ରମିୟ 11
11
ମାପ୍ରୁ ଆମାଇନା ରେମଲେ ଆଅନ୍ତୁର୍ତ
1 #
ପିଲିପି 3:5
ଡୁ'ତୁନ୍ ଡ'ନା, ମାପ୍ରୁ ଆମାଇନା ଇସ୍ରାଏଲ୍ ରେମଲେ ଅନ୍ତୁରତା ଡ' ଏତ୍ଗୁତୁପେ ଇ? ଆରାକ୍, ମାପ୍ରୁ ଇନ୍ଡଇ'ଏସା ଆମାଇନା ରେମଲେ ଆଅନ୍ତୁର୍ତ । ମାସା'ଡ'ନା, ଜୁ, ନିଂସା ମୁଇନ୍ଡା ଇସ୍ରାଏଲ୍ ରେମ । ନିଂ ଅବ୍ରାଆମ୍ନା ଉଁ'ଉଁନେନ୍ ବିନ୍ୟାମିନ୍ନା କୁଲ୍ବକ୍ ଜନମ୍ ଡେଂଗୁତିଂ । 2ମାପ୍ରୁ ଆମାଇନା ରେମଲେ ମୁଲ୍ବାଂସା' ସିରେଲ'ବୁଂଅଁ'ତାସା' ଆମା'ଏ ଇନ୍ଡଇ'ଏସା ମାଇ ଆଅନ୍ତୁର୍ତ । ଇନ୍ତେକନ୍ଡେ'କା ବାବବାଦି ଏଲିୟଲା ଇସ୍ରାଏଲ୍ ରେମଲେ ମା ଡେମ'ତା ଡ'ସେକ୍ ଆମାପ୍ରୁ ସୁନ'କୁନୁଂ ମାପ୍ରୁନା ଉଲାକ୍ବକ୍ ଲେକ୍ଲ'ବୁଂଅଁ'ତା, ଗୁତୁନା ପେ ଆମାକ୍ତୁପେ ଇ? 3ଏଲିୟଲା ଆମାପ୍ରୁ ମା ସୁନ' ଡ'ନା “ଅ ପ୍ରବୁ, ମା'ଏ ଆବାବବାଦିଲେ ଅଡାବ'ସୁଂଅଁ' ମାରି ଗିଗେପୁଲେଇ ଅ'ରଇଁୟ' ବୁଂଅଁ'କୁନୁଂ ବେଦିଲେସା ମା'ଏ ବିଲାୟ'ସୁଂଅଁ' । ମାରି ଆ'ନା ନିଂ ମୁଇନ୍ଡାଉ ଡୁତିଂ । ଆନିଂସା ମା'ଏ ଅଡାପ୍ପୁଲେଇ ସେସ୍ଟା ଡେମ'ତା” ଡ'ସେକ୍ ସୁନ' । 4ସା' ମାପ୍ରୁ ଆମାଇ ମା ଡ'ସେକ୍ ସୁନ' ଡ'ନା “ଜୁ, ନ ମୁଇନ୍ଡାଉ ଡ'ସେକ୍ ଏତ୍ଗୁତୁନ ଇ? ଆରାକ୍, ଜାଜା ଆବାଲ୍ ଡେପ୍ତା ସୁନ୍ଡ୍ରକ୍ ଆଡୁତା ଡୁ'ତୁନ୍ବାଇ' ସାତ୍ଅଜାର୍ ରେମଲେବକ୍ ସିରେଲ'ସେକ୍ ନିଂପୁଲେଇ ନିଂ ବୁଂଅଁ'ତିଂ” ଡ'ସେକ୍ ସୁନ'ତା । 5ଡୁ'ତୁନାଉ ଆ'ନାସା ଡେଂଗୁତା, ମା ଡ'ନା, ମାପ୍ରୁ ଦୟା ଡେମ'ସେକ୍ ସିରେଲ' ବୁଂଅଁ'କୁନୁଂ ଇସ୍ରାଏଲ୍ ରେମଲେ ଏନ୍ତୁକ୍ର ପାପ୍ନା ଡନ୍ଡ୍କସ୍ଟ ବୁମ୍ବାମ୍ନାକୁରୁଂ ଆ'ନା ରକ୍ୟା ବାଂଗୁତା । 