Matayo 9
9
Yesu nɨ agú aꞌbezà àtɨ̀jʉ vɨɨ
(Mariko 2:1-12; Luka 5:17-26)
1Yesu tu yee alɨa, kàdrì ròò àva mèrè ɨ̀ga àkú ìmgbélé ɨ̀rɨ awo ɨ̀rɨ nɨ ovʉjʉ vɨɨ alɨa. 2Nàa, ꞌba alóo jí ɨ̀rɨ bʉ agú àloo aꞌbezà vɨ́ɨvɨɨ lazà drʉ bírísì drìa. Yesu nɨ ꞌba ndee ɨnɨ àꞌɨ̀taa ndrèrɨa, ꞌyo agú aꞌbezà ndee yɨ́ kɨ́nɨ̀, “Mɨ así ɨ̀rɨ mbamba mvamàa lá! Ɨ̀zatà mɨ awo vɨɨ ɨnɨ trʉ̀zà drʉ.”
3Acete vɨ̀a, ɨmbaꞌba àzítáá Musa awo vɨɨ nɨ vɨɨ alóo ɨꞌdó ꞌyo ànɨ ɨ̀sɨlɨa kɨ́nɨ̀, “Agú ꞌdɨ̀vɨɨ ɨ̀déá drʉ Orɨ bʉ!”
4Yesu nɨ eꞌyo ɨnɨ nɨ ɨgale vɨɨ vàle ra vɨɨ yɨ̀, ꞌyo ɨnɨ yɨ́ kɨ́nɨ̀, “Àmɨ ɨgataa ònzɨ tà mbaa àmɨ asíá àrɨ eꞌyo yɨ̀ yà? 5Eꞌyo ngoo ɨ̀rɨ ɨ̀wako drʉ ꞌyozà drʉ nɨ̀, ꞌyojʉ, ‘Mɨ awo ɨ̀zatà vɨɨ ɨnɨ trʉ̀zà drʉ vɨɨ ɨ,’ nòsɨ̀kʉ ꞌyojʉ, ‘Mɨ nga oru díká mɨ ací vɨɨ ɨ yà’? 6Mà ngaa muu ɨ̀ce àmɨ yɨ́ kɨ́nɨ̀, ꞌBa Mvápi awo òkpo cɨ nyawúá ɨ̀zatà trʉ̀jʉ.” Acete ꞌyo agú aꞌbezà ndee yɨ́ kɨ́nɨ̀, “Mɨ nga oru, mɨ ꞌdu mɨ awo bírísì díká mɨ mvɨ àkúá” 7Ànɨ agú ndee nga oru díká mvɨ àkúá rá. 8Òꞌbɨ nɨ eꞌyo ꞌdɨ̀vɨɨ ndrèjʉ ꞌba, ovʉ́ òsùtaa yɨ̀ díká ìnzí Orɨ nɨ tʉ̀ ɨ̀rɨnɨ òkpo ꞌdɨ̀vɨ́ɨvɨɨ fèle ꞌba ada yɨ́ ɨ̀ndɨ̀ vɨɨ yɨ̀.
Yesu nɨ Matayo nɨ omvejʉ vɨɨ
(Mariko 2:13-17; Luka 5:27-32)
9Yesu nɨ àngʉ̀ na kʉjʉ ꞌba, mu adro, ndrè agú mʉ̀sorò trale omvele Matayo drʉ vɨɨ, rɨzà drʉ nɨ awo mézà mʉ̀sorò trajʉ vɨɨ tia. Omve ɨ̀rɨ kɨ́nɨ̀, “Mɨ bɨ̀ ma buti.” Ànɨ Matayo nga oru díká bɨ̀ lʉ́ ɨ̀rɨ buti ɨ.
