Матфей 27

Рим чагырыкчы Пилаттың мурнунда

(Мк. 15:1; Лк. 23:1-2; Ин. 18:28-32)

1Эртен эрте Бурганның дээди бараалгакчылары, чоннуң баштыңнары дөгере чөвүлежип чугаалашкаш, Иисусту өлүрер деп шиитпир үндүргеннер. 2# Лк. 3:1; 13:1; Аж.-ч. 3:13; 1 Тим. 6:13Олар Ону хүлээш, чагырыкчы Пилатка аппарып хүлээдип бергеннер.

Иуданың өлүмү

(Аж.-ч. 1:18-19)

3Иисусту садыпкан Иуда Ооң шииттирип алганын көргеш, кем-буруузун миннип, Бурганның дээди бараалгакчылары болгаш баштыңнарга үжен мөңгүн чоозун эгидип бергеш: 4«Буруу чок кижини садып, бачыт үүлгеттим» – деп турган. А демгилери: «Биске ол кандыг хамаанныг чүвел? Ол сээң херээң-дир» – деп харыылааннар. 5# 2 Хаан. 17:23Иуда чоостарын Бурганның өргээзинге тө чажыпкаш, чоруй баргаш, моңну берген. 6# 4 Хаан. 12:9; Мк. 12:41; Ин. 8:20Бурганның дээди бараалгакчылары чоостарны чыып алгаш: «Бо акша хан өртээ болган төлээде, ону Бурганның өргээзиниң акша-мөңгүн чыыр хааржаанга суп болбас» – дээннер. 7Олар сүмелешкеш, ол акша-биле «Дой сава кылыкчызының шөлү» дээр, даштыкы улусту хөөржүдер черни садып аарын шиитпирлээннер. 8Ынчангаш бөгүнге дээр ол шөлдү «Ханныг шөл» деп адап турар.

9 # Мф. 2:17Иеремия медээчини дамчыштыр баш бурунгаар чугаалаан медеглел ынчаар боттанган:

«Олар израиль чоннуң Ол дээш доктааткан өртээ – үжен мөңгүн чоосту ап алгаш, 10# Иер. 18:3; 32:7-9; Зах. 11:12-13Дээрги-Чаяакчының меңээ дужааганын ёзугаар, „Дой сава кылыкчызының шөлү“ дээш берипкеннер».

Пилаттың Иисусту байысааганы

(Мк. 15:2-5; Лк. 23:3-5; Ин. 18:33-38)

11 # Мф. 2:2Иисусту чагырыкчының мурнунга тургузуп каан. «Сен – иудей хаан сен бе?» – деп, Пилат Оон айтырган.

Иисус: «Силер бодуңар ынча дидиңер» – деп харыылаан. 12А Бурганның дээди бараалгакчылары болгаш баштыңнар Ону буруудады бээрге, Иисус оларга кандыг-даа харыы бербээн.

13 # Мф. 26:62Пилат ынчан Аңаа мынча дээн: «Дыңнавайн тур сен бе? Сеңээ удур буруудадыышкыннарның хөйүн көрбес бе?!» 14Ынчалза-даа Иисус чагырыкчыга харыылавайн барып, ону аажок кайгаткан.

Варавваны хостааны, Иисусту өлүмге шиидип кааны

(Мк. 15:6-15; Лк. 23:13-25; Ин. 18:39–19:16)

15Чагырыкчы Хосталыышкын байырлалында чоннуң шилээни бир херектенни хостап бээр чаңчылдыг турган. 16Ол үеде Варавва дээр билдингир херектен кара-бажыңга чыткан чүве-дир. 17Улус чыглып кээрге, Пилат олардан айтырган: «Мен силерге кымны хостап берейн? Кайызын хостап алыксап тур силер: Варавваны бе азы Христос деп адаар Иисусту бе?» 18# Ин. 12:19(Иисусту адааргаан сагыш-биле аңаа тудуп эккелгенин Пилат билип турган.)

19Пилат шииткел үндүрер бедик черге олурда, ооң кадайы аңаа сөс дамчыттырыпкан: «Ол кем-буруу чок кижи-биле үрелдешпе! Мен бо дүне дүжүмде Ол дээш аажок човаг-хинчек көрдүм».

20 # Аж.-ч. 3:14Ынчалза-даа Бурганның дээди бараалгакчылары болгаш баштыңнар чонну Иисусту өлүрүп шиидерин, а Варавваны хостаарын дилээр кылдыр көгүдүп каапканнар.

21Чагырыкчы олардан: «Бо ийи кижиниң кайызын хостап берейн, кымны дээр силер?» – деп айтырган.

Улус шупту: «Варавваны!» – деп алгырган.

22Пилат оларга мынча дээн: «А Христос деп адаар Иисусту канчаайн?»

Шуптузу аңаа: «Ону хере шаап шаажылаңар!» – дээр болган.

23 # Лк. 23:41; Евр. 4:15Чагырыкчы: «Чогум чүү дээш? Ол кандыг кемниг херек кылганыл?» – деп айтырган.