6ମାତର୍ ମା'ଏ ବଲ୍କାମ୍ ଡେମ'କୁନୁଂ ଜୁଲ'ସେକ୍ ଆମା'ଏ ନିଂନା ରେମଲେ ଡ'ସେକ୍ ମାପ୍ରୁ ସିରେଲ'ଆଡୁତା । ମାତର୍ ମାଇ ଆମା'ଏ ଦୟା ଡେମ'ତାସା'ଉ ସିରେଲ'ତା । ମା'ଏ ଡେମ'କୁନୁଂ ବଲ୍କାମ୍ ଜୁଲ'ସେକ୍ ନିଂନା ରେମଲେ ଡ'ସେକ୍ ସିରେଲ'ନାଏ ମାପ୍ରୁ ଆମା'ଏ ଦୟା ଡେମ'ତାସା'ଉ ସିରେଲ'ତା ଡ'ସେକ୍ ସୁଁସୁ ଆଗଂତୁନେଇ' ।
7ଡୁ'ତୁନ୍ ଡ'ନା କେନ୍ ଗୁଲାଇନା ଅର୍ତ ମାଲେଇ? ଇସ୍ରାଏଲ୍ ରେମଲେ ମା ତୁର'କୁ ଗୁତୁନା ମା'ଏ ଆବାମ୍ତା । ମାପ୍ରୁ ସିରେଲ' ବୁଂଅଁ'କୁନୁଂ ଉନାରଉ ଗୁତୁନା ବାଂଗା' । ମାରି ଡୁକୁନୁଂ ରେମଲେ ମାପ୍ରୁନା ତୁମ' ମାନ୍ସେ'ଗା ଡୁକୁପୁଲେଇ ମୁନ୍ ଆରାକ୍ସା' ମା'ଏ ଡୁ'ତୁନ୍ଉ ଡୁକୁଲେଇ' ଡ'ସେକ୍ ମାପ୍ରୁନା ମୁନ୍ଡେଂକୁସା' ଆମା'ଏ ଡୁ'ତୁନାଉ ମାପ୍ରୁ ଅ'ଡେମ' । 8ମାପ୍ରୁନା ଉଲାକ୍ବକ୍ ଗୁତୁନ୍ ବିସୟ ଡି'କେନା ଲେକ୍ଲ'ତା, ମା ଡ'ନା “ମାପ୍ରୁ ଆମା'ଏ ମାକ୍ନାବାଇ' ରେମ୍ସୁଗ ଅ'ଡେମ'ବେଡ' । ମା'ଏ ଡୁ'ତୁନ୍ଉ ଡେଂଗୁତାସା' ଆ'ନ୍ପନ୍ତେକ୍ ସତ୍ବାଇ' ମା ଡ'ସେକ୍ ଜୁଜୁ ଆଗଂତା ମାରି ବାନିକବର୍ ଅଂ ଆଗଂତା” ଡ'ସେକ୍ ଲେକ୍ଲ'ତା । 9ଦାଉଦ୍ ରାଜାସା ମା'ଏନା ବିସୟ ଡି'କେନା ସୁନ'ତା, ମାଇ ମା ଡ' ସୁନ' ଡ'ନା:
“ଆ'ନା ମା'ଏ ଅବୁଦି ବଲ୍ ସୁମ'ଇଡ'ସେକ୍ ସାର୍ଦାକ୍ସେକ୍ ଡୁତା ।
ଗୁତୁନା ମା'ଏନ୍ ଜିବନ୍ବକ୍ ଆମା'ଏ ଅବୁଦି କସ୍ଟ ବିବେ'ବାଇ' ମୁଇ ଡୁନକ୍ ଆରା'ଗେ ଉନୁରକ୍ବକ୍ ଅଇ'କୁନୁଂସୁଗ ଡେଂକୁଲେଇ' ।
ମା'ଏ ଗୁତୁନ୍ବକ୍ ଗାଇକୁନୁଂସୁଗ ମାପ୍ରୁ ଆମା'ଏ ଡନ୍ଡ୍କସ୍ଟ ବେଡେଇ' ।
10ଇମ୍ବ'ନା ସତ୍ବାଇ' ଗୁତୁନା ମା'ଏ ଜୁଜୁ ଆଗଂଏଁଇ'
