ରମିୟ 16
16
ପାଉଲଲା ଆମାଇନା ରେମଲେ ସୁନ୍ଡ୍ରଡେନ୍
1କେଂକ୍ରେୟା ଉଂଗମ୍ବକ୍ ଡୁକୁନୁଂ ବିସ୍ବାସି ରେମଲେନ୍ ବିତ୍ରେ ନେଇ'ନା ତୁନା ମୁଇନ୍ଡା ପଇବି ଡ'ସେକ୍ ଇମି ଡୁକୁନୁଂ ସେଲାନ୍ଲା ଡୁତା । ମାଇ ଆତା ଆଜିସୁଲା ବିସ୍ବାସ୍ ଡେମ'କୁନୁଂ ରେମଲେବକ୍ ସାନ୍ଡୁଂରେମ୍ । 2ସା' ଆଜିସୁଲା ବିସ୍ବାସ୍ ଡେମ'କୁନୁଂ ରେମଲେବକ୍ ମି ଡିନ୍ଡେମ୍ ଡୁତା ଡୁ'ତୁନା ଆମାଇ ପ୍ରବୁନା ଇମିବକ୍ ପେ ବଲ୍ ଜୁ । ମାରି ଆମାଇ ମାମା ଦର୍କାର୍ ଡୁତା ଗୁତୁନ୍ ଗୁଲାଇବକ୍ ସାନ୍ଡୁଂ, ମାସା'ଡ'ନା ମାଇ ଆନିଂ ମାରି ଆପାଲ୍ ରେମଲେସା ଅବୁଦି ସାନ୍ଡୁଂଅଁ'କୁ ।
3 #
ପେରିତ 18:2
ମାରି ନିଂବୁରଂ କିରିସ୍ଟ ଜିସୁନା କାମ୍ ଡେମ'କୁନୁଂ ପ୍ରିସ୍କିଲା ଡ'ସେକ୍ ଇମି ଡୁକୁନୁଂ ମୁଇନ୍ଡା ସେଲାନ୍ଲା ମାରି ମାଇନା ଇମ୍ପର୍ ଆଆକିଲାଲା ନମସ୍କାର୍ ଡ'କୁ ଡ'ସେକ୍ ସୁଁଲେଇ । 4ଆନିଂ ରକ୍ୟା ଡିନ୍ଡେମ୍ରେମ୍ ମାଇପା ଗୁଇ'ୟାନାବେ । ସା' ନିଂ ଆମାଇପା ଅବୁଦି ସୁନ୍ଡ୍ରତିଂ ମାରି ଆଜିସୁଲା ବିସ୍ବାସ୍ ଡେମ'କୁନୁଂ ଜିଉଦି ଆରାକ୍ବାଇ'ନା ଗୁଲାଇ ରେମଲେସା ଆମାଇପା ସୁନ୍ଡ୍ରଗୁତା ।
5ମାରି ଆଜିସୁଲା ବିସ୍ବାସ୍ ଡେମ'କୁନୁଂ ରେମଲେ ମାଇପାନା ଡିଂଅଁବକ୍ ପାର୍ତନାପୁଲେଇ ରୁନ୍ତା । ଆମା'ଏ ଆଗୁଲାଇରସା ସୁନ୍ଡ୍ରତିଂ ଡ'ସେକ୍ ସୁଁଲେଇ । ମାରି ନିଂ ଅବୁଦି ଆଲାତ୍ ଡେମ'କୁନୁଂ ଆନିଂନା ବାଇଲକ୍ ଆଏପାଇନେତଲାସା ସୁନ୍ଡ୍ରକୁ ଡ'ସେକ୍ ସୁଁଲେଇ । ମାଇଉ ଆସିଆ ଦେସ୍ବକ୍ ଆକିରିସ୍ଟଲା ମୁଲ୍ ବିସ୍ବାସ୍ ଡେମ'କୁନୁଂ ରେମ ।
6ମାରି ଆମରିୟମାସା ସୁନ୍ଡ୍ରକୁ ଡ'ସେକ୍ ସୁନ'ବେ'ଲେଇ । ମାଇ ଆପେ ସାନ୍ଡୁଂପୁଲେଇ ଅବୁଦି ଆଦାଂ ଡେଂକୁ ।
