Rumi 13
13
Sakwlpha rokni bagwi tangbai
1Jothobw hauarni sakwlpha roknw maniywi himthwk, twmwi hinba Kaitor jebwnw sakwlpha khalai Bini bader arw kaisabw sakwlpha ongmanya. Kaitorse sakwlpha roknw chongkha, 2aithani bagwi sakwlphani baithe je bacha bw Kaitorni sakwl lakhnani baithese bachagw. Jebwrok imwtwijar khalai bok sakni sakagw senji ringkhogwi twbwgw. 3Jebwrok gam samung khalai sakwlphanw kirithai bokni mwngsabw kwrwi, matwr jebwrok benirai khalai bokse kiriyw. Nokh tama sakwlphanw kiriyagwi himni nayo? Halai jebw gam obwnw khlayoi tongdi. Obwbai nokh Bini daini lopma mannw. 4Nokhni gamni bagwi bw Kaitorni mwngnai hinwi samung khalayo. Nokh jwtini benirai khalaiyw hai kiridi, twmwi hinba benirai roknw senji rwnai bagri Bini tongw. Bwlai Kaitorni mwngnaisa, jebwrok benirai samung tang boknw bw Kaitorni ongwi senji rwgw. 5Aithani nokh khamka sakwlpharokni kok khanagwi tongdi. Kaitorni senjinw kirigwi keber bokni kok khanagwi tongthai obwya, matwr nokhni khabuk sap tonni bagwibw obwnw khlaidi. 6Aithani to nokh ol rwgwi tongw, twmwi hinba ol kholuarok bokni samungni bisingtwi Kaitornw mwngdok. 7Aithani nini daini jebw manthai obwnw boknw rwdi. Jebw ol kholnai bwnw jotho podni ol rwdi. Jenw borom rwthai kalai bwnw borom rwdi, Jenw sak nangthai kalai bwnw sak nangdi.
8Arw kaisani dayw keber hamjakmani lagaini bader arw mwngsa lagai nokhni tongyatwi, twmwi hinba jebwrok sakni nokarinw hamjak, bokse thi khlaywi kerongnal maniywi tongjak. 9Ang i koknw sadok, twmwi hinba Kaitorni jotho tholmwng, "Sinalchua takhalaidi, borog ta buthaldi, takhokdi, lopha ta ongdi," imwrok tei imwtwijar arw tholmwng roknw kwrwngsa tholmani bisingtwi sajakha, "Nini nokarinw nini sakni kosol hamjakdi." 10Hamjakhalai kaisabw kasani guna khalaiya. Halai nungjagw, kaisabai kaisanw hamjakmani bisingtwise jotho kerongnal palejago.
11Taising jora jebw sakha, nokh khamka obwnw paledi tabokni jonw bus manwi obwtwi jar khlaywi tongdi. Mwktrwini bachanai jo ongkha, twmwi hinba jephuo chwng paitokjak aiphuni naikhalai tabokse tekhokjakma mannai jora koriyw sokpaikha. 12Hor paini ongkha por ongwi phaidok, aithani phaidi chwng andarni samung yakarwi pohorni yakphong daphong tisagwi lanw. 13Chwng chuak nwngthai tei chuak nwngwi kwphwi ongwi chirik thaiya, sinalchua khalaitaiya, oburujuburu langma hotaiya, kwija kapha tei naislithaiya, matwr jebwrok salni pohorw him, phaidi, chwng bokni kosol podiya langma honw. 14Nokh ri ni kosol Subrai Jisu Khristobai sakroknw phwngwi pairwdi, Sumsok aikangni muchokma sokrwnai aita kha tarwdi.
Currently Selected:
Rumi 13: TPE
Highlight
Copy
Compare
Share
Want to have your highlights saved across all your devices? Sign up or sign in
©️2025 Bible Students Fellowship of Bangladesh