1 Korinti 16
16
Uɓolotosu wi ikebe adama a ama a̱ A̱sula̱
1Ni i ushi ikebe adama a ama a̱ A̱sula̱, n ciga ɗu ta̱ i yuwan cine n dammai a̱a̱ꞌisa̱ a̱ a̱za̱ e Itoni a na a̱ ri pe a̱tsuma̱ a Galatiya a yuwan. 2Urana wa Aladi suru i ꞌyuwan i ciga za suru u zuwa ikebe i ro e ili i na u tsura̱i. I zuwa le adama a sadaka. Ni i yuwan ne, ya̱a̱ ta̱wa̱ nda i ꞌya̱wa̱ ndeɗe tsa̱ra̱ i ushi utafa a mantsa ma na n ta̱wa̱i shi. 3I ɗangwa a̱za̱ e Itoni o ro a tara ikebeꞌe a̱ ꞌya̱wa̱ Urishelima. Na̱ n rawa n ta ca le mepepelime ma na woo roco a̱ɗu ɗa i ɗangwa nle. 4Na̱ wu ntsaa a̱mu fo n ꞌya̱wa̱, tsu ta yuwan mmalu suru.
Ili i na Bulu cigai u yuwan
5Na̱ n ka̱nda̱ruwa̱ Makidoniya suru, n ta̱ ta̱wa̱ n ka̱lyuwa̱ ɗu. 6U ta yuwan n da̱nu na̱ a̱ɗu neꞌen rana re, ko a̱ tyo o ukosu u mantsa mo uta̱nu. A̱vu i kamba mu a̱tsuma̱ a mmalu n va̱, uba̱ta̱ u na mee tyo suru. 7Na̱ Zagbain usu, n ciga n rawa ɗe goꞌo shi, tsa̱ra̱ n da̱nu oɓolo na̱ a̱ɗu a mantsa na̱ a̱bunda̱ a na ma̱a̱ ta̱wa̱ a̱vu n ka̱ra̱shi. 8Amma n ta̱ da̱na̱ pa a̱tsuma̱ a Afisu hali urana u na aa yuwan A̱buki o Urana wa Kupoton† u ka̱ra̱. 9Adama a na a̱ kpa̱tuꞌwa̱a̱ mu ta̱ ure u saꞌani u ro adama o ulinga u gbain, waru ama na̱ a̱bunda̱ a̱ ta̱ ususu, ko na wo oꞌwoi nꞌyuwatan n ta̱ lo na̱ a̱bunda̱.
10Na̱ Timoti rawa, i ushi yi ne ekere e re. U ta yuwusan ulinga wu Zagbain, cine a̱mu maa yuwusan. 11She i lyawa nanza rono yi e iɗa wan. I zuwaa yi abaꞌun reve i kamba yi a mantsa ma na wa̱a̱ ka̱mba̱ ya̱ꞌa̱ va̱. N ta pura yi na ama a na a̱a̱ ta̱wa̱.
12Adama a za tsu Apolo, m patishi yi ta̱ u ꞌya̱wa̱ oɓolo na̱ a̱za̱ a̱ yi a mantsa ma na a̱a̱ ka̱lyuwa̱ ɗu, amma u ri na aɗa a na wa̱a̱ ꞌya̱wa̱ gogo shi. Nu u tsura̱ mantsa u ta̱ ta̱wa̱.
Ukosu u mepepelime ma̱ Bulu
13I da̱na̱ ufoɓu. I ɓa̱na̱ ucawu wo okolo a̱ ɗu ulobonu. Waru she yu uwwa wovon wan. Yi isawan nu ucira. 14I yuwan ulinga u ɗu suru a̱tsuma̱ e icigi.
15I reve ta̱ a na Istifana nu uꞌwa wa̱ yi ma̱ɓula̱ ele ɗa aza a na a fara o oꞌwoi a̱za̱ e Itoni a̱tsuma̱ a Akataya, waru a ca ta̱ aciyele adama a̱ a̱ga̱nda̱ a ama a̱ A̱sula̱. M pati ɗu ta̱ ama a̱ va̱, 16i toni ama a nda na akapi e le aza a na a yuwusan ulinga oɓolo ne ele. 17N yuwan ta̱ ma̱za̱nga̱ a na Istifana, na̱ Fatunatu na̱ Akayiku a rawai. A kamba mu ta̱ adama a na i ri pa shi. 18A ca mu ta̱ ugbamu wa asuvu, waru n reve ta̱ a yuwaan ɗu ta̱ fo ne. Ni i ciga i ꞌyuwan i ca tsugbain a̱ tyo aza a na suru a yuwain tsugbashi tsa na tsa ntsayi.
19A̱a̱ꞌisa̱ a̱ a̱za̱ e Itoni† pa nda a̱tsuma̱ e iɗa ya Asiya a̱ ta̱ lyungusa̱a̱ ɗu ica̱su i le. Akila oɓolo na̱ Birisika, oɓolo na̱ a̱a̱ꞌisa̱ a na o ɓolotosu o uꞌwa u le, a̱ ta̱ lyungusa̱a̱ ɗu ica̱su i le a̱tsuma̱ a ala a Zagbain.
20A̱za̱ e Itoni yi Zagbain suru a̱ ta̱ lyungusa̱a̱ ɗu ica̱su i le. I ca̱sa̱la̱i ulobonu.
21A̱mu Bulu, a̱mu ɗa n ɗanai ica̱su i nda ne ekere a̱ va̱.
22N ta yuwusan avasa A̱sula̱ a yuwaan vuma na ꞌyuwain Zagbain una̱. Lyawa Zagbain ta̱wa̱ gogo.
23Lyawa isaꞌani ya̱ Yesu Zagbain da̱na̱ oɓolo na̱ a̱ɗu.
24N ciga ta̱ vuma na suru ri a̱tsuma̱ e Yesu Kristi Zamawawa.
Currently Selected:
1 Korinti 16: tswNT
Highlight
Share
Copy
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.