मुध चेलर 21
21
पावलस ही यरुसलेम ही डहरे एकना
1एकाबिरी एम आर ती छिन्डिरकम की कोहाँ डोँगा नू अरगकम की कोस नू अड़सकम, अउर दोसरा उल्ला रोडस नू अउर अस्ते ती पटारा नू अड़सकम। 2ख़ने फोनिके नू काना ओन्टा कोहाँ डोँगा ख़क्खम की एम अइय्या नुम अरगकम की केरकम। 3एकाबिरी सा'इप्रस टापू एथरा, ख़ने अदिन एम डेब्बा तरा आ पक्खे सिरिया तरा केरकम की टुरोस नू इत्तकम। एन्देरगेका कोहाँ डोँगा ती मालसमान असन एत्त'आना रहचा। 4असन एम पत्त'ऊ आलरिन ख़क्खम की सात उल्ला गुटी आर गने रहचकम। नेम्हा बोलतस ती अगुवा'ई ख़क्खियर की आर पावलसिन “यरुसलेम नू अमके काला” बाचर। 5लेकिन सात उल्ला रहचकम की एम आर ती बिदा मन्जकम की उरख़कम। होरमा पत्त'ऊ भ'इय्योर, आर ही मुक्कर, ख़द्दख़र्रार हूँ एमरिन अड़सत'आ गे सहर बाहरी गुटी बरचर अउर एम होरमम समुन्दर ही गन्डा नू मुक लिदरकम की गोहरारकम। 6ताबसिले एम कोहाँ डोँगा नू अरगकम अउर आर तम्हय एड़पा तरा किर्रियर।
7टुरोस ती समुन्दर डहरे इक्कम की एम टोलेमा'इस नू अड़सकम। असन पत्त'ऊ भ'इय्योरिन गोड़ लग्गकम अउर आर गने ओन्द उल्ला रहचकम। 8दोसरा उल्ला एम बिदा मन्जकम की कैसरिया नगरे नू बरचकम। अउर असन एम दवसमाचार तिंगू फिलिपस ही एड़पा नू केरकम की रहचकम। फिलिपस यरुसलेम नू सेवा नना गे चाजरका सात गोड़ेर मधे ओर्तोस रहचस।#मुध चेलर ६:५; ८:५ 9मुन्द तिंगू आस ही चार गोड़े डिन्डा कुके ख़द्दर रहचर। 10एम असन जोक्क उल्ला रहचकम की यहुदिया प्रदेस ती अगाबस नामे मन्जका ओरोत अगमजानिस बरचस।#मुध चेलर ११:२८ 11आस एम्हय गुसन बरचस की पावलस ही गम्छन होच्चस की तंग्हय ख़ेड्ड-ख़ेक्खन हेचस अउर बाचस, “नेम्हा बोलतस एन्ने ब'अदस, ‘ई गम्छा एका आलस ही हिके, आसिन यरुसलेम नू यहुदिर एन्नेम हे'ओर अउर नन-यहुदिर ही ख़ेक्खा नू सोप'ओर चि'ओर।’”
12ई कत्थन मेन्जकम की एम अउर आ अड्डा ता आलर मिल्रकम की आसिन यरुसलेम नू अमा कला ब'आ की बिन्ती नन्जकम। 13लेकिन पावलस बिड़दाचस की बाचस, “निम एन्नेकी चिख़दर की एंग्हय जियन एन्देरगे दुखी नन्दर? एन्देरगेका उर्बा येसुस ही नामे ही खतरी कैद नू पड़ारना लेका मला, लेकिन यरुसलेम नू खे'आ गे हूँ एन सपड़ारका र'अदन।”
14आसिन मनाब'आ पोल्ना खतरी “उर्बस ही इच्छा पुरा मना नेक'आ” ब'आ की एम छछेम मन्जकम।
15जोक्क उल्ला ख़ोख़ा एम सपड़ारकम, अउर यरुसलेम तरा केरकम। 16एम्हय संगे नू कैसरिया ता एक'अम-एक'अम पत्तु'उर हूँ केरर, अउर आर एमरिन सा'इप्रस ता ओरोत पच्चा पत्त'ऊ मनासोनस ही एड़पा नू ओन्दरर। आस गुसन एमा गे र'आ पड़ारकी रहचा।
