Matta 23
23
Qqaren, ur xeddmen
(Mq 12.38-40; Lq 11.39-52; 20.45-47)
1Imiren Yasuɛ inṭeq ɣer lɣaci d inelmaden-is yenna-yasen :
2Imusnawen d ifariziyen yettunefk-asen ad slemden ṭawrat n Musa. 3Xedmet ayen akk ara wen-d-inin, meɛna ur xeddmet ara ayen xeddmen nutni, axaṭer ayen i d-qqaren ur t-xeddmen ara. 4Ttcuddun tiɛekkmin ẓẓayen ttɛebbin-tent ɣef tuyat n yimdanen, ma d nutni ttagin ad ten-ɛiwnen ula s yixf n iḍudan-nsen. 5Ayen akk i xeddmen, xeddmen-t i wakken ad ten-walin yimdanen, ssihriwen tiḥerztin-nsen, ssiɣzifen tiɣṛisin n llebsa-nsen. 6Ḥemmlen ad ṭṭfen imukan imezwura ama di tmeɣṛiwin ama di leǧwameɛ, ḥemmlen mi ara ttsellimen fell-asen yimdanen di tejmuyaɛ akked leswaq ; 7ḥemmlen daɣen mi ara sen-qqaren yimdanen : A sidi. 8Ma d kunwi ɣuṛ-wat ad wen-qqaren : A sidi axaṭer d atmaten i tellam yerna yiwen kan i d Ssid-nwen. 9Ur qqaret ula i yiwen di ddunit “Baba” axaṭer yiwen n Baba-twen kan i tesɛam, d win yellan deg igenwan. 10Ur qebblet ara ad tettusemmim : Imeqqranen axaṭer anagar yiwen i d ameqqran : D Lmasiḥ ! 11Ameqqran deg-wen, d win iqeddcen fell-awen. 12Kra n win issimɣuṛen iman-is ad d-irs, ma d win issimẓiyen iman-is ad ittwirfed !
13A nnger-nwen ay ifariziyen d imusnawen n ṭawrat, ay at sin wudmawen ! Axaṭer tmeddlem tagelda n igenwan i yimdanen, ur tkeččmem kunwi, ur tettaǧǧam ad kecmen wid yebɣan !
14A nnger-nwen ay ifariziyen d imusnawen n ṭawrat, ay at sin wudmawen ! Axaṭer tettettem ayla n tuǧǧal, tesṭuqqutem awal di tẓallit-nwen i wakken ad d-tesbeggnem iman-nwen telham. Ɣef wayagi, lɛiqab i kkun-ittṛaǧun d ameqqran !
15A nnger-nwen ay ifariziyen d imusnawen n ṭawrat, ay at sin udmawen ! Tettnadim timura, tzeggrem ilellen i wakken ad d-trebḥem ɣas ula d yiwen ɣer ddin i tettabaɛem ; mi t-id-ternam ɣuṛ-wen, tettarram-t d win yuklalen ǧahennama akteṛ-nwen !
16A nnger-nwen ay iderɣalen yeṭṭfen afus i wiyaḍ ! Teqqarem : Ma yeggull wemdan s ufakan, ɣas iḥnet ulac fell-as ; ma d win ara iggallen s uṛeɣ yellan deg ufakan, ur as-ilaq ara ad iḥnet, ilaq ad iṭṭef di limin-ines ! 17Ay imehbal, ay iderɣalen ! D acu i yesɛan azal, d uṛeɣ neɣ d afakan i yettarran uṛeɣ-nni yettwaqeddes ? 18Teqqarem daɣen : Win ara iggallen s udebder n iseflawen, ɣas iḥnet ulac fell-as, ma d win ara iggallen s lweɛda yellan ɣef udebder-nni, ur as-ilaq ara ad iḥnet, ilaq ad iṭṭef di limin-ines. 19Ay iderɣalen ! Anwa i yesɛan azal, d lweɛda neɣ d adebder i yerran lweɛda-nni tettwaqeddes ? 20Win ara iggallen s udebder n iseflawen, iggull s udebder-nni d wayen akk yersen fell-as. 21Win ara iggallen s ufakan, iggull s ufakan akked Win i yellan deg-s. 22Win ara iggallen s igenwan, iggull s ukersi n tgeldit n Yillu akked Win yeqqimen fell-as.
