लुकस 22
22
यहुदी अगुवर येसुसिन धरतआ गे मोका बेद्दनर
(मत्तिस २६:१-५; मरकुस १४:१-२; युहन्नस ११:४५-५३)
1अखमिरी असमा मोख़ना यहुदिर ही कट्टना पबनी अड़सा बिद्दकी रहचा।#उरख़ाकाना १२:१-२७ 2यहुदी मुध नैगर अउर मोसास ही व्यवस्था सिखाबउर आलर गने इल्चका करने आर येसुसिन छछेम पिटा गे बिद्दियर।
यहुदास येसुसिन धोका चिइदस
(मत्तिस २६:१४-१६; मरकुस १४:१०-११)
3बारह गोड़े चेलर मधे ओरोत यहुदा इस्करियोतस ही जिया भितरी सैतान कोरचा। 4ख़ने आस यहुदी मुध नैगर अउर धर्मेस ही एड़पन इरु-ख़ुजू कप्तानर गुसन केरस की एकसे येसुसिन निम्हय ख़ेक्खा नू धरतआ चिआ ओंगोन बआ की सल्लाह नन्जस। 5इदिन मेन्जर की आर खुसमारर, अउर आस गे ढिबा चिअना गछरर। 6ख़ने यहुदास राजी मन्जस अउर एकाबिरी गोहड़ा मला मनो, आबाकी येसुसिन धरतअना मोका बेद्दा हेल्लरस।
येसुस कट्टना पबनी मनबाचस
(मत्तिस २६:१७-३०; मरकुस १४:१२-२६; युहन्नस १३:२१-३०)
7अखमिरी असमा मोख़ना कट्टना पबनी नू मेढ़हो ख़द्दन दाँड़े अरगतअना उल्ला बरचा। 8येसुस पतरुसस अउर युहन्नासिन एन्ने बाचस की तइय्यस, “कला की नमा गे कट्टना पबनी ही भोजे सपड़आ।”
9ख़ने आर आसिन मेन्जर, “एम ई भोजेन एसन सपड़ओम?”
10आस आरिन बाचस, “निम यरुसलेम नू कोरतेसात अड़ी नू अम्म चेड्डका ओरोत आलस निमरिन ख़क्खोस। आस ही ख़ोख़ा-ख़ोख़ा कालके, एका एड़पा नू आस कोरओस, अइय्यम निम हूँ कोरके। 11अउर आ एड़पा ता उरुबसिन ‘एन एंग्हय चेलर गने ओक्कोन की कट्टना पबनी ही भोजे ओन्ना पाहियर ही कुठली एसन र' ई?’ बआ की गुरुस मेन्जका रअदस, बआ चिआ। 12आस मइयाँ ता तल्ला नू सिंगराचका-सपड़ाचका ओन्टा कोहाँ कुठलिन निमन एदओस, अउर अइय्यम भोजे सपड़आके।”
13आर केरर, अउर येसुस बाचका लेखअम ख़क्खियर, अउर आर कट्टना पबनी ही भोजे सपड़ाचर।
उर्बास ही भोजे
(मत्तिस २६:२६-३०; मरकुस १४:२२-२६; १ कोरिन्थिर ११:२३-२५)
14भोजे बेड़ा मन्जा, ख़ने येसुस तंग्हय मुध चेलर गने ओना-मोख़ा उक्कियस। 15आस आरिन बाचस, “एन दुक्खे खेपना ती पहलेम ई कट्टना पबनी ही भोजे निम्हय गने ओन्ना कोहाँ मने नन्जका रहचकन। 16एन्देरगेका एन निमरिन बअदन, धर्मेस ही राजी नू ई भोजे ही मने पुरा मला मन्ना गुटी एन ई भोजेन मला ओनोन।”
17अदिही ख़ोख़ा येसुस डुब्हा नू मन्जका अंगुर मध ख़ेक्खा नू होच्चस की धर्मेसिन धन्यवाद चिच्चस अउर बाचस, “इदिन होआ अउर निम होरमर ख़टरआ की ओना। 18एन्देरगेका एन निमरिन बअदन, धर्मेस ही राजी नू ई अंगुर मध ही मने पुरा मला मन्ना गुटी एन ई अंगुर मधन मला ओनोन।”
19ख़ने आस असमान होच्चस अउर धन्यवाद चिच्चका ख़ोख़ा अदिन किच्चयस अउर आर गे एन्ने बअनुम चिच्चस, “निम्हय खतरी चिच्चका इद एंग्हय देह हिके। एंग्हय सुरता गे इदिन नना।” 20अन्नेम ओन्डका ख़ोख़ा आस डुब्हान होच्चस अउर बाचस, “ई डुब्हा नू मन्जका अंगुर मध निम्हय खतरी एंग्हय ख़ेस ती हेचका ओन्टा पुना गच्छरका हिके। ई ख़ेस निम्हय खतरी बाहतारकी र' ई।#यरमियास ३१:३१-३४; १ कोरिन्थिर ११:२५
21“लेकिन एःरा, एंगन धरतुऊ आलस एंग्हय गने ओन्ना टेबिल नू उक्का रअदस।#अस्सनापाड़ना ४१:९ 22अक्कू धर्मेस ही मने नन्जका लेखा धर्मेस तय्यका एन आल तंग्दस तो खेआम पड़ारओ, लेकिन ओहरे आ आलसिन ने धर्मेस तइका एन आल तंग्दसिन धरतआदस।”
23एन्ने नलख ननू आर मधे ता ने मनो होत्एन बआ की आर ताम-ताम कच्छनखरआ हेल्लरर।
कोहाँ ने हिके?