7ମାରି ଆନ୍ଦ୍ରନିକ ମାରି ଜୁନିୟା ଡ'କୁନୁଂ ଇମ୍ବାୟବକ୍ସା ସୁନ୍ଡ୍ରକୁ ଡ'ସେକ୍ ସୁନ'ବେ'ଲେଇ । ମାଇପା ନେଇ'ନା ରେମଲେ ମାରି ନିଂବୁରଂ ବନ୍ଦିବକ୍ ଡୁକୁ । ନିଂ ଆକିରିସ୍ଟଲା ବିସ୍ବାସ୍ ଡିନ୍ଡେମ୍ ସିଁସେଇଁଉ ମାଇପା ଇମ୍ବାୟ ଆକିରିସ୍ଟଲା ବିସ୍ବାସ୍ ଡେମ'କୁ ମାରି ଜିସୁନା ପେରିତଲେ ଗୁଲାଇର ମାଇପା ବଲ୍ରେମ୍ ଡ'ସେକ୍ ସୁନ'ତା ।
8ମାରି ଆମ୍ପିଲିୟାତ ଡ'ସେକ୍ ଇମିକୁନୁଂଆଁବକ୍ସା ସୁନ୍ଡ୍ରକୁ ଡ'ସେକ୍ ସୁନ'ବେ'ଲେଇ । ମାଇ ଆପ୍ରବୁଲା ବିସ୍ବାସ୍ ଡେମ'ତା ମାରି ଆମାଇ ନିଂ ଅବୁଦି ଆଲାତ୍ ଡେମ'ତିଂ ।
9ନେଇ'ବୁରଂ କିରିସ୍ଟନା ସେବାକାମ୍ ଡେମ'କୁନୁଂ ଆଉର୍ବାନ ଡ'କୁନୁଂଆଁ ମାରି ନିଂ ଅବୁଦି ଆଲାତ୍ ଡେମ'କୁନୁଂ ଆସ୍ତାକୁଲାସା ସୁନ୍ଡ୍ରକୁ ଡ'ସେକ୍ ସୁନ'ବେ'ଲେଇ ।
10ମାରି ଆଆପେଲାସା ସୁନ୍ଡ୍ରକୁ ଡ'ସେକ୍ ସୁନ'ବେ'ଲେଇ । ମାଇନା ଜିବନ୍ବକ୍ ଅବୁଦି ଦୁକକସ୍ଟ ସା'ଗା' ଡ'ନାସା ମାଇ ଆକିରିସ୍ଟଲାଉ ସବ'ସେକ୍ ଡୁକୁସା' କିରିସ୍ଟଲା ଆମାଇ ବଲ୍ରେମ୍ ଡ'ସେକ୍ ଜୁଲ'ତା ।
ମାରି ଆରିସ୍ତବୁଲନା ଡିଂଅଁନ୍ରେମ୍ବକ୍ସା ଆଗୁଲାଇର ସୁନ୍ଡ୍ରକୁ ଡ'ସେକ୍ ସୁନ'ବେ'ଲେଇ ।
11ମାରି ନିଂନା ରେମ ଆକେରଦିୟଲାସା ସୁନ୍ଡ୍ରକୁ ଡ'ସେକ୍ ସୁନ'ବେ'ଲେଇ ।
ମାରି ନାର୍କିସ୍ନା ଡିଂଅଁବକ୍ ଜାଜା ଆପ୍ରବୁଲା ବିସ୍ବାସ୍ ଡେମ'ତା ଆମା'ଏସା ଆଗୁଲାଇର ସୁନ୍ଡ୍ରକୁ ଡ'ସେକ୍ ସୁନ'ବେ'ଲେଇ ।
12ଟ୍ରାଇପେନା ମାରି ଟ୍ରାଇପସା ଡ'ସେକ୍ ଇମିକୁନୁଂ ଇମ୍ବାୟ ସେଲାନ୍ପାବକ୍ସା ସୁନ୍ଡ୍ରକୁ ଡ'ସେକ୍ ସୁନ'ବେ'ଲେଇ । ମାଇପା ଇମ୍ବାୟ ପ୍ରବୁନା ସେବାକାମ୍ବକ୍ ଅବୁଦି ବଲ୍ ଆଦାଂଡେଂସେକ୍ କାମ୍ ଡେମ'କୁ ।
