Lecɣal n Imceggɛen 4
4
Buṭrus d Yuḥenna zdat n useqqamu n ccṛeɛ
1Buṭrus d Yuḥenna mazal-iten heddṛen i lɣaci mi d-wwḍen kra n imseflen, idda-d yid-sen umeqqran n iɛessasen n ufakan akked kra n yirgazen si tejmaɛt n isaduqiyen. 2Zeɛfen mi walan imceggɛen sselmaden lɣaci yerna ttbecciṛen ḥeggu n lmeyytin di Yasuɛ. 3Ṭṭfen-ten, rran-ten ɣer lḥebs armi d azekka-nni axaṭer imiren iɣli-d yiḍ. 4Lameɛna aṭas seg wid yeslan i wawal, umnen. Ad ilin azal n xemsa alaf n yimdanen i yumnen.
5Azekka-nni, lḥekkam, imṛayen akked imusnawen n ṭawrat yellan di temdint n Urucalim, nnejmaɛen. 6Yella umesfel ameqqran Ḥannan, Kayif, Yuḥenna, Alixandru, d iɛeggalen meṛṛa n twaculin n imseflen imeqqranen. 7Wwin-d Buṭrus d Yuḥenna, sbedden-ten di tlemmast-nsen akken ad ten-beḥten, qqaren-asen : Ansi i wen-d-tekka tezmert-agi, anwa isem s wayes i tneddhem armi txedmem ayagi ?
8Dɣa Buṭrus yeččuṛen d Ṛṛuḥ imqeddes, yenna-yasen :
9A lḥekkam d imṛayen n wat Isṛail ! Imi ɣef lxir i nexdem i wergaz-agi aɛiban d wamek i yeḥla i aɣ-d-testeqsayem ass-agi, 10ilaq ad teẓrem kunwi d wat Isṛail meṛṛa, d akken s yisem n Yasuɛ Lmasiḥ Anaṣari, win akken i tsemmṛem ɣef umidag, win akken i d-isseḥya Yillu si gar lmeyytin, s tezmert-is i ibedd wergaz-agi tura zdat-wen iḥla. 11D netta i ɣef d-nnant Tira Iqedsen :
D aẓru-nni i tḍeggrem kunwi ay ibennayen,
i yuɣalen d aẓru i yeṭṭfen lebni # 4.11 Walit
Ihellilen
118.22 ; Icaɛya 28.16 ; Matta 21.42..
12Deg-s i yella leslak ; ulac di ddunit meṛṛa isem nniḍen s wayes i nezmer ad nettusellek.
13Mi walan d akken Buṭrus d Yuḥenna heddṛen s laman mebla akukru, wehmen axaṭer ẓran d imdanen ur neɣri ara ; ɛeqlen-ten seg wid yeddan d Yasuɛ. 14Lameɛna imi walan argaz-nni yeḥlan ibedd zdat-sen, ur ufin d acu ara d-inin. 15Umṛen-ten ad ffɣen seg useqqamu n ccṛeɛ i wakken ad mcawaṛen wway gar-asen, 16nnan : D acu ara nexdem s yimdanen-agi ? Imezdaɣ n temdint n Urucalim akk wwin-d s lexbeṛ d akken xedmen lbeṛhan yerna d tidett ur nezmir ara ad nenkeṛ ayagi. 17Lameɛna i wakken ur iteffeɣ ara lexbeṛ-agi gar lɣaci, ad neggall deg-sen ur ttuɣalen ara ad mmeslayen ula i yiwen s yisem-agi. 18Uɣalen ssawlen-asen, ggullen deg-sen i wakken ur ttuɣalen ara ad mmeslayen neɣ ad slemden s yisem-agi n Yasuɛ. 19Lameɛna Buṭrus d Yuḥenna nnan-asen : D acu i d lḥeqq zdat Yillu, ad wen-naɣ awal i kunwi neɣ ad naɣ awal i Yillu ? 20Walit s yiman-nwen ! Nekni ur nezmir ara ad nessusem ɣef wayen neẓra d wayen nesla. 21Rnan ggullen deg-sen, lameɛna serrḥen-asen imi ur ufin ara sebba s wayes ara ten-ɛaqben, yerna lɣaci akk ttḥemmiden Illu ɣef wayen yeḍran, 22axaṭer argaz-agi i yeḥlan s lbeṛhan di leɛmeṛ-is akteṛ n ṛebɛin yiseggasen.