(मत्तिस २०:२५-२८; १९:२८; मरकुस १०:४२-४५)
24अक्कू चेलर मधे होरमर ती कोहाँ ने हिके बआ की बहस मना हेल्लरा। 25येसुस आरिन बाचस, “नन-यहुदिर ही बेलर तम्हय आलर मइयाँ सासन नन्नर अउर आर आलरिन आर दव आलर हिकनर बअनन बेद्दनर। 26लेकिन निम मधे ने हूँ एन्ने मला मना। निम मधे होरमर ती कोहाँ मना बिद्दुस होरमर ती सन्नी मना पड़ारई अउर अगुवा मना बिद्दुस, नोकर लेखा तेतर-सुसर नन्नम चाही। 27अक्कू एंगन तेंगा कोहाँ ने हिके? ओना गे उक्का उरुबस का ओना गे चिऊ नोकरस? ओना गे उक्का उरुबस मलदस दरा? लेकिन एःरा, एन तो निम्हय मझही नू ओन्ना मोख़ना चिऊ नोकरस लेखा मन्जका रअदन।
28“निम एंग्हय दुक्खे गुट्ठी ही बेड़ा नू एंगा गे सँगे चिच्चका रहचकर। 29औंगे एकन्ने एम्बस एंगा गे ओन्टा सासन नन्ना अधिकार चिच्चका रअदस अन्नेकिम एन हूँ निमा गे अधिकार चिओन। 30औंगे एंग्हय राजी नू निम एंग्हय टेबिल नू ओनोर अउर मोख़ोर, अउर बेलगदी नू ओक्कोर की इस्राएल ता बारह गोतर ही न्याय ननोर।”
येसुस पतरुसस ही इन्झरकन मुन्द तेंगदस
(मत्तिस २६:३१-३५; मरकुस १४:२७-३१; युहन्नस १३:३६-३८)
31अदिही ख़ोख़ा येसुस सिमोन बअना पतरुससिन बाचस, “सिमोन, हे सिमोन, मेना एन निंगन ओन्टा कत्था बओन, किसानर ख़ेस्स ती भुसिन बेघना लेखा, निमन हूँ एंग्हय ती छिन्डा गे सैतानद धर्मेस गने पेसना निचकी र' ई। 32लेकिन एन निंग्हय पत्तअना मला एबसेरआ नेकआ बआ की निंग्हय लागी गोहरारकन, अउर फेर निन एंग्हय तरा किर्रका ख़ोख़ा भइय्योरिन पत्तअना नू बड़ियर ननके।”
33पतरुसस बाचस, “अना उर्बायो, एन निंग्हय गने जेहेल नू रआ गे अउर खेआ गे हूँ सपड़ार का रअदन।”
34ख़ने येसुस बाचस, “पतरुस, एन निंगन बअदन का, इन्ना माख़ा कोकरो चिंख़ना ती मुन्द निन एंगन तिन बेर बलदन बओय।”
येसुस चेलरिन बरना दुक्खे ही बेड़ा गे सपड़ारआ बाचका
35येसुस आरिन बाचस, “एकाबिरी एन निमरिन दवसमाचार मेनतआगे ढिबा ही थइला, झोला अउर जुता बेगर तइका रहचकन, आबिरी एन्दरा निमा गे एकअम कत्था ही चाड़ मन्जा?”
