ପେରିତ 9
9
ସାଉଲ୍ଲା ଆଜିସୁ ବିସ୍ବାସ୍ ଡିନ୍ଡେମ୍ଡେନ୍
1ଆଇ'ତୁନ୍ବେଲା ସାଉଲ୍ଲା ଜିରୁସାଲମ୍ ମୁନା'ଉଂଗମ୍ବକ୍ ଆପ୍ରବୁ ବିସ୍ବାସ୍ ଡେମ'ସେକ୍ ଡୁକୁନୁଂ ଆଗୁଲାଇ ସିସ୍ୟଲେ ଅଡାପ୍ତିଂ ଡ'ସେକ୍ ଇସାଉ ଡରାୟ'ସେକ୍ ଡୁକୁ । ସା' ମାଇ ମୁନା'ପୁଜାରିଲେନ୍ ମୁନା'ପୁଜାରିନ୍ବକ୍ ଉଇସେକ୍, 2ଦମେସକ ମୁନା'ଉଂଗମ୍ବକ୍ ଜାଏସା ପ୍ରବୁନା କୁରୁଂବକ୍ ଉଇଡେନ୍ତା ଡ'ନା ଆମା'ଏ ଆଗୁଲାଇ ଆଇଂଗେରେ ଆସେଲାନେ ତୁଲ'ରେଡ'ସେକ୍ ଜିରୁସାଲମ୍ ମୁନା'ଉଂଗମ୍ବକ୍ ଇନ୍ଡ୍ରିଂପୁଲେଇ ଆନିଂ ଅଦିକାର୍ ବେଡ'ତା ଡ'ସେକ୍ ଆତା ଜିଉଦିରେମଲେନା ଆଗୁଲାଇ ପାର୍ତନା ଡିଂଅଁନା ମୁନା'ରେମେ ସିଟିଲେ ଲେକ୍ଲ' ବେ' ଡ'ସେକ୍ ସୁନ' । 3ତିର୍ଗି' ମାଇ ଦମେସକବକ୍ ଉଇଡେଂକୁନୁଂବେଲା ଆତୁନ୍ ମୁନା'ଉଂଗମ୍ ତାଇ'ଡେକନ୍ଡେକ୍ ସରଗ୍କୁରୁଂ ମୁଇ ତାରା' ସେଟ୍ଟ' ମାଇନା ଗୁରୁଂ ତାର୍କିକ୍ ବେଡ' । 4ସା' ଆତା ମାଇ ତୁବୁକ୍ବକ୍ ଲଗ୍ଡାଇ'ଗା' ମାରି “ସାଉଲ୍, ଅ ସାଉଲ୍, ମାସା' ଆନିଂ କସ୍ଟ ବେଡ'ତୁନ?” ଡ'ସେକ୍ ମୁଇନ୍ଡା ଆମାଇ ସୁନ'କୁନୁଂ ମାଇ ଅଂଅଁ' ।
5ଅଂଅଁ'ସେକ୍ “ଅ ପ୍ରବୁ, ନ ଜା?” ଡ'ସେକ୍ ସାଉଲ୍ଲା ଅ'ଗଁସ୍ଲା'ଗା' । ସା' “ଆଜା ନ କସ୍ଟ ବେଡ'ତୁନ ଗୁତୁନ୍ ଜିସୁଲା ନିଂ, 6ଆ'ନା ନ ତନା, ମାରି ମୁନା'ଉଂଗମ୍ବକ୍ ଗାଇୟା । ନ ମା ଡେମ'ନା ଡେନ୍ତା ଡ'ସେକ୍ ଆତା ମୁଇନ୍ଡା ଆନ ସୁନ୍ତ” ଡ'ସେକ୍ ମାଇ ସୁନ' ।