10Yesu nɨ rɨrɨa tà nyarɨa Matayo awo jóá, ꞌba òꞌbɨ́ mʉ̀sorò trale vɨɨ ɨnɨ ꞌba ɨ̀zatà be vɨɨ ɨnɨ be, mú fɨ tà nya ɨrɨ bʉ ꞌba ɨ̀rɨ nɨ ɨmbale vɨɨ ɨnɨ be ɨ̀ndɨ̀. 11ꞌBa Farasayi drʉ vɨɨ ɨnɨ nɨ ɨ̀rɨ ndrèjʉ ꞌba, zí ꞌba ɨ̀rɨ nɨ ɨmbale vɨɨ ɨnɨ kɨ́nɨ̀, “Ɨmbaápi àmɨ ꞌyowa vɨɨ nɨ tà nyaa ꞌba mʉ̀sorò traꞌba díká ꞌba ɨ̀zatà be vɨɨ ɨbe àrɨ eꞌyo yɨ̀ yà?”
12Yesu nɨ eꞌyo ꞌdɨ̀vɨɨ ɨrɨjʉ ꞌba, òmvɨ ɨnɨ yɨ́ kɨ́nɨ̀, “ꞌBa ɨnɨ rúá nɨ́ ovʉle ònyɨ̀be vɨɨ léé dàkɨ̀tarɨ̀ kʉ, te ra ꞌba àzo drʉ vɨɨ ɨnɨ ɨ ka. 13Te àmɨ mú eꞌyo sɨ̀zà ꞌyole kɨ́nɨ̀, ‘Àfa manɨ lèle vɨɨ ɨ̀rɨ asíndrɨ̀zà nɨ, te ovʉ ɨtetaa#Hosia 6:6 nɨ kʉ,’ vɨɨ ɨkɨ́a òni. Àrɨ̀yɨ̀kʉ ma caa mu ꞌba eꞌyo drɨ́á Orɨ nɨ lèle vɨɨ ꞌole vɨɨ ɨnɨ omve ɨ kʉ, te ꞌba ɨ̀zatà be vɨɨ ɨnɨ ɨ.”
Yesu nɨ zijʉ àbírí ꞌdàzà drìa vɨɨ
(Mariko 2:18-22; Luka 5:33-39)
14Acete ꞌba Yohana Bàbùtízìmù fèle vɨɨ nɨ ɨmbale vɨɨ cá Yesu bʉ díká zí ɨ̀rɨ kɨ́nɨ̀, “Àmá àbírí ꞌda ꞌba Farasayi drʉ vɨɨ ɨbe ra te ꞌba mɨnɨ ɨmbale vɨɨ ꞌdáá nɨnɨa kʉ àrɨ eꞌyo yɨ̀ yà?”
15Yesu òmvɨ ɨnɨ yɨ́ kɨ́nɨ̀, “Sìtà omu cale òmù izí rujʉ vɨɨ alɨa vɨɨ ɨnɨ nɨ otajʉ àwʉ wʉzà be dèè izíó nɨ cɨ ra yà? Ce ɨcoo nɨ ꞌo kʉ! Te sawà nɨ muu caa ꞌbanɨ izíó nɨ ꞌdujʉ ɨnɨ bʉ vɨɨ yɨ̀ ra, díká ɨnɨ ngaa mu ànɨ àbírí ꞌdàa ra.
16“ꞌBa àloo ɨcoo bòngo dèzà vɨ́ɨvɨɨ mulia rʉgà drʉ bòngo oꞌdɨ so ɨ kʉ, àrɨ̀yɨ̀kʉ bòngo oꞌdɨ vɨɨ nɨ ngaa bòngo òku vɨɨ àcee ra díká ɨ̀rɨ ngaa sò ndee ɨ̀nyàyɨɨ angɨrɨ. 17Díká ꞌba àloo ɨcoo wɨ́nò oꞌdɨ vɨ́ɨvɨɨ òsʉ màgálà òku wɨ́nò ɨdejʉ vɨ́ɨvɨɨ alɨa kʉ. Àrɨ̀yɨ̀kʉ té o ra, ɨꞌdɨ ndee ɨco àfɨ ra, wɨ́nò alɨa vɨɨ nɨ ngaa raa ra díká màgálà ndee nɨ ngaa caa òròdríkó drʉ. Ɨ̀ndɨ̀a ráaka, ꞌbá wɨ́nò oꞌdɨ vɨɨ to màgálà òꞌdɨ vɨɨ alɨa, ànɨ yɨ̀ ꞌbá ɨcó ɨnɨ tà mba ònyɨ̀be ìrìtro benì.”