आर बाचर, “मला मन्जा।”
36येसुस बाचस, “लेकिन अक्कू नेख़य थइला र' ई, आस अदिन चेड़आ नेकआ, अन्नेम झोला हूँ चेड़आ नेकआ। अउर नेख़य गुसन टडरी मल्ला, आस तंग्हय झुलन बिसा की हूँ ओन्टा टडरी ख़ेदा नेकआ। 37एन्देरगेका एन निमरिन बअदन, ‘आस गुनहा ननुर गने गनरस’#यसायाहस ५३:१२ बआ की लिखरका कत्था एंग्हय नू पुरा मन्नम चाही। हए, एंग्हय पत्त नू लिखरका कत्था पुरा मन्नुम बरआ लगी।”
38चेलर बाचर, “अना उर्बायो, एःरा, इसन एम्हय गने दुई ठो टडरी र' ई।”
येसुस बाचस, “मन्जा।”
जैतुन परता नू येसुस ही गोहरारना
(मत्तिस २६:३६-४६; मरकुस १४:३२-४२)
39अउर हुरमी उल्ला लेखा येसुस यरुसलेम सहर अम्बियस की जैतुन परता नू केरस अउर चेलर हूँ आस गनेम केरर। 40आ अड्डा नू अड़सियस की आस चेलारिन बाचस, “मलदव कत्था गुट्ठी नू निम मला फसारआ नेकआ बआ की गोहरारआ लक्का रआ।”
41ख़ने येसुस तंग्हय चेलर ती थोरे गेच्छा केरस की मुकलिदरस की एन्ने बअतेम गोहरारस, 42“अना बाबा, निंग्हय मने र' ई होले, ई दुक्खे ही डुबहन एंग्हय गुस्ते हटबआ चिआ। लेकिन एंग्हय मने मला, निंग्हय मने दुम पुरा मना नेकआ।” 43[ताब मेर्ख़ा ती ओन्टा मेर्ख़ादुतस बरचस की आस गे बल अउर खेपना सवंग चिच्चस। 44आस ही जिया बग्गेम दुक्खे ती निन्दकी रहचा, ख़ने आस भितरी जिया तिम गोहरारस। आस ही पसिना ख़ेस लेखअम ख़ेख़ेल नू चुरख़ा लगिया।]
45गोहरारस की येसुस तंग्हय चेलर मन्जका अड्डा नू किर्रियस की बरचस ख़ने, आर दुक्खे ती ख़ड़दिका करने ख़न्दरकन ख़क्खियस। 46ख़ने आस आरिन बाचस, “निम एन्देरगे बिडरका रअदर? चोआ अउर परिक्छा नू मला खतरओम बआ की गोहरारआ।”
येसुस ही धरतारना
(मत्तिस २६:४७-५६; मरकुस १४:४३-५०; युहन्नस १८:३-११)
47येसुस ई कत्था कच्छनखरआ लक्का रहचस ख़ने ओन्टा गोहड़ा असन अड़सिया, बारह गोड़े चेलर मधे यहुदा बअना ओरोत चेलस आलर ही अगु-अगू बरचस। अउर येसुसिन गोड़ लग्गना खतरी आसिन चोंखागे आस हेद्दे केरस। 48लेकिन येसुस आसिन बाचस, “यहुदा, निन धर्मेस तय्यका एन आल तंग्दसिन चोंखा की धोखा चआ बेद्ददय?”