Ынчалза-даа олар улам ыыткыр алгыржып-ла турган: «Ону хере шавыңар!»

24 # Ы. х. к. 21:6; Ыд. ыр. 25:6; 72:13Пилат чүнү-даа кылып шыдавазын база үймээн-даа үнер чыгыы апарганын көргеш, суг алдыртып алгаш, чон мурнунга холдарын чуггаш: «Мен бо кижиниң өлүмү дээш буруу чок мен, бодуңар харыылаңар» – дээн.

25 # 1 Фес. 2:16Ынчаарга чон: «Ооң өлүмү дээш буруу бистиң база ажы-төлүвүстүң кырынга дүшсүн» – деп харыылаан.

26 # Мф. 20:19Пилат ынчан улуска Варавваны хостап берген, а Иисусту кымчылааш, хере шавары-биле аппаарын дужааган.

Шериглерниң Иисусту дорамчылааны

(Мк. 15:16-20; Ин. 19:2-3)

27Пилаттың шериглери ынчан Иисусту чагырыкчының ордузунче аппарганнар. Ону долгандыр бүдүн батальон хире шериг чыглып келген. 28Олар Ооң хевин ужулгаш, Аңаа хааннар кедер хүрең-кызыл тон кедирип кааннар. 29Оон тенниг харагандан дээрбек өрээш, Ооң бажынга кедиргеш, оң холунга даянгыыш тудускаш, Иисусту дорамчылап, Ооң мурнунга дискектенип ора дүшкеш: «Иудей хаан алдаржызын!» – деп кочулап пат болганнар. 30# Иса. 50:6; Мф. 20:19Олар Олче дүкпүрүп, даянгыыш-биле бажынче соп шаг болганнар. 31Иисусту дорамчылап мага хангаш, хүрең-кызыл тонну ужулгаш, Ооң Бодунуң хевин кедиргеш, хере шавары-биле алгаш чорупканнар.

Иисустуң хере шаптыртканы

(Мк. 15:21-32; Лк. 23:26-43; Ин. 19:17-27)

32Орук ара оларга Киринея чурттуг Симон деп кижи таваржы бээрге, шериглер ону Иисустуң белдир-ыяжын көдүрер кылдыр албадапканнар. 33Голгофа азы «Баш сөөгү» деп адаар черге чедип келгеш, 34# Ыд. ыр. 68:22олар Иисуска бир-ле ажыг чүүл холаан арага бергеннер#27:34 Ол үеде шаажылаттырып өлүртүр улуска аарышкы намдадыр бир-ле ажыг наркотиктиг бүдүмел холаан суксун бээр турган.. Ол шенеп көргеш, ишпейн барган. 35# Ыд. ыр. 21:19Иисусту белдир-ыяшка хере шаап кааш, шериглер Ооң хевин алыр үлүг тыртып, аразында үлежип алганнар. 36А ооң соонда олар Ону кадарып олуруп алганнар.

37Иисустуң кем-буруузун айтып: «Иудей хаан Иисус бо-дур» деп бижээн самбыражыгашты Ооң бажының кырынга кадап каан турган.

38Ооң-биле кады өске ийи дээрбечини#27:38 Ол үеде римчилер-биле демисежип турган, чонда нептереңгей дайынчыларны болганчок-ла «дээрбечилер» деп адаар турган. база: бирээзин Ооң оң талазында, а өскезин солагай талазында белдир-ыяштарга хере шаап каан. 39# Ыд. ыр. 21:7; 108:25Эрткен-дүшкен улус Ооң талазынче баштары-биле дорамчылалдыг айтып, кочулап турган: 40# Мк. 14:58; Ин. 2:19 || Мф. 4:3-6«„Бурганның өргээзин үреп-бускаш, үш хүн дургузунда тудуп тургузуптар мен“ – деп турдуң чоп! Бодуңну Бодуң камгала! Бурганның Оглу шын болзуңза, белдир-ыяштан дүжүп кел!»

41Бурганның дээди бараалгакчылары, ном-хоойлу тайылбырлакчылары болгаш баштыңнар демнежип алгаш, база-ла Ону кочулап турганнар: 42# Ин. 10:18 || Ин. 1:49; 12:13 || Ин. 20:29«Өскелерни камгалап турган, а Бодун камгалап шыдавас де! Израильдиң хааны де! Ол белдир-ыяштан дүжүп келзин, бис ынчан Аңаа бүзүрей бээр бис! 43# Ыд. ыр. 21:8-9Ол Бурганга ынанып турду. Ынчангаш Ол Бурганга эргим болза, Бурган ам Ону камгалап алзын! Ол Бодун Бурганның Оглу мен деп турду чоп!» 44Ооң-биле кады хере шаптырган дээрбечилер база Ону бак сөглеп турган.