7ମାଇବୁରଂ ଉଇଡେଂକୁନୁଂ ରେମଲେ ଗୁଲାଇର ଗୁତୁନ୍ ସୁନ'କୁନୁଂ ଅଂଅଁ' ମାତର୍ ମା'ଏ ଆଜାଏସା ଜୁଜୁ ଆଗଂତାସା' ଅବୁଦି ବୁତୁଂସେକ୍ ଆତାଉ ଜୁ'ଜା' ତଂଉଇଗା' । 8ସାଉଲ୍ଲା ଆଲୁଂ ଲ'ଗ୍ଡାଇ'କୁନୁଂକୁରୁଂ ତକ୍ଡାକ୍ସେକ୍ ଜୁଲ'ସା' ମାଇନା ମ' ଆତାର୍ତା । ସା' ମାଇବୁରଂ ଡୁକୁନୁଂ ରେମଲେ ଆମାଇ ତୁଂତୁଂଅଁ'ସେକ୍ ଦମେସକ ଉଂଗମ୍ବକ୍ ରିଂଅଁ' ଉଇଗା' । 9ମାରି ତିନ୍ଦିନ୍ ମାଇନା ମ' ଆତାର୍ତା ମାରି ମାଇ ମାସା ମସୁନୁମ୍ ମଇନି' ଡୁକୁ ।
10ସା' ଆତା ଦମେସକ ଉଂଗମ୍ବକ୍ ଅନନିୟ ଡ'ସେକ୍ ମୁଇନ୍ଡା ସିସ୍ୟ ଡୁକୁ । ଆମାଇ ପ୍ରବୁ ମୁସୁକ୍ଡିମ୍ବକ୍ ଅ'ତୁନାକ୍ସେକ୍ “ଅ ଅନନିୟ” ଡ'ସେକ୍ ୱାୟ'ସା' ଅନନିୟଲା, “ଅ ପ୍ରବୁ, ନ ସୁଁ ନିଂ ଅଂଅଁ'ତିଂ” ଡ'ସେକ୍ ସୁନ' ।
11ସା' ପ୍ରବୁ ଆମାଇ ସୁନ', “ନ ତନା, ଇଂକେକୁରୁଂ ତୁର୍ସେକ୍ ସଲକ୍ ଡ'କୁନୁଂ କୁରୁଂବକ୍ ଉୟା । ଆତା ଉଇନା ଜିଉଦା ଡ'ସେକ୍ ମୁଇନ୍ଡାନା ଡିଂଅଁବକ୍ ତାର୍ସସ୍ ଉଂଗମ୍ନା ସାଉଲ୍ ଡ'ସେକ୍ ମୁଇନ୍ଡା ଡୁତା, ଆମାଇ ନ ତୁର୍। ମାସା'ଡ'ନା ଆ'ନା ମାଇ ପାର୍ତନା ଡିନ୍ଡେମ୍ ଡେନ୍ତା । 12ମାରି ଅନନିୟ ଡ'ସେକ୍ ମୁଇନ୍ଡା ମାଇନ୍ବକ୍ ସାକ୍ସେକ୍ ମାଇନା ବାଗ୍ବକ୍ ତିତି ବୁଂଅଁ'ସେକ୍ ପାର୍ତନା ଡେମ'ସା' ମାଇ ମାରି ମ' ଜୁଜୁ ଗଂଗା' ଡ'ସେକ୍ ଆମାଇ ନିଂ ଅସୁୟ'ତିଂ” ଡ'ସେକ୍ ପ୍ରବୁ ସୁନ' ।
13ମାତର୍ ଅନନିୟଲା ସୁନ', “ଅ ପ୍ରବୁ, କେନ୍ ରେମନା ବିସୟ ରେମଲେ ସୁନ'କୁନୁଂ ମାରି ଜିରୁସାଲମ୍ ମୁନା'ଉଂଗମ୍ବକ୍ ଆନ ବିସ୍ବାସ୍ ଡେମ'ସେକ୍ ଡୁକୁନୁଂ ରେମଲେବକ୍ ମାଇ ଅବୁଦି କସ୍ଟ ବେଡ'ତା ଡ'ସେକ୍ ଅବୁଦିର ଆନିଂ ସୁନ'କୁନୁଂ ନିଂ ଅଂଅଁ'ତିଂ । 14ମାରି ଆନ ବିସ୍ବାସ୍ ଡେମ'ସେକ୍ ଡୁକୁନୁଂ ଆଗୁଲାଇ ରେମଲେ ଆକେସା ସାକ୍ସେ'ଗା ସୁସପ୍ପୁଲେଇ ମୁନା'ପୁଜାରିଲେ ଆମାଇ ଅଦିକାର୍ ବେଡ'ତା ଡ'ସେକ୍ ସୁନ'କୁନୁଂସା ନିଂ ଅଂଅଁ'ତିଂ” ଡ'ସେକ୍ ସୁନ' ।