Yesu nɨ òdrʉa dràle ra vɨɨ ɨ̀ngàjʉ díká izí àzo drʉ vɨɨ àtɨ̀jʉ vɨɨ
(Mariko 5:21-43; Luka 8:40-56)
18Yesu nɨ rɨrɨa eꞌyo ꞌdɨ̀vɨɨ ꞌyorɨa, ꞌBa ose àloo Yahudi ꞌyowa vɨ́ɨvɨɨ ca ɨ̀rɨ bʉ, sì ùlùúti nyawúá ɨ̀rɨ andretia díká kɨ́nɨ̀, “Zàmàa drà ngà lʉ́ oꞌdɨ́ꞌdò ꞌdɨ̀ ɨ. Te mɨ mu ngà gí ti ɨ̀rɨ drìa díká ɨ̀rɨ ngaa ɨ̀gàa ra.” 19Ànɨ Yesu nga oru díká bɨ̀ agú ndee butia ra pàbaa ꞌba ɨ̀rɨ nɨ ɨmbale vɨɨ mú ɨ̀rɨ butiyɨ̀ ɨ̀ndɨ̀.
20Acete cotí izí àloo àrɨ nɨ ibúlé rale rúá ɨlɨ mudrí drìa ìrì vɨɨ ca Yesu ngulia le drʉ díká ɨlo ɨ̀rɨ awo bòngo ti. 21Izí ndee ɨga eꞌyo nɨ asíá cenɨ̀cenɨ̀ kɨ́nɨ̀, “Ma tè kíríá bòngo ɨ̀rɨ awo vɨɨ ɨloo, ma ngaa àtɨ̀ɨ ra.” 22Yesu òjati àva, ndrè ɨ̀rɨ díká kɨ́nɨ̀, “Mɨ así ɨ̀rɨ òtɨ̀ kʉ zàmàa lá, àꞌɨ̀taa mɨ awo vɨɨ àtɨ̀ mɨ ꞌba.” Butia cotícotí izí ndee àtɨ̀ ra.
23Yesu nɨ ace fɨjʉ ꞌba ose ndee awo jóá ꞌbá, ndrè ꞌba gʉ̀á vʉle àwʉ ongo kajʉ vɨɨ ɨnɨ, ꞌba àwʉ wʉle dràa vɨɨ ɨnɨ be ꞌba dèè, 24ꞌyo ɨnɨ yɨ́ kɨ́nɨ̀, “Àmɨ pʉ́ drɨ́á àja! Òdrʉamvaa vɨɨ dràa kʉ, te ɨ̀rɨ oꞌdú koo!” Te ꞌba drɨ́á zo ɨ̀rɨ gigi. 25Butia ꞌbanɨ òꞌbɨ jóá vɨɨ ɨnɨ ɨ̀pʉ̀jʉ àja ꞌba, Yesu fɨ òdrʉa ndee drìa, ru ɨ̀rɨ gí ɨ̀rɨ ɨ̀ngajʉ díká òdrʉa ndee nga oru ra. 26Eꞌyo ꞌdɨ̀vɨɨ ku wàkàkà àngʉ̀ ndee alɨa yɨ̀ drɨ́á.
271 Yesu nɨ àngʉ̀ ndee kʉrɨa, àgu ìrì muleko vɨɨ bɨ́ ɨ̀rɨ buti díká rɨ́ ji oyʉ pàyɨ̀ kɨ́nɨ̀, “Daudi Mvápi, mɨ ovʉ asíndrɨ̀zà be àma bʉ!”
28Yesu nɨ ace fɨjʉ jóá ꞌbá, àgu ìrì muleko ꞌdɨ̀vɨɨ cá ɨ̀rɨ bʉ, ànɨ zi ɨnɨ kɨ́nɨ̀, “Àmɨ àꞌɨ̀ ma ɨco àmɨ àtɨ ra vɨɨ ra yà?”
Òmvɨ́ ɨ̀rɨ kɨ́nɨ̀, “Èè, Opɨ.”