ମାରି ଲେଂଗିବାଇ' ଡୁନ'ତେୟଁସେ'ଗା କୁବ୍ଡାଲ'କୁବ୍ଡିଲ' ଉଇକୁନୁଂସୁଗ ମା'ଏନା ଜିବନ୍ବକ୍ ଇସାଉ ଅବୁଦି ଦୁକକସ୍ଟ ସାବେଇ' ” ଡ'ସେକ୍ ସୁନ'ତା ।
11ଡୁ'ତୁନ୍ ଡ'ନା ନିଂ ଆପେ ମାରି ଅ'ଗଁସ୍ଲାକ୍ତିଂ, ମା ଡ'ନା, ଆଇସ୍ରାଏଲ୍ରେମଲେ ଡୁ'ତୁନା ଡେଂଗା'ସା' ମା'ଏ ଇସାଉପୁଲେଇ ନାସ୍ ଆର୍ଉଇଗା' ଇ? ଆରାକ୍, ମା'ଏ ଆନାସ୍ତା । ମା'ଏ ମାପ୍ରୁନା ତୁମ' ମସୁନପ୍ ନିଜର୍ନା ମୁନ୍ସୁଗ ଡୁକୁପୁଲେଇ ମୁନ୍ଡେଂଗା' । ସା' ଜାଜା ଜିଉଦିରେମଲେ ଆରାକ୍ ମା'ଏ ମାପ୍ରୁନା ବଲ୍କବର୍ ବିସ୍ବାସ୍ ଡେମ' ମାରି ମାପ୍ରୁ ଆମା'ଏ ପାପ୍ନା ଡନ୍ଡ୍କୁରୁଂ ରକ୍ୟା ଡେମ' । ସା' ଗୁତୁନ୍ ଜୁଲ'ସେ'ଗା ଇସ୍ରାଏଲ୍ ରେମଲେନ୍ ଜିବନ୍ବକ୍ ଆନେଇ'ସା ଗୁତୁନ୍ ରକ୍ୟା ମି ବାମ୍ତା ଡ'ସେକ୍ ଆଂକାର୍ବାଇ'ନା ମୁଇ ଏତ୍ ସା'ଗା' । ଗୁତୁନ୍ପୁଲେଇଉ ମାପ୍ରୁ ଆମା'ଏ ଡି'କେନ୍ ଡେମ' । 12ମାପ୍ରୁ ଆଇସ୍ରାଏଲ୍ରେମଲେ ପାପ୍ନା ଡନ୍ଡ୍କୁରୁଂ ରକ୍ୟା ଡିନ୍ଡେମ୍ନା ବଲ୍କବର୍ ବେଡ'ବୁଂଅଁ' ମାତର୍ ମା'ଏ ଗୁତୁନ୍ ବଲ୍କବର୍ ଆସପ୍ତ । ସା' ଜାଜା ଜିଉଦିରେମଲେ ଆରାକ୍ ମା'ଏନ୍ବକ୍ ଗୁତୁନ୍ ବଲ୍କବର୍ ସୁନ'ସା' ମା'ଏ ମାପ୍ରୁନା ମୁନ୍ସୁଗ ଡୁକୁପୁଲେଇ ଗୁତୁନ୍ ଜିବନ୍ ବିବେ'ନା ବଲ୍କବର୍ ବିସ୍ବାସ୍ ଡେମ'ସା' ମା'ଏ ବଲ୍ ଡେଂଗା' । ମାତର୍ ପେ ଏତ୍କୁଲା ଇସ୍ରାଏଲ୍ ରେମଲେ ଗୁଲାଇର ଗୁତୁନ୍ ଜିବନ୍ ବିବେ'ନା ବଲ୍କବର୍ ବିସ୍ବାସ୍ ଡେମ'ନା କେନ୍ ଦେସ୍ଦୁନିଆନା ରେମଲେ ଗୁଲାଇର ଅଦିକ୍ ବଲ୍ ଡେମାନା ।
ମାପ୍ରୁ ଆଗୁଲାଇର ରକ୍ୟା ଡେମ୍ତ
