Rumi 16
16
Polni hamchang
1Tabok ang chini bukhuk Phoibirni kothoyw hamphari khalaidok. Bw Kingkriya aulini mothani mwngjwk. 2Kaitorni borogroknw jekhalayoi sodor khalaywi lathai kalai bwnw nokh Subraini mwngwi obwtwijar khalayoi sodor khalaywi ladi. Mwngsachwk kothoyw jwtini bw nokhni dayw chubama nayw hingkhlai bwnw chubadi, twmwi hinba bw kodur borognw, obw tama anwbw chubajak. 3Priskilla bai Akilanw ani hamchang rwdi. Bok Khristo Jisuni samungw angbai baksa mwngjak 4Ani singli rwkkhia khalaini bagwi bok sakroknw thwimungni sakangw khibijak. Keber angya, matwr jotho Bejihudi motharokbw bokni dayw hamakhom. 5Bokni nogw jebwrok motha hinwi baksa thumjalai boknwbw ani hamchang rwdi.
Asia amchoini pwila jebw Khristonw yachakjak ani o khajani aphak Ipenitonw hamchang rwdi. 6Je Moriyom nokhni bagwi kabangma tangsrang khalaijak, bwnw hamchang rwdi. 7Andronik bai Juniyanw ani hamchang rwdi. Bokbw ani kosol Jihudi tei angbai baksa bokhbw alongw chupjagwi tongjak. Pirisairokni bisingw bok boromnang borog. Bok ani sakangw Khristonw paitokjak. 8Subraini pabaksabai ani khajani aphak Ampliyatnw hamchang rwdi. 9Je Ubran jebw chwngbai baksa Khristoni bagwi samung tang, bwnw tei ani khajani aphak Estakhisnw hamchang rwdi. 10Apillinw hamchang rwdi, jebwnw Khristoni borog hinwi potaiyoi naijak. Aristobulni nokni borog roknw hamchang rwdi. 11Herodiyon, jebw ani kosol Jihudi, bwnw hamchang rwdi. Narkisni nugw jebwrok Subraini borog boknw hamchang rwdi.
12Kruphena tei Kruphosanw hamchang rwdi, I birokmarok Subraini bagwi tangsrang khalaiyw. Ani o Khajani aphakchwkma Porsisnwbw hamchang rwdi, jebw Subraini bagwi kabangma samung tangjak. 13Subrai chongnai Ruphnw tei bomanw hamchang rwdi. Bini boma ani dayw amani kosolse. 14Osungkrito, Phligon, Hemers, Patrobas, Hermas, arw bokbai baksa tongnai Khristoni paitoai takhuk roknwbw hamchang rwdi. 15Phillog arw Juliya, Niriyo arw bini bukhuk, Olumpo tei bokbai baksa Kaitorni je borogrok tong boknw jothonw hamchang rwdi. 16Hamjakmani kha lagwi nokh kaisabai kaisanw hamchang rwdi. Khristoni jotho motharok nokhnw hamchang rwkha.
Paithak hamphrwng
17Takhukrok, nokh je swrwngmung mankha obwni baithe phwrwngmwng rwgwi jebwrok aphak baklai tei thema rw, boknw naichwmdi hinwi ang nokhnw kabokjagw. Nokh bokni daini kachalw tongdi. 18Twmwi hinba imwtwijar borogrok chini Subrai Khristonw mwngya karwi keber sakni oknwse mwngw. Kwtwi tei khanatok kok sagwi ujua khani borogroknw banedok. 19Nokhni kok khananaini kok jotho khanajak, tei obwni bagwi ang nokhni sakao khasrang jak. Ang nayw nokh gamnw siniywi yachagwi lanaitwi tei chaya daini kachalo tongnaitwi. 20Khachang rwnaisa Kaitor dodogwi saitannw nokhni yathwi tolao khibiywi nagdrubwi pairwnai. Chini Subrai Jisuni khakhamma nokh jothobai baksa tongthwk. 21Angbai baksa jebw samung tang o Timothiyo nokhnw hamchang rwdok, Lukiyo, Jason, tei Sosipatrobw nokhnw hamchang rwdok. Bokbw ani kosol Jihudi dophani borog. 22Ang Tortiyo, Polni i koktunnw suidok. Subraini borog hinwi angbw nokhnw hamchang rwdok. 23-24Ang jeni nugw tong arw jotho mothani borogrok jeni nugw baksa khlaywi malailai o Gaiyobw nokhnw hamchang rwdok. I aulini rang pwisani thikua Irasto tei chini takhuk Kartobw nokhnw hamchang rwdok.#16:23-24 kwrwngsa kwrwngnwi Grik elembagw lobong 16: khep 24 imwnw kwrwngrwjak. Chini Subrai Jisu Khristoni khakhamma nokhbai baksa tongthwk. Amen. 25Jisu Khristoni kothoyw je kothoma ang piri, o kothomani bisingtwi nokhnw thi tonnai pharan O Kaitorni tongw, Jebw kabangma mol jora Bini huijak bachungni kothoyw kaisanwbw sajiya. 26Matwr Paiphlaiya Kaitorni tholmani kosol diyari rokni suinaini bisingtwi jotho dophani borogrokni dayw obwnw sirwjak, bok Khristonw paitogwi Kaitorni kok rumma naitwi. 27Keber Bwse kaisa Kaitor, Bwse mwkchak ganang. Jisu Khristoni bisingtwi molbrung Bini chwngsacha ongthwk. Amen.
Currently Selected:
Rumi 16: TPE
Highlight
Copy
Compare
Share
Want to have your highlights saved across all your devices? Sign up or sign in
©️2025 Bible Students Fellowship of Bangladesh