Mui Psalm 94
94
1Lio kau Lord, ioe God, leu i sapemu suu olanga: ioe God leu i sapemu suu olanga oke haatai mei.
2Oke haahanengainio kau, ioe a leilei ana walumalau: oke haaahue huniro muini ko tohainire mala uri kire ado.
3Lord, kira orahaa kei hule ingenite: kei lai hule ingenite kira orahaa ke ileileinimwae?
4Kire ke paparahono mola ana walada: kira palopalo takalo ko meni ereere paine.
5Kire ko repu menamenase mwala ioe, Lord: kire ko pilingie mwakano tootoolamu.
6Kire ko horohoroie mu nao na mu awata: kire ko horohoro pelie mu reiinge.
7Tae kire ko teuri, a Lord e saa lesire: God Jacob e saa manatai telihada.
8Omu ke neineisae ana kira qeu dolalie mwala: na mwala e herohero omu kesi manatainire ana nga dinge.
9Atei e too alingana uri e saa rongo: atei e too maana uri e saa lio?
10Nge ngaini ko deu ni haausulie mwala: e saa holai haananaue ingeie ngeena ko haahaausulie mu inoni ana sae nanaunge.
11A Lord e manatainie mu neisaenga mu inoni: maalana ko nei mangoi ola hahaiteli.
12Deidehie inoni ngeena, Lord, oko haahaananaue: nge oko haausulie ure mai ana mu haatolanga ioe.
13Uri okei haamamaloa mwaanie mu dinge tataala: hule ana kei eli akau ana kalinge loosie kira orahaa.
14A Lord e saa maleledie ike mwala ingeie: na e saa ahoa ike ana tootoolada.
15Ana tolahai leinge ke loko alihoi mei ana tolahai odotainge: na ahutana muini saeda e ahureha nge kei luluisulie.
16Atei kei apani mae peire mwala palolada e tataala hunieu: Atei ni kei taelai peieu huni apani mae hunire mwala palolada e tataala.
17A Lord oto e kaa peieu: maurihaaku kei io lauae oto ana leu a qaqaidengile.
18Ana nou unue kau uri, aaeku kei uri rerede: amasinge ioe, Lord, e hele alaa aku.
19Ana maholo mu sae i saeku ko hungehunge i manataku: mu wala ni haasae dodo ioe e kohi hunie maurihaaku.
20Nge uri ioioha kira orahaa kei hata peio taane: nge ko urine leune adumilana tataalanga hunie mu haatolanga?
21Mwala ngeena ke loloko hunie maurihaana A Odotai: kire ko leilei mae ana apune a mwaadala.
22Tae a Lord domana toloi nume nakue: na God ingeie oto suu ineu.
23Nge e haa oliteinie hunire ana tolahada e takalo ilengide, na kei tapa mousire hahie mu tataalanga: Lord God ikie kei tapa tekelainire.
Currently Selected:
Mui Psalm 94: apbPSA
Highlight
Share
Copy
Want to have your highlights saved across all your devices? Sign up or sign in
First published as part of the Anglican Prayer Book by the Melanesian Press, 1946.
