San Juan 21
21
Jesús okinmonextili chikome itlamachtijkawah
1Satepa, Jesús oksepa okinmonextili itlamachtijkawah itempa n lago de Tiberias. Iwa ijkí okinmonextili: 2Ompa sansikah okatkah Simón Pedro, Tomás non okiliayah kuatsi, Natanael non de Caná de Galilea, itelpochwah n Zebedeo iwa n ok ome itlamachtijkawah n Jesús. 3Iwa Simón Pedro okinmili:
—Nio nimichmati.
Yejwah okinankilijkeh:
—Tejwah noiwa tiawih mowa.
Yejwah otlejkokeh itech se barka iwa omichmaatoh, pero non yúali amitla michi okikitskijkeh. 4Ijkuak yotlanestiwalaya, Jesús omoketsato itempa n lago, pero itlamachtijkawah amo okimatiah kox Ye n Jesús. 5Ijkuakó okinmili:
—Nopilwah, ¿nonkipiah siki michi?
Yejwah okinankilijkeh:
—Amó.
6Ijkuakó Jesús okinmili:
—Xikontlamotlakah n michayatl iyekma n barka iwa nonkinmajsiskeh michimeh.
Yejwah ijkó okichijkeh, iwa ayakmó oweletiah okikixtiayah n michayatl, porke miaktikeh michimeh okinkitskijkeh. 7Ijkuakó Juan non Jesús okitlasojtlaya okili n Pedro:
—¡Ye n Toteko Jesús!
Ijkuak Simón Pedro okikak Ye n Jesús, okimotlalili itlakeh porke okatka xipetstik iwa onmotlamotlak ijtik atl. 8N oksikimeh itlamachtijkawah okalakitoh itempa n atl itech barka sa kitilantiwih n michayatl tentiwits ika michimeh, porke sa kanaj mákuili poali metro okatkah itempa n atl. 9Ijkuak okiskeh, okitakeh siki tlekúyoli xotlatok, iwa ikpak okatka michi, iwa paj. 10Jesús okinmili:
—Xikualinwikakah sikimeh michimeh non sikin ononkinkixtijkeh.
11Simón Pedro otlejkok kan barka iwa okitilantia asta itempa n lago n michayatl tenti ika se siento iwa n tlajko iwa n eyi (153) wejweyi michimeh. Iwa maya n michimeh okatkah miaktikeh n michayatl amo okojkótonki. 12Ijkuakó Jesús okinmili:
—Ximotlamajsewikih.
Nion se itlamachtijkau omixewi okitlajtlani Akin Ye, porke yokimatiah Ye Jesús. 13Otlanki Jesús owalmijkuani, okónanki n paj iwa okinmajmák itlamachtijkawah, iwa noijkó okichi iwa n michimeh.
14Ika ni ya eyi welta okinmonextili itlamachtijkawah satepa de omoyoliti.
Jesús kitlapowia Simón Pedro
15Ijkuak yotlankeh omotlamajsewijkeh, Jesús okili n Simón Pedro:
—¿Simón ipiltsi n Juan, techtlasojtla okachi ke ninteh?
Pedro okinankili:
—Noteko Tejwatsi kuali tikmatok nimitsneki.
Jesús okili:
—Techinmokuitlawili noichkawah.
16Jesús oksepa okitlajtlani:
—Simón ipiltsi n Juan, ¿techtlasojtla?
Pedro okinankili:
—Noteko, Tejwatsi kuali tikmatok nimitsneki.
Jesús oksepa okili:
—Techinmokuitlawili noichkawah.
17Jesús okitlajtlani ipan eyi welta:
—¿Simón Pedro ipiltsi n Juan, techneki?
Pedro omoyolkoko porke Jesús ayakmó okitlajtlani techtlasojtla ipan eyi welta, porke sa iksemi okitlajtlani kox okinekia. Pedro okinankili:
—Noteko, Tejwatsi kuali tikmatok nimitsneki.
Jesús okili:
—Techinmokuitlawili noichkawah. 18De milajka, de milajka nimitsilia, ijkuak otikatka titélpochtli, te monewia otikonakiaya motlake, iwa otiaya san kan ik te otiknekia. Pero ijkuak tiwewejtis, sa tikinmajkokuis momawah iwa ok se mitstlalilis motlakeh iwa mitswikas kan amo tiknekis tias.
19Ijkuak Jesús ijkó okijto, okinekia kajsikamatiltis n Pedro kenijki mikiskia iwa ijkó kiweyiliskia Dios. Satepa okili:
—Xiwiki nowa.
Jesús tlajtoa de Juan
20Ijkuak Pedro owalmókopki okitak okwalintokaya itlamachtijkau akin Jesús okitlasojtlaya. Ye omonakasikték itech ielpa ijkuak okimomajsewijtokah n yualtlákuali de Paskua iwa okitlajtlanijka akin kitemaktiskia. 21Ijkuak Pedro okitak itlamachtijkau n Jesús, okitlajtlani:
—Noteko, iwa nin tlakatl, ¿tlan mochiwas?
22Jesús okinankili:
—Tla Ne nikmonekiltis mamokawa asta ijkuak Ne niwalmokopas, te mach moteki. Te xiwiki nowa.
23Ijkuakó non tlájtoli opé momati itech nochteh non okineltokakeh, iwa okijtoayah non imomachtijkau amo mikiskia. Pero Jesús amo okijto amo mikiskia, Ye okijto: “Tla Ne nikmonekiltis mamokawa asta ijkuak Ne niwalmokopas, te mach moteki.”
24Ye nin imomachtijkau akin tetlapowia de tlan otlamochi iwa nika okijkuilo. Iwa tejwah kuali tikmatokeh kijtoa tlan milák.
25Iwa okachi miak onka tlan okichi n Jesús. Tla mijkuiloskia nochi tlan Ye okichi, n tlajkuílolteh amo akiskiah itech nin tlaltíkpaktli.
Currently Selected:
San Juan 21: npl
Highlight
Share
Copy
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.