15ମାତର୍ ପ୍ରବୁଲା ଆମାଇ ସୁନ', “ନ ଉୟା! ମାସା'ଡ'ନା ଜାଜା ଜିଉଦିରେମ ଆରାକ୍ ମା'ଏନ୍ବକ୍ ମାରି ମା'ଏନା ରାଜାଲେନ୍ବକ୍ ମାରି ଇସ୍ରାଏଲ୍ ରେମଲେନ୍ବକ୍ ଉଇସେକ୍ ନିଂନା ବିସୟ ସୁଁସୁନା କାମ୍ ଡିନ୍ଡେମ୍ପୁଲେଇ ଆମାଇ ନିଂ ସିରେଲ'ତିଂ । 16ରେମଲେନ୍ବକ୍ ଉଇସେକ୍ ନିଂନା ବିସୟ ମାଇ ସୁନ୍ତସା' ରେମଲେ ଆମାଇ ଅବୁଦି କସ୍ଟ ବେ'ତ ଡ'ସେ'ଗା ନିଂ ଆମାଇ ନିଜେ ସୁନ୍ତିଂ” ଡ'ସେକ୍ ସୁନ' ।
17ସା' ଅନନିୟଲା ଉଇସେକ୍ ଆତା ଡିଂଅଁବକ୍ ଗାଇଗା' ମାରି ସାଉଲ୍ନା ବାଗ୍ବକ୍ ତିତି ବୁଂଅଁ'ସେ'ଗା ମାଇ ସୁନ', “ଅ ବାଇଲକ୍ ସାଉଲ୍, ନ ତଂକେ ସୁସାପ୍ବେଲା କୁରୁଂବକ୍ ଜା ଆନ ଅ'ତୁନାଗା' ଗୁତୁନ୍ ପ୍ରବୁ ଜିସୁଲା ନନା ମ' ଆ'ନା ମାରି ତାରେଇ' ମାରି ଆନ ପବିତ୍ର ଆତ୍ମା ବାମେଇ' ଡ'ସେକ୍ ଆନିଂ ନନ୍ବକ୍ ବେନ୍ଟାୟ'ତା” ଡ'ସେକ୍ ସୁନ' ।
18ସା' ଆ'ଇକୁ ଆ'ଡଂନା ଇସାଆ'ସୁଗବାଇ' ମାଇନା ମ'କୁରୁଂ ଆଲୁଂ ଲ'ଗା'ସା' ମାଇନା ମ' ତାର୍ଗା' । ସା' ମାଇ ତଗ୍ଡାକ୍ସେକ୍ ବାପ୍ତିସ୍ମା ରିଂଗା' । 19ମାରି ମାଇ ସୁମ'ଇଡ'ସେକ୍ ବଲ୍ ବପୁ ବାଂଗା' ।
ସାଉଲ୍ଲା ଦମେସକବକ୍ ବଲ୍କବର୍ ସୁଁସୁଡେନ୍
ମାରି ମାଇ ଆ'ଇଦିନ୍ସୁଗ ଆତା ଦମେସକବକ୍ ଆଜିସୁ ବିସ୍ବାସ୍ ଡେମ'କୁନୁଂ ରେମଲେବୁରଂ ଡୁକୁଗା' । 20ମାରି ମାଇ ଜିଉଦିରେମଲେନା ପାର୍ତନା ଡିଂଅଁବକ୍ ଉଇସେକ୍ ଜିସୁଲାଉ ମାପ୍ରୁନା ଉଁ'ଉଁ ଡ'ସେକ୍ ଆଗୁଲାଇର ଆଇ'କୁ ସୁଁସୁ ମୁଲାୟ' । 