An Kolosiya 1

D'Po̱o̱sso̱

1I mi Bulus, un Sila dagin u soot k'comta̱v Ye̱so Ka̱risti. A hyanna cinnan Timoti, a̱n ge̱nvoin no taka̱llaka̱ hna.

2I caama̱n baa an gabs Ka̱risti na̱m'ga̱u. An zattin ri d'reb da, an rein a̱n copun Kolosiya.

Lag A'Sil ceta cinna a Kanubu Ye̱so Ka̱ristin ne̱e̱ no u'pusu a la̱ta̱m c'de̱b ne̱.

Cepksa̱n bo̱mc Na'Sila̱

3C el ca̱n bo̱m A'Sil cet kan buu cinna Ye̱so Ka̱risti, kooye̱ daava c retina̱n cepkam no. 4I rema̱n c hongk ho̱da̱n batma̱n ba̱ta̱d no baa Ka̱risti Ye̱so, a to̱nca̱n a̱n rein ta̱n to̱n a s'gaba̱n kwe̱. 5A̱n el a̱n batma̱n ba̱tda̱n lo a emma̱n to̱ncan lo ne rema̱n sava̱m c'de̱b baan rihica̱n Sila kiniin no a̱nz a'cona. A̱n baask a̱n hongk da̱n ca̱nca a̱n kasi lalk u m'ga̱u, 6un cain no. Koope̱ a̱nmin copun yanda̱hna, kasi lalk el nu'ba̱rgu. U el a̱n kumma̱n a s'gab ho̱da̱na̱n u retin nu'em baa no lanma̱n hweda̱nda̱n a̱n hongtin o, a̱n ke̱e̱se̱ ta̱m pusu Na'Sil a ga̱um na̱n kwe̱.

7I baa Ipafaras hyanna co kanayomko, kan coka̱m Ka̱risti na̱m'ga̱u, a̱n hongin o. 8I unwa ta̱m a̱n ve̱ce̱in co da̱n goon to̱nc hyannano ca̱n Hora̱md Na'Sil de̱lin a̱n de̱bc no.

9Rema̱n taanlo lanma̱n hweda̱n a̱c hongtin da̱n nwaa, ca lag kwenam no A'Sil da. C konk az A'Sila̱, rem s'ver a u'ke̱e̱se̱n un Hora̱md na̱ rein da̱n ne̱e̱, a ne̱e̱ no napsa̱n rina̱n a to̱nine. 10C cepkka no bat ta̱n em c'nocurimu ho̱da̱na̱n Kan Go̱mca̱n Kooye̱ to̱ntine. A̱n pusa̱sa̱ o ta̱m c'de̱b a̱n rina̱n ta̱n em kwe̱. A̱n em rina̱n rein i kasi a̱n kooye̱ goon yomka na. A̱n sud ta̱m a̱n nap A'Sil a d'ke̱mne̱nne̱. 11C cepkk ta̱m az Sila ne̱e̱ no m'we̱s lanma̱n we̱sa̱m na̱ ma̱ k'gwin. I bat ta̱n la̱a̱ gaga̱m c'de̱b a̱n kab ta̱m ryaaka̱ d'kob a̱n c'za̱ngkta̱.

12Rema̱n ta̱m a̱n bo̱mt K'Ceto. Un de̱lin a̱n hwenna a̱n kum u'yob baan rina̱n a zein az ta ne̱e̱ neta̱n na̱ a̱nmin go̱mc na̱ ca̱ d'za̱n. 13Rema̱n i Silan gwa̱in na baan go̱mc ni'cumunkunnu, a uvtka̱ na baan go̱mc Waav na̱ un a rein ta to̱no̱. 14I baa ru a̱n nan kum c'to̱ve a kwisida̱ c'ko̱t no.#1:14 Go̱t ta̱m: AE̱fi 1:7.

