Эге дөс 21

Исаактың төрүттүнгени

1Дээрги-Чаяакчы Саррага чүнү чугаалаанын утпаан: аазаанын ёзугаар шуптузун күүсеткен. 2Сарра иштели бергеш, Бурганның айтып каан үезинде чөнүп калган Авраамга оол уруг божуп берген. 3# Э. д. 17:19Авраам Сарраның божуп берген оглун Исаак деп адап алган. 4# Э. д. 17:12-13Төрүттүнгениниң сески хүнүнде, Бурганның чагыын сагып, Авраам Исаакты кыртыжап демдектеп каан. 5Исаак төрүттүнгенде, Авраам чүс харлыг турган. 6А Сарра: «Бурган меңээ каткыны шаңнады. Мени дыңнаан кижи-ле элдепсинип каттырар боор оң. 7Сарра чаш төл эмзирер деп, Авраамга кым чугаалап турган боор? Бо-ла-дыр, кыраан назынында мен аңаа төл божуп бердим» – деп чугаалаан.

Агар биле Измаилди үндүр ойлатканы

8Оол өзүп кээрге, эмигден үндүрер апарган. Исаакты авазының эмиинден үндүрген хүнде, Авраам улуг дой кылган. 9# Гал. 4:29Египет кул Агарның Авраамдан божаан оглунуң Исаакты кочулап каттырып турарын Сарра көрүп каан. 10# Ин. 8:35; Гал. 4:30Ынчан ол Авраамга: «Бо кул херээженни оглу-биле кады үндүр ойладывыт. Ооң оглу мээң оглум Исаак-биле дең эргелиг салгакчың болбазын!» – деп чугаалаан. 11Бодунуң оглунуң дугайында ындыг сөстер дыңнаары Авраамга дыка анчыг болган. 12# Рим. 9:7Ынчалза-даа Бурган аңаа мынча дээн: «Оол дээш-даа, Агар дээш-даа, сагыш аарып, муңгарава. Сарраның чугаалааны хевээр күүсет, чүге дээрге сээң салгалың Исаакты дамчыштыр уламчылаар-дыр. 13Ынчалза-даа Агарның оглундан база бир чон нептерээр кылдыр чаяап каар мен. Чүге дээрге ол база сээң оглуң болгай». 14Эртенинде Авраам Агарга чемни тудускаш, суглуг саваны ооң эктинге салып бергеш, оглу-биле кады чорупсун дээн. Агар оон чорупкаш, Беэр-Шеваның ээн кургаг ховузунга аза берген.

15Савазында суу төнүп каарга, Агар оглун бир чадаң ыяш хөлегезинге каапкан. 16Ол ча адым хире хемчээлдиг черже ырадыр чоруй баргаш: «Оглумнуң канчаар хинчектенип өлүрүн көөр хөңнүм чогул» – дээш, ыглап-сыктап эгелээн. 17Бурган оолдуң үнүн дыңнап каан. Бурганның төлээзи дээрден Агарны кыйгырыпкаш: «Канчап бардың, Агар? Кортпа, Бурган чадаң ыяш чанында чыдар сээң оглуңнуң үнүн дыңнап каан-дыр. 18Тургаш, барып оглуңну көдүрүп ал. Мен оглуңдан укталган улуг чон чаяап каар мен» – дээн. 19Бурган Агарның караан ажыдыптарга, ол кудук көрүп каан. Оон савазын суг-биле долдургаш, оглунга сугну ижиртип алган.

20Бурган оолду черле утпайн чораан. Ээн кургаг ховуга чурттап тургаш, оол өзүп келген, ча-биле адар адыгжы апарган. 21# Сан. 10:12; 3 Хаан. 11:18Ол Фаран ховузунга чурттап турган. Авазы аңаа Египеттен кадай тып эккеп берген.

Авраамның Авимелех хаан-биле дугуржулга кылганы

22Ол үеде Авимелех бодунуң шериг баштыңчызы Фихол-биле Авраамга келгеш, мынча дээн: «Сен чүнү-даа кылып туруңда, Бурган сээң-биле кады-дыр. 23Ам Бурганның ады-биле меңээ даңгыраглап көрем: мени-даа, мээң оолдарымны-даа, мээң үре-салгалымны-даа мегелеп, хомудатпас сен. Сеңээ кандыг энерел көргүскен-дир мен, сен база меңээ болгаш сени чурттадып алганы черниң чонунга багай чүве кылбас сен».

24«Даңгыраглап тур мен» – деп, Авраам чугаалаан. 25Ынчан Авимелехтиң улузу ооң казып каан кудуун эжелеп алганын Авраам чемелеп чугаалаан.

26Авимелех: «Ону кым ынчанганын билбес мен. Мооң мурнунда сен меңээ ындыг чүве чугаалаваан сен. Ол дугайында чаа дыңнап тур мен» – дээн. 27Авраам Авимелехке шээр болгаш бода малды белекке бээрге, олар дугуржулга кылып алганнар. 28Оон Авраам чеди хой аңгылап берген.

29«А бо чеди хойну чүге аңгылап бердиң?» – деп, Авимелех айтырган.

30«Чеди хойну менден ап көр. Бо белек кудукту мээң казып алганымның бадыткалы болгай аан» – деп, Авраам харыылаан. 31# Э. д. 26:33(Оон эгелээш, оларның даңгырак беришкен черин Беэр-Шева#21:31 Беэр-Шева – еврей дылда «беэр» деп сөс «кудук» дээн, а «шева» деп сөс «даңгырак»-даа, «чеди»-даа деп сөстерге дөмейлешкек. деп адай берген.) 32Беэр-Шевага дугуржуп алганының соонда, Авимелех бодунуң шериг баштыңчызы Фихол-биле кады филистим черже чана бергеннер. 33А Авраам Беэр-Шевага тамариск деп ыяш олуртуп кааш, Дээрги-Чаяакчының – мөңге Бурганның адын мактап кыйгырган. 34Авраам филистим черге үр үеде даштыкы кижи бооп чурттаан.

Currently Selected:

Эге дөс 21: Ы.Б.2025

Highlight

Copy