21ସା' ଆତା ଡୁକୁନୁଂ ଗୁଲାଇର ମାଇ ସୁନ'କୁନୁଂ ଅଂଅଁ'ସେ'ଗା ଅବୁଦି କାବା ଡେଂସେ'ଗା ସୁନ' “ଜୁ, କୁନୁଂଆଁଉ ଜିରୁସାଲମ୍ ମୁନା'ଉଂଗମ୍ବକ୍ ଆଜିସୁଲା ବିସ୍ବାସ୍ ଡେମ'କୁନୁଂ ରେମଲେବକ୍ ଅଡାବ'କୁନୁଂଆଁ । ଆ'ନାସା ମାଇ ଆକେନ୍ ରେମଲେ ତୁଲ'ରେଡ'ସେକ୍ ଜିରୁସାଲମ୍ ମୁନା'ଉଂଗମ୍ବକ୍ ରିଂଅଁ' ଉଇସେକ୍ ମୁନା'ପୁଜାରିଲେନ୍ ତିତିବକ୍ ବିବେ'ପୁଲେଇ ଆକେ ସା'ଗୁତା” ଡ'ସେକ୍ ସୁନ' । 22ମାତର୍ ମାପ୍ରୁ ଆସାଉଲ୍ଲା ଅବୁଦି ବପୁ ବେଡ' । ମାରି ମାପ୍ରୁନା ଉଲାକ୍ବକ୍ ଲେକ୍ଲ'କୁନୁଂସୁଗ ଜିସୁଲାଉ କିରିସ୍ଟଲା ଡ'ସେକ୍ ମାଇ ଆମା'ଏ ବଲ୍ ଅସୁୟ' ବେଡ'କୁନୁଂସୁଗ ସୁନ'ସା' ଆତା ଦମେସକବକ୍ ଡୁକୁନୁଂ ଜିଉଦିରେମଲେ ମାଇନା ବାଗ୍ବକ୍ ବାସ୍ ମାସା ସୁଁସୁ ଆଗଂତା ।
23 #
2 କରି 11:32,33 ଅବୁଦି ଦିନ୍ ତିର୍ଗି' ଜିଉଦିରେମଲେ ଏନ୍ତୁକ୍ର ଆସାଉଲ୍ଲା ଅଡାପ୍ନେଇ' ଡ'ସେକ୍ ଅଇଁୟ' । 24ସା' ଗୁତୁନ୍ ଉଂଗମ୍ନା ଡାନ୍ଡର୍ବକ୍ ଗୁଲାଇ ସିମି'ଇଁ ଗୁଲାଇ ତୁମୁଂଗ ଆମାଇ ଅଡାପ୍ନେଇ' ଡ'ସେକ୍ ମା'ଏ ଜାଗ୍ଲ' ଲେଇ'କୁ । ମାତର୍ ମା'ଏ ଡି'କେନ୍ ଅଇଁୟ'ତା ଡ'ସେକ୍ ଆସାଉଲ୍ଲା ରେମଲେ ସୁନ'କୁ । 25ସା' ଆଜିସୁ ବିସ୍ବାସ୍ ଡେମ'କୁନୁଂ ଏନ୍ତୁକ୍ର ତୁମୁଂଗ ଆତୁନ୍ ମୁନା'ଉଂଗମ୍ନା ତି'ୟୁର୍ବାଇ' କନ୍ତିକୁରୁଂ ମୁଇ ଡାମୁଂବକ୍ ଆମାଇ ଅଲେୟ'ସେକ୍ ବାଇରି ଅ'ଜର'ବେଡ' ।
26ସାଉଲ୍ଲା ଜିରୁସାଲମ୍ ମୁନା'ଉଂଗମ୍ବକ୍ ସା'ଗା'ସା' ଆଜିସୁ ବିସ୍ବାସ୍ ଡେମ'କୁନୁଂ ରେମଲେବୁରଂ ମିସ୍ତିଂ ଡ'ସେକ୍ ଏତ୍ଗା' । ମାତର୍ ମା'ଏ ଆମାଇ ଅବୁଦି ବୁତୁଂଗା' । ମାସା'ଡ'ନା ମାଇ ସତଇସା ଆଜିସୁଲା ବିସ୍ବାସ୍ ଡେମ'ତା ଡ'ସେକ୍ ମା'ଏ ଆମାଇ ବିସ୍ବାସ୍ ଆଡେମ୍ତ । 