Miˈshinkǝn 15

1I mbalǝn yen pe'te' Yahudiya is mbǝ Antakiya si kulci' mi'bǝtl Yesu kal: si usu “In a sǝlkin kan u nǝ mbidli ma' Musa u wai u, kikǝn mbi' pe'kǝltwai.” 2Tǝn shilǝn gu mbǝlli ki Bulus nǝ Balnabas shotti bi mul ndǝlti ne' si. Is la'ki tǝkǝ Bulus nǝ Balnabas, ne' mi'bǝtl Yesu kalen, sǝtto Ulushelima ma' milshinkǝn ne' kolsi tǝn shilǝ ni. 3A si tǝn shitu wasǝn, kǝlǝ' tya pinikiya nǝ Samaliya, i Ikilisiya la'si shitu, asi dlib kan unǝ ginǝ bǝ Yahudawawai u bǝl Yesu kal. Shilǝn gu i laki mus mi'bǝtl Yesu kal is kum hwoltugi. 4Nǝs mbǝkǝci Ulshelima u, i mil Ikilisiya nǝ mil shinkǝn nǝ kolsi ulisi ɗem, sine is dlimisi mus ulnǝ Lya pǝli tu'ma'si u. 5Na mi'bǝtl Yesu kalen, mi'bǝtl ɗalika ki Palisiyawa is hilya is usu, “Ginǝ bǝ Yahudawa wai u nǝn sǝtlsi la'si nǝ ngesi amus sǝbbǝl zhil ki Musa.” 6I milshikǝn ne' Kolsi is maga sǝ'ya shilǝn u. 7Kal ki shotti bi wasǝn mul ndǝlti, i Bitlus hilya idlǝmisi shilǝn: “Yelsǝni, kimanini te' ge' cinyen te' ka Lya a wolin nǝn ge' kini, abi ɗaka ginǝ bǝ Yahudawa wai u sǝ'kum shilǝn ki Lya as la' mbadli. 8Lya mul ma' mbadli, ta mbo toh i ta ndǝ'nǝsi i, hal ibbǝlsi Yal ki mbatl ki Lya mul gunti, kan unǝ' bǝlmi u. 9Ta bwas dlominǝn ne'siwai, gaki ta okǝl mbadlwasǝn taka i gaki la'ti mbadlwasǝn. 10Gaki nǝgu, ya lakiɗa iki lyap cimbǝtl Lya ɗa, ka zi mi'bǝtl Yesu kali kaya unnǝ mini ne' mi'zǝ' mi'zǝ'mini ma, mamanǝn kanti wai u? 11Ma la' mbatli tǝn alheli ki Yesu mǝ mbi pe'kǝtl ɗa, kǝnǝ kan u nǝs mbi u.” 12I mus hwu' mbalǝn i dǝm shot, si gakki' Balnabas isi Bulus kǝm, nǝsi dlǝmissi gagashintu nǝ Lya pǝli ge' ginǝ bǝ Yahudawawai u tu'ma'si. 13Nǝs paki u, i Yakubu shilǝni. “Kini yelsǝni,” Kumǝnnǝni. 14Bitlus dlimmimmi kan unǝ Lya gob likǝnti i otl mbalǝn ge'shin wasi te'ge' ginǝ bǝ Yahudawawai u. 15Shilǝn ki mi'nje shinkǝn nda'ce kǝnɗa nǝgu, kan unǝ ɗaki laci' u:

16“ ‘Kal ki gu an palti,

ɗaɗanu akǝn libi ki Dauda gunǝ nda u.

Ankǝnti a dlilli lǝbi.

17Gaki tǝ mbalǝnyi nǝ sa' i, sǝ ngau Lya ɗa,

hal ne' ginǝ bǝ Yahudawawai u nǝɗǝ mbe'

shin i u, Lya usu, mulnǝ pǝl usi u.’

18Lǝɓa ki Lya ki maniɗa mati tun teɗi.

19“Gaki nǝgu, yenti ini, ginǝ bǝ Yahudawa wai u, a mbunwai tǝn zisi bal ulǝngawai mi'patl te'ma' Lya i. 20Age' shuki nǝgu tǝn laccisi an dlimisi bǝs ɗam ulki ɗami ki lya ki mi'pǝtlgontwai, nǝ pǝtl kontwai, nǝ ɗab tlu'unǝ bǝ apocwai u, nǝ ɗab hwula. 21Gaki shilǝn ki zhil ki Musa a dlimǝn dli mus ge'gatli tun teɗi, ɗǝ dlǝp lashti ge' lu dopga ki Yahudawa hwu gas cin shutu kǝnǝ.”

