Romans 5
5
Te tuku tonu ma Tupua
1Kae fakkau kotatou ku tukuna tonu ki Tupua ia tatou paanaki kia koia, tera tatou ku naa ko te roto mafora ma Tupua i tatou Ariki Jesus Christ. 2Koia ne nai aumai ina kotatou ia tatou fakatonu ki te roto laoi o Tupua nei, iei e tatou nofo ria. Tera tatou e vaki soro ia tatou paanaki soro kotatou ka vaevae i te taurekareka o Tupua! 3Ma kotatou e vaki soro fokia ia tatou fakarongo neaisu anga, faina e tatou iroa ina koa tatou visi visi anga e fai fekauaki o faka suku suku ki te kaataki maarie. 4Ko Tupua e nai faka tonu sia ko atatou kaataki maarie, ma tana faka tonu anga e nai faia ke tatou paanaki soro. 5Te paanaki soro nei si se nai faia ke tatou faka maa, faina i te fakapere a Tupua ne nai utuufakina ko atatou fatu manava ki te sori o na Mauri Tapu kia tatou.
6Vasia kotatou noko koi losi iei, i te vasia tonu o Tupua, ko Christ ne faka mate ki faoa titisara. 7E faingataa ki se tangata ke faka mate mo te tangata tonu, kae matea e faingaofia ki se tangata ke faka mate mo te tangata laoi. 8Kae ko Tupua ne nai faka saa ria ko tana fakapere maatea kia tatou faka peinei: Kae ko Christ ne faka mate kia tatou i tatou vasia noko titisara iei!
9Tera kotatou ku tukuna tonu ki Tupua i vasia nei ki te toto o Christ. Tera e ravea atu rei ko Christ ka nai faka saofia kotatou mai te teke ranga o Tupua. 10Tatou noko tau firi firi ma Tupua, kae ne nai faia kotatou ana soavaka i te faka mate anga o tana Tama. Tera e ravea atu rei ku nai faka saofia kotatou i te ora o Christ. 11Kae siei fuarei teinei, kae kotatou e vaki soro fokia ki Tupua i tatou Ariki Jesus Christ, faina koia ku nai faia kotatou a soavaka o Tupua i vasia nei.
Adam ma Christ
12Te sara ne aumai ina kia taangata nei i te tangata sokotasi, ma i tana sara ne aumai te mate. Ia riu ara nei, te mate ku aumai ina ki nga turaurau kaatoa, faina ko nga taangata kaatoa ku fetoki ki te titisara. 13Te sara ku naa ia taangata nei i vasia oa Fono siki soria iei, kae te sara si see fai fekauakina i vasia siei ko ni fono iei. 14Tera mai te vasia o Adam ki te vasia o Moses, ko nga taangata kaatoa e aofakina ki te mate, maafa rei onia koratou si se ne fai sara pe Adam ne saeaki i te taufau ranga a Tupua.
Adam ku faka ata ki te tangata ke au. 15Kae raua e kese kese, faina te sori more a Tupua si see fai pe te sara a Adam. E tonu rei, ko nga taangata tokarava ne tamatea faina i te sara a te tangata sokotasi. Kae te roto laoi o Tupua e sapa maatea rei, i tana sori more ki nga taangata tokarava rei, faina i te roto laoi o te tangata sokotasi, ko Jesus Christ. 16Ta tera te kese ranga i faasi o te sori a Tupua ma te sara a tangata sokotasi. Ia tua te sara sokotasi, au rei te faka tautara o te “E tokaa!”; kae ia tua oa sara e rava, au rei te sori more o “See tokaa!” 17E tonu rei i te saeaki ranga a te tangata sokotasi, te mate ne tafito arei o fono fono faina i te tangata sokotasi nei. Kae e sapa maatea atu arei kia ratou, e ratou saua riaina ko te roto laoi maatea o Tupua ma te sori more o te faka patino ranga ke fono fono i te ora, faina i te tangata sokotasi ko Jesus Christ.
18Kae tera, te sara sokotasi e nai tamatea ko nga taangata kaatoa; ia fai riu ara sokotasi, te fai tonu tuu sokotasi e nai faka masara ria ko nga taangata kaatoa ke ora. 19Maina i te saeaki ranga a te tangata sokotasi, ku fai ko nga taangata tokarava rei ke fai te faoa titisara, tera fokia te tautari anga a te tangata sokotasi, ku fai ko nga taangata tokarava rei fokia ke tukuna tonu ki Tupua.
20A fono ne faka atetea ke singa ato arei ko fai fai sara, kae i ngangea oa sara ne singa ato iei, ko te roto laoi o Tupua ku singa ato sapa rei ki mua. 21Kae tera, fakapera pe te sara ne nai kaavea ki te mate, tera fokia te roto laoi o Tupua e nai kaavea tatou i te tonu tuu ki te ora mau ia Jesus Christ tatou Ariki.
Currently Selected:
Romans 5: TKP
Highlight
Copy
Compare
Share
Want to have your highlights saved across all your devices? Sign up or sign in
© 2025 Wycliffe Bible Translators, Inc.