Yomka Ye̱so a go̱mc ru nu

15I Ye̱so a̱n rein hyo̱o̱m Sila nan zain ta he̱ne̱ da. Waa va̱ m'e̱te̱. Un reina̱n go̱mca̱n rihica̱n Sila balin kwe̱. 16I Ye̱so a̱n balin c'rihi kwe̱, rihica̱n rein a'con a ca̱n rein a̱nmin copun yanda̱ha̱n ne. Rihica̱n nan he̱ne̱ a ca̱n na zain nan he̱na̱n da. A to̱n i c'go̱mo̱, a we̱sma̱n ca̱n kwe̱. Alla go̱mgo̱mno̱, a we̱sa̱m na̱n kwe̱. I unwa a̱n balin ca̱ kwe̱ rema̱n hid ru. 17U lak de̱ha̱nzo ai Sila balt kooye̱. I unwa a̱n se̱e̱pse̱in u bo̱p ta̱m c'rihi kwe̱ a̱n we̱sa̱m ru.

18I unwa a̱n rein so̱dka̱v a s'gaba. A s'gab a̱n rein we̱du ru. I unwa a̱n tu po̱to̱so̱ na̱. I unwa Kan e̱tina̱n wa̱a̱ u po̱to̱. I bat tu soot go̱m va̱n kooye̱. 19I emk A'Sil d'ke̱m az hwera̱n rina̱n de̱lin na̱ a soot A'Sila̱, az rihica̱n lo boro a̱nmi baa Ye̱so. 20Rem Ye̱so ta̱m a̱n Sila se̱e̱ptin a rina̱n a eminna̱n kwe̱. To̱n i rihica̱n rein a̱nmin copun yanda̱ha̱n alla ca̱n rein a'cona. Ye̱so emk se̱e̱pse̱da̱ ha̱n au asktin hiba̱m ru a̱n conan kanka̱n na edgtin o.

21Nwaa a̱n lak a̱n wankske hid no aa A'Sil na̱. A̱n lak ta̱m a̱n ha̱lc na̱ a̱n de̱bc no rema̱n rihic naak ca̱n rein nu'emka̱llo. 22A̱nta̱ma̱ la, rema̱n Ye̱so nesk we̱du ru u uk a̱n cona k'kan, u se̱e̱pske̱ no aa A'Sil na̱. I rema̱n u sata no a̱n hwic Na'Sil neta̱n an zattin ri d'reb da, an zattin c'ko̱pto̱ da, ta̱m an na zain a̱n bo̱p a̱n d'ko̱t da. 23Ti soot taanlo, awaz a̱n ryaak hwic a̱n bata̱m d'ba̱t baa Na'Sila̱. A̱n tank ta̱m s'ga̱a̱r a̱n esk s'naa s'ila̱. A̱n ta em u'hevke-hevke baan rina̱n saktin u'con a̱n kasi lalkuna̱n kabin da. I kasi lalkuna̱n hongine. Un na bisiin kooye̱ rihiya in ciin s'hob a̱nmin copun yanda̱hna. Un mi Bulus reina̱n emam m'coko.

Coka̱m Bulus rem a s'gaba

24A̱nta̱ma̱, a̱m el a̱n c'za̱ngkta̱ rema̱n kobda̱ m ryain rem no. A̱m la a̱n ryaaka̱ d'kob rema̱n a̱m hya̱a̱lta̱ kobda̱n a s'gab ta ryaa. Goon kobda̱n Ka̱risti ryain rema̱n a s'gaba, an rein we̱du ru. 25A̱m sootk cok va̱n kasi lalk Na'Sil rema̱n po̱guna̱n Sila po̱gin m a̱m bisi no sa̱nsa kwe̱. 26Rihica̱n Sila ze̱sin netnan de̱ha̱n s'we̱e̱ hwe̱di sa̱n to̱ine, go̱t la a̱nta̱ma̱ a ba̱tkska̱ ca̱ baa neta̱n na̱. 27I na̱nna a̱n Sila dagin a napasa na̱ da̱n damran gwinka̱n rihi i ze̱sk ine baa an zain Yahude̱n da. Rihi ne, i Ka̱risti a̱nmi baa no, gwinka̱n na saktin u'con.

28I Ka̱risti u'na̱n c reina̱n d'ba̱s a̱n kaaga̱m netna. A̱n la̱a̱sa̱m na̱ a̱n s'ver kwe̱. I bat ca̱n san koowe̱ u ko̱ga̱rk a̱n s'gab a̱n hwic ru. 29I rina̱n de̱lin bo̱ a̱m emt a'yomk na̱m'cok a̱n geda̱n we̱sma̱n Sila ne̱in me, ma̱n rein na'yomk a̱nmin baa ri.

Currently Selected:

An Kolosiya 1: driNT

Highlight

Copy