29Acete Yesu ɨlo ɨnɨ mule díká kɨ́nɨ̀, “Ɨ̀rɨ ꞌonɨ trótrò àꞌɨ̀taa àmɨ ꞌyowa vɨɨ butia yɨ̀.” 30Ànɨ ɨnɨ mule zì nɨ ra. Yesu lɨ ɨnɨ bílé ngɨ́lɨ́ngɨ́lɨ́ kɨ́nɨ̀, “Àmɨ òlʉ́ eꞌyo ꞌdɨ̀vɨɨ ꞌba àloo yɨ́ kʉ.” 31Te ꞌba ndee kódrì pʉ́ mu eꞌyo Yesu nɨ ꞌole vɨɨ ɨre àngʉ̀ naa alɨa yɨ̀ drɨ́á.
Yesu nɨ agú ɨ̀tàle kʉ vɨɨ àtɨ̀jʉ vɨɨ
32Àgu ndee ɨnɨ nɨ pʉ̀rɨa mvɨrɨa, ꞌba alóo jí agú ɨ̀tàle kʉ orɨndɨ ònzɨ yɨ́ vɨ́ɨvɨɨ Yesu bʉ. 33Te Yesu nɨ orɨndɨònzɨ ɨ̀rɨ alɨa vɨɨ ɨ̀pʉ̀jʉ ꞌba, agú ndee ɨꞌdo ɨ̀ta ra díká ꞌba drɨ́á cá òsùtaa yɨ̀ ànɨ ꞌyó kɨ́nɨ̀, “Àma ndrèe ngà drɨ̀ò eꞌyo àloo ꞌdɨ̀ vɨ́ɨvɨɨ àngʉ̀ Isirali nɨ vɨɨ alɨa kʉ.”
34Te ꞌba Farasayi drʉ vɨɨ ꞌyó kɨ́nɨ̀, “Opɨ orɨndɨ onzɨ ꞌyowa vɨɨ ɨ òkpo fe Yesu yɨ́ orɨndɨònzɨ ɨdrojʉ nɨ̀.”
Yesu nɨ ovʉjʉ òꞌbɨ yɨ́ càndɨ yɨ̀ vɨɨ
35Yesu ací àkú imgbelé àloo nyɨ́rɨ́á vɨɨ ɨnɨ ale yɨ̀ kúrù, rɨ ji ꞌba ɨmba pàyɨ̀ sinagogi ɨnɨ ale yɨ̀, òlʉ̀ eꞌyo ònyɨ̀be Kárí ꞌBùnɨ vɨɨ drìa díká àtɨ̀ ꞌba drɨ́á àzo be vɨɨ ɨnɨ ra. 36Ɨ̀rɨ nɨ òꞌbɨ mʉ̀mʉrà vɨɨ ɨnɨ ndrèjʉ ꞌba, càndɨ fɨ ɨ̀rɨ asíá ꞌba ndee ɨnɨ eꞌyo yɨ̀ tʉ̀, àrɨ̀yɨ̀kʉ ɨnɨ nɨ ovʉle òrì yɨ̀ díká ɨzákɨ̀zà drʉ, kɨ̀le kàbèlè abale sùà drʉ agú ɨnɨ ocele vɨɨ àkòa yɨ̀ vɨɨ lé. 37Ànɨ ꞌyo ꞌba ɨ̀rɨ nɨ ɨmbale vɨɨ ɨnɨ yɨ́ kɨ́nɨ̀, “Òrɨ ka ngaa angɨrɨ, te ꞌba òrɨ ndee lòꞌba vɨɨ ɨnɨ kàlàfe wereá drʉ. 38Àmɨ zí eꞌyo Opɨ òrɨ apíre drʉ vɨɨ tia, ànɨ ɨ̀rɨ pè àzí ꞌbá ti angɨrɨ mujʉ òrɨ ndee lòjʉ benì.”
