Kulki Kaikanka 3
3
Libait nani warkka ba
1Sainai ilka ra Dawan bui Moses ra aisin ba piua ra, Eran ba Moses wal kiamka nani ba naha nani kata: 2Eran luhpia nani nina ba: tawahkia ba Nadab, ningka ba Abihú, wala Eleazar bara Itamar.#Kul K 26.60. 3Naha nani walhwal na purara batana laikan ba ra, baha nani ba aihka sakan prîs warkka ba daukaia, 4sakuna Nadab Abihú wal ba Dawan lama altarka ra witin kaiki ba kat pruan, kan witin nani lâ kat daukras Dawan adarka apia pauta mukan, Sainai upla iwras tasbaya ra.#Lib 10.1-2; Kul K 26.61. Witin nani sin luhpa âpu kan. Bamna Eleazar bara Itamar wal baman prîs warkka ba daukan, Eran lika pura kaiki kan.
5Dawan ba Moses ra aisi, naku win:
6“Libai kiamka nani ba paiws balbia, bara wis witin nani ba Eran lamara wark nani daukaia sakri, witin ai adarka ra. 7Eran warkka ba witin nani hilp munbia, dakni aiska warkka ba daukaia tint watla ra; bara baku witin nani tint watla ra warkka nani daukaia ba brin. 8Bara tint watla ra wark daukaia dukia nani ba sut main kaiki kabia, bara dîa dîa sut Israel luhpia nani warkka daukaia ba, witin nani ai mihta ra mangkbia. 9Libait nani ba Israel luhpia wala nani ba tila wina aihka sâks. Witin nani ba, Eran bara ai kiamka nani baman warkka dauki kabia. 10Bamna Eran bara luhpia nani baman yarka prîs warkka dauki kabia, bara ani upla wala baha lamara wabia ba prubia.”
Libait nani ba, Dawan mita bâk sakan sa
11Dawan ba Moses ra aisi, naku win:
12“Bamna kaiks, Libait nani ba Israel luhpia nani tila wina bâk sakri sa, tawahkia nani ba watlika ra, Israel luhpia nani tilara luhpia tawahkia aisubi taki nani ba, 13tawahkia nani sut ba lika yang briri, Idsip tasbaya ra tawahkia nani sut ikri ba yua wina, bara Israel ra tawahkia bani ba, upla nani bara daiwan nani tawahkia sin sut.#Imp St 13.2,11-16. Bamna tawahkia nani ba yang briri. Yang sika Dawan.”
Libait nani ba kulki kaikan
14Bara Dawan bui Sainai upla iwras tasbaya ra Moses ra aisi, naku win: 15“Libait luhpia nani ba kulki kaiks, aisika nani bara taika nani ba wina, bara ai masraka nani ba sut, waitna bani kati kumi bri ba wina ai purara.” 16Bamna Moses, Dawan bîla dîa daukaia win ba kat daukan.
17Libai luhpia nani ba yumhpa kan: Guersón, Quehat bara Merarí.
18Bara naha nani sika Guersón luhpia nani nina kulkanka masraka nani ba kat: Libní bara Simí.
19Quehat luhpia nani ba, ai masraka nani kulkan ba kat, Amram, Ishar, Hebrón bara Uziel.
20Bara Merarí luhpia nani ai masraka nani kulkan ba kat Mahli bara Musí.
Naha nani sika Libai masraka nani, ai aisika nani watla bîla uplika nani kulkanka ba.
21Guersón masraka nani ba sika Libní bara Simí wal kiamka nani ba. 22Baha nani kulki kaikan ba waitna bani kati kumi bri ba wina ai purara, 7,500 kan. 23Guersón masraka nani ba lika tint watla muna tani ra takaski kan. 24Bara Guersón kiamka wihtka ba lika Eliasaf, Lael luhpia ba. 25Dawan wal aisaia watla ra, Guersón luhpia nani warkka ba sika tint watla ba main kaikaika, tint watla pura prakaika ba bara tint watla durka kwalka ba sin. 26Utla lata kutbanka kwalka nani ba bara utla kutban durka kwalka ba sin lama kir holi pliska ba, altar ba sin kutban kwalka ba, baha sin kwala pamaia kiwka nani ba sin sut kaikaia.