13-14ମାତର୍ ପେ ଜାଜା ଜିଉଦିରେମଲେ ଆରାକ୍ ନିଂ ଆ'ନା ଆପେଉ ସୁନ'ତିଂ, ମା ଡ'ନା: ଜାଜା ଇସ୍ରାଏଲ୍ ଆରାକ୍ ମା'ଏନ୍ବକ୍ ବଲ୍କବର୍ ସୁଁସୁପୁଲେଇ ମାପ୍ରୁ ଆନିଂ ପେରିତ ଡ'ସେକ୍ ସିରେଲ'ତା । ସା' ନିଂ ମାପ୍ରୁନା ବଲ୍କବର୍ ଆପେ ସୁନ'ତିଂସା' ପେ ଆମାପ୍ରୁ ବିସ୍ବାସ୍ ଡେମ'କୁନୁଂ ଜୁଲ'ସେକ୍ ଇସ୍ରାଏଲ୍ ରେମଲେନା ଜିବନ୍ବକ୍ ଆଂକାର୍ ଡେଂସେକ୍ ଆମାପ୍ରୁ ବିସ୍ବାସ୍ ଡିନ୍ଡେମ୍ ଡୁତା ମାରି ପାପ୍ନା ଡନ୍ଡ୍କୁରୁଂ ରକ୍ୟା ବୁମ୍ବାମ୍ ଡୁତା । ସା' ମାପ୍ରୁ ଆନିଂ ବେଡ'କୁନୁଂ କେନ୍ କାମ୍ ନିଂ ଅବୁଦି ସାର୍ଦାକୁସି ଡେଂସେକ୍ ଡେମ'ତିଂ । 15ଇସ୍ରାଏଲ୍ ରେମଲେ ମାପ୍ରୁନା ତୁମ' ଆମାନ୍ତାସା' ଦେସ୍ଦୁନିଆବକ୍ ଡୁକୁନୁଂ ପାଲ୍ ଜାତିନ୍ ରେମଲେବକ୍ ମା'ଏ ନିଂନା ରେମଲେ ଡ'ସେକ୍ ମାପ୍ରୁ ସିରେଲ' । ମାପ୍ରୁ ଡୁ'ତୁନ୍ ଡେମ' ଡ'ନା ପେ ଏତ୍କୁଲା, ଆଇସ୍ରାଏଲ୍ରେମଲେ ମା'ଏ ନିଂନା ରେମଲେ ଡ'ସେକ୍ ମାପ୍ରୁ ସିରେଲ'ନା ଗୁଇ'କୁନୁଂ ରେମଲେ ବୁରକୁନୁଂସୁଗ ଡେନ୍ତା । 16ନେଇ' ଇସ୍ରାଏଲ୍ ରେମଲେ ରୁଟି ଅ'ରଇଁବେଲା ମାପ୍ରୁପୁଲେଇ ଡ'ସେକ୍ ମୁଲ୍ନା ରୁଟି ବେ'ତୁନେଇ' । ମୁଲ୍ନା ରୁଟି ମାପ୍ରୁପୁଲେଇ ଡ'ସେକ୍ ବେ'ତୁନେଇ' ଡ'ନା ଗୁତୁନ୍ ରୁଟି ପବିତ୍ରବାଇ' । ଡୁ'ତୁନ୍ ଡ'ନା ଗୁତୁନ୍ବୁରଂ ଅ'ରଇଁୟ'କୁନୁଂ ମାରି ଡୁକୁନୁଂ ରୁଟିଲେସା ପବିତ୍ରବାଇ' ଡେନ୍ତା । ଡୁ'ତୁନ୍ଉ ମୁଇ ସୁଲପ୍ନା ସୁନୁମ୍ବକ୍ ପବିତ୍ରବାଇ' ଡ'ନା ଗୁତୁନ୍ ସୁଲପ୍ନା କେନ୍ଡାଲେସା ପବିତ୍ରବାଇ'ଉ ।
