पेरेरित 15
15
यरुसलेम सहरम बैठक भेल
1पछास कुन्हुँ-कुन्हुँ मानुकसब यहुदिया पर्देसस एन्टिओखिया सहरम एले आ ओइलगक बिस्वासिसिका एनामे सिछ्या दिअ लग्ले, “तोर्स्या मोसाले देल नियम अन्सार खत्ना नाइ कर्ब त मुक्ति पाब नाइ सक्ब।”#लेबि १२:३ 2जब यि बात पावल आ बर्नबासले सुनल्के त ओकर्स्या एहेन सिछ्या देल्हार मानुकसिसङ बर्कि बाद-बिबाद करल्के। ओहेस ओइलगक बिस्वासिस्या पावल, बर्नबास आ अरु बिस्वासिसिका पनि यि बातक छल-फल कर लागि यरुसलेमम भेल पेरेरित आ अगुवासिलग पठाइलाहार सल्लाहा करल्के।
3ओहेस एन्टिओखिया मन्डलिक बिस्वासिस्या ओकर्सिका पठाइल्के। अनि ओकर्स्या फोनिके आ सामरिया पर्देसबाक जाइत खुमा ओइलगक बिस्वासिसिका दस्रो जातक मानुकस्या पनि प्रभुका बिस्वास करल्को कहिक सुनाइल्के त ओइलगक बिस्वासिसब एक्दम खुसि भेले। 4अनि ओकर्स्या यरुसलेम पुग्ले त ओकर्सिका मन्डलिक बिस्वासि, अगुवा आ पेरेरितस्या स्वागत करल्के। तब पावल आ बर्नबासले ओइलग आइल सभे मानुकसिका पर्मेसोरले ओकर्सिक मार्फत कर्ल कामक बारेम सुनाइल्के। 5ओकर्सिक बात सुनिक कुन्हुँ-कुन्हुँ फरिसि दलक बिस्वासिस्या ठेर्याइक एनामे कहल्के, “दस्रो जातक बिस्वासिसिका पनि खत्ना कर आ मोसाले देल नियमका पालन कर पर्तो।”
6ओहेस यि बातक बारेम छल-फल कर लागि पेरेरित आ मन्डलिक अगुवास्या बैठक करल्के। 7अनि थुप्रे घरिया छल-फल भेले त पत्रुस उठ्ले आ एनामे कहल्के, “ए दाजुभाइसब, तोर्सिका थाहे छो, भले दिन् अगा केनामे पर्मेसोरले हम्र मार्फत दस्रो जातक मानुकस्या खुसिक खबर सुनिक बिस्वास करुस कहिक तोर्सिक बिचस हम्रा चुन्ल छलो।#पेरेरित १०:१-४३ 8सभेक मनक बात जान्लाहार पर्मेसोरले आपन्सिएक जक्या ओकर्सिका पनि पबित्र आत्मा दैक ओकर्सिका सुइकार कर्ल बातका देखाइल छो।#पेरेरित १०:४४; २:४ 9किरकि पर्मेसोरले आपन्सिक आ ओकर्सिक बिचम कथ्यो भेदभाब नाइ राखल्को। तर ओकर्स्या बिस्वास कर्ल कारनस पर्मेसोरले ओकर्सिक मनका सुद्द कर्ल छो। 10ओहेस तोर्स्या किर दस्रो जातक बिस्वासिसिका मोसाले देल नियमक बोझा बोकाइक पर्मेसोरक जाँच् कर खोज्छ? जक्रा न त आपन्स्या न त आपन्सिक पुर्खास्या बोक सकल्को। 11ओना नाइ करुँ, आपन्स्या बिस्वास कर्छ कि प्रभु येसुक किर्पास जेनामे ओकर्स्या मुक्ति पाइल छो, ओनाहिमे आपन्स्या पाइल स्या।”
