Acts 26
26
Ko Paul ne araara faki ko na faasi kia Agrippa
1Agrippa ne muna atu kia Paul, “Kuou ku tuku atu kia ko kee, ke araara ki tou kee faasi ia.”
Ko Paul ne fora ko ana rima ma tana faka epa o fai tana araara fanga ki na kee faasi:
2“Agrippa te Tii o fenua! Kuou i te aso nei ku maatea toku vaki vaki ke kau tuu ki runga o araara faki toku faasi kia ko kee koa nea kaatoa a nga Jew e teke mai kia kuou iei. 3Teinei e tonu rei, natafito ku kee iroa ina laoi rei koa tukunga kaatoa o nga Jew, ma ratou fesiri siri anga. Kuou e kaisi atu kia ko kee ke fakarongo maarie kia kuou.
4“Ko nga Jew kaatoa ku ratou iroa ina ko toku fai ora mai toku vasia rei noko tama tama iei. Ne ratou iroa ina rei toku fai ora ne fakatafito ake i toku kee fenua, ma i Jerusalem. 5#Act 23.6; Phil 3.5.Nga vasia katoa e ratou iroa ina kuou te foi faoa o te kano rotu e ati ko nga Pharisee, kae koratou e fifia ke faka maori kuou noko fai iei. 6Ta i vasia nei, kuou e faka tautara siaina, natafito kuou e paanaki rei ki te tongi a Tupua ne fai kia tatou puna. 7Te tongi rei nei, ko atatou kainanga e tino angafuru ma rua ne paanaki ke oono kiei, pe koratou e faka turoro ki Tupua te poo ma te ao. Tou Maurunga ee, natafito ia paanaki nei, kuou ne faka tautara sia e nga Jew nei! 8Sea natafito kotou naa e faingataa ke fakatonu ki Tupua e nai faka masike riaina ko faoa mate?
9 #
Act 8.3; 22.4,5. “Kuou take nea rei, noko maanatu maso kuou kau fai pariki tiaina ko te ingoa o Jesus o Nazareth. 10Konei aku nea ne fai i Jerusalem. Kuou e poi ma te manuu o nga ariki fai kava ma ne kau tukuna temate rei ko te kano fenua o Tupua ki te fare pono pono. Ma kuou fokia e kau i faoa e fai, o tuku ko aratou ora ki te mate. 11E rava rei koa vasia e kau fakkiroa riaina koratou i nga paito taanaki kaatoa o nga Jew, ma ne kau faia riaina koratou ke taafuri kese mai ia ratou fakatonu ranga. Kuou ku maatea rei toku teke kia ratou, kuou ku poi fokia ki nga noforanga i rake fenua ke fai pariki koratou i kuraa.
Paul e faka ari ko na furisia anga
(Act 9.1–19; 22.6–16)
12“Tera ia tukunga nei kuou ne poi ki Damascus o fai fekauaki koa taranga a nga ariki fai kava. 13Tou Maurunga ee, i te avatea kuou ne ono i te riu ara ki te aata o te maarama mai te vaerangi kia kuou ma nga taangata e kau fanonga komatou, na maarama e maatea rei ma te raa. 14Komatou kaatoa ne fetekai peka rei ki te kere, ma kuou ne fakarongo ki te reo e karanga mai kia kuou ia taranga faka Hebrew, ‘Saul ee, Saul ee! Sea natafito e kee fai pariki tia kuou? Ko kee e fai pariki maso ko kee ia, pe te puluka e taatua vae ki tana kee raakau tosi, ke fakarongo neaisu maso koia.’
15“Kuou ne fesiri, ‘Ko kee koai, te Ariki ee?’