ମାରି ଅବୁଦି ଆଲାତ୍ ଡେମ'କୁନୁଂ ପର୍ସି ଡ'ସେକ୍ ଇମିକୁନୁଂ ସେଲାନ୍ବକ୍ସା ସୁନ୍ଡ୍ରକୁ ଡ'ସେକ୍ ସୁନ'ବେ'ଲେଇ । ମାଇ ନିଂନା ମାରି ପ୍ରବୁନା ସେବାକାମ୍ବକ୍ ଅବୁଦି ବଲ୍କାମ୍ ଡେମ'କୁ ।
13 #
ମାର୍କ 15:21
ମାରି ରୁପଲା ଡ'ସେକ୍ ମୁଇନ୍ଡା ଡୁତା । ଆମାଇ ପ୍ରବୁଲା ସିରେଲ'ତା । ମାଇନା ୟଂ ନିଂନା ୟଂସୁଗ ଡୁତା । ଆମାଇପା ଇମ୍ବାୟବକ୍ସା ସୁନ୍ଡ୍ରକୁ ଡ'ସେକ୍ ସୁନ'ବେ'ଲେଇ ।
14ମାରି ଅସୁଂକ୍ରିତ, ପ୍ଲେଗନ୍, ଅର୍ମିସ୍, ପାତ୍ରବା, ଅର୍ମାସ୍ ଆମା'ଏ ଆଗୁଲାଇର ମାରି ଆଜିସୁଲା ବିସ୍ବାସ୍ ଡେମ'ସେକ୍ ମା'ଏବୁରଂ ଜାଜା ଡୁତା ଆମା'ଏ ଆଗୁଲାଇରସା ସୁନ୍ଡ୍ରକୁ ଡ'ସେକ୍ ସୁନ'ବେ'ଲେଇ ।
15ମାରି ଆପିଲଲଗଲା, ଆଜୁଲିଅଲା, ଆନିରୁସ୍ଲା ମାରି ଆମାଇନା ତୁନା, ମାରି ଆଅଲୁମ୍ପାଲାସା ମାରି ଆଜିସୁଲା ବିସ୍ବାସ୍ ଡେମ'ସେକ୍ ମା'ଏବୁରଂ ଜାଜା ଡୁତା ଆମା'ଏ ଆଗୁଲାଇରସା ସୁନ୍ଡ୍ରକୁ ଡ'ସେକ୍ ସୁନ'ବେ'ଲେଇ ।
16ମାରି ପେ ପେନ୍ ବିତ୍ରେ ଅ'ବୁଇଁତମ୍ସେକ୍ ଅ'ସୁନ୍ଡ୍ରଆରା । ଆକିରିସ୍ଟଲା ବିସ୍ବାସ୍ ଡେମ'ସେକ୍ ପାଲ୍ପାଲ୍ ଉଂଗମ୍ବକ୍ ଡୁକୁନୁଂ ଗୁଲାଇ ମନ୍ଡଲିନା ରେମଲେ ଆପେ ନମସ୍କାର୍ ଡ'ସେକ୍ ସୁନ'ତା ।
କେନ୍ ସିଟି ଅ'ଡମ୍ବେଲା ଲେକ୍ଲ'କୁନୁଂ ତୁମ'
17ଅ ବୁୟାଂଏଁ ତୁନାଲେ, ନେଇ ଆପେ ଅମାଗ'କୁନୁଂ ବାଦ୍ଲି ଡିନ୍ଡେମ୍ପୁଲେଇ ଏନ୍ତୁକ୍ର ପେନ୍ବକ୍ ସାକ୍ସେକ୍ ପାଲ୍ପାଲ୍ ତୁମ' ଅମାଗ'ସେକ୍ ଆପେ ପାଲ୍ପାଲ୍ ଦଲ୍ ଅ'ଡେମ୍ତ ମାରି ଏନ୍ତୁକ୍ର ଆମାପ୍ରୁ ଅନ୍ତୁର'ସେକ୍ ସୁଲୁଂ ଡୁଂତା । ସା' ଡୁ'ତୁନ୍ବାଇ' ରେମଲେନ୍କୁରୁଂ ପେ ସଇଗା ଡେଂସେକ୍ ଡୁକୁଲା । ମା'ଏବୁରଂ ଇନ୍ଡଇ'ଏସା ଆମିସ୍ଗା' ଡ'ସେକ୍ ନିଂ ଆପେ ସୁନ'ତିଂ । 