An Roma 11
11
Kan za̱im netnan Isra'ila
1Lag na a̱m ipk no, “Sila ha̱l-ha̱l bo̱ kaa neta̱n na̱?” Za taanl da. Rema̱n i mi kan Isra'ila, goov Ibrahi, ta̱m kan guti Be̱nje̱mi. 2Sila ta ha̱l neta̱n na̱ aa napin ai na matt na̱ da. A̱n ta nap rina̱n ge̱nsa̱n lalks Na'Sil vatin in tanin Iliya da? Ho̱da̱na̱n u kontin A'Sil rem an Isra'ila. U zeka, 3“Kan Go̱mca̱n Kooye̱, an Isra'ila hok baranc rov kwe̱. A he̱e̱ka̱lk ta̱m sakaca̱n emam rov sako. I mi v'da̱n a̱n kusini, a el la a̱n hoba̱n hweed ri.”#11:3 Go̱t ta̱m: 1Go̱m 19:10,14.
4Iye̱ a̱n Sila se̱sin o? Sila zeka o, “A̱m kiniki hid ri, neta̱n s'kwe̱re̱ s'tan'ila̱, an ta hwiipsa̱in cepk un Ba'al, Sila c'ko̱l da.”#11:4 Go̱t ta̱m: 1Go̱m 19:18. 5I ho̱da̱n lo bo̱ ta̱m a̱n daava̱ hna. Neta̱n kusk an Sila dagin rema̱n pusuu na̱. 6Awaz dagc Na'Sil i rema̱n pusuu na̱, ca soot rema̱n yomkanan noc tu em da. Ai soot la az i rema̱n yomka noco, pusu Na'Sil ta soot bo̱ ta̱m u'pusu da.
7I'Le̱e̱le̱ bo̱ kaana? Rina̱n an Isra'ila hobine, a ta kum e da. I an na dagin baa na̱ an kumi ni. Na kandsk de̱bc an kusine. 8Ho̱da̱na̱n i retin a'ge̱n a̱n lalks Na'Sila̱. Sa̱ zeka, “Sila ne̱e̱k na̱ de̱bca̱n zattin u'ke̱e̱se̱ da. A ta he̱n a̱n is na̱ alla a hong a̱n conc na̱n da v'daa.” 9Dauda zeka ta̱ma̱,
“Lag he̱tda̱n a banin soot reno
a rin kwegam na̱-na̱,
ri c'ka̱tksi a rina̱n ti kwe̱lve̱ na̱ ven no.
10Lag a poma, a rob u'he̱no,
a soot na̱m'cok kooye̱ daava.”#11:10 Go̱t ta̱m: Isa 29:10.
11Lag ta̱m a̱m ipk no, “An Isra'ila ka̱tksi-ka̱tksi bo̱ kaa, a hyaa ta̱m d'kale?” Za taanl da. I rema̱n hyaad na̱ a̱n an zain Yahude̱n da kumtin d'gwa̱a̱ma̱. I bat ti de̱l an Isra'ila em hyubud na̱. 12A̱nta̱ma̱, awaz ko̱tda̱n an Isra'ila ko̱tin de̱lk an copun yanda̱ha̱n kumk u'pusu. Az ta̱m hyaad na̱ de̱lk an zain Yahude̱n da, a kumk u'pusu. I ho̱da̱npe̱ a̱n pusuun lo tu soot daava̱n na de̱lestein an Isra'ila baa an ta kum d'gwa̱a̱m kwe̱?
Gwa̱a̱m an zain Yahude̱n da
13Lag na a̱m ve̱ce̱te̱ no nwaananan zain Yahude̱n da, i mi k'comt baa an zain Yahude̱n da. Ta̱'m dak d'gen a̱n yomka ri. 14I bat ho̱da̱na̱n ti emt kwe̱, a̱m de̱l neta̱n ri an Isra'ila a em d'hyubu. Bat ahyan baa na̱ ta kum d'gwa̱a̱ma̱. 15Awaz an Sila nestain na̱ dima̱, netnan copun yanda̱ha̱n kumk ke̱e̱d nu'se̱e̱p a A'Sil na̱, i'le̱e̱le̱ a̱n ti soott daava̱n Sila kabtin na̱? Ti soot u'po̱to!
16Awaz ga̱lun be̱re̱e̱dida̱n na se̱ke̱in A'Sil na̱m'e̱t i rihi kasi baa Na'Sila̱, be̱re̱e̱dida̱n lo bo̱ d'biri, i da̱ kasi baa Na'Sila̱. Awaz ga̱a̱rsa̱n ce el sa̱ kasi baa Na'Sila̱, i ho̱da̱n lo bo̱ a̱n za̱ts sa̱n soott sa̱ kasi baa Na'Sila̱.
17Na geda̱mk za̱tsa̱n ceun o̱lif un na gwaine, na o̱mo̱ kaa za̱tsa̱n o̱lif u d'kad na dapa. Nwaananan zain Yahude̱n da, i ho̱da̱n za̱tsa̱n ceun o̱lif u d'kad a̱n reine. I nwaa a̱n na dapin a̱n ceun o̱lif un na gwaine. Ceun o̱lif u'na̱n na gwain la, i Yahude̱ne̱. I baa na̱ a̱n reina̱n kumma̱n pusuu Na'Sila̱. 18Rema̱n taanlo, an ema la za̱tsa̱n na gedmin c'ka̱ndi da. An em la c'ka̱ndi, nap na, az za nwaa a̱n reina̱n ryaaksam s'ga̱a̱r da, i ga̱a̱rsan reina̱n ryaaksam no.