23A nnger-nwen ay ifariziyen d imusnawen n ṭawrat, ay at sin wudmawen ! Tettakem leɛcuṛ ɣef nneɛneɛ, abesbas d lkemmun, lameɛna tettaǧǧam ɣer deffir ayen akk yesɛan azal di ṭawrat : Lḥeqq, ṛṛeḥma d laman ; d annect-agi i ilaq ad t-txedmem mebla ma terram di rrif ayen nniḍen. 24Ay iderɣalen iteṭṭfen afus i wiyaḍ ! Tettṣeffim tissit-nwen seg izi, meɛna tesseblaɛem alɣem.
25A nnger-nwen ay ifariziyen d imusnawen n ṭawrat, ay at sin wudmawen ! Axaṭer tessizdigem taqbuct d uḍebsi s ufella, meɛna ɣer daxel-nsen ččuṛen d tukeṛdiwin d ṭṭmeɛ. 26Ay afarizi aderɣal ! Ssizdeg uqbel daxel n teqbuct d uḍebsi, i wakken ula s ufella-nsen ad izdigen !
27A nnger-nwen ay ifariziyen d imusnawen n ṭawrat, ay at sin wudmawen ! Tettemcabim ɣer iẓekwan isebɣen s lǧir ; s ufella cebḥen, ɣer daxel ččuṛen d iɣsan n lmeyytin d rekku. 28Akka ula d kunwi, tettbegginem-d iman-nwen telham ɣer yimdanen, lameɛna zdaxel teččuṛem d leɣruṛ d cceṛ.
29A nnger-nwen ay ifariziyen d imusnawen n ṭawrat, ay at sin wudmawen ! Tbennum iẓekwan n lanbiya, tettcebbiḥem iẓekwan n wid iḍuɛen Illu, 30teqqarem lemmer i nɛac di zzman n lejdud-nneɣ, tili ur neqbil ara ad ntekki yid-sen deg usizzel n idammen n lanbiya. 31S wakka tettcehhidem d akken kunwi d tarwa n wid ineqqen lanbiya 32yerna kunwi tettkemmilem ayen xedmen lejdud-nwen ! 33A ccetla n izerman ! Amek ara tmenɛem si lɛiqab n ǧahennama ? 34Daymi ara wen-d-ceggɛeɣ lanbiya, ukyisen akked imusnawen n ṭawrat. Kra deg-sen ad ten-tenɣem, kra ad ten-tsemmṛem ɣef umidag, kra nniḍen ad ten-tejlekḍem di leǧwameɛ-nwen yerna ad ten-tqehhṛem si temdint ɣer tayeḍ. 35S wakka, idammen n iḥeqqiyen yuzzlen di lqaɛa, si Habil aḥeqqi mmi-s n Adem armi d Zakariya mmi-s n Birikya, i tenɣam gar ufakan akked udebder n iseflawen, ad d-uɣalen ɣer yiri-nwen. 36Ad wen-d-iniɣ tidett : Ayagi meṛṛa ad d-iɣli ɣef lǧil-agi !
37A tamdint n Urucalim ! A tamdint n Urucalim ineqqen lanbiya, ireǧǧmen wid i am-d-ittuceggɛen sɣuṛ Yillu, acḥal n tikkal i bɣiɣ ad d-jemɛeɣ arraw-im akken tjemmeɛ tyaziṭ ifṛax-is ddaw wafriwen-is, meɛna teggumaḍ ! 38Ihi atan wexxam-im ad ixlu ! 39Axaṭer aql-i ad wen-iniɣ : Ur tettuɣalem ara ad iyi-twalim, alamma d ass i deg ara tinim : Ittubarek win i d-yusan s yisem n Umeɣlal#23.39 Walit Ihellilen 118.26. !
Currently Selected:
Matta 23: TiIq
Highlight
Copy
Compare
Share
Want to have your highlights saved across all your devices? Sign up or sign in
Bible en kabyle © Alliance biblique universelle, 2024.
Le travail de traduction, réalisé principalement en Algérie entre 1992 et 2024, a été effectué par l’Association Chrétienne d’Expression Berbère (ACEB) avec le soutien de l’Alliance biblique universelle.