12तब बैठकम आइल सभे मानुकसब चुप भेले। अनि पावल आ बर्नबासले ओकर्सिक मार्फत पर्मेसोरले दस्रो जातक बिचम कर्ल अचम्मक काम आ चिनहसिक बारेम सुनाब लग्ले त सभेले ध्यान दैक सुनल्के। 13जब ओकर्स्या सुनाइ सकल्के त याकुबले एनामे कहल्के, “ए दाजुभाइसब, हम्र बात सुन्। 14सिमोन पत्रुसले भर्खर कहल्को कि केनामे पर्मेसोरले दस्रो जातक मानुकसिका किर्पा करिक आप्न मानुक बनाइल्को। 15यि बातसङ त अगमबक्तास्या कहल पनि मिल्छो। किरकि धर्मसास्तरम एनामे निख्ल छो,
16‘ओक्र पछास हम घुमिक एबो,
आ भर्कल घर जक्या दाउदक राज्येका फेरि बनाइबो,
अनि उ नास भेल राज्येका फेरि बनाइक
अगल्काइ जक्या जोर्गर बनाइबो।#आमोस ९:११-१२
17ताकि अरु मानुकस्या परमप्रभुका खोज सकुस,
आ दस्रो जातक मानुकस्या पनि जक्रा हम आप्न नामक मार्फतस बलाइल स्यो’ कहिक प्रभले कहल छो। यि सभे बातसब प्रभुले कर्तो।
18यि बात परमप्रभुले पेहेनि कहल छलो।
19“ओहेस हम्र बिचारम प्रभुका बिस्वास कर्लाहार दस्रो जातक मानुकसिका दुख नाइ दिउँ। 20बरु ओकर्सिका मुर्तिका चर्हाइल चिजसब, घेचका अइंठिक मार्ल पसु आ रकत नाइ खाइ अनि बेभिचार नाइ कर्ह्य कहिक निखिक पठाइ दिउँ।#प्रस्थान ३४:१५-१७; लेबि १८:६-२३; लेबि १७:१०-१६ 21किरकि मोसाले देल नियम त पेहेनिस सहर-सहरम पर्चार हब्ति आइल छो आ हरेक जिराइलाहार दिनम पनि सभाघरसिम पह्र्ति छो।”
दस्रो जातक बिस्वासिसिक लागि चिठि निख्ल
22तब पेरेरितसब, अगुवासब आ मन्डलिक बिस्वासिसब मिलिक आप्न बिचस दुइ जना मानुकका चुनिक पावल आ बर्नबाससङ एन्टिओखिया सहर पठाइलाहार फैसला करल्के। उ दुइ जना मानुकसब यहुदा कहलाहार बर्नबास आ सिलास छले। ओकर्स्या बिस्वास कर्लाहार दाजुभाइसिक अगुवा छले। 23ओकर्स्या एनामे निख्ल चिठि ओकर्सिक मार्फत पठाइल्के, “यरुसलेमम भेल पेरेरित आ अगुवासिक तर्फस एन्टिओखिया, सिरिया आ किलिकियाम रहलाहार दस्रो जातक सभे बिस्वासिसिका गोरलाग स्यो। 24हमर्स्या यि सुन्ल स्यो कि हमर्सिक बिचस कुन्हुँ-कुन्हुँ मानुकसब हमर्सिक आदेस बिना तोर्सिलग जाइक तोर्सिक मनका दोधारम पारिक थुप्रे दुख देल छो। 25ओहेस जब हमर्स्या उ बात सुन्ल्यो त बैठक कर्ल्यो आ सभेक सहमतिम हमर्सिक बात तोर्सिलग पुगाब लागि कुन्हु-कुन्हुँ मानुकका चुनिक पावल आ बर्नबाससङ पठाइलाहार फैसला कर्ल्यो। 26एकर्स्या एहेन मानुकसब स्यो जकर्स्या प्रभु येसु खिरिस्टक लागि आप्न ज्यान पनि झन्डे गुमाइल। 