Currently Selected:
Matayo 9: MADI-URL
Highlight
Share
Copy
Want to have your highlights saved across all your devices? Sign up or sign in
© Wycliffe Bible Translators, Inc., © SIL Uganda, All rights reserved
Matayo 9
9
Yesu nɨ agú aꞌbezà àtɨ̀jʉ vɨɨ
(Mariko 2:1-12; Luka 5:17-26)
1Yesu tu yee alɨa, kàdrì ròò àva mèrè ɨ̀ga àkú ìmgbélé ɨ̀rɨ awo ɨ̀rɨ nɨ ovʉjʉ vɨɨ alɨa. 2Nàa, ꞌba alóo jí ɨ̀rɨ bʉ agú àloo aꞌbezà vɨ́ɨvɨɨ lazà drʉ bírísì drìa. Yesu nɨ ꞌba ndee ɨnɨ àꞌɨ̀taa ndrèrɨa, ꞌyo agú aꞌbezà ndee yɨ́ kɨ́nɨ̀, “Mɨ así ɨ̀rɨ mbamba mvamàa lá! Ɨ̀zatà mɨ awo vɨɨ ɨnɨ trʉ̀zà drʉ.”
3Acete vɨ̀a, ɨmbaꞌba àzítáá Musa awo vɨɨ nɨ vɨɨ alóo ɨꞌdó ꞌyo ànɨ ɨ̀sɨlɨa kɨ́nɨ̀, “Agú ꞌdɨ̀vɨɨ ɨ̀déá drʉ Orɨ bʉ!”
4Yesu nɨ eꞌyo ɨnɨ nɨ ɨgale vɨɨ vàle ra vɨɨ yɨ̀, ꞌyo ɨnɨ yɨ́ kɨ́nɨ̀, “Àmɨ ɨgataa ònzɨ tà mbaa àmɨ asíá àrɨ eꞌyo yɨ̀ yà? 5Eꞌyo ngoo ɨ̀rɨ ɨ̀wako drʉ ꞌyozà drʉ nɨ̀, ꞌyojʉ, ‘Mɨ awo ɨ̀zatà vɨɨ ɨnɨ trʉ̀zà drʉ vɨɨ ɨ,’ nòsɨ̀kʉ ꞌyojʉ, ‘Mɨ nga oru díká mɨ ací vɨɨ ɨ yà’? 6Mà ngaa muu ɨ̀ce àmɨ yɨ́ kɨ́nɨ̀, ꞌBa Mvápi awo òkpo cɨ nyawúá ɨ̀zatà trʉ̀jʉ.” Acete ꞌyo agú aꞌbezà ndee yɨ́ kɨ́nɨ̀, “Mɨ nga oru, mɨ ꞌdu mɨ awo bírísì díká mɨ mvɨ àkúá” 7Ànɨ agú ndee nga oru díká mvɨ àkúá rá. 8Òꞌbɨ nɨ eꞌyo ꞌdɨ̀vɨɨ ndrèjʉ ꞌba, ovʉ́ òsùtaa yɨ̀ díká ìnzí Orɨ nɨ tʉ̀ ɨ̀rɨnɨ òkpo ꞌdɨ̀vɨ́ɨvɨɨ fèle ꞌba ada yɨ́ ɨ̀ndɨ̀ vɨɨ yɨ̀.
Yesu nɨ Matayo nɨ omvejʉ vɨɨ
(Mariko 2:13-17; Luka 5:27-32)
9Yesu nɨ àngʉ̀ na kʉjʉ ꞌba, mu adro, ndrè agú mʉ̀sorò trale omvele Matayo drʉ vɨɨ, rɨzà drʉ nɨ awo mézà mʉ̀sorò trajʉ vɨɨ tia. Omve ɨ̀rɨ kɨ́nɨ̀, “Mɨ bɨ̀ ma buti.” Ànɨ Matayo nga oru díká bɨ̀ lʉ́ ɨ̀rɨ buti ɨ.