Tajmaɛt n watmaten teḥmed Illu
23Mi sen-serrḥen, ṛuḥen ɣer watmaten, ḥkan-asen akk ayen i sen-d-nnan imseflen imeqqranen d imṛayen. 24Mi slan watmaten-nni i wayen i d-yenna Buṭrus, akken ma llan neddhen s yiwet n taɣect ɣer Yillu nnan : Ay Ameɣlal, kečč i ixelqen igenni, lqaɛa, ilel d wayen akk yellan. 25D kečč i d-ineṭqen s Ṛṛuḥ-ik imqeddes seg yimi n jeddi-tneɣ Dawed aqeddac-ik, mi d-yenna :
Acuɣer ccwal-agi gar leǧnas,
acuɣer igduden ggaren-d anagar yir ixemmimen ?
26 Igelliden n ddunit heggan iman-nsen,
imeqqranen dduklen akk,
ffɣen-d d iɛdawen n Umeɣlal akked Lmasiḥ-ines # 4.26 Walit
Ihellilen 2.1-2. .
27Axaṭer d tidett, di temdint-agi, Hirudus d Bilaṭus mcawaṛen, dduklen nutni d ibeṛṛaniyen akked wat Isṛail, uɣalen d iɛdawen n Yasuɛ, aqeddac-ik imqeddes i textaṛeḍ#4.27 Neɣ : Lmasiḥ.. 28Ayen akka xedmen, d ayen akken i tqesdeḍ keččini di lebɣi-inek, s tezmert-ik, si zik. 29I tura, ay Ameɣlal, wali-d amek akka i aɣ-ssagaden ; efk-aɣ-d ay Ameɣlal tazmert s wayes ara nbecceṛ awal-ik s ṭṭmana mebla akukru. 30Ssers-d afus-ik i wakken ad ḥlun imuḍan, i wakken ad d-ilint licaṛat d lbeṛhanat s yisem n Yasuɛ aqeddac-ik imqeddes.
31Mi fukken taẓallit, amkan-nni anda nnejmaɛen irgagi ; ččuṛen akk s Ṛṛuḥ imqeddes, bdan ttbecciṛen awal n Yillu s ṭṭmana mebla tuggdi.
Atmaten beṭṭun wway gar-asen ayen sɛan
32Wid akk yumnen s Lmasiḥ, dduklen akk s yiwen n wul, s yiwen n ṛṛuḥ, ula d yiwen deg-sen ur iḥsib ayen yesɛa d ayla-s i yiman-is kan, meɛna cerken kullec wway gar-asen. 33Imceggɛen ttcehhiden-d ɣef ḥeggu n Yasuɛ s tezmert tameqqrant yerna ṛṛeḥma n Yillu txeddem deg-sen s lǧehd. 34Yiwen deg-sen ur ixuṣṣ di kra ; axaṭer wid akk yesɛan tiferkiwin neɣ ixxamen znuzun-ten, ttawin-d idrimen n wayen i zzenzen, 35ttaken-ten i yimceggɛen, nutni feṛṛqen-ten i mkul yiwen ɣef leḥsab n wakken yeḥwaǧ.
36Yusef yellan n wat Lawi iwumi semman imceggɛen Barnabas, (yeɛni argaz inehhun) i ilulen di tegzirt n Qubṛus, 37yesɛa yiwet n tferka, izzenz-itt, iwwi-d idrimen-nni, yefka-ten i yimceggɛen.
Currently Selected:
Lecɣal n Imceggɛen 4: TiIq
Highlight
Copy
Compare
Share
Want to have your highlights saved across all your devices? Sign up or sign in
Bible en kabyle © Alliance biblique universelle, 2024.
Le travail de traduction, réalisé principalement en Algérie entre 1992 et 2024, a été effectué par l’Association Chrétienne d’Expression Berbère (ACEB) avec le soutien de l’Alliance biblique universelle.