27ओहेस हमर्स्या यहुदा आ सिलासका तोर्सिलग पठाइल स्यो। ओकर्स्याहु हमर्स्या निखिक पठाइले बातका आप्न मुहस तोर्सिका कहतो। 28किरकि पबित्र आत्मा आ हमर्सिका यि अस्लि लग्लो कि चाहिलस बेसि अरु कुन्हुँ बोझ तोर्सिक उप्रिम लाद्ल नाइ जाउस। 29ओहेस तोर्स्या मुर्तिका चर्हाइल चिजसब, रकत आ घेचका अइंठिक मार्ल पसुक तिमन नाइ खाह्य। अनि बेभिचार नाइ कर्ह्य। तोर्स्या यि सभे चिजस बेग्रे रहब त अस्लि हेतो। अखन्क लागि एत्केम छुटुम।”
30तब ओकर्स्या चिठि लइक एन्टिओखिया सहर पुग्ले आ मन्डलिक सभे मानुकका बलाइक उ चिठि देल्के। 31अनि ओकर्स्या चिठि खोलिक पह्रल्के त ओइम निख्ल हौसला देल्हार बातस एक्दम खुसि भेले। 32यहुदा आ सिलास अगमबक्ता भेल कारनस ओकर्स्याहु मन्डलिक बिस्वासिसिका थुप्रे बचनस हौसला दैक ओकर्सिक बिस्वासका जोर्गर बनाइल्के। 33अनि जब ओकर्सिका ओइलग रहल भले दिन् बित्ले त ओइलगक बिस्वासिस्या यहुदा आ सिलासका अस्लिमे जो कहिक फेरि यरुसलेमक मन्डलिम पठाइ देल्के। 34[तर सिलासका चाहिं ओहेलग रह लागि मन लग्ले।]
35अनि पावल आ बर्नबासले चाहिं ओइलगक अरु थुप्रे बिस्वासिसिसङ मिलिक प्रभुक बचन सिखाइति आ खुसिक खबर सुनाइति एन्टिओखिया सहरेम रहले।
पावल आ बर्नबास छुट्ल
36ओक्र कन्हेक दिनक पछा पावलले बर्नबासका एनामे कहल्के, “ले आब् आपन्स्या जुन-जुन सहरम प्रभुक बचन पर्चार कर्ल छल उ सहरम फेरि च। अनि ओइलग भेल बिस्वासिसिका भेटिक ओकर्सिक हाल-खबर बुझुम।” 37बर्नबासले मर्कुस कहलाहार युहन्नाका पनि सङि लगाब खोजल्के। 38तर पावलले चाहिं ओक्रा लगाब लागि ठिक नाइ सम्झल्के किरकि मर्कुसले काम बिना पुरा करिक पामफिलिया सहरस ओकर्सिका छोरिक गेल छले।#पेरेरित १३:१३ 39मर्कुसक कारनस पावल आ बर्नबासक बिचम बर्कि मतभेद भेले। ओहेस ओकर्स्या छुट्ले आ बर्नबासले मर्कुसका आप्नसङ लइक पानि जाहाजम चर्हिक साइपरस टापुभर गेले। 40तर पावलले चाहिं सिलासका छानल्के। अनि ओइलगक बिस्वासिस्या ओकर्सिका प्रभुक जिम्माम सुम्पिक पठाइ देल्के। 41तब ओकर्स्या सिरिया आ किलिकिया पर्देसबाक जाइत खुमा ओइलग भेल मन्डलिसिक बिस्वासिसिका बिस्वासम जोर्गर बनाइति गेले।
Currently Selected:
पेरेरित 15: DANU
Highlight
Copy
Compare
Share
Want to have your highlights saved across all your devices? Sign up or sign in
© 2024 (Active), Mother Tongue Translators Society and Wycliffe Bible Translators, Inc. All rights reserved.