पावलस याकुबसिन ख़क्खदस
17ख़ने एकाबिरी एम यरुसलेम नू अड़सकम, ताब पत्त'उर एमरिन खुसमारनुम स्वागत नन्जर। 18दोसरा उल्ला पावलस एम्हय गने याकुबस गुसन केरस। असन होरमा अगुवर रहचर। 19पावलस आरिन गोड़ लग्गियस, अउर आस नन्जका नलख ती नन-यहुदिर ही मझी नू धर्मेस एक्कने खल्ल ती नलख नन्जस अदिही पत्त नू आरिन ओन्टा-ओन्टा नन्जस की तिंगियस। 20इदिन मेन्जर की आर धर्मेस ही महबा नन्जर। ताबसिले आसिन बाचर, “एःरा भ'ई, यहुदिर ही मझी नू पत्त'उर हजारौं र'अनर, अउर आर व्यवस्था ता नियम-विधी गुट्ठिन बेस्स कुना मननर। 21नन-यहुदी आलर ही मझी नू र'ऊ यहुदिरिन ‘मोसस ही व्यवस्थन मला मन'आ पड़ार'ओ, कुक्को ख़द्दर ही खतना नना गे मला पड़ार'ओ अउर यहुदिर ही विधी गुट्ठिन मला मनआ पड़ार'ओ’ ब'आ की निन सिखाब'अदय ब'अना कत्था आर हूँ मेन्जका र'अनर। 22अक्कू नाम एन्दरा ननोत? निन बरचका र'अदय ब'आ की आर मानिम मेनोर। 23औंगे एम एन्दरा ब'अदम, अदिन नना। भाकल ननू चार गोड़ेर एम्हय गने र'अनर। 24इरिन हो'आ की निन हूँ इर ही संगे-संगेम सुध मना, अउर इर ही चुट्टी मुन्डरना बिरी ता खर्चन निन तिरके। एन्नेकी निन मोसस ही व्यवस्थन मन्नन इरकय की निंग्हय पत्त नू मेन्जका एक'अम कत्था मानी हिके ब'आ की होरमर अख़'ओर।#गिन्ती ६:१३-२१ 25लेकिन नन-यहुदिर ने पत्ताचका र'अनर, आर मुरुत गुट्ठी गे दाँड़े अरगका चिजन, ख़ेस, टोटा मोचराचका की पिटका जानबर ही अहड़न अमा मोख़ा अउर बेभिचार ती गेच्छा र'आ पड़ार'ई ब'अनन एम निर्नय नन्जकम की चिट्ठी लिखचका र'अदम।”#मुध चेलर १५:२९
26ताबसिले पावलस अबड़ा आलरिन होच्चस, अउर दोसरा उल्ला आर ही संगे-संगेम तंगन हूँ सुध नन्ताचस, अउर सुधिकरन ही उल्ला इकला पुरा मनो होत्'एन, अउर होरमर ही खतरी चि'अना भेटी ही सुचना चि'आ गे आस धर्मेस ही मन्दिर भितरी कोरचस।
पावलस ही धरतारना
27एकाबिरी सातौं उल्ला पुरा मना बिद्दकी रहचा, ताब एसिया ता यहुदिर पावलसिन धर्मेस ही मन्दिर नू इरियर की गोट्टा गोहड़न हुचकाचर अउर आसिन धरचर। 28आर एन्ने ब'अनुम चिच्चियार'आ हेल्लरर, “इस्रा'एल ता आलरो, संगरा नना! आलरिन हुरमी अड्डा काला की नम्हय जाती, मोसस ही व्यवस्थन अउर ई अड्डा ही बिड़दो नू सिखाब'ऊ आलस इसुम हिकदस। ई बग्गे लेका माला, इस ग्रिकरिन हूँ धर्मेस ही मन्दिर नू ओन्दरस की ई नेम्हा अड्डन असुध नन्जका चिच्चका र'अदस।” 29एन्देरगेका इस ही अगू नू आर एफिसस ता त्रोफिमस ब'अना ओर्तोसिन पावलस धर्मेस ही मन्दिर नू ओन्दरका हिकदस ब'आ की आर सोच्चर।#मुध चेलर २०:४