Иисустуң өлүмү

(Мк. 15:33-41; Лк. 23:44-49; Ин. 19:28-30)

45Хүн үнгенден бээр алдыгы шактан тоску шакка чедир бүгү чер кырын дүмбей караңгы шыва апкан. 46# Аж.-ч. 3:1 || Ыд. ыр. 21:2А тоску шак үезинде Иисус: «Эли, Эли, лема савахфани?» («Мээң Бурганым, Мээң Бурганым, чүү дээш Мени кааптың?» – дээни ол) – деп ыыткыр алгырыпкан. 47Чоогунга турган улустуң чамдыызы ону дыңнааш: «Ол Илияны кый деп тур» – деп турган. 48# Ыд. ыр. 68:22Оларның бирээзи дораан маңнап чеде бергеш, суг сиңирер губка ап алгаш, ону ажыг виноград арагазынга өттүрүп алгаш, өрген бажынга кедиргеш, ижиртири-биле Иисусче сунган. 49Арткан өөрү: «Адыр! Ону камгалаары-биле Илияның кээр-келбезин көөр-дүр» – деп турганнар.

50Иисус база катап ыыткыр алгырган соонда, Ооң амы-тыны үстү берген.

51 # Хост. 26:33; Лев. 16:2Ол өйде Бурганның өргээзинде аскан көжеге үстүнден адаанга чедир ийи чара орлу берген. Чер сириңейнип, хая-даштар буступ калган. 52# Иса. 26:19; Иез. 37:12; Дан. 12:2; Ин. 5:21, 25Чевеглер ажыттынып, Бурганның хөй-ле улузунуң өлүг мага-боттары катап дирли берген. 53# Неем. 11:2; Иса. 48:2; 52:1Олар чевеглеринден үнгеш, Иисустуң катап дирилгениниң соонда ыдыктыг хоорайга чедип келгеннер. Оларны хөй улус суглуг караа-биле көрген.

54Чүс шериг баштыңчызы база Иисусту таңныылдап турган шериглер чер шимчээшкинин болгаш өске-даа бүгү болган чүүлдерни көргеш, аажок сестип: «Ол ылап-ла Бурганның Оглу-дур!» – деп турганнар.

55Орта хөй херээжен кижилер база ол бүгүнү ырактан хайгаарап турганнар. Олар Иисуска бараан бооп, Ону Галилеядан үдеп келген улус чүве-дир. 56# Лк. 8:2 || Мф. 20:20Херээжен улустуң аразынга Мария Магдалина, Иаков биле Иосийниң авазы Мария база Зеведейниң оолдарының авазы турган.

Иисусту орнукшутканы

(Мк. 15:42-47; Лк. 23:50-56; Ин. 19:38-42)

57Кежээ дүшкенде, Аримафея#27:57 Аримафея – бо болза Эрги Чагыг-керээде (1 Хаан. 1:1) Раматаим деп адап турар суур. чурттуг Иосиф деп бай кижи чедип келген. Ол база Иисустуң өөреникчизи турган. 58Ол Пилатка келгеш, Иисустуң мага-бодун дилеп алган.#27:58 Еврей чаңчыл ёзугаар, чок болган кижини мөчээн хүнүнде ажаар ужурлуг, артында-ла пятницаның кежээзинде суббота, амыр-дыш хүнү, эгелей бээр. Оон аңгыда Ы. х. к. 21:22-23 ёзугаар, ыяшка астынган азы белдир-ыяшка хере шаптырган кижиниң мага-бодун ол-ла хүн дүжүргеш, ажаар ужурлуг турган. А Пилат мага-ботту аңаа бээрин дужааган. 59Мага-ботту дүжүрүп алгаш, Иосиф ону арыг пөс шывыг-биле ораагаш, 60# Иса. 53:9хаяда оя шаап алганы бодунуң чаа чевег-куюнга орнукшудуп каан. Чевег-куйнуң аксын, улуг даш чууп эккеп, дуглап кааш, Иосиф чоруй барган. 61А Мария Магдалина болгаш база бир Мария чевег-куйнуң дужунга олуруп калганнар.

Чевег чанында таңныылдар

62Пятницаны солуп кээр даартазында хүндүс Бурганның дээди бараалгакчылары болгаш фарисейлер Пилатка келгеш, 63# Мф. 16:21; 17:23; 20:19мынча дээннер: «Хайырааты! Ол мегечи дириг тургаш: „Үш хүн эртерге, катап дирлир мен“ – деп чугаалаанын сактып келдивис. 64Ынчангаш үшкү хүнге чедир чевегни кадарар айтыышкындан бериңерем. Оон башка Ооң өөреникчилери чедип келгеш, мага-ботту оорлап аппаарлар, а оон чонга: „Ол өлүглер аразындан катап дирилди“ – деп чарлай бээрлер. Ол сөөлгү меге баштайгызындан-даа дора болур».

65Пилат оларга: «Таңныылдардан берейн. Баргаш, бодуңар баш билип кадарыңар» – деп харыылаан. 66# Дан. 6:17; Ажыд. 20:3Олар чоруткаш, таңныылдар тургузуп, дашка таңма баскаш, чевег-куйну кадарып эгелээннер.

Currently Selected:

Матфей 27: Ы.Б.2025

Highlight

Copy