49ताब येसुस ही चेलर आसिन धरतआ गे आलर बरचकन इरियर की येसुसिन मेन्जर, “उर्बायो, एन्दरा इबड़रिन टडरी ती ख़ोतोम?” 50आर मधे ती ओरोत चेलस टडरी ती हुरमी ती कोहाँ यहुदी नैगस ही नोकरस ही तिना ख़ेबदन ख़ोत्तस चिच्चस।
51लेकिन येसुस बाचस, “अक्कू मन्जा, अम्बा चिआ!” बाचस की आ आलस ही ख़ेबदन छुबचस की कोड़े नन्जस चिच्चस।
52ख़ने येसुस ही बिड़दो नू बरचका यहुदी मुध नैगर, धर्मेस ही एड़पा ख़ापू सैनर अउर यहुदी अगुवारिन बाचस, “एन्दरा एन ख़लबन हिकदन दरा निम टडरी अउर डन्डा गुट्ठी ओन्दरकर की एंगन धरआ बरचका रअदर? 53एन हुरमी उल्ला धर्मेस ही एड़पा नू निम्हय गनेम रहचकन। लेकिन निम एंगन मला धरचकर। उख़ा ही सवंग नलख नन्जका बेड़ा नुम निम्हय नलख नन्ना बेड़ा हिके।”
पतरुसस ख्रिस्तसिन बलदन बअदस
(मत्तिस २६:६९-७५; मरकुस १४:६६-७२; युहन्नस १८:१५-१८, २५-२७)
54धर्मेस ही एड़पन इरु-ख़ुजू कप्तानर येसुसिन धरचर की हुरमी ती कोहाँ यहुदी नैगस ही एड़पा नू ओन्दरर। लेकिन पतरुसस गेच्छा-गेच्छा तिम आस ही ख़ोख़ा-ख़ोख़ा बरचस। 55असन आलर चाली नू चिच्च दगचर की सेक्रआ लगियर ख़ने पतरुसस हूँ बरचस की आर गनेम उक्कियस। 56ओरोत नोकरनिद चिच्च ही बिल्ली नू पतरुससिन बेस्स कुना इरिया। औंगे बाचा, “ई आलस हूँ तो येसुस गने रहचस।”
57लेकिन पतरुसस एन्ने बअनुम ठकचस, “अनय दयगो, एन आसिन बलदन।”
58ओन्द बेड़ा ख़ोख़ा ओर्तोस आसिन इरियस की बाचस, “निन हूँ तो आर ही दुम संगे हिकदय।”
पतरुसस बाचस, “अना ददाहो, एन मलदन।”
59ओन्द घन्टा लेक्खआ मन्जा ख़ने दोसरा ओरोत आलस बाचस, “ई आलस हूँ मानिम येसुस गनेम रहचस, एन्देरगेका इस तो गालिल ता दुम हिकदस।”
60लेकिन पतरुसस बाचस, “अना संगे, निन एन्दरा बआ लगदय, एन बलदन।” आस बअतेबअतेम कोकरो चिंख़िया।
61ख़ने उर्बास किर्रियस की पतरुससिन इरियस, ताब उर्बास “इन्ना माख़ा कोकरो चिंख़ना ती मुन्द निन एंगन तिन बेर बलदन बओय” बाचका कत्था पतरुसस गे सुरता बरचा। 62अउर आस बाहरी उरख़ियस की भोकरार-भोकरार चिंख़ियस।
येसुस ही अपमान
(मत्तिस २६:६७-६८; मरकुस १४:६५)
63अक्कू येसुसिन ख़ापू आलर आसिन ठट्ठा नन्जर अउर लोआ-पस्सआ लगियर। 64आस ही ख़न्नन मुन्धचर की लोअनुम मेन्जर, “मुन्द तेंगा की बआ का निंगन ने लौचा?” 65आर आसिन लज्जे मोख़ताचर की बग्गे मला बेस्स कत्था गुट्ठी येसुस ही बिड़दो नू कच्छनखरर।
कोहाँ सभा ही अगू येसुस
(मत्तिस २६:५७-६८; मरकुस १४:५३-६५; युहन्नस १८:१९-२४)
66बिज्जिया ख़ने, यहुदी मुध नैगर अउर मोसास ही व्यवस्था सिखाबउर ख़ोड़रर। आर येसुसिन तम्हय कोहाँ सभा नू होच्चर की बाचर, 67“अगर निन ख्रिस्त हिकदय होले एमन बआ।” आस बाचस, “एन तेंगोन होले हूँ निम मला पत्तओर।”
68“एन निमरिन मेनोन होले हूँ निम आना मला किर्तओर। 69लेकिन अक्कू धर्मेस तय्यका एन आल तंग्दस हुरमी सवंग उइयू धर्मेस ही तिना तरा ओक्कोस।”
70ख़ने आर होरमर बाचर, “होले, एन्दरा निन धर्मेस ही तंग्दय हिकदय?”
आस आर गे किर्ताचस की बाचस, “निमुम बअदर, एन आसुम हिकदन।”
71ख़ने आर बाचर, “एमा गे दोसरा एन्देर गोवाह ही चाड़ र' ई दरा? एन्देरगेका नाम आस ही बई तिम मेन्जकत होच्चकत।”
Currently Selected:
लुकस 22: KRUX
Highlight
Copy
Compare
Share
Want to have your highlights saved across all your devices? Sign up or sign in
© 2024 (Active), Mother Tongue Translators Society and Wycliffe Bible Translators, Inc. All rights reserved.