30ताब गोट्टा सहर नू हल्ला मन्जा, अउर आलर ओन्द संगेम बुंगनुम बरचर। आर पावलसिन धरचर की धर्मेस ही मन्दिर ती बाहरी घिस्याबा'अनुम ओन्दरर, अउर तुरतेम बली गुट्ठिन मुच्चियर। 31एकाबिरी आर आसिन पिटा बिद्दका रहचर, आबिरी गोट्टा यरुसलेम सहर नू लो'अना पिटना मना बेद्दा लगी ब'अना कत्था रोमी सेनापतिस गुसन अड़सिया। 32आस तुरतेम सिपाही अउर कप्तानरिन संगे नू होच्चस की आर गुसन बुंगनुम अड़सियस। आर सेनापती अउर सिपाहिरिन इरियर की पावलसिन लो'आ गे अम्बियर। 33ताब आ सेनापतिस हेद्दे बरचस की पावलसिन धरचस अउर दु'ई ठो सिकड़ी ती हे'आ गे पेसस। आस मेन्जस, “इस ने हिकदस, अउर इस एन्दरा नन्जस?” 34लेकिन आ गोहड़ा नू मन्जका आलर ती नेक'उम ओन्टा कत्था अउर नेक'उम दोसरा कत्था बाचर की चिच्चियारर, अउर आस आ हल्ला करने एन्दरा मन्जकी र'ई अदिन बलका करने पावलसिन ब्यारेक नू हो'आ गुचा बाचस की पेसस। 35ख़ने आर सिड़ही नू अरगा लगियर ख़ने आलर कोहड़े हल्ला नन्जर की पावलसिन पिटा बेद्दा लगियर ख़ने सिपाहिर आसिन चेड्डर की होच्चर। 36एन्देरगेका आलर ही गोहड़ा “आसिन पिटा” ब'आ की चिच्चियारनुम ख़ोख़ा-ख़ोख़ा लक्का रहचर।
पावलस तंग्हय पत्त नू तिंगका
37ब्यारेक भितरी अड़सत'आ हेल्लरर ख़ने पावलस सेनापतिसिन बाचस, “एन निंगन एन्दर'उम कत्था ब'आ ओंगोन?” ख़ने आ सेनापतिस बाचस, “एन्दरा निन ग्रिक भखा हूँ कच्छनखर'आ गे अख़दय?
38“एन्दरा निन आ मिसरी दुम मलदय, ने जोक्क बेड़ा अगू विद्रोह नन्जस की चार हजार विद्रोहरिन फिटकी अड्डा नू होच्चस की केरका रहचस?”
39पावलस बाचस, “मला! एन तो किलिकिया ता टार्सस नू कुन्दुरका यहुदी हिकदन। एन आ नामे चलरका सहर ता दुम ओन्टा नागरिक हिकदन। दया नना की एंगन ई आलर ही अगू नू एन्दर'उम कत्था कच्छनखर'आ गे चि'आ।”
40एकाबिरी आस कच्छनखर'आ गे चिच्चस, ताब सिड़ही नू इज्जस की पावलस आलरिन ख़ेक्खा ती इसारा नन्जस। आलर छछेम मन्जर ख़ने आस आरिन हिब्रू भखा नू एन्ने बाचस,
Currently Selected:
मुध चेलर 21: KRUX
Highlight
Copy
Compare
Share
Want to have your highlights saved across all your devices? Sign up or sign in
© 2024 (Active), Mother Tongue Translators Society and Wycliffe Bible Translators, Inc. All rights reserved.
