1 Amurǝm 6
6
Solomon ɓak ɓala mala Yahweh a Urǝshalima
1Anzǝm apǝlǝa gbǝman-ine nǝ lumi-tongno-nong-tàrú (480) mǝnana amǝ Isǝrayila purnǝì nzali Masar, a inea pǝlǝa mala do-bunomurǝm mala Solomon amur amǝ Isǝrayila, a ɓaria zongŋo, zongŋo Ziv ka, Solomon tita túró mala ɓak ɓala mala Yahweh. 2Ɓala mǝnana Murǝm Solomon ɓakkî Yahweh ka, sauwa male ka ɓakusǝu lumi-tongno-nong-ine (90) na, tangŋa male ka ɓakusǝu lumi-tàrú (30) na, sǝ dāh'rya male ka ɓakusǝu lumi-ine-bwamdǝ-tongno (45) na. 3Sauwa mala Jamloro mǝnana sarǝa a ɓadǝm, sǝ karǝa arǝ sauwa mala ban-mǝfele mala ɓalae ka, ɓakusǝu lumi-tàrú (30) na. Sǝ tangŋa male mǝnana purî ɓadǝm Ban-mǝfele ka ɓakusǝu lum-bwamdǝ-tongno (15) na. 4Pàk amǝsǝkurǝm mǝɓweari mǝnana à eau-kam a kuli arǝ bumkurǝm mala ɓalae ka. 5Nongsǝ kusǝɓa mǝtangŋe mǝnana kàrìban kat ka, arǝ abumkurǝm mala ankanggariban mala Ban-mǝfele andǝ nzǝm Ban Nggea-mǝfele, sǝ ɓakki akurǝm-giriban amurí kàrìban. 6Tangŋa mala akurǝm mǝnana a nzali ka, ɓakusǝu tongno-nong-ɓari nǝ gauwa-tsùrú (7 ½) na; tangŋa mala akurǝm-kuli mǝnana amur amǝnana a nzali ka, ɓakusǝu tongno-nong-ine (9) na, sǝ akurǝm-kuli mǝnana à masǝlǝa a kuli ka, tangŋa malea na ɓakusǝu lum nǝ gauwa-tsùrú (10 ½). Nying abân pa gbasha à kàrìban a nza arǝ bumkurǝm mala ɓalae ace mǝnana anggun-gbasha mana à tamsǝkia ace pa gbasha arǝ akurǝm-kuli ka ɓǝa kǝa kutiki arǝ abumkurǝm mala ɓalae ɗàng.
7Lang à ndarǝ ɓak ɓalae ka, kǝ atali mǝnana à gilǝkinarǝia a ban mǝnana à ɓunnia kàm ngga, nda à pàngŋǝ̀nà-túró nǝia ka; à ok ɓekǝ gi ndolo, ko bero, ko mala ɓekǝ girtúró mala bolo-candǝa aɓa ɓalae lang à ndarǝ ɓe ka ɗàng.#6:7 Sǝni gbal aɓa: 1Amur 5:17.
8Bankutio aban ká aɓa kurǝm-nzali ka, nda atà bu-mǝli mala ɓalae; njar ban-eauwe mǝpurǝke na kam aɓalǝi mǝnana à nǝ̀ eau nǝi aban ká a kurǝm-kuli mǝnana a tsùrú ka, sǝ lo akano a kurǝm-kuli mǝnana a tsùrú ka, ɓè na kam ace eauwe aban ká a masǝlǝata kurǝm-kuli mǝnana a ɓongban ngga. 9Anggo sǝ Solomon ɓak ɓalae sǝ mali; sǝ gìr múrí nǝ agbǝlang andǝ akpamgbang mala nggun-seda. 10Dāh'rya mala koya kurǝm [andǝ kurǝm-kuli] mǝno ɓakkia ka, ɓakusǝu tongno-nong-ɓari nǝ gauwa-tsùrú (7 ½) na; sǝ kpapikia arǝ ɓalae nǝ agbǝlang nggun-seda.