18ମା'ଏ ନେଇ'ନା ପ୍ରବୁ କିରିସ୍ଟଲାପୁଲେଇ କାମ୍ ଡେମ' ଆଡୁତା, ମାତର୍ ମା'ଏନା ମୁନ୍ଇସାରେ ମା'ଏ ସୁସୁମ୍ଇ'ପୁଲେଇଉ କାମ୍ ଡେମ'ତା । ମା'ଏ ରେମଲେ ଅଂ ମୁନ୍ ଡିନ୍ଡେମ୍ବାଇ' ସୁୱାଲ୍ ସୁୱାଲ୍ ତୁମ' ସୁନ୍ତ । ମାରି ଜାଜା ଇମ୍ବ'ନା ବଲ୍ ଇମ୍ବ'ନା ଆସାର୍ ଡ'ସେକ୍ ମାଗ୍ମାକ୍ ଆଗଂତା ଡୁ'ତୁନ୍ବାଇ' ରେମବକ୍ ମା'ଏ ନାଡାଇତ । 19ପେ ମାପ୍ରୁନା ତୁମ' ବଲ୍ ମାନ୍ସେକ୍ ଡୁତା ଡ'ସେକ୍ ଗୁଲାଇର ଅଂଅଁ'ତାସା' ନିଂ ଆପେ ଏତ୍ସେକ୍ ଅବୁଦି ସାର୍ଦା ଡେଂଗୁତିଂ । ମାତର୍ ଇମ୍ବ'ନା ଅବୁଦି ବଲ୍ ଗୁତୁନ୍ ପେ ଅବୁଦି ବଲ୍ ମାଗେଇ' ମାରି ଇମ୍ବ'ନା ଅଲିରାକ୍ବାଇ' ଡୁତା ଗୁତୁନା ପେ ଆମାଗେଇ' ଡ'ସେକ୍ ନିଂନା ମୁନ୍ ଡୁତା । 20ମାପ୍ରୁଉ ଆନେଇ' ସାନ୍ତିସାର୍ଦା ବିବେ'ରେମ୍ । ମାଇ ଆସଇତାନ୍ନା ବପୁ ସୁରୁଇ' ଆରାଇୟ'ସେକ୍ ଆମାଇ ପେନ୍ ତିକ୍ସୁଂ ଆଲୁଂ ବୁଂତସା' ମାଇ ପେନ୍ ବାଗ୍ବକ୍ ମାରି କାମ୍ ଡିନ୍ଡେମ୍ ଆଗଂତା । ମାରି ନେଇ'ନା ପ୍ରବୁ ଜିସୁଲା ଆପେ ଦୟା ଡେମେଇ' ।
21 #
ପେରିତ 16:1
ନିଂବୁରଂ ତିରେ କାମ୍ ଡେମ'କୁନୁଂ ତିମତିଲା ଆପେ ସୁନ୍ଡ୍ରଗୁତା । ମାରି ନେନ୍ ରେମଲେ ଲୁକିୟଲା, ଜାସନ୍ଲା ମାରି ସସିପାତ୍ରଲାସା ଆପେ ସୁନ୍ଡ୍ରଗୁତା । 22ପାଉଲଲା ସୁନ'କୁନୁଂ ଅଂଅଁ'ସେକ୍ ନିଂ ତର୍ତିୟଲା କେନ୍ ସିଟି ଲେକ୍ଲ'ତିଂ । ନିଂସା ଆପେ ପ୍ରବୁନା ଇମିବକ୍ ସୁନ୍ଡ୍ରଗୁତିଂ । 