मुध चेलर 21
21
पावलस ही यरुसलेम ही डहरे एकना
1एकाबिरी एम आर ती छिन्डिरकम की कोहाँ डोँगा नू अरगकम की कोस नू अड़सकम, अउर दोसरा उल्ला रोडस नू अउर अस्ते ती पटारा नू अड़सकम। 2ख़ने फोनिके नू काना ओन्टा कोहाँ डोँगा ख़क्खम की एम अइय्या नुम अरगकम की केरकम। 3एकाबिरी सा'इप्रस टापू एथरा, ख़ने अदिन एम डेब्बा तरा आ पक्खे सिरिया तरा केरकम की टुरोस नू इत्तकम। एन्देरगेका कोहाँ डोँगा ती मालसमान असन एत्त'आना रहचा। 4असन एम पत्त'ऊ आलरिन ख़क्खम की सात उल्ला गुटी आर गने रहचकम। नेम्हा बोलतस ती अगुवा'ई ख़क्खियर की आर पावलसिन “यरुसलेम नू अमके काला” बाचर। 5लेकिन सात उल्ला रहचकम की एम आर ती बिदा मन्जकम की उरख़कम। होरमा पत्त'ऊ भ'इय्योर, आर ही मुक्कर, ख़द्दख़र्रार हूँ एमरिन अड़सत'आ गे सहर बाहरी गुटी बरचर अउर एम होरमम समुन्दर ही गन्डा नू मुक लिदरकम की गोहरारकम। 6ताबसिले एम कोहाँ डोँगा नू अरगकम अउर आर तम्हय एड़पा तरा किर्रियर।
7टुरोस ती समुन्दर डहरे इक्कम की एम टोलेमा'इस नू अड़सकम। असन पत्त'ऊ भ'इय्योरिन गोड़ लग्गकम अउर आर गने ओन्द उल्ला रहचकम। 8दोसरा उल्ला एम बिदा मन्जकम की कैसरिया नगरे नू बरचकम। अउर असन एम दवसमाचार तिंगू फिलिपस ही एड़पा नू केरकम की रहचकम। फिलिपस यरुसलेम नू सेवा नना गे चाजरका सात गोड़ेर मधे ओर्तोस रहचस।#मुध चेलर ६:५; ८:५ 9मुन्द तिंगू आस ही चार गोड़े डिन्डा कुके ख़द्दर रहचर। 10एम असन जोक्क उल्ला रहचकम की यहुदिया प्रदेस ती अगाबस नामे मन्जका ओरोत अगमजानिस बरचस।#मुध चेलर ११:२८ 11आस एम्हय गुसन बरचस की पावलस ही गम्छन होच्चस की तंग्हय ख़ेड्ड-ख़ेक्खन हेचस अउर बाचस, “नेम्हा बोलतस एन्ने ब'अदस, ‘ई गम्छा एका आलस ही हिके, आसिन यरुसलेम नू यहुदिर एन्नेम हे'ओर अउर नन-यहुदिर ही ख़ेक्खा नू सोप'ओर चि'ओर।’”
12ई कत्थन मेन्जकम की एम अउर आ अड्डा ता आलर मिल्रकम की आसिन यरुसलेम नू अमा कला ब'आ की बिन्ती नन्जकम। 13लेकिन पावलस बिड़दाचस की बाचस, “निम एन्नेकी चिख़दर की एंग्हय जियन एन्देरगे दुखी नन्दर? एन्देरगेका उर्बा येसुस ही नामे ही खतरी कैद नू पड़ारना लेका मला, लेकिन यरुसलेम नू खे'आ गे हूँ एन सपड़ारका र'अदन।”
14आसिन मनाब'आ पोल्ना खतरी “उर्बस ही इच्छा पुरा मना नेक'आ” ब'आ की एम छछेम मन्जकम।
15जोक्क उल्ला ख़ोख़ा एम सपड़ारकम, अउर यरुसलेम तरा केरकम। 16एम्हय संगे नू कैसरिया ता एक'अम-एक'अम पत्तु'उर हूँ केरर, अउर आर एमरिन सा'इप्रस ता ओरोत पच्चा पत्त'ऊ मनासोनस ही एड़पा नू ओन्दरर। आस गुसन एमा गे र'आ पड़ारकी रहचा।
