1 Amurǝm 21
21
Jezebel wal-lú Nabot ace ɓaban-anap male
1Adyan ngga, Nabot ɓwa'Jezǝril ka ndanǝ ɓaban-anap a Jezǝril, a nkanggari ɓala mala Ahap murǝm Samariya. 2A ɓè pwari ka, Ahap ne Nabot ama, <<Pam ɓaban-anap mô, mǝ rik agir mbú kàm, acemǝnana ɓabanì na tù nǝban ɓala mem, sǝ mǝ nǝ po ɓè ɓaban-anap mǝnana kútì mǝno ka a kúnì. Sǝ ɓǝ̀ a kǝ earce ka, mǝ nǝ po boalo mǝnana karǝ arǝ gulo mala nzalî ka.>>
3Sǝ Nabot nyesǝi Ahap cau ama, <<Ɓǝ̀ Yahweh twalbani mǝnana mǝ po nzali liɓala mala akâ ka.>> 4Nda Ahap nyar a ɓala male nǝ bumkiɗikea andǝ bumlulla ace cau mǝnana Nabot ɓwa Jezǝril banggi wi ka, acemǝnana Nabot nani wi ama, <<Pa mǝ nǝ po nzali liɓala mala akâ ɗàng.>> Nda Ahap nongŋo amur gyangŋan-nongŋo male, pǝlǝ mǝsǝi nǝ rǝ kurǝm, sǝ ɓinǝ li girlina.
5Sǝama māmí Jezebel yiu abaní, sǝ ɗì ama, <<Palang sǝ banɓikio anggo, sǝ a ɓinǝ ligirlina?>> 6Ahap eari māmí ama, <<Nda acemǝnana ǝn banggi Nabot ɓwa'Jezǝril ama, <Makkam ɓaban-anap mô, ko ɓǝ̀ a kǝ earce ka, mǝ nǝ po ɓè ɓaban-anap a kúnì.> Sǝ yì ka banggam ama, <Pa mǝ nǝ po ɓaban-anap mem> ɗàng.>>
7Sǝ māmí Jezebel ne wi ama, <<A nda murǝm Isǝrayila re? Lo ligirlina, sǝ ɓǝ̀ banɓoaro. Mǝ nǝ po ɓaban-anap mala Nabot ɓwa'Jezǝril.>>
8Nda Jezebel gilǝ acautera nǝ lullǝ Ahap, sǝ tsǝk gbalmo parbu mala Ahap amur acautera nì, sǝ tasǝia aban aɓwana-mǝgule andǝ amǝgulo mǝnana à ndanǝdo a nggea-là mǝnana Nabot nakam ngga. 9Sǝ gilǝ aɓalǝ acautera nì ama, <<Wu tsǝk pwari gilmur, sǝ wu tunǝ kpapi mala aɓwana abanɓwáná. Wu pe Nabot bando aɓadǝmba aɓwe. 10Wu tsǝk #21:10 Ɓalli gbal aɓa: Nggur 13:13.amǝ'ɓealɓana ɓari a nkāɓe mala Nabot, sǝ ɓǝà tsǝki wi cau arǝì, ama, <A na mǝɓane#21:10 Ɓalli gbal aɓa: Pur 22:28; Pǝris 24:16. amur Ɓakuli andǝ murǝm.> Sǝ wu pusǝì, wu kya ɓukki nǝ atali ɓǝ̀ wǔ.>>
11Sǝ aburana mala nggea-là Jezǝril, yià aɓwana-mǝgule andǝ amǝgulo mǝnana à ndanǝdo a nggea-là mala Nabot ka, à pǎ kǝla mǝnana Jezebel gilǝia wia ka. Kǝla mǝnana à gilǝì aɓalǝ acautera mǝnana tasǝia wia ka, 12à tunǝ gilmur, sǝ à tsǝk Nabot aɓadǝmba aɓwe. 13Pǝlǝa amǝ'ɓealɓana ɓari yi do a nkāɓe Nabot. Amǝ'ɓealɓana mǝno yinǝ cau amurì a ɓadǝmba aɓwana, à bang ama, <<Nabot na mǝɓane amur Ɓakuli andǝ murǝm.>> Nda à pusǝì a nzǝm nggea-lê, sǝ à ɓukki nǝ atali wǔ ka. 14Pǝlǝa à tasǝî Jezebel cau ama, <<Nabot ka à ɓukkinì nǝ atali, wuna.>>
15Lang Jezebel ongŋǝna ama à ɓukkina Nabot nǝ atali sǝ wuna ka, Jezebel ne Ahap ama, <<Lo, kyane ak girkuma mala ɓaban-anap mala Nabot ɓwa'Jezǝril mǝnana ginǝ po a kúnì boalo ka, acemǝnana Nabot pà kàm nǝyilǝmu ɗǝm ɗàng, wuna.>> 16Lang Ahap ongŋǝna ama Nabot wuna ka, Ahap pǝlǝa lo sulǝ aban ká a ɓaban-anap mala Nabot ɓwa'Jezǝril, ace ak girkuma mala Nabot.