लुकस 22
22
यहुदी अगुवर येसुसिन धरतआ गे मोका बेद्दनर
(मत्तिस २६:१-५; मरकुस १४:१-२; युहन्नस ११:४५-५३)
1अखमिरी असमा मोख़ना यहुदिर ही कट्टना पबनी अड़सा बिद्दकी रहचा।#उरख़ाकाना १२:१-२७ 2यहुदी मुध नैगर अउर मोसास ही व्यवस्था सिखाबउर आलर गने इल्चका करने आर येसुसिन छछेम पिटा गे बिद्दियर।
यहुदास येसुसिन धोका चिइदस
(मत्तिस २६:१४-१६; मरकुस १४:१०-११)
3बारह गोड़े चेलर मधे ओरोत यहुदा इस्करियोतस ही जिया भितरी सैतान कोरचा। 4ख़ने आस यहुदी मुध नैगर अउर धर्मेस ही एड़पन इरु-ख़ुजू कप्तानर गुसन केरस की एकसे येसुसिन निम्हय ख़ेक्खा नू धरतआ चिआ ओंगोन बआ की सल्लाह नन्जस। 5इदिन मेन्जर की आर खुसमारर, अउर आस गे ढिबा चिअना गछरर। 6ख़ने यहुदास राजी मन्जस अउर एकाबिरी गोहड़ा मला मनो, आबाकी येसुसिन धरतअना मोका बेद्दा हेल्लरस।
येसुस कट्टना पबनी मनबाचस
(मत्तिस २६:१७-३०; मरकुस १४:१२-२६; युहन्नस १३:२१-३०)
7अखमिरी असमा मोख़ना कट्टना पबनी नू मेढ़हो ख़द्दन दाँड़े अरगतअना उल्ला बरचा। 8येसुस पतरुसस अउर युहन्नासिन एन्ने बाचस की तइय्यस, “कला की नमा गे कट्टना पबनी ही भोजे सपड़आ।”
9ख़ने आर आसिन मेन्जर, “एम ई भोजेन एसन सपड़ओम?”
10आस आरिन बाचस, “निम यरुसलेम नू कोरतेसात अड़ी नू अम्म चेड्डका ओरोत आलस निमरिन ख़क्खोस। आस ही ख़ोख़ा-ख़ोख़ा कालके, एका एड़पा नू आस कोरओस, अइय्यम निम हूँ कोरके। 11अउर आ एड़पा ता उरुबसिन ‘एन एंग्हय चेलर गने ओक्कोन की कट्टना पबनी ही भोजे ओन्ना पाहियर ही कुठली एसन र' ई?’ बआ की गुरुस मेन्जका रअदस, बआ चिआ। 12आस मइयाँ ता तल्ला नू सिंगराचका-सपड़ाचका ओन्टा कोहाँ कुठलिन निमन एदओस, अउर अइय्यम भोजे सपड़आके।”
13आर केरर, अउर येसुस बाचका लेखअम ख़क्खियर, अउर आर कट्टना पबनी ही भोजे सपड़ाचर।
उर्बास ही भोजे
(मत्तिस २६:२६-३०; मरकुस १४:२२-२६; १ कोरिन्थिर ११:२३-२५)
14भोजे बेड़ा मन्जा, ख़ने येसुस तंग्हय मुध चेलर गने ओना-मोख़ा उक्कियस। 15आस आरिन बाचस, “एन दुक्खे खेपना ती पहलेम ई कट्टना पबनी ही भोजे निम्हय गने ओन्ना कोहाँ मने नन्जका रहचकन। 16एन्देरगेका एन निमरिन बअदन, धर्मेस ही राजी नू ई भोजे ही मने पुरा मला मन्ना गुटी एन ई भोजेन मला ओनोन।”
17अदिही ख़ोख़ा येसुस डुब्हा नू मन्जका अंगुर मध ख़ेक्खा नू होच्चस की धर्मेसिन धन्यवाद चिच्चस अउर बाचस, “इदिन होआ अउर निम होरमर ख़टरआ की ओना। 18एन्देरगेका एन निमरिन बअदन, धर्मेस ही राजी नू ई अंगुर मध ही मने पुरा मला मन्ना गुटी एन ई अंगुर मधन मला ओनोन।”
19ख़ने आस असमान होच्चस अउर धन्यवाद चिच्चका ख़ोख़ा अदिन किच्चयस अउर आर गे एन्ने बअनुम चिच्चस, “निम्हय खतरी चिच्चका इद एंग्हय देह हिके। एंग्हय सुरता गे इदिन नना।” 20अन्नेम ओन्डका ख़ोख़ा आस डुब्हान होच्चस अउर बाचस, “ई डुब्हा नू मन्जका अंगुर मध निम्हय खतरी एंग्हय ख़ेस ती हेचका ओन्टा पुना गच्छरका हिके। ई ख़ेस निम्हय खतरी बाहतारकी र' ई।#यरमियास ३१:३१-३४; १ कोरिन्थिर ११:२५
21“लेकिन एःरा, एंगन धरतुऊ आलस एंग्हय गने ओन्ना टेबिल नू उक्का रअदस।#अस्सनापाड़ना ४१:९ 22अक्कू धर्मेस ही मने नन्जका लेखा धर्मेस तय्यका एन आल तंग्दस तो खेआम पड़ारओ, लेकिन ओहरे आ आलसिन ने धर्मेस तइका एन आल तंग्दसिन धरतआदस।”
23एन्ने नलख ननू आर मधे ता ने मनो होत्एन बआ की आर ताम-ताम कच्छनखरआ हेल्लरर।
कोहाँ ने हिके?
