Матфей Киирилде
Киирилде
Христиан чаңчылдың санап турары-биле, бо номну бижээн кижи – үндүрүг хавырыкчызы Матфей Левий. Иисус Христос ону кыйгырып, эдерткеш, Бодунуң он ийи элчининиң бирээзи кылып алган (Мф. 9:9; Мк. 2:14; Лк. 5:27).
Матфей Буянныг Медээзин колдуунда еврей номчукчуларга хамаарыштыр бижээни ылап хире. Матфей номун Иисустуң ада-өгбе даңзызындан эгелээн. Ол даңзыда Иисусту еврей чоннуң өгбези Авраам биле израиль хаан Давидтиң дорт салгакчызы кылдыр көргүскен. Эрги Чагыг-керээни болганчок-ла цитаталавышаан, Матфей Назарет чурттуг Иисус дээрге Бурганның медээчилериниң Ооң чедип кээриниң дугайында баш бурунгаар чугаалап турганы, Бурганның шилип алганы Хаан болгаш Камгалакчы ылап-ла ол-дур дээрзин онзалап демдеглеп турар. Матфей оон ыңай Иисустуң ыдыктыг хоойлуну бүрүнү-биле күүсеткенин номунда айытпышаан, Ол израиль чоннуң эң дээди төлээлекчизи дээрзин көргүскен.
Матфей Иисустуң чугаалары болгаш өөредиинче улуг кичээнгейни салып турар (бүгү номнуң дөрттүң бир кезии). Бо Буянныг Медээ Иисусту мерген угаанныг башкы кылдыр көргүзүп турар: Иисус Бурганның Хоойлузун тайылбырлаар база Ооң Чагыргазының дугайында өөредир эргелиг. Иисустуң өөредиин темалар аайы-биле беш бөлүкке чарып, тургускан: 1) Даг кырынга суртаал (5–7 эгелер); 2) он ийи элчинге чагыглар (10-гу эге); 3) Бурганның Чагыргазының дугайында угаадыглыг чугаалар (13-кү эге); 4) Христостуң өөреникчизи болурунуң дугайында чагыг (18-ки эге); 5) келир үеде делегейге чүү болурунуң дугайында өттүр билген медеглел (24–25 эгелер). Матфейниң номунче Иисустуң өске Буянныг Медээлерде таварышпайн турар он угаадыглыг чугаазы база кирип турар.
Currently Selected:
Матфей Киирилде: Ы.Б.2025
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2025