17ସା' ପେ ଜାଜା ଇସ୍ରାଏଲ୍ ରେମଲେ ଆରାକ୍ ପେ ମୁଇ ବୁର୍ଲୁକ୍ବକ୍ନା ଜିତ ସୁଲପ୍ସୁଗ ଡୁତୁପେ ମାରି ଡିଂଅଁବକ୍ ଉନ'ସେକ୍ ଅମୁନାଡ'କୁନୁଂ ମୁଇ ଜିତ ସୁଲପ୍ସୁଗ ଇସ୍ରାଏଲ୍ ରେମଲେ ଡୁତା । ସା' ଡିଂଅଁବକ୍ ଉନ'ସେକ୍ ଅମୁନାଡ'କୁନୁଂ ଜିତ ସୁଲପ୍ନା କେନ୍ଡା ପିଗ୍ରୁଗ' ଅଡକ୍ସୁଂଅଁ'ସେକ୍ ବୁର୍ଲୁକ୍ବକ୍ନା କେନ୍ଡା ଆତା ରିଂଅଁ'ସେକ୍ ଗୁତୁନ୍ ସୁନୁମ୍ବକ୍ବକ୍ ବୁମ'କୁନୁଂସୁଗ ଆପେ ମାପ୍ରୁ ବୁଂଅଁ'ତା । ସା' ଆଇସ୍ରାଏଲ୍ରେମଲେ ମାପ୍ରୁ ମାମା ବଲ୍ବାଇ' ବେଡ'ତା ଗୁତୁନ୍ ଗୁଲାଇ ଆପେସା ଆ'ନା ବାଂଗୁତା । 18ମାତର୍ ଆ'ନା ନିଂ ମୁନା'ରେମ୍ସୁଗ ଏଗୁତିଂ ଡ'ସେକ୍ ବଡ୍ପୁନ୍ ଆଡେଂଗା' । ମାସା'ଡ'ନା ପେ ଆ'ନା ଗୁତୁନ୍ ସୁଲପ୍ନା କେନ୍ଡାସୁଗ ଡୁତୁପେ ଡ'ନାସା ଗୁତୁନ୍ ସୁଲପ୍ନା ରେ'ଗି ଆପେ ଆତା ଡୁକୁପୁଲେଇ ସାନ୍ଡୁଂଅଁ'ତାସା'ଉ ପେ ଆତା ବଲ୍ ଡୁତୁପେ, ମାତର୍ ପେ ଆରେ'ଗି ସାନ୍ଡୁଂଅଁ'ତୁନେଇ ଡ'ସେକ୍ ଆଏତ୍ଗା' । 19ମାତର୍ ଜୁ ଆନେଇ ବୁମ୍ବୁମ୍ପୁଲେଇ ମାପ୍ରୁ ଆମା'ଏ ପିଗ୍ରୁଗ'ସୁଂଅଁ' ଡ'ସେକ୍ ପେ ସୁନ୍ତୁପେ । 20ଅଁ'ଅଁ ଗୁତୁନା ସତ୍, ମାତର୍ ମା'ଏ ଆମାପ୍ରୁ ବିସ୍ବାସ୍ ଆଡେମ୍ତସା'ଉ ଆମା'ଏ ପିଗ୍ରୁଗ'ସୁଂଅଁ' । ମାରି ପେ ଆମାପ୍ରୁ ବିସ୍ବାସ୍ ଡେମ'ତୁପେସା'ଉ ପେ ଆ'ନା ଗୁତୁନ୍ ତାନ୍ବକ୍ ଡୁତୁପେ । ସା' ପେ ବଡ୍ପୁନ୍ ଆଡେଂଗା' ମାତର୍ ଆନେଇ'ସା ମାମା ଡେନ୍ତାବେ ଡ'ସେକ୍ ବୁତୁଂସେକ୍ ଡୁକୁଲା । 21ମାସା'ଡ'ନା ଗୁତୁନ୍ ସୁଲପ୍ନା କେନ୍ଡାସୁଗ ଡୁକୁନୁଂ ଇସ୍ରାଏଲ୍ ରେମଲେବକ୍ ମାପ୍ରୁ ଡୁ'ତୁନା ଡେମ' ଡ'ନା ଆନେଇ'ସା ଡୁ'ତୁନା ଡେମ୍ତ ଡ'ସେକ୍ ପେ ଏତ୍କୁଲା ।