(मत्तिस २०:२५-२८; १९:२८; मरकुस १०:४२-४५)
24अक्कू चेलर मधे होरमर ती कोहाँ ने हिके बआ की बहस मना हेल्लरा। 25येसुस आरिन बाचस, “नन-यहुदिर ही बेलर तम्हय आलर मइयाँ सासन नन्नर अउर आर आलरिन आर दव आलर हिकनर बअनन बेद्दनर। 26लेकिन निम मधे ने हूँ एन्ने मला मना। निम मधे होरमर ती कोहाँ मना बिद्दुस होरमर ती सन्नी मना पड़ारई अउर अगुवा मना बिद्दुस, नोकर लेखा तेतर-सुसर नन्नम चाही। 27अक्कू एंगन तेंगा कोहाँ ने हिके? ओना गे उक्का उरुबस का ओना गे चिऊ नोकरस? ओना गे उक्का उरुबस मलदस दरा? लेकिन एःरा, एन तो निम्हय मझही नू ओन्ना मोख़ना चिऊ नोकरस लेखा मन्जका रअदन।
28“निम एंग्हय दुक्खे गुट्ठी ही बेड़ा नू एंगा गे सँगे चिच्चका रहचकर। 29औंगे एकन्ने एम्बस एंगा गे ओन्टा सासन नन्ना अधिकार चिच्चका रअदस अन्नेकिम एन हूँ निमा गे अधिकार चिओन। 30औंगे एंग्हय राजी नू निम एंग्हय टेबिल नू ओनोर अउर मोख़ोर, अउर बेलगदी नू ओक्कोर की इस्राएल ता बारह गोतर ही न्याय ननोर।”
येसुस पतरुसस ही इन्झरकन मुन्द तेंगदस
(मत्तिस २६:३१-३५; मरकुस १४:२७-३१; युहन्नस १३:३६-३८)
31अदिही ख़ोख़ा येसुस सिमोन बअना पतरुससिन बाचस, “सिमोन, हे सिमोन, मेना एन निंगन ओन्टा कत्था बओन, किसानर ख़ेस्स ती भुसिन बेघना लेखा, निमन हूँ एंग्हय ती छिन्डा गे सैतानद धर्मेस गने पेसना निचकी र' ई। 32लेकिन एन निंग्हय पत्तअना मला एबसेरआ नेकआ बआ की निंग्हय लागी गोहरारकन, अउर फेर निन एंग्हय तरा किर्रका ख़ोख़ा भइय्योरिन पत्तअना नू बड़ियर ननके।”
33पतरुसस बाचस, “अना उर्बायो, एन निंग्हय गने जेहेल नू रआ गे अउर खेआ गे हूँ सपड़ार का रअदन।”
34ख़ने येसुस बाचस, “पतरुस, एन निंगन बअदन का, इन्ना माख़ा कोकरो चिंख़ना ती मुन्द निन एंगन तिन बेर बलदन बओय।”
येसुस चेलरिन बरना दुक्खे ही बेड़ा गे सपड़ारआ बाचका
35येसुस आरिन बाचस, “एकाबिरी एन निमरिन दवसमाचार मेनतआगे ढिबा ही थइला, झोला अउर जुता बेगर तइका रहचकन, आबिरी एन्दरा निमा गे एकअम कत्था ही चाड़ मन्जा?”