23#ପେରିତ 19:29; 1 କରି 1:14; 2 ତିମତି 4:20 ଆକେ ଗାୟସ୍ ଡ'କୁନୁଂ ମୁଇନ୍ଡାନା ଡିଂଅଁବକ୍ ବାସାଗୁତିଂ । ମାଇନା ଡିଂଅଁବକ୍ଉ ଆଜିସୁଲା ବିସ୍ବାସ୍ ଡେମ'କୁନୁଂ ଗୁଲାଇରବୁରଂ ନେଇ ପାର୍ତନାପୁଲେଇ ରୁନ୍ତୁନେଇ । ମାଇସା ଆପେ ସୁନ୍ଡ୍ରଗୁତା । ମାରି କେନ୍ ମୁନା'ଉଂଗମ୍ନା ଡାବୁ ଜୁଜୁରେମ୍ ଏରାସ୍ଟଲା ଡ'କୁନୁଂ ମୁଇନ୍ଡା ମୁନା'ରେମ୍ ମାରି ନେଇ'ନା ବୁୟାଂ କଆର୍ତଲାସା ଆପେ ସୁନ୍ଡ୍ରଗୁତା ।
24 # 16:24 ନେଇନା ପ୍ରବୁ ଜିସୁ କିରିସ୍ଟଲା ଆପେ ଆଗୁଲାଇର ଦୟା ଡେମେଇ' । ଆମେନ୍ । କେନ୍ ପଦ ମୁଲ୍ନା ବଲ୍ଟା ଉଲାକ୍ବକ୍ ଆଡୁତା ।
25ନିଂ ଆପେ ଜିସୁ କିରିସ୍ଟନା ବଲ୍କବର୍ ସୁନ'ତିଂ । ଗୁତୁନ୍ ବଲ୍କବର୍ଉ ପେ ଅଦିକ୍ ଅଦିକ୍ ଆମାପ୍ରୁ ବିସ୍ବାସ୍ ଡିନ୍ଡେମ୍ପୁଲେଇ ବପୁ ବେ'ତ । କେନ୍ ବଲ୍କବର୍ ମୁଲ୍ବାଂସା' ଆ'ନ୍ପନ୍ତେକ୍ ରୁକ୍ସାଗ'ସେକ୍ ବୁଂଅଁ'କୁନୁଂସୁଗ ଡୁକୁ । 26ମାତର୍ ବାବବାଦିଲେ ଇନ୍ତେ ଲେକ୍ଲ'ବୁଂଅଁ'କୁନୁଂସୁଗ ମାରି ଇସାଉ ଡୁକୁନୁଂ ମାପ୍ରୁଲାସା ସୁଁ ଡ'ସେକ୍ ସୁନ'ସା' ଗୁତୁନ୍ ବଲ୍କବର୍ ଆ'ନା ଜାଜା ଜିଉଦିରେମଲେ ଆରାକ୍ ଆମା'ଏ ଆଗୁଲାଇର ଅସୁୟ'ବେଡ'ତା । ସା' ମା'ଏ ଗୁଲାଇର ଗୁତୁନ୍ ବଲ୍କବର୍ ଅଂଅଁ'ସେକ୍ ଆଜିସୁଲା ବିସ୍ବାସ୍ ଡେମ୍ତ ମାରି ଆମାଇ ମାନ୍ତା । 27ମାପ୍ରୁଉ ଇସାଉ ଡୁତା ମାରି ମାଇଉ ଗୁଲାଇ ମାଗ'ତା । ମାରି ଜିସୁ କିରିସ୍ଟଲା ନେଇ' ଗୁଲାଇରପୁଲେଇ ମାମା ଡେମ'ତା ଗୁତୁନ୍ ଗୁଲାଇ ଜୁଲ'ସେକ୍ ରେମଲେ ଆମାପ୍ରୁ ମଇମା ବେଡେଇ' । ଆମେନ୍ ।
Currently Selected:
ରମିୟ 16: BFW
Highlight
Copy
Compare
Share
Want to have your highlights saved across all your devices? Sign up or sign in
CC BY-NC-ND 4.0