10Yesu nɨ rɨrɨa tà nyarɨa Matayo awo jóá, ꞌba òꞌbɨ́ mʉ̀sorò trale vɨɨ ɨnɨ ꞌba ɨ̀zatà be vɨɨ ɨnɨ be, mú fɨ tà nya ɨrɨ bʉ ꞌba ɨ̀rɨ nɨ ɨmbale vɨɨ ɨnɨ be ɨ̀ndɨ̀. 11ꞌBa Farasayi drʉ vɨɨ ɨnɨ nɨ ɨ̀rɨ ndrèjʉ ꞌba, zí ꞌba ɨ̀rɨ nɨ ɨmbale vɨɨ ɨnɨ kɨ́nɨ̀, “Ɨmbaápi àmɨ ꞌyowa vɨɨ nɨ tà nyaa ꞌba mʉ̀sorò traꞌba díká ꞌba ɨ̀zatà be vɨɨ ɨbe àrɨ eꞌyo yɨ̀ yà?”
12Yesu nɨ eꞌyo ꞌdɨ̀vɨɨ ɨrɨjʉ ꞌba, òmvɨ ɨnɨ yɨ́ kɨ́nɨ̀, “ꞌBa ɨnɨ rúá nɨ́ ovʉle ònyɨ̀be vɨɨ léé dàkɨ̀tarɨ̀ kʉ, te ra ꞌba àzo drʉ vɨɨ ɨnɨ ɨ ka. 13Te àmɨ mú eꞌyo sɨ̀zà ꞌyole kɨ́nɨ̀, ‘Àfa manɨ lèle vɨɨ ɨ̀rɨ asíndrɨ̀zà nɨ, te ovʉ ɨtetaa#Hosia 6:6 nɨ kʉ,’ vɨɨ ɨkɨ́a òni. Àrɨ̀yɨ̀kʉ ma caa mu ꞌba eꞌyo drɨ́á Orɨ nɨ lèle vɨɨ ꞌole vɨɨ ɨnɨ omve ɨ kʉ, te ꞌba ɨ̀zatà be vɨɨ ɨnɨ ɨ.”
Yesu nɨ zijʉ àbírí ꞌdàzà drìa vɨɨ
(Mariko 2:18-22; Luka 5:33-39)
14Acete ꞌba Yohana Bàbùtízìmù fèle vɨɨ nɨ ɨmbale vɨɨ cá Yesu bʉ díká zí ɨ̀rɨ kɨ́nɨ̀, “Àmá àbírí ꞌda ꞌba Farasayi drʉ vɨɨ ɨbe ra te ꞌba mɨnɨ ɨmbale vɨɨ ꞌdáá nɨnɨa kʉ àrɨ eꞌyo yɨ̀ yà?”
15Yesu òmvɨ ɨnɨ yɨ́ kɨ́nɨ̀, “Sìtà omu cale òmù izí rujʉ vɨɨ alɨa vɨɨ ɨnɨ nɨ otajʉ àwʉ wʉzà be dèè izíó nɨ cɨ ra yà? Ce ɨcoo nɨ ꞌo kʉ! Te sawà nɨ muu caa ꞌbanɨ izíó nɨ ꞌdujʉ ɨnɨ bʉ vɨɨ yɨ̀ ra, díká ɨnɨ ngaa mu ànɨ àbírí ꞌdàa ra.
16“ꞌBa àloo ɨcoo bòngo dèzà vɨ́ɨvɨɨ mulia rʉgà drʉ bòngo oꞌdɨ so ɨ kʉ, àrɨ̀yɨ̀kʉ bòngo oꞌdɨ vɨɨ nɨ ngaa bòngo òku vɨɨ àcee ra díká ɨ̀rɨ ngaa sò ndee ɨ̀nyàyɨɨ angɨrɨ. 17Díká ꞌba àloo ɨcoo wɨ́nò oꞌdɨ vɨ́ɨvɨɨ òsʉ màgálà òku wɨ́nò ɨdejʉ vɨ́ɨvɨɨ alɨa kʉ. Àrɨ̀yɨ̀kʉ té o ra, ɨꞌdɨ ndee ɨco àfɨ ra, wɨ́nò alɨa vɨɨ nɨ ngaa raa ra díká màgálà ndee nɨ ngaa caa òròdríkó drʉ. Ɨ̀ndɨ̀a ráaka, ꞌbá wɨ́nò oꞌdɨ vɨɨ to màgálà òꞌdɨ vɨɨ alɨa, ànɨ yɨ̀ ꞌbá ɨcó ɨnɨ tà mba ònyɨ̀be ìrìtro benì.”