11Pǝlǝa cau mala Yahweh yiu aban Solomon ama, 12<<Amur cau mala ɓala mǝnia a kǝ ɓè ka, ɓǝ̀ awu nǝ kpata anê mem, awu nǝ gya aɓalǝ anggurcau mem sǝ awu nǝ dum nǝ okiru arǝ anzongcau mem kat ka, mǝ nǝ lùmsǝ pacau mem a bano, yì pacau mǝnana ǝn pa aban tárró Dauda ka. 13Mǝ nǝ do aɓalǝ amǝ Isǝrayila sǝ pà mǝ nǝ pǝlǝ nzǝmam arǝ aɓwana mem Isǝrayila ɗàng.>>#6:13 Ɓalli gbal aɓa: Pur 25:8; Nggur 31:6,8; Jes 1:5.
14Nda Solomon ɓak ɓalae sǝ mali ka. 15Tsǝki akpamgbang mala nggun-seda a nkanggariarǝia à gìr abumkurǝm andǝ nkigir mala ɓalae nǝ ɓalǝu; sǝ a nzali a ɓakurǝm ngga nongsǝki akpamgbang mala nggun-sapǝre. 16Twal arǝ bumkurǝm mala nzǝmban nǝ ɓá ɓalae ka, kasǝ banfana ɓakusǝu lumi-tàrú (30), sǝ kàrì nǝ atsarkan mala akpamgbang nggun-seda, lo a nzali kya bik ban nkigir; ɓak mǝnia ka ace mǝnana ɓǝ̀ duk ban-mǝfele mǝ'ɓaɓalǝuî, yì Ban Nggea-mǝfele. 17A ɓadǝm Ban Nggea-mǝfele mǝnia ka, nda Ban-mǝfele. Sauwa male ka ɓakusǝu lumi-tongno-nong-mwashat (60) na. 18Abumkurǝm mala ɓá ɓalae ka, à gìria kat nǝ akpamgbang mala nggun-seda; kǝ tali pa kàm mǝnana à nyì lǝmdǝ ka ɗàng. Sǝ arǝ akpamgbang mala nggun-seda mǝnia aɓa ɓalae ka, à shàr pǎ mala afufe andǝ apwasǝo-bondo.
19Solomon gilǝki ban aɓa Ban Nggea-mǝfele, ace tsǝk Akwati Kùrcau mala Yahweh kàm. 20A ɓadǝm Ban Nggea-mǝfele ka, gyangŋan mala nggun-seda na kam. Sauwa mala Ban Nggea-mǝfele ka karǝa andǝ tangŋa andǝ dāh'rya male, sǝ ɓakusǝu lumi-tàrú (30) na. Solomon tasǝ ɓālǝi nǝ bolo-njengǝlan mǝɓoarne. 21Solomon tasǝ cili ɓá ɓalae nǝ bolo-njengǝlan mǝɓoarne, sǝ pàk ansolo bolo-njengǝlan ace gbàr bankutio aɓa Ban Nggea-mǝfele, sǝ tasǝ ɓālǝi nǝ bolo-njengǝlan. 22Tasǝ ɓá ɓalae puppup nǝ bolo-njengǝlan she lang gìrnì kat-kat ka; sǝ gyangŋan mǝnana a ɓadǝm Ban Nggea-mǝfele ka, tasǝ rǝi kat nǝ bolo-njengǝlan.