Shin kǝn ki mi'dlitl shilǝn

22I milshinkǝn, nǝ kolsi nǝ mus mi' Ikilisiya mus is kǝndǝ sǝppekǝl gen age' si as shinsi tya Antakiya nǝ Bulus isǝ Balnabas. Is pekkǝl Yahuza (gunǝɗǝ mbettiki Balsaba u) nǝ Sila, si mi'kinani ge' mi'bǝtl Yesu kal. 23Is bǝlsi shinkǝn ki lwatbati mul ussu, Ma' yelsini wakǝn milshinkǝn nǝ kolsi, mil bǝtl Yesu kal, ma' yelsǝni inǝn ginǝ bǝ Yahudawawai u ki Antakiya, nǝ Suliya nǝ Kilikiya: shinniti. 24Mǝ kumi gen pekki ɗǝ ge'mi bǝ nǝ ndǝtinǝnwai, si tlǝlinkin kin mbadli, ulnǝs dlimi u a ɗǝ hwoti kini. 25In ndǝgi musinǝn tǝn pekkǝl gen inǝn an shinsi tya ma'kini nǝ yelǝnsi inǝn ki Balnabas nǝ Bulus, 26mbalǝn ginǝ bǝlgawasǝn gaki shinkǝ Yesu Almasihu u. 27Gaki nǝgu, mashin Yahuza nǝ Silas sǝ' dlimikin ulnǝn laci u nǝ biwasǝn. 28Gaki a mbuni Yal ki mbatl ki Lya i nǝ mi, bǝn zikin ulǝn mul diɓǝtl aga tǝ ngǝtl ginǝ ɗǝ lyapdli u wai. 29Bǝ ɗamǝn ulnǝs poci lya ki mi'pǝtlgontwai, nǝ ɗap tlu nǝ hwula giɓi, nǝ ɗap tlu u nǝs modǝli' yalu nǝ pǝttya ne' mbalǝn. Kǝn dǝmti lau ǝn ka zakǝn pǝtl undi gi u. Se agason. 30Sine nǝs pallisi bi u, is su swa Antakiya, alǝbi is dom mi' Ikilisiya is bǝlsi lwabbati. 31Nǝ mbalǝn dlǝm lashti u is kum hwol tu' nǝ shikǝn ki ndǝlli' si mbatlu. 32Yahuza nǝ Silas, si ma gawasǝn mi'nje'shinkǝn kǝni, is dlǝm shilǝn ki ndǝlli' si mbadli iye. 33Kal ki lǝp muttwasǝn tyaka, i mi'bǝtl Yesu kal pallisi bi nǝ hwoltugi, is paltwa ma'ginǝ shinsi suɗi. 34Silas yeni ambuni tǝtdǝm lǝbi. 35Amma Bulus nǝ Balnabas is dlil a Antakiya, alǝbi si ne' gen diɓǝli asi kulci'si shilǝn ki Lya.

Bulus bwassi isǝ Balnabas

36Kal ki lǝpmutti i Bulus ul Balnabas usu, “Tǝn paltyai ma' mi'bǝtl Yesu kal ki ge'gatlu nǝ mus nǝn dlǝm shilǝn ki Lya ɗa u an ya kan unǝ si ɗa u.” 37Balnabas ɗǝ lyamti sǝ' zǝga nǝ Yahaya, gunǝ ɗǝ mbetti ki Malkus, ne'si. 38Amma Bulus yeni a mbuni sǝ' zǝga ne'twai, gaki ta za'si a Bampiliya i, ta ɓeukina ne'si ɗǝ kyautǝni wai. 39I lǝshi manti tegge' dlomwasǝn, Hal is bwassi. I Balnabas kan Malkus is te'ge' kundǝlǝn ki mal is lǝ tya Kublus. 40Amma i Bulus wol silas is zǝga, mi'bǝtl Yesu kal is shilǝn nǝ Lya gawasi tǝ alheli ki Lya bǝli nǝti. 41Is du tya ge' atl ki Suliya nǝ ki Kilikiya, ti ndǝlli' Ikilisiya i mbadli.

Currently Selected:

Miˈshinkǝn 15: zbu

Highlight

Copy

Compare