19Ta̱n la̱a̱ a̱n ze, “Na geda̱m-geda̱m za̱tsa̱ m'e̱t rem na dapt me.” 20I ho̱dune! Na gedanka na̱ rema̱n a ta bat d'ba̱t baa Na'Sil da. Nwaa la na dapk no rema̱n a̱n batk d'ba̱t baa Na'Sila̱. An em la m'lo̱g da, soot na zapzapa. 21Awaz Sila ta lag za̱tsa̱n ce sa̱m'e̱t da, gab na sasa, rema̱n nwaa ta̱ma̱, ta la̱a̱ a̱n gedanna no. 22Kekksa na ho̱da̱na̱n Sila retin a kasi, a ci la ta̱m ven hwe̱di. Ta ven an ko̱tine, ta ema no i kasi awaz a̱n ryaak hwic a̱n le̱vk kasi. A za taanl da, nwaa ta̱m nan gedanna no.
23Awaz la Yahude̱n ta boro a̱n robamda̱n bata̱m d'ba̱t baa Na'Sil da, nan vaakta na̱ na dap a̱n ceune. Rema̱n Sila ta la̱a̱ a̱n em taanlo. 24Nwaananan zain Yahude̱n da, na gedka no baan ceun o̱lif u d'kade, na haka na dap baan ceun o̱lif un na gwaine. A̱n na gab ho̱da̱na̱n ce tu gubt da. A ti pa̱t bo̱ kaa a̱n k'le̱v na vaakta an rein za̱tsa̱n ke̱ge̱, na dap a̱n ceun o̱lif un na gwain da?
Kwisid Na'Sil baa koowe̱
25Hyaarene, a̱m ta to̱n az a̱n rob napsa̱n rihica̱ m'ze̱s ca̱ha̱n, a̱n to̱o̱ a̱n c'ka̱ndi az a̱n ci s'ver da. Honga̱mzac an Isra'ila ahyan za d'kal da. I na cet daava̱n na de̱lestein an zain an Isra'ila da baa an ta kum d'gwa̱a̱ma̱. 26Nan gwa̱a̱ an Isra'ila kwe̱ ho̱da̱na̱n i retin a'ge̱n a̱n lalks Na'Sila̱. Sa̱ zeka,
“Ka d'gwa̱a̱ma̱ tu rwa̱n lanma̱n Zaayo̱n.
Tu ho̱l ha̱lc Na'Sil a̱n de̱bc goov Yakubu.
27I lalkuna̱n m gigiin bo̱ na̱,
daava̱n ta̱'m kwisiti na̱ ko̱tc na̱.”
28An Isra'ila sootk an ha̱lc Na'Sil rema̱n a ha̱lk a̱n kab kasi lalko. I em-em la taanl bat ta̱n kum kwisid Na'Sila̱. Rema̱n dagca̱n na dagin la na̱, i na̱nna a̱n Sila reina̱n c'to̱n rema̱n cetonc na̱ c'swaacne. 29Rema̱n Sila za ta kuz po̱g na̱ a pusuuna̱n da cakk.
30Nwaananan zain Yahude̱n da, a̱n baak a ha̱l ke̱be̱m Na'Sil de̱hne. Go̱t la a̱nta̱ma̱, a̱n kumk d'kwisi rema̱n ha̱luna̱n Yahude̱n bain a ha̱l la ba̱na̱ ke̱be̱m Na'Sila̱. 31I ho̱da̱n lo bo̱ ta̱m a̱n Yahude̱n ha̱ltin ke̱be̱m Na'Sil a̱nta̱ma̱, bat ta kum kwisida̱n Sila emain no. 32Rema̱n Sila sipk koowe̱ a̱n pasma̱ s'giira. A emk taanl bat ta ema koowe̱ d'kwisi.
Bo̱mc Na'Sila̱
33M'Ga̱u vers Na'Sil a naps na̱n zatta ged da.
Aa ged lalko a nan be̱tk da.
Rihica̱n a rein ta ema,
c to̱o̱k naps noco!#11:33 Go̱t ta̱m: Isa 55:8.
34Iwe̱ a̱n napin de̱bc Kan Go̱mca̱n Kooye̱?
Alla iwe̱ a̱n takina̱n ne̱e̱ o lalko?#11:34 Go̱t ta̱m: Isa 40:13.
35Iwe̱ a̱n takina̱n ne̱e̱ A'Sil rihi,#11:35 Go̱t ta̱m: Ayu 41:11.
Sila copt o?
36Rema̱n c'rihi kwe̱ ca̱ lan baa na̱.
I rem na̱ ta̱m a̱c retine.
I a̱n'a ta̱m a̱n ciin ca̱ kwe̱.
Lag na ne̱e̱ na̱ k'gwin d'kal-d'kala! A̱nha̱a̱n.
Currently Selected:
An Roma 11: driNT
Highlight
Share
Copy
Want to have your highlights saved across all your devices? Sign up or sign in
© Wycliffe Bible Translators, Inc. and © The Nigeria Bible Translation Trust 2019
