Lecɣal n Imceggɛen 3
3
Ḥellu n yiwen uqudaṛ
1Ad tili d lejwahi n tlata n tmeddit, Buṭrus d Yuḥenna dduklen, ulin ɣer ufakan i wakken ad ẓẓallen.
2Ttawin-d mkul ass yiwen n wergaz i d-ilulen d aqudaṛ ɣer tewwurt n ufakan, tin iwumi qqaren tawwurt tucbiḥt ; ittɣimi dinna i wakken ad issuter tin n Ṛebbi i wid i ikeččmen ɣer ufakan. 3Mi iwala Buṭrus d Yuḥenna tteddun ad kecmen, issuter-asen tin n Ṛebbi. 4Buṭrus d Yuḥenna, reṣṣan allen-nsen fell-as, nnan-as : Muqel-d ɣuṛ-neɣ ! 5Imuqel-iten wergaz-nni, iḍmeɛ deg-sen ad as-d-fken kra. 6Dɣa yenna-yas Buṭrus : Ur sɛiɣ uṛeɣ ur sɛiɣ lfeṭṭa, lameɛna ayen sɛiɣ ad ak-t-fkeɣ : S yisem n Yasuɛ Lmasiḥ Anaṣari, kker telḥuḍ ! 7Iṭṭef-it-id seg ufus ayeffus, issker-it-id. Imiren kan ḥlan iḍarren-is d tkeɛburin n iḍarren-is. 8Ibedd ɣef yiḍarren-is, ineggez, ibda ileḥḥu. Ikcem yid-sen ɣer ufakan, ileḥḥu ittjellib, ittḥemmid Illu.
9Lɣaci akk walan-t mi ileḥḥu ittḥemmid Illu. 10Mi t-ɛeqlen qqaren : Mačči d win akken ittɣimin ɣer “tewwurt tucbiḥt” n ufakan win akken issuturen tin n Ṛebbi ? Dehcen meṛṛa, wehmen deg wayen iḍran yid-s. 11Argaz-nni iteddu d Buṭrus akked Yuḥenna, ur iṭṭixiṛ ara fell-asen, lɣaci-nni meṛṛa wehmen, uzzlen-d ɣuṛ-sen ɣer usqif iwumi qqaren Asqif n Sliman.
Ameslay n Buṭrus ɣef lbeṛhan
12Mi iwala Buṭrus ayagi, yenṭeq ɣer lɣaci yenna : Ay at Isṛail, acuɣer akka twehmem deg wayen iḍran ? Acuɣer i d-ttmuqulem ɣuṛ-neɣ, am akken d nekni i yesselḥan argaz-agi s tezmert-nneɣ neɣ s ṭṭaɛa-nneɣ ? 13D Illu n Ibrahim, n Isḥaq d Yaɛqub, Illu n lejdud-nneɣ, d netta i d-isbeggnen lɛaḍima n Yasuɛ aqeddac-is, win akken i tnekṛem, i tsellmem i lḥakem Bilaṭus#3.13 Walit Matta 27.2 akked tezmilt. i yebɣan ad as-d-iserreḥ. 14Kunwi tnekṛem Imqeddes, Aḥeqqi ; tessutrem ad d-serrḥen i bu tmegṛaḍ deg umkan-is. 15Tenɣam agellid n tudert, meɛna Illu yesseḥya-t-id si gar lmeyytin, aql-aɣ d inagan. 16D tazmert yellan deg isem n Yasuɛ i d-yerran lǧehd i wergaz-agi i tettwalim, yerna tessnem-t. D Yasuɛ s wayes numen i t-isseḥlan zdat-wen meṛṛa.
17Ay atmaten, ẓriɣ s lqella n lefhama i txedmem annect-nni, am kunwi am imeqqranen-nwen. 18Meɛna s wakka i yesnekmal Yillu ayen i d-yenna si zik seg imawen n lanbiya#3.18 Walit Ihellilen 22 ; Icaɛya 53. meṛṛa : Yenna-d d akken Lmasiḥ-ines ad inneɛtab.
19Tubet ihi, beddlet tikli i wakken ad ttwimḥun ddnubat-nwen, 20i wakken ad kkun-id-asen wussan n usteɛfu sɣuṛ Umeɣlal, ad wen-d-iceggeɛ Yasuɛ Lmasiḥ, win akken i wen-ihegga. 21Tura atan deg igenni alamma yusa-d lweqt i deg ara tuɣal txelqit meṛṛa d tamaynut, akken i t-id-yenna Yillu si zik seg imawen n lanbiya. 22Musa yenna i wat Isṛail : “Ameɣlal Illu-nwen ad wen-d-iceggeɛ si gar watmaten-nwen, yiwen n nnbi am nekk, ad as-tḥessem deg wayen akk ara wen-d-yini. 23Kra n win ur nettḥessis ara i nnbi-yagi, ad ittwikkes si ddunit gar watmaten-is#3.23 Walit Asmekti 18.18-19..” 24Lanbiya meṛṛa, si zzman n nnbi Ṣamwil d wid meṛṛa i d-irnan deffir-s, caren-d daɣen ɣef ussan-agi i deg nettɛici. 25D kunwi i d arraw n lanbiya, i d arraw n temsisit i yexdem Yillu d lejdud-nneɣ, mi as-yenna i Ibrahim : S dderya n dderya-k ara barkeɣ tiwaculin meṛṛa n ddunit#3.25 Amezruy n talsa 22.18.. 26I kunwi d imezwura iwumi d-iceggeɛ Yillu aqeddac-is, isseḥya-t-id i wakken ad kkun-ibarek yerna ad issebɛed mkul yiwen deg-wen seg yir lecɣal-is.
Currently Selected:
Lecɣal n Imceggɛen 3: TiIq
Highlight
Copy
Compare
Share
Want to have your highlights saved across all your devices? Sign up or sign in
Bible en kabyle © Alliance biblique universelle, 2024.
Le travail de traduction, réalisé principalement en Algérie entre 1992 et 2024, a été effectué par l’Association Chrétienne d’Expression Berbère (ACEB) avec le soutien de l’Alliance biblique universelle.