Yokana 20
20
1 #
Mat 28:1-10; Mk 16:1-11; Luk 24:1-12. Apaaran nasodit nakasabato kodil Mariam Magadalene alosit ates, eroko emutono akwap, koany amoru ikokororitai awai kates. 2#Yok 13:23. Koker, kolot mama ejai Simon Petero ka ekesisian ŋol lokemina Yesu, kolimok kes ebe, “Kelemar Ejakait kates, mam kijeni neibwaikinitai.” 3Kosodi konyou Petero ka ekesisian ece, koloto ates, 4Kokerata kere iarei, konye kilany ekesisian ŋol Petero, koliŋ adolore ates; 5kokukum, kireik toma, koany igoen lukebaputa ejaas nen, konye mam abu koloma. 6Kosodi kodolu Simon Petero da, etupakinit ŋes, koloma toma ates; koany igoen lukebaputa ejaas nen, 7#Yok 11:44. ka eitabala, lokejai akouke, mam kejaas kigoen lukebaputa konye kenunukitoi kaiboisike bon. 8Kosodi koloma da ekesisian ece, lokeliŋi adolore ates, koany ŋesi kiyuu da; 9#1 Kor 15:4; Asw 2:24-32. naarai mam ber kes aienunito nakiwadikatai ebe ibusakinit ŋes ajarun, 10Kosodete koboŋosi bobo ikesisiak oreriakec.
11Konye kebwoi Mariam kokiŋa eapie kates emonyi, napemonyi kokukum kireik toma ates; 12koany imalaikan iarei lukenapito luakwaŋak, iboiete, ediopet kakou, ediopet da kakejen kanekiperikinitoi akuan naka Yesu. 13Kes da kotemasi ŋes atiar, “Imonyi inyo, toto?” Kotema kes atiar, “Naarai kelemar Ekajakait, mam ajeni neibwaikinitai.” 14Kedau einer ŋun kibelokin kau koany Yesu ebwoi, komam ejeni ebe ŋes Yesu, 15Kotema Yesu ŋes atiar, “Imonyi inyo, toto? Imoi iŋai?” Konye ŋin koomite ŋes araut ekeswaman emanikor, kotema atiar, “Ejakait, arai ilemarit ijo ŋes, kolimokinai neibwaikinit, eoŋ da ayaŋaari.” 16Kotema Yesu ŋes atiar, “Mariam,” Kibelokin ŋesi kotema kAburanian atiar, “Raboni!” (Ŋes atemar ebe, “Ekesisianakinan,”) 17#Bur 2:11,12; Rom 8:29. Kotema Yesu ŋes atiar, “Sirikitiŋ eoŋ, naarai eriŋa edokara mama ejai Papa; konye kolot mama ejaas ikainacan kolimok kes ebe, Adokari alosit mama ejai Papaka, ŋes Papakus da, mama ejai Ekadeke, ŋes Ekusideke da.” 18Kolot Mariam Magadalene kolimok ikesisiak ebe, “Aanyu eoŋ Ejakait.” Kolimok da kes nuabu kinera kaŋes.
19 #
Mk 16:14-18; Luk 24:36-49. Kosodi kikamus apaaran ŋin nasodit naka asabato, kegolol ikekia kaneajaas ikesisiak kanuka akurian Iyudayan, kobu Yesu kobwo kokidiŋikec, kotema kes atiar, “Kinapakinos,” 20#1 Yok 1:1. Kedau einer ŋun, kitodik kes akekanin ka akemarana. Kosodete kiyalamikinos ikesisiak nakeanyuniata Ejakait, 21#Yok 17:18. Kotema Yesu kes bobo atiar, “Kinapakinos. Kwape keyakuunia Papa, eoŋ da keyakiari yes kwape kwaŋin.” 22#Age 2:7. Kosodi kedau einer ŋun, kiyeŋak kes, kotema atiar, “Kijautu Emoyo Lokalaunan. 23#Mat 16:19; 18:18. Arai isioniete adiakanareta nuka ituŋanan kere, isionio; arai da ienete adiakanareta nuka ituŋanan kere, eenio.”
24 #
Yok 11:16; 14:5. Konye ediopet ka lutomon kaarei, ŋes Tomas lokenyaritai Didumo#20:24 Didumo apolouke Emuut. mam kejaas kakes nakebunio Yesu. 25#Yok 19:34. Aso kolimokis ikesisiak ice ŋes ebe, “Kianyu Ejakait.” Konye kotema atiar, “Arai mam eoŋ aanyunit apoorei nuka aseito kakaninike, ka aibwaikin da ikabokor apedon nuka aseito, ka aibwaikin akakan toma amaranake, mam eoŋ eyuuni nepetai da.”
26 #
Yok 20:19. Ketuboros apaarasia akanykauni kojaas bobo ikekesisiak togo, kojai Tomas da nepepe kakes. Kegolol ikekia konye kobu Yesu kobwo kokidiŋikec, kotema atiar, “Kinapakinos,” 27Kosodi kotema ŋesi Tomas atiar, “Koyau ne ekonibokorit, koany akakanin; koyau da akonikan, kibwaik toma amaranaka; kwabo sirikiraun lomam iyuunit, dimarai loiyuunit.” 28#Yok 1:1. Koboŋok Tomas ebe, “Ekajakait, Ekadeke da!” 29#1 Pet 1:8. Yesu kotema ŋes atiar, “Naarai kiany eoŋ ŋes konyet iyuunia? Isirereŋitoi luiyuunete komam eanyunito.”
30Kiswama Yesu aanyuneta ace nuipu kakonyen nuka ikesisiak, numam iwadikatai oitabo lo; 31#1 Yok 5:13; Rom 1:17. konye iwadikatai nu tetere iyuunete yesi ebe Yesu ŋes Kristo, Okoku loka Edeke, ido kanuka aiyuun ŋin kojaut kaijar kokirorikeŋ.
Currently Selected:
Yokana 20: AOV1961
Highlight
Share
Copy
Want to have your highlights saved across all your devices? Sign up or sign in
Ateso Old Version Bible © United Bible Societies, 1961.