पावलस याकुबसिन ख़क्खदस
17ख़ने एकाबिरी एम यरुसलेम नू अड़सकम, ताब पत्त'उर एमरिन खुसमारनुम स्वागत नन्जर। 18दोसरा उल्ला पावलस एम्हय गने याकुबस गुसन केरस। असन होरमा अगुवर रहचर। 19पावलस आरिन गोड़ लग्गियस, अउर आस नन्जका नलख ती नन-यहुदिर ही मझी नू धर्मेस एक्कने खल्ल ती नलख नन्जस अदिही पत्त नू आरिन ओन्टा-ओन्टा नन्जस की तिंगियस। 20इदिन मेन्जर की आर धर्मेस ही महबा नन्जर। ताबसिले आसिन बाचर, “एःरा भ'ई, यहुदिर ही मझी नू पत्त'उर हजारौं र'अनर, अउर आर व्यवस्था ता नियम-विधी गुट्ठिन बेस्स कुना मननर। 21नन-यहुदी आलर ही मझी नू र'ऊ यहुदिरिन ‘मोसस ही व्यवस्थन मला मन'आ पड़ार'ओ, कुक्को ख़द्दर ही खतना नना गे मला पड़ार'ओ अउर यहुदिर ही विधी गुट्ठिन मला मनआ पड़ार'ओ’ ब'आ की निन सिखाब'अदय ब'अना कत्था आर हूँ मेन्जका र'अनर। 22अक्कू नाम एन्दरा ननोत? निन बरचका र'अदय ब'आ की आर मानिम मेनोर। 23औंगे एम एन्दरा ब'अदम, अदिन नना। भाकल ननू चार गोड़ेर एम्हय गने र'अनर। 24इरिन हो'आ की निन हूँ इर ही संगे-संगेम सुध मना, अउर इर ही चुट्टी मुन्डरना बिरी ता खर्चन निन तिरके। एन्नेकी निन मोसस ही व्यवस्थन मन्नन इरकय की निंग्हय पत्त नू मेन्जका एक'अम कत्था मानी हिके ब'आ की होरमर अख़'ओर।#गिन्ती ६:१३-२१ 25लेकिन नन-यहुदिर ने पत्ताचका र'अनर, आर मुरुत गुट्ठी गे दाँड़े अरगका चिजन, ख़ेस, टोटा मोचराचका की पिटका जानबर ही अहड़न अमा मोख़ा अउर बेभिचार ती गेच्छा र'आ पड़ार'ई ब'अनन एम निर्नय नन्जकम की चिट्ठी लिखचका र'अदम।”#मुध चेलर १५:२९
26ताबसिले पावलस अबड़ा आलरिन होच्चस, अउर दोसरा उल्ला आर ही संगे-संगेम तंगन हूँ सुध नन्ताचस, अउर सुधिकरन ही उल्ला इकला पुरा मनो होत्'एन, अउर होरमर ही खतरी चि'अना भेटी ही सुचना चि'आ गे आस धर्मेस ही मन्दिर भितरी कोरचस।
पावलस ही धरतारना
27एकाबिरी सातौं उल्ला पुरा मना बिद्दकी रहचा, ताब एसिया ता यहुदिर पावलसिन धर्मेस ही मन्दिर नू इरियर की गोट्टा गोहड़न हुचकाचर अउर आसिन धरचर। 28आर एन्ने ब'अनुम चिच्चियार'आ हेल्लरर, “इस्रा'एल ता आलरो, संगरा नना! आलरिन हुरमी अड्डा काला की नम्हय जाती, मोसस ही व्यवस्थन अउर ई अड्डा ही बिड़दो नू सिखाब'ऊ आलस इसुम हिकदस। ई बग्गे लेका माला, इस ग्रिकरिन हूँ धर्मेस ही मन्दिर नू ओन्दरस की ई नेम्हा अड्डन असुध नन्जका चिच्चका र'अदस।” 29एन्देरगेका इस ही अगू नू आर एफिसस ता त्रोफिमस ब'अना ओर्तोसिन पावलस धर्मेस ही मन्दिर नू ओन्दरका हिकदस ब'आ की आर सोच्चर।#मुध चेलर २०:४
