Mui Psalm 89
89
1Neke sulu onioni sulie amasinge a Lord: neke houleinie ani wawaku walaimolinge ioe hunie taena nga qaunge.
2Ana nou teuri keu, Kire ke haauresie amasinge huni ke io hu: oke rodie walaimolinge ioe tai salo.
3E teuri, Nou haalu eni haalunge peia mwane ineu nou lio hilisie nakue: nou ere ni haapunge oto hunia David ini heiraretai ineu.
4Neke rodi meutaa oto hu ana mu weuwemu: neke haauresie naunekume ni alaha ioe isulie taena nga qaunge.
5Na salo ke lahea mu anoa ioe Lord: walaimolinge ioe lou i saana pulita kira maai.
6Ana ngeitai tai salo kei sada peia Lord: hatongainilana Lord ure e urihana atei hikana mu kale ni ramo?
7God ngeena, kire kei meuteinie i matolana pulita kira maai: ani haamaunge liutaa ana i saana muini ko io kalikelie.
8Lord God Sabaoth, ngeitei e ramo mala ioe, Jah: na walaimolinge ioe ko kelitei honotamu.
9Ana oko la otoi alaha honosie asi e pouhirue: mu heuliesi ana ko susu pou, na ioe oko si haasadaa lou elihoi ana.
10O papatainie oto a Rahab domana ngaini kire horo maeana: o tatangainie mui maeloonga ana nime ni ramolamu.
11O tooana oto salo o tooana lou henue hu: walumalau na mu mola ni ola ana, o neie noone poopootana oto.
12O haaholaa noone poo hao na poo tae: Tabor na Hermon ke ileilenimwae hahie satamu.
13Nime ni ramonga oto amu: nimemu ko la otoi aailaa, nime i qaloqalomu e liutaa tae.
14Odotainge na leinge e nei poopoota ani neunekume ni alaha ioe: amasinge na walaimolinge ko heiraretai i naomu.
15Deidehie mwala ko rorongo saie lahunge ni ilenimwaenga: Lord, kire ko laelae mone ana rarangana maamu.
16Kire ke ileilenimwae ana satamu suli heidinge: kire ke tohainire oto ana odotainge ioe.
17Ana ioe mone ramolada e manikulue: ana manata diananga ioe rarangoi ola iemi kei lae liutaa tae.
18A Lord mei talo iemi ni para hanosilamami: Ini e Maai mu Israel e tooana king iemi.
19Oto ana maholona o haatai oto hunie kira maai ioe, o si teuri, Nou tooni hahie ini e ramo peie peilana: nou suluie tae ini nou lio hunie mwaanie mwala.
20Nau lio odoie oto a David ini heiraretai ineu: nou suuhie oto qaune ani rumu maai.
21Nimeku kei rodie oto: na nimeku kei sapeie oto.
22Nga maeloonga saa haamaausie ike: wa nga kale ni orahaa kei talei teungeinie lou.
23Neke darongainire hou mu maeloonga ingeie tai naona: neke horoire muini ko ngingidu upu hunie.
24Tae walaimolinge na amasinge ineu kei hekusie oto: na inunuhaana sataku kire ke suluie tae rarangoi ola ingeie.
25Neke neie nimana i hahona asi: na qaloqalona i hahona mui wei.
26Kei saaieu uri, Ioe a amaku: God ineu, hau haaurileku.
27Neke suluie huni kei nei naohai kale hunieu: huni ke liutaa wau i hahona mu king ana walumalau.
28Neke haatewaa amasinge ineu nana huni ke io hu: neke rodie oto toohu walaimolinge ineu nana.
29Neke qaoa mu weuwana kire ke io hu: na naunekume ni alaha ingeie ke urihana mu dinge ni lengi.
30Ana mu kalena ke dau ni tolipuri ana walaku: na ana kire saa sulu sulie mu leinge ineu.
31Ana kire ke dau ni haamolaa mu wala ni haananaunge ineu: na ana kire saa usulie mu haatolanga ineu
32Oto ana maholona neke susuraaie haitohenga ikire ani maai rade: na mu orahaa ikire ani walo ni reurepu.
33Tae ineu nou saa taasie mango amasinge ineu mwaanie: nou saa ero oto ani tolipuringe ana walaimolinge ineu.
34Nou saa haamolaa haalunge ineu: nou saa olisie mei wala e isitaa oto mwaanie ngiduku.
35Nou ere ni haaapunge haatae oto ani manatanga maai ineu: uri nou saa eroa ike a David.
36Mu weuwana kei io hu oto: na naunekume ni alaha ingeie kei urihana sato i naoku.
37Kire ke rodie oto hu mala warowaro: mala mei ola ni unu haaoaie toohu tai salo.
38Tae ioe o sikaa o leledie oto: o saewasulie oto mwane ioe kire suuhie.
39O sareinie oto haalunge ioe peia mwane ioe: o dau aela ana oto rorodara ingeie na o asie oto iano.
40O akerainie oto ahutana mu tete ingeie: o dau tekelainie iano mu nume hau ingeie.
41Mwala ko liu isulie tala ngeena kire ko talei leue oto: e nei oto ola ni leledinge hunie mui tekihana.
42O suluie oto qaloqalona mui maeloonga ingeie: o qaora muini ko ngingidu upu hunie huni kire ke saesaediana hahie.
43Toohu, o haaliue maana naihi ingeie: o kaa peipeie ike ani ohotaa.
44O qaoa rarangana huni ke mou telai oto: na o huuleinie naunekume ni alaha ingeie hai ano.
45Mu dinge ni saanauhaana o kumwasii oto: na o aluhie oto ani masanga.
46Uri oke mumunio taraurei, Lord, lai hule ana inganite: na saewasunge ioe kei wana mala dunge lai hule ana inganite?
47Oke neineisae aku ana noko io oorue mola: e ue o haaholara mango mu kale ni inoni hunie nga ola ahutata?
48Ngeitei inoni ngeena kei haro mauri tewa na e saa leesie hikana nga maenga: na uri kei haaurie maurihaana mwaanie kalinge?
49Lord, amasinge ioe holai nao ni ngeena ngeii oto itei: o ere ni haapunge hunia David ana ani walaimolinge ioe?
50Lord, oke neineisae ana mu wala kire ko la otoi leledie mu heiraretai ioe ani: na ana noko wawalaa i saeku nga moola mwala hunge ko mamasaa itehulaani;
51Moola ngeena mu maeloonga ioe, Lord, e leledio oto ani: kire leledie oto aena mwane ioe kire suuhie.
52Deidehia Lord oto hu: Amen na Amen.
Currently Selected:
Mui Psalm 89: apbPSA
Highlight
Share
Copy
Want to have your highlights saved across all your devices? Sign up or sign in
First published as part of the Anglican Prayer Book by the Melanesian Press, 1946.