आर बाचर, “मला मन्जा।”
36येसुस बाचस, “लेकिन अक्कू नेख़य थइला र' ई, आस अदिन चेड़आ नेकआ, अन्नेम झोला हूँ चेड़आ नेकआ। अउर नेख़य गुसन टडरी मल्ला, आस तंग्हय झुलन बिसा की हूँ ओन्टा टडरी ख़ेदा नेकआ। 37एन्देरगेका एन निमरिन बअदन, ‘आस गुनहा ननुर गने गनरस’#यसायाहस ५३:१२ बआ की लिखरका कत्था एंग्हय नू पुरा मन्नम चाही। हए, एंग्हय पत्त नू लिखरका कत्था पुरा मन्नुम बरआ लगी।”
38चेलर बाचर, “अना उर्बायो, एःरा, इसन एम्हय गने दुई ठो टडरी र' ई।”
येसुस बाचस, “मन्जा।”
जैतुन परता नू येसुस ही गोहरारना
(मत्तिस २६:३६-४६; मरकुस १४:३२-४२)
39अउर हुरमी उल्ला लेखा येसुस यरुसलेम सहर अम्बियस की जैतुन परता नू केरस अउर चेलर हूँ आस गनेम केरर। 40आ अड्डा नू अड़सियस की आस चेलारिन बाचस, “मलदव कत्था गुट्ठी नू निम मला फसारआ नेकआ बआ की गोहरारआ लक्का रआ।”
41ख़ने येसुस तंग्हय चेलर ती थोरे गेच्छा केरस की मुकलिदरस की एन्ने बअतेम गोहरारस, 42“अना बाबा, निंग्हय मने र' ई होले, ई दुक्खे ही डुबहन एंग्हय गुस्ते हटबआ चिआ। लेकिन एंग्हय मने मला, निंग्हय मने दुम पुरा मना नेकआ।” 43[ताब मेर्ख़ा ती ओन्टा मेर्ख़ादुतस बरचस की आस गे बल अउर खेपना सवंग चिच्चस। 44आस ही जिया बग्गेम दुक्खे ती निन्दकी रहचा, ख़ने आस भितरी जिया तिम गोहरारस। आस ही पसिना ख़ेस लेखअम ख़ेख़ेल नू चुरख़ा लगिया।]
45गोहरारस की येसुस तंग्हय चेलर मन्जका अड्डा नू किर्रियस की बरचस ख़ने, आर दुक्खे ती ख़ड़दिका करने ख़न्दरकन ख़क्खियस। 46ख़ने आस आरिन बाचस, “निम एन्देरगे बिडरका रअदर? चोआ अउर परिक्छा नू मला खतरओम बआ की गोहरारआ।”
येसुस ही धरतारना
(मत्तिस २६:४७-५६; मरकुस १४:४३-५०; युहन्नस १८:३-११)
47येसुस ई कत्था कच्छनखरआ लक्का रहचस ख़ने ओन्टा गोहड़ा असन अड़सिया, बारह गोड़े चेलर मधे यहुदा बअना ओरोत चेलस आलर ही अगु-अगू बरचस। अउर येसुसिन गोड़ लग्गना खतरी आसिन चोंखागे आस हेद्दे केरस। 48लेकिन येसुस आसिन बाचस, “यहुदा, निन धर्मेस तय्यका एन आल तंग्दसिन चोंखा की धोखा चआ बेद्ददय?”