23Aɓa Ban Nggea-mǝfele ka, tsǝk aɓǝ̀nzál mala acerup ɓari mǝnana à shària nǝ nggun olif ka; dāh'rya mala komǝye atea ka ɓakusǝu lum-bwamdǝ-tongno (15) na. 24Sauwa mala nkpamtari cerup ka, ɓakusǝu tongno-nong-ɓari nǝ gauwa-tsùrú (7 ½) na, sǝ sauwa mala ɓè nkpamtari cerup ka, ɓakusǝu tongno-nong-ɓari nǝ gauwa-tsùrú (7 ½) na. Sǝ mǝnna mala ankpamtari cerup ka ɓakusǝu lum-bwamdǝ-tongno na. 25Anggo gbal, mǝnna mala ankpamtari ɓaria cerup ka ɓakusǝu lum-bwamdǝ-tongno na; acerup mǝnia ɓari ka à kārǝ́ gǝ̀rgǝ̀r a gulo malea andǝ nggunrǝia, 26sǝ dāh'rya mala komǝye atea ka ɓakusǝu lum-bwamdǝ-tongno na. 27Tamsǝ acerup mǝnia ka à came a nkanggariarǝia aɓa Ban Nggea-mǝfele, ankpamtaria mǝnna. Nkpamtari mwashat mala cerup man mwashat ka mǝnna je rǝ bumkurǝm a bu-mǝli, sǝ nkpamtari mwashat mala ɓè cerup ka mǝnna je rǝ bumkurǝm a bu-mǝnggare, sǝ ɓaria nkpamtari koya cerup ka mǝnna je mala ɓì a tsùrú; 28Solomon tasǝ rǝ acerup mǝnia ka nǝ bolo-njengǝlan.
29Abumkurǝm mala akurǝm mǝnia ɓari, yì Ban-mǝfele andǝ Ban Nggea-mǝfele ka, à mbàkì rǝia kat nǝ acerup, andǝ anggun-nkangga andǝ apwasǝo-bondo mǝnana à shària ka. 30Tasǝ ɓālǝ-akurǝm mala ɓalae nǝ bolo-njengǝlan, yì ɓālǝ Ban-mǝfele andǝ ɓālǝ Ban Nggea-mǝfele yia kǝm. 31Ace bankutio aɓa Ban Nggea-mǝfele ka, à pàk alǝpikúnkurǝm, nǝ nggun olif, sǝ tangŋa mala anggun-kun'ndá andǝ múr-kun'ndá ka gauwe mwashat aɓa gauwe tongno mala tangŋa mala Ban-mǝfele na. 32Alǝpikúnkurǝm mǝnia à pea nǝ nggun olif ka, à mbàkì rǝia nǝ acerup, andǝ anggun-nkangga andǝ apwasǝo-bondo mǝnana à shària ka; sǝ acerup, andǝ anggun-nkangga andǝ apwasǝo-bondo ka, à gìr múrià nǝ bolo-njengǝlan mǝnana à walki ka. 33Bankutio aɓa Ban-mǝfele gbal ka pàkki wi anggun-kun'ndá nǝ nggun olif, sǝ tangŋa male ka, gauwe mwashat aɓa gauwe ine mala tangŋa mala Ban-mǝfele na. 34Ɗǝm ngga pàk alǝpikúnkurǝm ɓari nǝ nggun-sapǝre, sǝ komǝye atea ka ndanǝ ambui ɓari mana à kǝ pǝlǝa aɓalǝ ankpako malea ka. 35Shàr acerup, andǝ anggun-nkangga andǝ apwasǝo-bondo arǝ alǝpikúnkurǝmì, sǝ tasǝ rǝia lǝkǝt-lǝkǝt nǝ bolo-njengǝlan.
36Sheran mala patal mǝɓalǝuî mala ɓalae ka ɓè nǝ anggea-tali mǝnana à ɓunnia ka, abwamdǝe tàrú amurǝarǝia, sǝ bwamdǝe mwashat mala agbǝlang nggun-seda.
37A inea pǝlǝa mala do-bunomurǝm mala Solomon, a zongŋo Ziv ka, à mal nongsǝ kusǝɓa mala ɓala mala Yahweh; 38sǝ à yi mal túró ɓak ɓalae kat, andǝ agir mǝnana kat à tsǝa aɓa nyoulǝa-pa male ka, a lum-nong-mwashatia pǝlǝa mala do-bunomurǝm mala Solomon, aɓa tongno-nong-tàruià zongŋo, zongŋo Bul. Twal Solomon apǝlǝa tongno-nong-ɓari sǝ mal ɓak ɓalae.
Currently Selected:
1 Amurǝm 6: mbu
Highlight
Copy
Compare
Share
Want to have your highlights saved across all your devices? Sign up or sign in
©️2022 The Seed Company