22ମା ଡ'ନା, ମାପ୍ରୁ ଅବୁଦି ଆଲାତ୍ବାଇ' ଡ'ନାସା ମାଇ ପାପ୍କାମ୍ ଡେମ'କୁନୁଂ ରେମ୍ବକ୍ ଡନ୍ଡ୍ସା ବେ'ତ ଡ'ସେକ୍ କେନା ଜୁଲ'ନା ନେଇ' ମାକ୍ତୁନେଇ' । ଜାଜା ମାଇ ଦୟାବାଇ' ଡ'ସେକ୍ ଆମାଇ ଏତ୍ତା ଆମା'ଏ ମାଇ ଦୟା ଡେମ୍ତ । ମାତର୍ ପେ ଆମାଇ ଡୁ'ତୁନା ଆଏତ୍ତୁପେ ଡ'ନା ମାଇ ଆପେସା ବାର୍ତୁଗ'ସୁଂତ । 23ଇସ୍ରାଏଲ୍ ରେମଲେ ବିସ୍ବାସ୍ ମଡିନେମ୍ ଆଡୁକୁନାଏ ମାପ୍ରୁ ଆମା'ଏ ଆମ୍ବ' ବୁଂବୁଂ ଡୁକୁ ଆତା ମାରି ବୁଂନା । ମାସା'ଡ'ନା ମାପ୍ରୁ ଆମା'ଏ ଗୁତୁନ୍ ସୁନୁମ୍ବକ୍ବକ୍ ମାରି ବୁମ୍ବୁମ୍ ଗଂତା । 24ପେ ଡ'ନା ଗୁତୁନ୍ ବୁର୍ଲୁକ୍ବକ୍ ଡୁକୁନୁଂ ଜିତ ସୁଲପ୍ନା କେନ୍ଡାଲେସୁଗ ଡୁକୁପେ ମାତର୍ ମାପ୍ରୁ ଗୁତୁନ୍ ସୁଲପ୍କୁରୁଂ ଆପେ ପିଗ୍ରୁଗ' ରିଂଅଁ'ସେକ୍ ଡିଂଅଁବକ୍ ଉନ'କୁନୁଂ ଜିତ ସୁଲପ୍ନା ସୁନୁମ୍ବକ୍ବକ୍ ବୁମ'ବେଡ' । ଜୁ, ଇନ୍ଡଇ'ଏସା ରେମଲେ ବୁର୍ଲୁକ୍ନା ସୁଲପ୍ନା କେନ୍ଡା ପିଗ୍ରୁଗ' ରିଂଅଁ'ସେକ୍ ଡିଂଅଁନା ସୁଲପ୍ବକ୍ ଆବୁମ୍ତ । ମାତର୍ ଡୁ'ତୁନା ଡେମ'କୁନୁଂସୁଗ ମାପ୍ରୁ ଆପେ ଡେମ' ଡ'ନା ଜିଉଦିରେମଲେ ଆମାପ୍ରୁ ବିସ୍ବାସ୍ ଡେମ'ନା ଆମା'ଏ ମାଇ ଗୁତୁନ୍ ଡିଂଅଁନ୍ ସୁଲପ୍ବକ୍ ଆବୁମ୍ତ ଇ? ଆରାକ୍, ବୁମ୍ତ । ମାସା'ଡ'ନା ମା'ଏଉ ଗୁତୁନ୍ ସୁଲପ୍ନା କେନ୍ଡାଲେ ।
ମାପ୍ରୁ ଗୁଲାଇ ଜାତିନ୍ ରେମଲେବକ୍ ଆଲାତ୍ ଡେମ'ତା
25ଅ ବୁୟାଂଏଁ ତୁନାଲେ, ଜାଏସା ଆ'ନ୍ପନ୍ତେକ୍ ମମୁନାକ୍ ଡୁକୁନୁଂ ମୁଇ ତୁମ' ନିଂ ଆପେ ସୁନ୍ତିଂ । ଗୁତୁନ୍ ପେ ମାଗ'ନାଉ ବଲ୍ ଡ'ସେକ୍ ନିଂ ଏତ୍ଗୁତିଂ । ମାସା'ଡ'ନା ପେ ଗୁତୁନ୍ ମାଗ'ନା ନେଇ ଗୁଲାଇ ମାଗ'କୁନୁଂ ରେମଲେ ଡ'ସେକ୍ ପେ ମାରି ବଡ୍ପୁନ୍ ଆଡେନ୍ତୁପେ ଡ'ସେକ୍ ଏତ୍ଗୁତିଂ । ପେ ଆମାପ୍ରୁ ମାନ୍ଗୁତୁପେ ମାତର୍ ଏନ୍ତୁକ୍ ଇସ୍ରାଏଲ୍ ରେମଲେ ଆମାଇ ଆମାନ୍ତା । ପାଲ୍ ଜାତିନ୍ ରେମଲେ ଆ'ଇର ଆମାପ୍ରୁ ମାନ୍ବାର୍ ଡୁତା ଡ'ସେକ୍ ଡୁତା, ମା'ଏ ଗୁଲାଇର ଆମାପ୍ରୁ ବିସ୍ବାସ୍ ଡିନ୍ଡେମ୍ପନ୍ତେ'କା ଇସ୍ରାଏଲ୍ ରେମଲେ ଡି'କେନାଉ ଡୁତା । 