49ताब येसुस ही चेलर आसिन धरतआ गे आलर बरचकन इरियर की येसुसिन मेन्जर, “उर्बायो, एन्दरा इबड़रिन टडरी ती ख़ोतोम?” 50आर मधे ती ओरोत चेलस टडरी ती हुरमी ती कोहाँ यहुदी नैगस ही नोकरस ही तिना ख़ेबदन ख़ोत्तस चिच्चस।
51लेकिन येसुस बाचस, “अक्कू मन्जा, अम्बा चिआ!” बाचस की आ आलस ही ख़ेबदन छुबचस की कोड़े नन्जस चिच्चस।
52ख़ने येसुस ही बिड़दो नू बरचका यहुदी मुध नैगर, धर्मेस ही एड़पा ख़ापू सैनर अउर यहुदी अगुवारिन बाचस, “एन्दरा एन ख़लबन हिकदन दरा निम टडरी अउर डन्डा गुट्ठी ओन्दरकर की एंगन धरआ बरचका रअदर? 53एन हुरमी उल्ला धर्मेस ही एड़पा नू निम्हय गनेम रहचकन। लेकिन निम एंगन मला धरचकर। उख़ा ही सवंग नलख नन्जका बेड़ा नुम निम्हय नलख नन्ना बेड़ा हिके।”
पतरुसस ख्रिस्तसिन बलदन बअदस
(मत्तिस २६:६९-७५; मरकुस १४:६६-७२; युहन्नस १८:१५-१८, २५-२७)
54धर्मेस ही एड़पन इरु-ख़ुजू कप्तानर येसुसिन धरचर की हुरमी ती कोहाँ यहुदी नैगस ही एड़पा नू ओन्दरर। लेकिन पतरुसस गेच्छा-गेच्छा तिम आस ही ख़ोख़ा-ख़ोख़ा बरचस। 55असन आलर चाली नू चिच्च दगचर की सेक्रआ लगियर ख़ने पतरुसस हूँ बरचस की आर गनेम उक्कियस। 56ओरोत नोकरनिद चिच्च ही बिल्ली नू पतरुससिन बेस्स कुना इरिया। औंगे बाचा, “ई आलस हूँ तो येसुस गने रहचस।”
57लेकिन पतरुसस एन्ने बअनुम ठकचस, “अनय दयगो, एन आसिन बलदन।”
58ओन्द बेड़ा ख़ोख़ा ओर्तोस आसिन इरियस की बाचस, “निन हूँ तो आर ही दुम संगे हिकदय।”
पतरुसस बाचस, “अना ददाहो, एन मलदन।”
59ओन्द घन्टा लेक्खआ मन्जा ख़ने दोसरा ओरोत आलस बाचस, “ई आलस हूँ मानिम येसुस गनेम रहचस, एन्देरगेका इस तो गालिल ता दुम हिकदस।”
60लेकिन पतरुसस बाचस, “अना संगे, निन एन्दरा बआ लगदय, एन बलदन।” आस बअतेबअतेम कोकरो चिंख़िया।
61ख़ने उर्बास किर्रियस की पतरुससिन इरियस, ताब उर्बास “इन्ना माख़ा कोकरो चिंख़ना ती मुन्द निन एंगन तिन बेर बलदन बओय” बाचका कत्था पतरुसस गे सुरता बरचा। 62अउर आस बाहरी उरख़ियस की भोकरार-भोकरार चिंख़ियस।
येसुस ही अपमान
(मत्तिस २६:६७-६८; मरकुस १४:६५)
63अक्कू येसुसिन ख़ापू आलर आसिन ठट्ठा नन्जर अउर लोआ-पस्सआ लगियर। 64आस ही ख़न्नन मुन्धचर की लोअनुम मेन्जर, “मुन्द तेंगा की बआ का निंगन ने लौचा?” 65आर आसिन लज्जे मोख़ताचर की बग्गे मला बेस्स कत्था गुट्ठी येसुस ही बिड़दो नू कच्छनखरर।
कोहाँ सभा ही अगू येसुस
(मत्तिस २६:५७-६८; मरकुस १४:५३-६५; युहन्नस १८:१९-२४)
66बिज्जिया ख़ने, यहुदी मुध नैगर अउर मोसास ही व्यवस्था सिखाबउर ख़ोड़रर। आर येसुसिन तम्हय कोहाँ सभा नू होच्चर की बाचर, 67“अगर निन ख्रिस्त हिकदय होले एमन बआ।” आस बाचस, “एन तेंगोन होले हूँ निम मला पत्तओर।”
68“एन निमरिन मेनोन होले हूँ निम आना मला किर्तओर। 69लेकिन अक्कू धर्मेस तय्यका एन आल तंग्दस हुरमी सवंग उइयू धर्मेस ही तिना तरा ओक्कोस।”
70ख़ने आर होरमर बाचर, “होले, एन्दरा निन धर्मेस ही तंग्दय हिकदय?”
आस आर गे किर्ताचस की बाचस, “निमुम बअदर, एन आसुम हिकदन।”
71ख़ने आर बाचर, “एमा गे दोसरा एन्देर गोवाह ही चाड़ र' ई दरा? एन्देरगेका नाम आस ही बई तिम मेन्जकत होच्चकत।”
Currently Selected:
:
Highlight
Copy
Compare
Share
Want to have your highlights saved across all your devices? Sign up or sign in
© 2024 (Active), Mother Tongue Translators Society and Wycliffe Bible Translators, Inc. All rights reserved.