Yesu nɨ òdrʉa dràle ra vɨɨ ɨ̀ngàjʉ díká izí àzo drʉ vɨɨ àtɨ̀jʉ vɨɨ
(Mariko 5:21-43; Luka 8:40-56)
18Yesu nɨ rɨrɨa eꞌyo ꞌdɨ̀vɨɨ ꞌyorɨa, ꞌBa ose àloo Yahudi ꞌyowa vɨ́ɨvɨɨ ca ɨ̀rɨ bʉ, sì ùlùúti nyawúá ɨ̀rɨ andretia díká kɨ́nɨ̀, “Zàmàa drà ngà lʉ́ oꞌdɨ́ꞌdò ꞌdɨ̀ ɨ. Te mɨ mu ngà gí ti ɨ̀rɨ drìa díká ɨ̀rɨ ngaa ɨ̀gàa ra.” 19Ànɨ Yesu nga oru díká bɨ̀ agú ndee butia ra pàbaa ꞌba ɨ̀rɨ nɨ ɨmbale vɨɨ mú ɨ̀rɨ butiyɨ̀ ɨ̀ndɨ̀.
20Acete cotí izí àloo àrɨ nɨ ibúlé rale rúá ɨlɨ mudrí drìa ìrì vɨɨ ca Yesu ngulia le drʉ díká ɨlo ɨ̀rɨ awo bòngo ti. 21Izí ndee ɨga eꞌyo nɨ asíá cenɨ̀cenɨ̀ kɨ́nɨ̀, “Ma tè kíríá bòngo ɨ̀rɨ awo vɨɨ ɨloo, ma ngaa àtɨ̀ɨ ra.” 22Yesu òjati àva, ndrè ɨ̀rɨ díká kɨ́nɨ̀, “Mɨ así ɨ̀rɨ òtɨ̀ kʉ zàmàa lá, àꞌɨ̀taa mɨ awo vɨɨ àtɨ̀ mɨ ꞌba.” Butia cotícotí izí ndee àtɨ̀ ra.
23Yesu nɨ ace fɨjʉ ꞌba ose ndee awo jóá ꞌbá, ndrè ꞌba gʉ̀á vʉle àwʉ ongo kajʉ vɨɨ ɨnɨ, ꞌba àwʉ wʉle dràa vɨɨ ɨnɨ be ꞌba dèè, 24ꞌyo ɨnɨ yɨ́ kɨ́nɨ̀, “Àmɨ pʉ́ drɨ́á àja! Òdrʉamvaa vɨɨ dràa kʉ, te ɨ̀rɨ oꞌdú koo!” Te ꞌba drɨ́á zo ɨ̀rɨ gigi. 25Butia ꞌbanɨ òꞌbɨ jóá vɨɨ ɨnɨ ɨ̀pʉ̀jʉ àja ꞌba, Yesu fɨ òdrʉa ndee drìa, ru ɨ̀rɨ gí ɨ̀rɨ ɨ̀ngajʉ díká òdrʉa ndee nga oru ra. 26Eꞌyo ꞌdɨ̀vɨɨ ku wàkàkà àngʉ̀ ndee alɨa yɨ̀ drɨ́á.
271 Yesu nɨ àngʉ̀ ndee kʉrɨa, àgu ìrì muleko vɨɨ bɨ́ ɨ̀rɨ buti díká rɨ́ ji oyʉ pàyɨ̀ kɨ́nɨ̀, “Daudi Mvápi, mɨ ovʉ asíndrɨ̀zà be àma bʉ!”
28Yesu nɨ ace fɨjʉ jóá ꞌbá, àgu ìrì muleko ꞌdɨ̀vɨɨ cá ɨ̀rɨ bʉ, ànɨ zi ɨnɨ kɨ́nɨ̀, “Àmɨ àꞌɨ̀ ma ɨco àmɨ àtɨ ra vɨɨ ra yà?”
Òmvɨ́ ɨ̀rɨ kɨ́nɨ̀, “Èè, Opɨ.”