पेरेरित 15
15
यरुसलेम सहरम बैठक भेल
1पछास कुन्हुँ-कुन्हुँ मानुकसब यहुदिया पर्देसस एन्टिओखिया सहरम एले आ ओइलगक बिस्वासिसिका एनामे सिछ्या दिअ लग्ले, “तोर्स्या मोसाले देल नियम अन्सार खत्ना नाइ कर्ब त मुक्ति पाब नाइ सक्ब।”#लेबि १२:३ 2जब यि बात पावल आ बर्नबासले सुनल्के त ओकर्स्या एहेन सिछ्या देल्हार मानुकसिसङ बर्कि बाद-बिबाद करल्के। ओहेस ओइलगक बिस्वासिस्या पावल, बर्नबास आ अरु बिस्वासिसिका पनि यि बातक छल-फल कर लागि यरुसलेमम भेल पेरेरित आ अगुवासिलग पठाइलाहार सल्लाहा करल्के।
3ओहेस एन्टिओखिया मन्डलिक बिस्वासिस्या ओकर्सिका पठाइल्के। अनि ओकर्स्या फोनिके आ सामरिया पर्देसबाक जाइत खुमा ओइलगक बिस्वासिसिका दस्रो जातक मानुकस्या पनि प्रभुका बिस्वास करल्को कहिक सुनाइल्के त ओइलगक बिस्वासिसब एक्दम खुसि भेले। 4अनि ओकर्स्या यरुसलेम पुग्ले त ओकर्सिका मन्डलिक बिस्वासि, अगुवा आ पेरेरितस्या स्वागत करल्के। तब पावल आ बर्नबासले ओइलग आइल सभे मानुकसिका पर्मेसोरले ओकर्सिक मार्फत कर्ल कामक बारेम सुनाइल्के। 5ओकर्सिक बात सुनिक कुन्हुँ-कुन्हुँ फरिसि दलक बिस्वासिस्या ठेर्याइक एनामे कहल्के, “दस्रो जातक बिस्वासिसिका पनि खत्ना कर आ मोसाले देल नियमका पालन कर पर्तो।”
6ओहेस यि बातक बारेम छल-फल कर लागि पेरेरित आ मन्डलिक अगुवास्या बैठक करल्के। 7अनि थुप्रे घरिया छल-फल भेले त पत्रुस उठ्ले आ एनामे कहल्के, “ए दाजुभाइसब, तोर्सिका थाहे छो, भले दिन् अगा केनामे पर्मेसोरले हम्र मार्फत दस्रो जातक मानुकस्या खुसिक खबर सुनिक बिस्वास करुस कहिक तोर्सिक बिचस हम्रा चुन्ल छलो।#पेरेरित १०:१-४३ 8सभेक मनक बात जान्लाहार पर्मेसोरले आपन्सिएक जक्या ओकर्सिका पनि पबित्र आत्मा दैक ओकर्सिका सुइकार कर्ल बातका देखाइल छो।#पेरेरित १०:४४; २:४ 9किरकि पर्मेसोरले आपन्सिक आ ओकर्सिक बिचम कथ्यो भेदभाब नाइ राखल्को। तर ओकर्स्या बिस्वास कर्ल कारनस पर्मेसोरले ओकर्सिक मनका सुद्द कर्ल छो। 10ओहेस तोर्स्या किर दस्रो जातक बिस्वासिसिका मोसाले देल नियमक बोझा बोकाइक पर्मेसोरक जाँच् कर खोज्छ? जक्रा न त आपन्स्या न त आपन्सिक पुर्खास्या बोक सकल्को। 11ओना नाइ करुँ, आपन्स्या बिस्वास कर्छ कि प्रभु येसुक किर्पास जेनामे ओकर्स्या मुक्ति पाइल छो, ओनाहिमे आपन्स्या पाइल स्या।”