30ताब गोट्टा सहर नू हल्ला मन्जा, अउर आलर ओन्द संगेम बुंगनुम बरचर। आर पावलसिन धरचर की धर्मेस ही मन्दिर ती बाहरी घिस्याबा'अनुम ओन्दरर, अउर तुरतेम बली गुट्ठिन मुच्चियर। 31एकाबिरी आर आसिन पिटा बिद्दका रहचर, आबिरी गोट्टा यरुसलेम सहर नू लो'अना पिटना मना बेद्दा लगी ब'अना कत्था रोमी सेनापतिस गुसन अड़सिया। 32आस तुरतेम सिपाही अउर कप्तानरिन संगे नू होच्चस की आर गुसन बुंगनुम अड़सियस। आर सेनापती अउर सिपाहिरिन इरियर की पावलसिन लो'आ गे अम्बियर। 33ताब आ सेनापतिस हेद्दे बरचस की पावलसिन धरचस अउर दु'ई ठो सिकड़ी ती हे'आ गे पेसस। आस मेन्जस, “इस ने हिकदस, अउर इस एन्दरा नन्जस?” 34लेकिन आ गोहड़ा नू मन्जका आलर ती नेक'उम ओन्टा कत्था अउर नेक'उम दोसरा कत्था बाचर की चिच्चियारर, अउर आस आ हल्ला करने एन्दरा मन्जकी र'ई अदिन बलका करने पावलसिन ब्यारेक नू हो'आ गुचा बाचस की पेसस। 35ख़ने आर सिड़ही नू अरगा लगियर ख़ने आलर कोहड़े हल्ला नन्जर की पावलसिन पिटा बेद्दा लगियर ख़ने सिपाहिर आसिन चेड्डर की होच्चर। 36एन्देरगेका आलर ही गोहड़ा “आसिन पिटा” ब'आ की चिच्चियारनुम ख़ोख़ा-ख़ोख़ा लक्का रहचर।
पावलस तंग्हय पत्त नू तिंगका
37ब्यारेक भितरी अड़सत'आ हेल्लरर ख़ने पावलस सेनापतिसिन बाचस, “एन निंगन एन्दर'उम कत्था ब'आ ओंगोन?” ख़ने आ सेनापतिस बाचस, “एन्दरा निन ग्रिक भखा हूँ कच्छनखर'आ गे अख़दय?
38“एन्दरा निन आ मिसरी दुम मलदय, ने जोक्क बेड़ा अगू विद्रोह नन्जस की चार हजार विद्रोहरिन फिटकी अड्डा नू होच्चस की केरका रहचस?”
39पावलस बाचस, “मला! एन तो किलिकिया ता टार्सस नू कुन्दुरका यहुदी हिकदन। एन आ नामे चलरका सहर ता दुम ओन्टा नागरिक हिकदन। दया नना की एंगन ई आलर ही अगू नू एन्दर'उम कत्था कच्छनखर'आ गे चि'आ।”
40एकाबिरी आस कच्छनखर'आ गे चिच्चस, ताब सिड़ही नू इज्जस की पावलस आलरिन ख़ेक्खा ती इसारा नन्जस। आलर छछेम मन्जर ख़ने आस आरिन हिब्रू भखा नू एन्ने बाचस,
Currently Selected:
:
Highlight
Copy
Compare
Share
Want to have your highlights saved across all your devices? Sign up or sign in
© 2024 (Active), Mother Tongue Translators Society and Wycliffe Bible Translators, Inc. All rights reserved.