17Pǝlǝa cau mala Yahweh yiu aban Iliya ɓwa'Tishbe, ama, 18<<Lo, sulǝo kyane, kya kum Ahap murǝm Isǝrayila, mǝnana nda a Samariya ka; sǝni, yì ka, nda a ɓaban-anap mala Nabot, ban mǝnana wari ace ak girkuma mala Nabot ka. 19Awu nǝ banggi wi ama, <A walna ɓwa, sǝ a angŋǝna girkuma male?> Sǝ awu nǝ ne wi ama, Yahweh bang ama, <A ban mǝnana anva lenzǝki nkila Nabot ka, akǝ̀ banì sǝ anva nǝ̀ lenzǝki nkilio.> >>
20Lang Ahap sǝn Iliya ka, ɗì ama, <<A kumǝnam le, we ɓiamǝbura?>> Iliya eari wi ama, <<Ən kumǝno, acemǝnana a pana ɓamurò aban pàk gìr mǝnana mǝɓike na a mǝsǝ Yahweh ka. 21Sǝni, Yahweh bang ama, <Mǝ nǝ yinǝ gìr'mur'mwana amuro, sǝ mǝ nǝ kiɗikio kat-kat. Mǝ nǝ wal-luio, sǝ Mǝ nǝ wal-lú koya muna-ɓwabura mô mǝnana guro na andǝ mǝnana guro na raka a Isǝrayila. 22Mǝ nǝ tsǝk ɓala mò ɓǝ̀ pa kǝla ɓala mala Jerobuam muna-ɓwabura mala Nebat, sǝ kǝla ɓala mala Ba'asha muna-ɓwabura mala Ahija, acemǝnana a lulbumam, sǝ a tsǝ́ngŋǝ̀nà Isǝrayila pàngŋǝ̀nà cauɓikea. 23Sǝ amur Jezebel ka, anva nǝ̀ shak nyami a bân sheran mala Jezǝril.#21:23 a bân sheran mala Jezǝril Cau mǝnia nǝ kún Ibǝru ka, à bwalte ɗàng. #21:23 Ɓalli aɓa: 2Amur 9:10,30-37. 24Koyaɓwa a ɓala mala Ahap mǝnana nǝ̀ wù aɓa nggea-là ka, anva nǝ̀ shak ɓwe, sǝ koyaɓwa mǝnana wù a ɓabondo ka, anyal mǝnana a bumkuli ka nǝ̀ li ɓwê.> >>
25(Ɓè kǝɓwa pà kàm mǝnana pa ɓamurì arǝ pak ɓealɓikea a mǝsǝ Yahweh kǝla Ahap, mǝnana Jezebel soakite ka ɗàng. 26Ahap pàkki agir mǝɓike kǝ̀rkǝ́r. Peri aban ɓǝ̀nzál, kǝla mǝnana amǝ'Amor kǝ pàk ka, yià mǝnana Yahweh pǝria aɓadǝm amǝ'Isǝrayila ka.)
Pwanzali mala Ahap
27Lang Ahap ok acau man a kún Iliya ka, san daura male sǝ túr nggubyau-bumkiɗikea#21:27 nggubyau-bumkiɗikea ko <<asanginagìr>> arǝì, sǝ gilmur, do aɓa bumkiɗikea sǝ kǝ ging ɓukɓuk.
28Sǝ cau mala Yahweh yiu aban Iliya ɓwa'Tishbe, ama, 29<<A sǝnǝna ulang nongsǝmúrû mǝnana Ahap nongsǝi aɓadǝmbam ngga? Acemǝnana nongsǝmúrì aɓadǝmbam ngga, pa mǝ nǝ yinǝ gìr'mur'mwana a ɓàkú male ɗàng; #21:29 Ɓalli gbal aɓa: 2Amur 9:25.sǝama mǝ nǝ yinǝ gìr'mur'mwana amur ɓala male, a ɓàkú mala muna-ɓwabura male.>>
Currently Selected:
1 Amurǝm 21: mbu
Highlight
Copy
Compare
Share
Want to have your highlights saved across all your devices? Sign up or sign in
©️2022 The Seed Company