12तब बैठकम आइल सभे मानुकसब चुप भेले। अनि पावल आ बर्नबासले ओकर्सिक मार्फत पर्मेसोरले दस्रो जातक बिचम कर्ल अचम्मक काम आ चिनहसिक बारेम सुनाब लग्ले त सभेले ध्यान दैक सुनल्के। 13जब ओकर्स्या सुनाइ सकल्के त याकुबले एनामे कहल्के, “ए दाजुभाइसब, हम्र बात सुन्। 14सिमोन पत्रुसले भर्खर कहल्को कि केनामे पर्मेसोरले दस्रो जातक मानुकसिका किर्पा करिक आप्न मानुक बनाइल्को। 15यि बातसङ त अगमबक्तास्या कहल पनि मिल्छो। किरकि धर्मसास्तरम एनामे निख्ल छो,
16‘ओक्र पछास हम घुमिक एबो,
आ भर्कल घर जक्या दाउदक राज्येका फेरि बनाइबो,
अनि उ नास भेल राज्येका फेरि बनाइक
अगल्काइ जक्या जोर्गर बनाइबो।#आमोस ९:११-१२
17ताकि अरु मानुकस्या परमप्रभुका खोज सकुस,
आ दस्रो जातक मानुकस्या पनि जक्रा हम आप्न नामक मार्फतस बलाइल स्यो’ कहिक प्रभले कहल छो। यि सभे बातसब प्रभुले कर्तो।
18यि बात परमप्रभुले पेहेनि कहल छलो।
19“ओहेस हम्र बिचारम प्रभुका बिस्वास कर्लाहार दस्रो जातक मानुकसिका दुख नाइ दिउँ। 20बरु ओकर्सिका मुर्तिका चर्हाइल चिजसब, घेचका अइंठिक मार्ल पसु आ रकत नाइ खाइ अनि बेभिचार नाइ कर्ह्य कहिक निखिक पठाइ दिउँ।#प्रस्थान ३४:१५-१७; लेबि १८:६-२३; लेबि १७:१०-१६ 21किरकि मोसाले देल नियम त पेहेनिस सहर-सहरम पर्चार हब्ति आइल छो आ हरेक जिराइलाहार दिनम पनि सभाघरसिम पह्र्ति छो।”
दस्रो जातक बिस्वासिसिक लागि चिठि निख्ल
22तब पेरेरितसब, अगुवासब आ मन्डलिक बिस्वासिसब मिलिक आप्न बिचस दुइ जना मानुकका चुनिक पावल आ बर्नबाससङ एन्टिओखिया सहर पठाइलाहार फैसला करल्के। उ दुइ जना मानुकसब यहुदा कहलाहार बर्नबास आ सिलास छले। ओकर्स्या बिस्वास कर्लाहार दाजुभाइसिक अगुवा छले। 23ओकर्स्या एनामे निख्ल चिठि ओकर्सिक मार्फत पठाइल्के, “यरुसलेमम भेल पेरेरित आ अगुवासिक तर्फस एन्टिओखिया, सिरिया आ किलिकियाम रहलाहार दस्रो जातक सभे बिस्वासिसिका गोरलाग स्यो। 24हमर्स्या यि सुन्ल स्यो कि हमर्सिक बिचस कुन्हुँ-कुन्हुँ मानुकसब हमर्सिक आदेस बिना तोर्सिलग जाइक तोर्सिक मनका दोधारम पारिक थुप्रे दुख देल छो। 25ओहेस जब हमर्स्या उ बात सुन्ल्यो त बैठक कर्ल्यो आ सभेक सहमतिम हमर्सिक बात तोर्सिलग पुगाब लागि कुन्हु-कुन्हुँ मानुकका चुनिक पावल आ बर्नबाससङ पठाइलाहार फैसला कर्ल्यो। 26एकर्स्या एहेन मानुकसब स्यो जकर्स्या प्रभु येसु खिरिस्टक लागि आप्न ज्यान पनि झन्डे गुमाइल। 