Stira 2
2
Stira tuɣal d tagellidt
1Kra lweqt mbeɛd yersa wurrif n ugellid Ḥacwir. Yemmekta-d ayen texdem Wacti akked lqanun i d-yeffɣen mgal-is. 2Iqeddacen yezgan ɣer tama-s nnan-as : Ad d-nqelleb i ugellid tilemẓiyin tiɛezriyin icebḥen. 3Sbedd ay agellid imḍebbren di yal tamnaṭ n tgelda-inek, ad d-jemɛen akk tilemẓiyin tiɛezriyin icebḥen, ad tent-id-awin ɣer wexxam n tlawin deg leḥṣin n Cucan, ɣer ufus n Hiǧay amhal n ugellid, imḍebber ɣef wexxam n tlawin ; ad d-yelhi s yis-sent, ad sent-id-awin akk dduzan d zzyutat n ucebbeḥ. 4Tilemẓit ara ak-iɛeǧben ad tuɣal d tagellidt deg umkan n Wacti. Ṛṛay-agi yeɛǧeb i ugellid, dɣa yexdem akken.
5Yella deg leḥṣin n Cucan yiwen wergaz d ayahudi isem-is Murdaxay, d mmi-s n Yair mmi-s n Camɛi mmi-s n Qays, n wedrum n Benyamin. 6Yella gar wid i d-isnejla Nabuxadnaṣar agellid n Babil si Urucalim akked Yakunya agellid n Yahuda. 7Murdaxay iṛebba-d yelli-s ɛemmi-s Hadasa iwumi qqaren daɣen Stira, axaṭer tella d tagujilt, la baba-s la yemma-s ; d taqcict i cebḥen nezzeh.
8Mi yettwaberreḥ lameṛ n ugellid, jemɛen-d aṭas n tlemẓiyin ɣer leḥṣin n Cucan, tella gar-asent Stira. Wwin-tt akked tlemẓiyin nniḍen ɣer uɣṛem n ugellid, ɣer ufus n Hiǧay imḍebber n wexxam n tlawin. 9Teɛǧeb-as aṭas i Hiǧay yerna tufa lemziya ɣuṛ-s. Imiren kan yefka-yas dduzan n ucebbeḥ akked lqut i as-ilaqen, yextaṛ-as-d sebɛa tqeddacin deg wexxam n ugellid, yerna ifka-yas i nettat d tqeddacin-is tamezduɣt ifazen akk deg wexxam n tlawin. 10Ur d-tbeggen ara Stira d akken laṣel-is n Yahuda, axaṭer yugi-yas Murdaxay ad d-tini. 11Yal ass ittṛuḥ Murdaxay ɣer zdat wexxam n tlawin i wakken ad iẓer amek tettili Stira d wamek i as-teḍra.
12Tilemẓiyin-nni ttṛuḥunt s nnuba ɣer ugellid Ḥacwir, lameɛna ilaq ad heggint qbel iman-nsent azal n useggas akken tella lɛadda n tlawin. Setta wagguren imezwura ilaq ad ttwidehnent s zzit n uriḥan, setta wagguren nniḍen ad xeddment zzyutat n leɛṭer akked mkul ṣṣenf n ttawilat i zzin n tlawin. 13Mi ara d-tas nnuba n yiwet deg-sent akken ad tṛuḥ ɣer ugellid, tezmer ad tawi yid-s ayen akk ara tessuter seg wexxam n tlawin. 14Tameddit ad tṛuḥ ɣer ugellid, azekka-nni ṣṣbeḥ ad tt-awin ɣer wexxam nniḍen n tlawin, i ɣef yettɛassa umhal Caɛazɣaz, amḍebbeṛ n wexxam n tlawin n ugellid. Ur tettuɣal ara ɣer ugellid anagar ma yebɣa netta yerna yessawel-as-d s yisem-is.
15Mi d-tewweḍ nnuba n Stira, yelli-s n Abiḥayil ɛemmi-s n Murdaxay i tt-iṛebban, i wakken ad tṛuḥ ɣer ugellid, ur tessuter ad tawi yid-s acemma, anagar ayen i as-yenna Hiǧay amhal n ugellid, aɛessas n tlawin. Win ara iwalin Stira ad as-teɛǧeb. 16Wwin Stira ɣer uɣṛem n ugellid Ḥacwir deg waggur wis ɛecṛa, aggur n Ṭibit, deg useggas wis sebɛa n tgeldit-is. 17Agellid iḥemmel Stira nnig akk n tlawin nniḍen, tufa ɣuṛ-s lemziya d leḥnana ugar akk n tlemẓiyin nniḍen ; yessers taɛeṣṣabt tageldant ɣef uqerruy-is dɣa yesbedd-itt d tagellidt deg umkan n Wacti. 18Yexdem tameɣṛa d tameqqrant ɣef ddemma n Stira, iɛreḍ-d meṛṛa ineɣlafen-is d imḍebbren-is. Yefka asteɛfu i yimezdaɣ akk n tmura yerna yefṛeq tirezfin mebla ceḥḥa. 19Mi d-jemɛen tilemẓiyin i tikkelt tis snat, yella Murdaxay d aɛessas ɣer tewwurt n uɣṛem n ugellid. 20Stira ur d-tenni acemma ɣef laṣel n twacult-is, akken i as-tt-yumeṛ Murdaxay ; Stira tuɣ-as awal am wasmi tella seddaw n leɛnaya-s.
21Yiwen wass yella Murdaxay yettɛassa zdat n uɣṛem n ugellid. Biɣtan d Tarac sin yiɛessasen n yixxamen n ugellid mcawaṛen ad nɣen agellid Ḥacwir axaṭer rfan fell-as. 22Yesla Murdaxay s wayagi, dɣa ixebbeṛ tagellidt Stira, nettat txebbeṛ agellid s wayen i as-d-yenna Murdaxay. 23Mi nudan ɣef temsalt ufan d akken d tidett. Ɛellqen sin-nni n iqeddacen ɣer wesɣaṛ. Jerrden taluft-agi zdat n ugellid, deg wedlis n umezruy n tgelda.
Currently Selected:
Stira 2: TiIq
Highlight
Copy
Compare
Share
Want to have your highlights saved across all your devices? Sign up or sign in
Bible en kabyle © Alliance biblique universelle, 2024.
Le travail de traduction, réalisé principalement en Algérie entre 1992 et 2024, a été effectué par l’Association Chrétienne d’Expression Berbère (ACEB) avec le soutien de l’Alliance biblique universelle.