26ଡୁ'ତୁନ୍ଉ ଗୁଲାଇ ଇସ୍ରାଏଲ୍ ରେମଲେ ପାପ୍ନା ଡନ୍ଡ୍କୁରୁଂ ରକ୍ୟା ବାମ୍ତା ଡ'ସେକ୍ ମାପ୍ରୁନା ଉଲାକ୍ବକ୍ ଲେକ୍ଲ'ତା, ମା ଲେକ୍ଲ'ତା ଡ'ନା:
“ଆଇସ୍ରାଏଲ୍ରେମଲେ ରକ୍ୟା ଡିନ୍ଡେମା ସିୟନ୍କୁରୁଂ ସାପ୍ତା ।
ମାଇ ସାକ୍ସେକ୍ ଜାକୁବ୍ନା ଉଁ'ଉଁନେ ଗୁଲାଇର ଡେମ'କୁନୁଂ ଅଲିରାକ୍କାମ୍ ଗୁଲାଇ ସୁଲୁଂ ଡେମ୍ତ ।
27ନିଂ ମା'ଏବୁରଂ ପର୍ମାନ୍ ସବ'କୁନୁଂସୁଗ
ଆଇ'ତୁନ୍ବେଲା ନିଂ ଆମା'ଏ ମା'ଏନା ପାପ୍କୁରୁଂ ରକ୍ୟା ଡେମ୍ତିଂ” ଡ'ସେକ୍ ଲେକ୍ଲ'ତା ।
28ଇସ୍ରାଏଲ୍ ରେମଲେ ମାପ୍ରୁନା ବଲ୍କବର୍ ଆମାନ୍ତାସା' ମା'ଏ ଅବୁଦିର ମାପ୍ରୁନା ଦାଇରେମ୍ସୁଗ ଡେଂଗା' । ଡି'କେନ୍ ଡେଂଗା'ସା' ମା ଡେଂଗା' ଡ'ନା ପେ ଜାଜା ଇସ୍ରାଏଲ୍ ରେମଲେ ଆରାକ୍ ପେପୁଲେଇ ବଲ୍ ଡେଂଗା' । ମାତର୍ ମାପ୍ରୁ ଆଇସ୍ରାଏଲ୍ରେମଲେ ଆ'ନାସା ଆଲାତ୍ ଡେମ'ତା ମାସା'ଡ'ନା ମାପ୍ରୁ ଆମା'ଏନା ତୁତାଲେ ତିତିବାଡ' ବୁଂଅଁ'କୁନୁଂସୁଗ ଆମା'ଏ ସିରେଲ' ବୁଂଅଁ'ତା । 29ମାସା'ଡ'ନା ମାପ୍ରୁ ଆଜା ଆସିର୍ବାଦ୍ ଡେମ୍ତିଂ ଡ'ସେକ୍ ସିରେଲ' ବୁଂଅଁ'ତା ଆମା'ଏ ମାଇ ସୁନ'କୁନୁଂସୁଗ ଡେମ୍ତ, ଇନ୍ଡଇ'ଏସା ମାଇ ବାର୍ଗା'ତାଂବାଇ' ଆସୁନ୍ତ । 30ଇନ୍ତେ ପେ ଆମାପ୍ରୁ ମମାନ୍ବାର୍ ଡୁକୁପେ । ମାତର୍ ଆ'ନା ଇସ୍ରାଏଲ୍ ରେମଲେ ଆମାପ୍ରୁ ମମାନ୍ବାର୍ ଡୁତାସା' ମାଇ ଆପେ ଦୟା ଡେମ'ତା । 