Марк 16

Иисустуң катап дирилгени

(Мф. 28:1-8; Лк. 24:1-12; Ин. 20:1-10)

1 # Мк. 15:40Амыр-дыш хүнү эрткенде, Мария Магдалина, Иаковтуң авазы Мария болгаш Саломия олар, Иисустуң мага-бодун барып чаап каар-дыр дээш, чаагай чыттыг үстер садып алганнар. 2Улуг-хүнде, эртен эрте, хүн чаа-ла үнүп олурда, херээжен кижилер чевег-куйже чорупкан. 3# Мк. 15:46Орук ара олар: «Чевег-куйнуң аксын дуглаан дашты кым биске чайладыр чууп бээрил?» – деп аразында чугаалажып чорааннар. 4А чедип келгеш, ол аажок улуг дашты кыдыынче чууктап каанын көрүп кааннар. 5Олар чевег-куйнуң иштинче кире бергеш, ооң оң талазында ак хеп кеткен аныяк оолдуң олурарын көрүп кааш, элдепсинип корга бергеннер.

6Ол оол мынча дээн: «Кортпаңар. Силер хере шаптырып шаажылаткан Назарет чурттуг Иисусту дилеп чедип келген-дир силер. А Ол катап дирли берген, Ол ам мында чок. Ооң мага-бодунуң чыткан чери бо-дур. 7# Мк. 14:28Ам баргаш, Ооң өөреникчилеринге, ылаңгыя Пётрга мынча деп чугаалаңар: „Ол силерни мурнай Галилеяга чеде бээр. Ооң силерге чугаалааны дег, Ону аңаа көрүп каар силер“».

8Херээжен кижилер коргуушкунга алзып, чевег-куйдан үнгеш, халчып ыңай-ла болганнар. Олар кымга-даа чүнү-даа чугаалавааннар, чүге дээрге кортканы ол хире болган.

Катап дирилген Иисус-биле ужуражылгалар

(Мф. 28:9-10, 16-20; Лк. 24:13-49; Ин. 20:11-23)

9 # Лк. 8:2[Улуг-хүнде эртен эрте Иисус, катап дирилгениниң соонда эң баштай, чеди букту биеэде бир оон үндүр сывыртап бергени Мария Магдалинага кээп көзүлген. 10Мария чоруткаш, Ооң ажыын ажып ыглажып турган өөреникчилерге чүү болганын чугаалап четкен. 11# Лк. 24:11Иисус дириг деп, а Мария Ону көрген деп дыңнааш, олар аңаа бүзүревээн.

12Иисус ооң соонда ийи өөреникчизинге база, олар көдээ черже бар чыдырда, өске хевир-шырайлыг бооп көзүлген. 13Ол ийи өөреникчи ээп келгеш, арткан өөрүнге чугаалаан, ынчалза-даа оларга база-ла бүзүревээннер.

14Адак сөөлүнде Иисус он бир элчинге, олар чемненип олурда, кээп көзүлген. Иисус оларны бүзүрели четпес болганы дээш, Ону, катап дирилген турда, көрген улуска бүзүрээр хөңнү чок болган чөрүүзү дээш чемелээн. 15# Аж.-ч. 1:8; Кол. 1:23Иисус оларга мынча дээн: «Бүгү делегейни эргий кезип, бүгү кижи төрелгетенге Буянныг Медээни суртаалдаңар. 16# Аж.-ч. 16:31; Рим. 10:9; 1 Пет. 3:21 || Ин. 3:18Бүзүрей бергеш, сугже суктурар кижи – камгалал алыр, а бүзүревес кижи – шииттирип алыр. 17# Лк. 10:17; Аж.-ч. 5:16; 8:7; 16:18; 19:12 || Аж.-ч. 2:4; 10:46; 1 Кор. 12:10; 14:2Бурган бүзүрээн улусту дамчыштыр дараазында кайгамчык демдектерин илередир: олар Мээң адым-биле буктарны үндүр сывыртаар болгаш чаа дылдарга чугаалажыр; 18# Ыд. ыр. 90:13; Лк. 10:19; Аж.-ч. 28:3-5 || Аж.-ч. 9:12; 28:8чыланнарны холга тудуп аарга база өлүмнүг хоран ижерге, оларга хора халдавас. Олар холдарын аарыг улуска дегзирге, демгилери экирий бээр».

19 # Лк. 24:51; Аж.-ч. 1:9; 1 Тим. 3:16 || Ыд. ыр. 109:1; Аж.-ч. 7:55-56; 1 Пет. 3:22; Рим. 8:34; Эф. 1:20; Кол. 3:1; Евр. 1:3; 8:1; 12:2; Ажыд. 3:21Дээрги Иисус оларга бо бүгүнү чугаалааш, дээрже көдүрлүп үне бергеш, Бурганның оң талазынга барып олурупкан. 20# Аж.-ч. 5:12Ооң өөреникчилери тарап чоруткаш, чер болганга Буянныг Медээни суртаалдай бергеннер. Дээрги-Чаяакчы оларны деткип, оларның сөстерин кайгамчык демдектери-биле бадыткап турган. Аминь.]#16:9-20 Бо домактар Марктың номунуң эң бүзүрелдиг грек сөзүглелдеринде таварышпайн турар. Ол домактарны өске кижи немей бижээн бооп чадавас. Номнуң төнчүзү чамдык сөзүглелдерде өске кыскажак хевирлиг база бооп турар. Марктың бодунуң улаштыр бижээни номнуң төнчүзү чиде берген деп даап бодап болур.

Currently Selected:

Марк 16: Ы.Б.2025

Highlight

Copy