27ओहेस हमर्स्या यहुदा आ सिलासका तोर्सिलग पठाइल स्यो। ओकर्स्याहु हमर्स्या निखिक पठाइले बातका आप्न मुहस तोर्सिका कहतो। 28किरकि पबित्र आत्मा आ हमर्सिका यि अस्लि लग्लो कि चाहिलस बेसि अरु कुन्हुँ बोझ तोर्सिक उप्रिम लाद्ल नाइ जाउस। 29ओहेस तोर्स्या मुर्तिका चर्हाइल चिजसब, रकत आ घेचका अइंठिक मार्ल पसुक तिमन नाइ खाह्य। अनि बेभिचार नाइ कर्ह्य। तोर्स्या यि सभे चिजस बेग्रे रहब त अस्लि हेतो। अखन्क लागि एत्केम छुटुम।”
30तब ओकर्स्या चिठि लइक एन्टिओखिया सहर पुग्ले आ मन्डलिक सभे मानुकका बलाइक उ चिठि देल्के। 31अनि ओकर्स्या चिठि खोलिक पह्रल्के त ओइम निख्ल हौसला देल्हार बातस एक्दम खुसि भेले। 32यहुदा आ सिलास अगमबक्ता भेल कारनस ओकर्स्याहु मन्डलिक बिस्वासिसिका थुप्रे बचनस हौसला दैक ओकर्सिक बिस्वासका जोर्गर बनाइल्के। 33अनि जब ओकर्सिका ओइलग रहल भले दिन् बित्ले त ओइलगक बिस्वासिस्या यहुदा आ सिलासका अस्लिमे जो कहिक फेरि यरुसलेमक मन्डलिम पठाइ देल्के। 34[तर सिलासका चाहिं ओहेलग रह लागि मन लग्ले।]
35अनि पावल आ बर्नबासले चाहिं ओइलगक अरु थुप्रे बिस्वासिसिसङ मिलिक प्रभुक बचन सिखाइति आ खुसिक खबर सुनाइति एन्टिओखिया सहरेम रहले।
पावल आ बर्नबास छुट्ल
36ओक्र कन्हेक दिनक पछा पावलले बर्नबासका एनामे कहल्के, “ले आब् आपन्स्या जुन-जुन सहरम प्रभुक बचन पर्चार कर्ल छल उ सहरम फेरि च। अनि ओइलग भेल बिस्वासिसिका भेटिक ओकर्सिक हाल-खबर बुझुम।” 37बर्नबासले मर्कुस कहलाहार युहन्नाका पनि सङि लगाब खोजल्के। 38तर पावलले चाहिं ओक्रा लगाब लागि ठिक नाइ सम्झल्के किरकि मर्कुसले काम बिना पुरा करिक पामफिलिया सहरस ओकर्सिका छोरिक गेल छले।#पेरेरित १३:१३ 39मर्कुसक कारनस पावल आ बर्नबासक बिचम बर्कि मतभेद भेले। ओहेस ओकर्स्या छुट्ले आ बर्नबासले मर्कुसका आप्नसङ लइक पानि जाहाजम चर्हिक साइपरस टापुभर गेले। 40तर पावलले चाहिं सिलासका छानल्के। अनि ओइलगक बिस्वासिस्या ओकर्सिका प्रभुक जिम्माम सुम्पिक पठाइ देल्के। 41तब ओकर्स्या सिरिया आ किलिकिया पर्देसबाक जाइत खुमा ओइलग भेल मन्डलिसिक बिस्वासिसिका बिस्वासम जोर्गर बनाइति गेले।
Currently Selected:
:
Highlight
Copy
Compare
Share
Want to have your highlights saved across all your devices? Sign up or sign in
© 2024 (Active), Mother Tongue Translators Society and Wycliffe Bible Translators, Inc. All rights reserved.