“Ma te Ariki ne karanga mai, ‘Kuou ko Jesus, e kee fai pariki tia. 16Kae tokai ake ki runga. Kuou ku faka saa atu kia ko kee nei, ke faka patino atu kia ko kee te fai oa aku fainga fekau. Ko kee ke faka ari ki rake faoa pe nia ma au ne ono mata kia kuou i te aso nei, ma pe nia ma aku ka faka ari atu kia kee, ke fai ia vasia ka au. 17Kuou ka kau faka saofia ko kee mai ia tukunga pariki o nga Israel ma nga Gentile kuou ka fakkau atu ko kee kia ratou. 18Ko kee ke faka masara ko aratou mata ma ke taafuri kese mai te pouri ki te maarama, mai te makeke ranga o te atua pariki ki Tupua, tera ia ratou fakatonu ranga kia kuou, ko aratou sara ka faka ngaromia riaina ma ka sau ratou noforanga i te kano fenua ku faka patino riaina e Tupua.’
Paul e faka ari ko ana fainga fekau
19“Ta tera, Agrippa te Tii, kuou si se ne saeaki kia nea ne ono mata kuou kiei mai te vaerangi. 20#Act 9.20,28,29.Kuou ne kau tuufakina riaina ke tafuri kese ma tuku tukunga pariki ki te Ariki, ma ke fai faka sasa koa nea ko aratou ora ku siaki. Ne mataki fai i Damascus ma i Jerusalem, ma tera i nga noforanga rei o nga Israel ma nga Gentile kaatoa rei. 21Natafito ia atamai nei, ko nga Jew ne ratou pukea kuou i rota Paito Tapu ma ne fai ke ratou tamatea riaina kuou. 22Kae oko rei ki te aso nei, kuou ku soakina riaina e Tupua, ma tera, kuou e tuu i kunei o araara faki ko toku faasi ki te kano fenua kaatoa, e mau raro ma e maurunga. Pe nia ma aku e araara faki a nea sokotasi a nga ʻprophetʼ ma Moses ne munakina riaina ku au, ku faka saa riaina: 23#1 Cor 15.20.Ko te Ariki Fakaroro e fai ke fakarongo neaisu riaina ma ke fai te mataki tangata ke masike mai i te mate, ke faka iro iro ko te maarama o te faka sao ranga ki nga Jew ma ki nga Gentile.”
24I ngangea nei ko Festus ne nai karanga tiaina ko Paul, “Paul ee, ko kee ku varea, tau ako maatea anga ku nai faia ko kee ke varea iei!”
25Tongoi atu rei ko Paul, “Kuou si see varea, Festus ee, i tou laoi! Pe nia ma aku e araara faki nei, aku maori rei i atamai rei. 26Agrippa te Tii ee! Kuou e kau araara fakina faka poto kia kee nei, natafito a nea kaatoa nei ke iroa ina fakaoti rei, natafito ia nea nei si see funa riaina kese i te vae papa. 27Agrippa te Tii ee, ko kee siki e fakatonu ki nga ʻprophetʼ? Kuou e kau iroa ina ko kee e fai!”
28Muna atu rei ko Agrippa kia Paul, “I te vasia potu lake nei, ka kee faia riaina kuou te tangata tautari kia Christ?”
29Tongoi atu rei ko Paul, “Maafa rei te vasia e potu lake pe e roa, taku rotu ki Tupua, ko kee ma faoa kaatoa rei nei e fakarongo mai kia kuou i te aso nei, ke fai arei pea kuou nei, kae siei rei ia seni nei!”
30Tera te Tii, ma te gavana, ma Bernice, ma koratou kaatoa ne tokai ake ki runga, 31ma ia tua ku oro iei, koraua ne fai taranga maso koraua, “Te tangata nei siei pe nia ma ana ne fai sara ke tukua ki te fare pono pono, pe ke tamatea iei.”
326 Ma ko Agrippa ne muna atu kia Festus, “Te tangata nei ke tukuna kese ki tua pe koia si se ne fakatau rongo ki te Empra o nga Roman.”
Currently Selected:
Acts 26: TKP
Highlight
Copy
Compare
Share
Want to have your highlights saved across all your devices? Sign up or sign in
© 2025 Wycliffe Bible Translators, Inc.