31ପେ ଇନ୍ତେ ଡୁକୁନୁଂସୁଗ ଆ'ନା ଇସ୍ରାଏଲ୍ ରେମଲେସା ଡୁ'ତୁନ୍ଉ ଡୁତା । ମା'ଏ ଆ'ନା ଆମାପ୍ରୁ ଆମାନ୍ତା ଡ'ନାସା ମାଇ ଆପେ ଆଲାତ୍ ଡେମ'ସେକ୍ ପେନ୍ ପାପ୍ ଗୁଲାଇଉ କେମା ଡେମ'କୁନୁଂସୁଗ ମାପ୍ରୁ ଆମା'ଏସା ଦୟା ଡେମ'ସେକ୍ ମା'ଏନା ପାପ୍ ଗୁଲାଇଉ ମୁସିଂ କେମା ଡେମ୍ତ । 32ମାସା'ଡ'ନା ଜାଜା ଆମାପ୍ରୁ ଆମାନ୍ତା ଆମା'ଏ ଆଗୁଲାଇର ମାଇନା ଦୟା ଅସୁଇ'ପୁଲେଇ ମାପ୍ରୁ ଆମା'ଏ ମା'ଏନା ମୁନ୍ସୁଗ ଡୁକୁଲେଇ' ଡ'ସେକ୍ ବୁଂଅଁ'ତା ।
ମାପ୍ରୁଉ ଅବୁଦି ମୁନା'ବାଇ'
33ଜୁ, ମାପ୍ରୁ ଅବୁଦି ଦୟା ଡିନ୍ଡେମ୍ବାଇ', ମାଇ ଅବୁଦି ବୁଦିଗିୟାନ୍ବାଇ' ମାରି ମାଇ ମମୁନାକ୍ବାଇ' ମାଏସା ଆଡୁତା । ମାଇ ମାମା ଡେମ୍ତିଂ ଡ'ସେକ୍ ଏତ୍କୁନୁଂ ମା ଡ'ସେକ୍ ନେଇ' ମାକ୍ମାକ୍ ଆଗଂତୁନେଇ' ମାରି ମାଇ ମି ଡେମ'ତା ଡ'ସେକ୍ସା ଆମାକ୍ତୁନେଇ' । 34ପ୍ରବୁଲା ମାଇନା ଜିବନ୍ବକ୍ ମାମା ଏତ୍ଗୁତା ଡ'ସେକ୍ ଜାଏସା ମାଗ୍ମାକ୍ ଗଂତା ଇ? ମାରି ଜାଏସା ଆମାଇ ନ ଡୁ'ତୁନ୍ ଡି'କେନ୍ ଡେମ୍ ଡ'ସେକ୍ ବୁଦି ସୁଁସୁ ଗଂତା ଇ? ଆରାକ୍ । 35ମାପ୍ରୁ ଆନିଂ ଇନ୍ଡଇ'ଡେ ବେ' ଡ'ସେକ୍ ଜାଏସା ଆମାପ୍ରୁ ମାଏସା ବେଡ'ବୁଂଅଁ'ତା ଇ? ଆରାକ୍ । 36#1 କରି 8:6ମାସା'ଡ'ନା ମାପ୍ରୁଉ ମାଇନା ବପୁବୁରଂ ଗୁଲାଇ ଅ'ରଇଁୟ'ତା । ମାରି ଗୁତୁନ୍ ଗୁଲାଇନା ବାଗ୍ବକ୍ ମାଇନା ଅଦିକାର୍ ଡୁତା । ମାରି ଗୁଲାଇ ଆମାଇ ସୁନ୍ଡ୍ରପୁଲେଇଉ ମାଇ ଅ'ରଇଁୟ'ତା । ଆମାଇ ଗୁଲାଇର ଇସାଉ ମଇମା ବେଡେଇ' ମାରି ଅ'ନାଉଲେଇ' । ଆମେନ୍ ।
Currently Selected:
ରମିୟ 11: BFW
Highlight
Copy
Compare
Share
Want to have your highlights saved across all your devices? Sign up or sign in
CC BY-NC-ND 4.0