Hosea 9
9
Kukandua kwakua Izraeli
1We Izraeli, tekuwaminua,
tekusangalala nga Bazima.
Pantu tewakiba wa kisinka kuli Leza obe,
utonene kuongua mu bukambue
mu nkendo yonse ya kupuulilamo nghano.
2Kipuulilo kya nghano ni kya kutikilamo divai,
tekikabeekusia.
Divai ya lenu yaakaba yabakeepeele.
3Tebakeekala mu kyalo kyakua Yawe,
Efraimu waakabwelela ku Misri
ni kulia bilio bitiikeene mu Asuria.
4Tebakamupongwela Yawe bupe bwa divai,
ngelelo yabo teikikamuwamina.
Ngelelo ya ozo musango kuli bene yaakaba nga mukate wa balia balimukuloosia.
Bonse balibalia bebio bilio baakaba batiikeene.
Bebi bilio bilikuya byali bya bo bene.
Tekuti bitwalue mu Nghanda yakua Yawe.
5Mwaakakitaki mu busiku bwa nsikunkulu yenu ibiikilue,
pa busiku bwa nsikunkulu yakua Yawe?
6Anzia kine bapusuka mu busanzo,
Misri wakaba kubakolonghania,
ni Memfisi wakaba kubaziika.
Kipao kyabo kya mutofue kyaakamenamo mikunkuli,
ni myunga yakaba kukupilila mitanda yabo.
7 #
Lk 21.22
Nsiku ya kukandua yapalama,
nsiku ya kusaziiwa yakumana.
Izraeli amane evio.
Pantu bibalo byenu byavulisia
ni bulwani bwenu bwatanisia,
kabika amwenue kuba kipuba,
muntu alombwelue na mweo,
kuba wa luuba.
8Kabika ali ni Leza wane,
i musungi pali Efraimu.
Anzia kili evio, miteo imupembeele
monse mu-aliwapita,
bulwani ni bo mu Nghanda yakua Leza wakue.
9 #
Bap 19.1-30
Bakikila kwi-ingizia mu bituulilo
nga vikyaali mu nsiku yakua Gibea.#9.9 Gibea: Ku ozu muzi Baizraeli bamo ba mu mukowa wakua Benyamina baakitile bibiipile ku muka Mulawi. Keki kintu kyaaleetele bului bukata ni kulengia bantu ba mu mukowa wakua Benyamina kukumbua (mona Bap 19—21).
Leza waakalanguluka bubi bwabo
ni kubakanda pa mulandu wa bibalo byabo.
10 #
Mpe 25.1-5
“Lunaamusangile Izraeli,
kyaali kyali nga kusanga mizabibu mu kaseeba.
Lunaamwene babikolue benu,
kyaali kyali nga kumona mazabo a kutendekelapo a ku kimuti kya miku.
Inzi lubaafikile ku Baali-Peori
baizuukiizie bo bene ku mikisi ya busoni,
ni bo baitiikaaniizie
nga kintu kibaatonene bo bene.
11Bulumba bwakua Efraimu bwaakapupuka nga koni,
tekuli kuvyala, tekuli liimi, tekuli kwimita.
12Anzia balela baana,
naakabeepaya, tekuli waakasyalapo.
Lisyamo lyabo
musita unakaba kubafunghamina!
13Efraimu naamumwene nga Tiro,
abyelue pa bulongo bufukile,
inzi Efraimu waakatwala
baana bakue ku bangipaani.”
14We Yawe, bapeele,
kubako ulikubapeelaki?
Bapeele tuvumo twa kupulumuna
ni kukama kwa mabeele.
15“Pa mulandu wa bubi bwabo bonse buli mu Gilgali,
momo i munaabasuliile.
Pa mulandu wa bikitua byabo bya bibalo,
nakaba kubakumba mu nghanda yane.
Nsikikaba kubatona,
pantu banombozi babo bonse ni babisanguka.
16Efraimu wakiinoonua,
musila wabo wakifumpa,
tebakilimukuseekako buzabo.
Anzia kine bakaba kuvyala baana,
nakaba kwipaya mazabo a mponvu a mavumo abo.”
17Leza wane waakabakaana
pantu tebaali bamunvua.
Baakaba baya banukunta mu ntundu.
Currently Selected:
Hosea 9: KBTP
Highlight
Copy
Compare
Share
Want to have your highlights saved across all your devices? Sign up or sign in
Kitaabua New Testament @The Word For The World Southern Africa. 2023.