Марк 7

Ада-өгбениң дүрүмнери

(Мф. 15:1-20)

1Иерусалимден чедип келген фарисейлер болгаш элээн каш ном-хоойлу тайылбырлакчызы Иисустуң чанынга чыглып келгеннер. 2Олар Ооң чамдык өөреникчилериниң холдарын чугбайн, арыг эвес байдалда чемненип олурарын эскерип кааннар. 3# Гал. 1:14(Херектиң ужуру чүдел дээрге, бүгү иудейлер, а фарисейлер кымдан-даа артык, ада-өгбезиниң чаңчылдарын шыңгыы сагыыр, тускай чурумчуткан аайы-биле холун чугбаан шаанда, чемненип олурбас улус чүве-дир. 4# Евр. 9:10Базаардан садыглашкаш келгеш, олар холун чугбаан шаанда#7:4 Азы: «Олар садып эккелген хамык чүвезин чугбаан шаанда»., чем чивес турган. Оларның сагыыр кылдыр хүлээп алган оон-даа өске дыка хөй сагылга-дүрүмнери бар, чижээлээрге, аяктарны, дөмбүңнерни, чес сакпыңнарны, дөжектерни чурумчуткан аайы-биле чууру дээн ышкаш.) 5# Лк. 11:38Ынчангаш фарисейлер болгаш ном-хоойлу тайылбырлакчыларының Иисустан: «Чүге Силерниң өөреникчилериңер ада-өгбениң ёзу-чаңчылын тоовазыл? Чүге олар арыг эвес холдарын чугбайн, чем чиирил?» – деп айтырганы ол.

6 # Мф. 23:13Иисус мынча деп харыылаан: «Ийи арынныг силерниң дугайыңарда Исайя медээчи Бурганның адындан шын-на бижээн-дир:

„Бо чон Мени сөс кырында хүндүлээр, а сеткил-чүрээ-биле Менден ырак. 7# Иса. 29:13; Кол. 2:22Оларның Меңээ мөгейиишкини хей чүве-дир, чүге дээрге оларның өөредии – чүгле кижилер чогааткан сагылга-дүрүмнер-дир“.

8Силер Бурганның айтыышкыннарын тоовайн каапкаш, улустуң чаңчылдарын эдерер-дир силер»#7:8 Өске бурунгу сөзүглелдерде бо сөстерге «Аяк-сава чуурун сагып база өске-даа шак ындыг чүүлдерни хөйү-биле кылып турар-дыр силер» деп сөстерни немээн.. 9Оон Ол мынча дээн: «Силер боттарыңарның сагылга-дүрүмнериңер сагыыр дээш, Бурганның айтыышкыннарын тоовайн каапканыңар кончуг-ла эки-дир! 10# Хост. 20:12; 21:17Моисей силерге Бурганның айтыышкынын дамчыткан-на болгай: „Ачаң биле аваңны хүндүлеп чор“, ол ышкаш: „Ачазын азы авазын бак сөглээр кижини өлүмге онаар херек“. 11-12А силерниң чугааңар ёзугаар кандыг боор-дур? Ава-ачазынга: „Менден алыр ужурлуг чүвеңерни Бурганга өргүүрүм ол-дур“ – дээр кижи бар болза, силер аңаа ава-ачазынга чүнү-даа кылырын чөпшээревейн баар-дыр силер. 13Силер ооң-биле Бурганның сөзүн, боттарыңарның-на саналдаан чаңчылдарыңар дээш, күш чок болдуруп турар-дыр силер. Өске-даа шак ындыг чүүлдерни эңдере кылып чоруур-дур силер».

14Иисус чонну база катап чыып алгаш, мынча дээн: «Шуптуңар Мени дыңнааш, билип аарын кызыңар. 15-16# Аж.-ч. 10:15; Тит. 1:15Кижиже дашкаартан кирип кээр чүү-даа чүве ону бужартадып шыдавас. Кижиниң бодундан үнүп кээр чүве харын ону бужартадыр»#7:15-16 Өске бурунгу сөзүглелдерде бо сөстерге «Дыңнаар кулаа бар кижи дыңназын!» деп сөстерни немээн (Мф. 11:15; Мк. 4:9 көр)..

17Иисус чонну каапкаш, бажыңче кирип кээрге, өөреникчилери демги угаадыглыг чугааның дугайында Оон айтырган. 18Ол оларга мынча дээн: «Таанда-ла силер ам-даа билип шыдавааныңар ол бе? Кижиже дашкаартан кирип кээр чүү-даа чүве ону бужартадып шыдавас дээрзин көрбээниңер ол бе? 19# Аж.-ч. 10:15; 11:9; Тит. 1:15Чүге дээрге ол чүүл кижиниң чүрээнче эвес, а ишти-хырнынче киргеш, оон мага-боттан үне бээр болгай». (Шак ынчалдыр Ол бүгү аъш-чем аймаан арыг деп чарлаан.)