27Bara Quehat masraka nani ba sika Amram uplika nani ba, Ishar, Hebrón, bara Uziel uplika nani ba sin, 28waitna bani ai manka kati kumi alkan ba wina ai purara nani ba, asla sut kulkan ba ra 8,300 kan. Naha sin Dawan wal aisaia tint watla paskaia warkka ra kan, 29bara witin nani ba tint watla waupasa tani ra takaski banhwi kan. 30Ai wihtka ba lika Elisafán, Uziel luhpia ba. 31Baha nani main kaiki kan: lâ auhbaia watla ba, tibilka ba, kiandil bapi angkaia dusa ba, altar nani ba, diara wala nani wark daukaia yus muni ba, kwala paman nani ba bara diara watla nani ba sut.
32Bara prîs Eran luhpia, Eleazar lika, Libait nani sut wihtka aimaki kan baha watla ra.
33Merarí masraka ba lika Mahli bara Musí uplika nani ba, baha nani sika Merarí kiamka nani ba. 34Baha nani tila wina kulkan, waitna nani mani kati kumi wina ai purara bri ba sut lika 6,200. 35Bara Merarí kiamka wihtka ba lika Suriel, Abihail luhpia ba, baha nani takaskan tint watla ba tnaya yahbra tani ra. 36Merarí kiamka ba lika: tint watla tatka nani, dus nani ba, playka tara nani ba, ai munhta karnika alki playka nani bara diara watla nani wark daukaia dukia nani ba sut, 37bara utla kutban tnaya kir playa tara nani ba, munhta karnika dusa nani ba, dus tasba ra bapan nani ba bara ai kiwka nani ba sut main kaiki kan.
38Tint watla ra lalma Dawan wal aisaia tintka watla ba lamara, Moses, Eran bara ai luhpia nani aikuki, ai watla mâkan. Witin nani baha Dawan wal aisaia watla ba main kaiki kan Israel luhpia nani nina ra. Bara upla prîs apia nani ba baha lamara wabia kaka prubia.
39Moses bara Eran wal bui Libait nani ba kulkan masraka nani ba, Dawan win ba kat. Bara waitna bani, kati kumi wina ai purara ba sut lika 22,000 kan.
Libait nani ba tawahkia nani watlika ra sakan
40Bara Dawan bui Moses ra win:
“Israel luhpia waitna nani, tawahkia bani ba kulki kaiks, kati kumi bri ba wina ai purara, bara sin nina ba wauhtaya ra uls. 41Bara baha ningkara, Israel luhpia nani tawahkia nani ba watlika ra, Libait nani ba aik. Yang sika Dawan. Baku natka ra sin, Israel luhpia nani daiwra tawahkia nani ba watlika ra, Libait nani daiwra tawahkia ba aik.”
42Bamna Moses lika Dawan win ba kat, Israel luhpia nani tawahkia bani ba kulki kaikan, 43bara tawahkia waitna nani sut nina bani kat kulkan ba, kati kumi wina ai purara, asla lika 22,273 kan.
44Bara Dawan ba Moses ra aisi, naku win:
45“Libait nani ba sut bris, Israel luhpia nani tawahkia nani ba watlika ra, Libait nani daiwra nani ba sin, Israel luhpia daiwra nani ba watlika ra, bara Libait nani ba yang brimna. Yang sika Dawan. 46Sakuna Israel luhpia nani tawahkia ba kau ailal kan, Libait nani ba wal. Bamna 273 Israel luhpia tawahkia nani ba mana aibapi briaia sma, 47bahamna 273 nani kumi bani ba lal mana silbar mâ matsip makas, baha tint watla ra lalah praiska kulki ba kulkanka kat. 48Bara pura mana aibapan lalahka ba Eran ra bara luhpia nani ra sin yas.”
49Bara Moses baha lalahka ba Israel luhpia nani wina brin, pura mana aibapan lalahka kau pura takan ba, luhpia tawahkia nani 273 lal mana aibapan ba sin Moses brin, baha nani Libait nani mita atki sakan kan ba. 50Israel luhpia nani tawahkia nani wina brin ba silbar mâ 1,365, tint watla lalahka kulkanka ba kat. 51Bara pura mana aibapan lalahka ba, Moses bri si Eran ra bara ai luhpia nani ra sin yan, Dawan aisin ba kat, Dawan bui Moses ra dîa daukaia win ba kat daukan.
Currently Selected:
Kulki Kaikanka 3: MSKTU
Highlight
Copy
Compare
Share
Want to have your highlights saved across all your devices? Sign up or sign in
<p>© 2010 Bible Society in Nicaragua</p>