29Acete Yesu ɨlo ɨnɨ mule díká kɨ́nɨ̀, “Ɨ̀rɨ ꞌonɨ trótrò àꞌɨ̀taa àmɨ ꞌyowa vɨɨ butia yɨ̀.” 30Ànɨ ɨnɨ mule zì nɨ ra. Yesu lɨ ɨnɨ bílé ngɨ́lɨ́ngɨ́lɨ́ kɨ́nɨ̀, “Àmɨ òlʉ́ eꞌyo ꞌdɨ̀vɨɨ ꞌba àloo yɨ́ kʉ.” 31Te ꞌba ndee kódrì pʉ́ mu eꞌyo Yesu nɨ ꞌole vɨɨ ɨre àngʉ̀ naa alɨa yɨ̀ drɨ́á.
Yesu nɨ agú ɨ̀tàle kʉ vɨɨ àtɨ̀jʉ vɨɨ
32Àgu ndee ɨnɨ nɨ pʉ̀rɨa mvɨrɨa, ꞌba alóo jí agú ɨ̀tàle kʉ orɨndɨ ònzɨ yɨ́ vɨ́ɨvɨɨ Yesu bʉ. 33Te Yesu nɨ orɨndɨònzɨ ɨ̀rɨ alɨa vɨɨ ɨ̀pʉ̀jʉ ꞌba, agú ndee ɨꞌdo ɨ̀ta ra díká ꞌba drɨ́á cá òsùtaa yɨ̀ ànɨ ꞌyó kɨ́nɨ̀, “Àma ndrèe ngà drɨ̀ò eꞌyo àloo ꞌdɨ̀ vɨ́ɨvɨɨ àngʉ̀ Isirali nɨ vɨɨ alɨa kʉ.”
34Te ꞌba Farasayi drʉ vɨɨ ꞌyó kɨ́nɨ̀, “Opɨ orɨndɨ onzɨ ꞌyowa vɨɨ ɨ òkpo fe Yesu yɨ́ orɨndɨònzɨ ɨdrojʉ nɨ̀.”
Yesu nɨ ovʉjʉ òꞌbɨ yɨ́ càndɨ yɨ̀ vɨɨ
35Yesu ací àkú imgbelé àloo nyɨ́rɨ́á vɨɨ ɨnɨ ale yɨ̀ kúrù, rɨ ji ꞌba ɨmba pàyɨ̀ sinagogi ɨnɨ ale yɨ̀, òlʉ̀ eꞌyo ònyɨ̀be Kárí ꞌBùnɨ vɨɨ drìa díká àtɨ̀ ꞌba drɨ́á àzo be vɨɨ ɨnɨ ra. 36Ɨ̀rɨ nɨ òꞌbɨ mʉ̀mʉrà vɨɨ ɨnɨ ndrèjʉ ꞌba, càndɨ fɨ ɨ̀rɨ asíá ꞌba ndee ɨnɨ eꞌyo yɨ̀ tʉ̀, àrɨ̀yɨ̀kʉ ɨnɨ nɨ ovʉle òrì yɨ̀ díká ɨzákɨ̀zà drʉ, kɨ̀le kàbèlè abale sùà drʉ agú ɨnɨ ocele vɨɨ àkòa yɨ̀ vɨɨ lé. 37Ànɨ ꞌyo ꞌba ɨ̀rɨ nɨ ɨmbale vɨɨ ɨnɨ yɨ́ kɨ́nɨ̀, “Òrɨ ka ngaa angɨrɨ, te ꞌba òrɨ ndee lòꞌba vɨɨ ɨnɨ kàlàfe wereá drʉ. 38Àmɨ zí eꞌyo Opɨ òrɨ apíre drʉ vɨɨ tia, ànɨ ɨ̀rɨ pè àzí ꞌbá ti angɨrɨ mujʉ òrɨ ndee lòjʉ benì.”
Currently Selected:
:
Highlight
Share
Copy
Want to have your highlights saved across all your devices? Sign up or sign in
© Wycliffe Bible Translators, Inc., © SIL Uganda, All rights reserved