20 # Мф. 12:34; Иак. 3:6Оон ыңай мынча дээн: «Кижиниң бодундан үнүп турар чүве харын ону бужартадыр. 21# Гал. 5:19-21; 1 Кор. 6:9-10Кижиниң иштинден, ооң чүрээнден үнер чүүлдер бо-дур: бузуттуг-бак бодалдар, самыыраар чорук, ооржу база өлүрүкчү чорук, 22кады чурттаан эжинге шынчы эвес чорук, чазый чорук, кара сагыш, меге, туттунмас самыыраашкын, адааргал, хоп-нүгүл, бодун тогдунары база сээдең чорук. 23Кижиниң иштинден үнер бо бүгү бузут харын ону бужартадып турар».

Хананей херээжен кижиниң бүзүрели

(Мф. 15:21-28)

24 # Иис. 19:28-29; Иса. 23:1-18Иисус Галилеядан үнгеш, Тир болгаш Сидон хоорайларның чоок-кавызынче чорупкан. Ол бир бажыңга туруп алгаш, өске улус Ооң келгенин билбес боорун күзээн, ынчалза-даа дөмей-ле ону чажырып шыдаваан. 25Уруу букка алыскан бир херээжен кижи база Иисустуң келгенин билип каан. Ол херээжен доп-дораан ынаар чеде бергеш, Ооң буттарының баарынга доңгая кээп дүшкен. 26# Аж.-ч. 21:2-3Ол херээжен иудей эвес, а Сирияның Финикиязы чурттуг кижи болган.#7:26 Ол үеде Сирия рим можу болуп, а Иудея ооң составынче кирип турган. Херээжен Иисустан ооң уруунче кире берген букту үндүр сывырып бээрин ээрежип эгелээн.

27 # Мф. 7:6Иисус: «Уругларның чемин хунаап алгаш, ыттарга каап бээрге, кайын боор» – дээн.#7:27 Бурганның ажы-төлү деп израильчилерни адаар турган. Израильдиң чурттакчылары өске чоннар улузун ыттар деп адаар, ол болза коргунчуг дорамчылал деп санадыр.

28А ол херээжен: «Дээрги, а ыттар база-ла уругларның чемненген столундан кээп дүшкен тогланчы чыып чиир ышкажыгай» – дээн.

29Иисус ынчан: «Ындыг харыың дээш бук сээң урууңдан үне берди, чана бер» – дээн. 30Ол херээжен бажыңынга чедип келгеш, көөрге, уруу орун-дөжээнде чыдар, а бук оон үне берген болган.

Үнү чок, дүлей кижини экирткени

31 # Мк. 8:24 || Мк. 5:20 || Мк. 1:9Иисус Тирниң чоок-кавызындан үнгеш, Сидон хоорайны таварып эрткеш, Он-хоорай девискээрин таварыштыр Галилея хөлүнче чорупкан. 32# Иса. 35:5-6Ол черге улус үнү чок, дүлей бир-ле кижини Иисуска эккелгеш, аңаа холун дегзип, экиртирин Оон дилээн. 33# Мк. 8:23; Ин. 9:6Иисус ону кыдыынче аппаргаш, Бодунуң салааларын ооң кулактарынче суккаш, оон дүкпүрүпкеш, демги кижиниң дылынга дээй каапкан. 34Ол ооң соонда карактарын дээрже шиглей көрүнгеш, хандыр улуг тынгаш, аңаа: «Эффафа!» – дээн. (Ол дээрге «Ажыттын!» дээни ол.) 35Демги кижи ол-ла дораан дыңнап турар апарган, ооң дылы чештинип, иле-тода чугаалап эгелээн. 36# Мк. 1:44-45Иисус бо дугайында кымга-даа чугаалаваңар деп дужааган. Ынчалза-даа Ол шыңгыы хораан тудум, шупту улустуң ол бүгү дугайында медээни тарадыры дам баар болган. 37Олар аажок кайгап-харап, мынча деп турганнар: «Ооң кылып турар хамык чүвези эки-дир. Ол дүлей улусту – дыңнап турар, үнү чок улусту – чугаалап турар кылып каар-дыр!»

Currently Selected:

Марк 7: Ы.Б.2025

Highlight

Copy