27ମାତର୍ ବର୍ନବାଲା ଆମାଇ ୱାୟ'ସେକ୍ ପେରିତଲେନ୍ବକ୍ ରିଂଅଁ' ଉଇଗା' । ରିଂଅଁ' ଉଇସେକ୍ ସାଉଲ୍ଲା ଦମେସକବକ୍ ଉଇବେଲା କୁରୁଂବକ୍ ଆପ୍ରବୁଲା ଜୁଲ'କୁନୁଂ ମାରି ପ୍ରବୁଲା ମାଇବୁରଂ ଅଇଁୟ'କୁନୁଂ ମାରି ମବୁତୁଂ ମାଇ ଦମେସକ ଉଂଗମ୍ବକ୍ ଜିସୁନା ବଲ୍କବର୍ ସୁନ'କୁନୁଂ ଗୁଲାଇ ମାଇ ଆପେରିତଲେ ସୁନ' । 28ସା' ମାଇ ପେରିତଲେବୁରଂ ଡୁକୁକ୍ସେକ୍ ଜିରୁସାଲମ୍ ମୁନା'ଉଂଗମ୍ ଗୁଲାଇ କୁନ୍ଡା ମା'ଏବୁରଂ ବୁଲ୍ଲ'ସେକ୍ ମବୁତୁଂ ପ୍ରବୁନା ଇମି ସବ'ସେକ୍ ବଲ୍କବର୍ ସୁନ' । 29ଗିରିକ୍ସାମ୍ ଅଇଁନା ଜିଉଦିରେମଲେବୁରଂସା ମାଇ ଜିସୁନା ବଲ୍କବର୍ ସୁନ'ସେକ୍ ମା'ଏବୁରଂ ଅବୁଦି ଅଇଁୟ' । ମାତର୍ ମା'ଏ ଆମାଇ ମିଏସା ଅଡାପ୍ନେଇ' ଡ'ସେକ୍ ଏତ୍ଗା' । 30ସା' ଆଜିସୁ ବିସ୍ବାସ୍ ଡେମ'କୁନୁଂ ଏନ୍ତୁକ୍ର ଗୁତୁନ୍ ମାଗ'ସେକ୍ ଆମାଇ କାଇସରିଆ ମୁନା'ଉଂଗମ୍ବକ୍ ରିଂସେକ୍ ଆତାକୁରୁଂ ତାର୍ସ ମୁନା'ଉଂଗମ୍ବକ୍ ବେନ୍ଟାୟ' ବେଡ' ।
31ସା' ଜିଉଦା, ଗାଲିଲି ମାରି ସମିରନି ଡ'ସେକ୍ ଡୁକୁନୁଂ ଗୁଲାଇ ଦେସ୍ବକ୍ ଆଜିସୁ ବିସ୍ବାସ୍ ଡେମ'କୁନୁଂ ରେମଲେ ଗୁଲାଇର ଅବୁଦି ସାନ୍ତିସାର୍ଦା ଡେଂସେକ୍ ଡୁକୁ । ମା'ଏ ଆପ୍ରବୁଲା ବଲ୍ ମାନ୍ସେକ୍ ଡୁକୁ ମାରି ପବିତ୍ର ଆତ୍ମା ଆମା'ଏ ଆଗୁଲାଇର ସାନ୍ଡୁଂଅଁ'ସା' ମା'ଏ ଅବୁଦି ବପୁ ବାଂସେକ୍ ଡୁକୁ ମାରି ଅବୁଦି ରେମଲେ ଆଜିସୁ ବିସ୍ବାସ୍ ଡେମ' ।
ପିତର୍ଲା ଆଏନିୟଲା ବଲ୍ ଡିନ୍ଡେମ୍ଡେନ୍
32ପିତର୍ଲା ଆତା ଗୁଲାଇ କୁନ୍ଡା ବୁଲ୍ଲ'ସେକ୍ ମୁସିଂ ଲୁଦ ଡ'ସେକ୍ ମୁଇ ଉଂଗମ୍ବକ୍ ଆପ୍ରବୁଲା ବିସ୍ବାସ୍ ଡେମ'ସେକ୍ ଡୁକୁନୁଂ ରେମଲେନ୍ବକ୍ ସା'ଗା' । 33ସା' ଆତା ଏନିୟ ଡ'ସେକ୍ ଆମୁଇନ୍ଡା ମାଇ ଜୁଲ' । ମାଇନା ତିତି ତିକ୍ସୁଂ ଞେରି ଗୁଲାଇ ଗୁଇ'ସାର୍ତିଲ' ଗୁଇ'ସାର୍ସୁଂଅଁ'ସେକ୍ ଆଟ୍ବରସ୍ ଲିଲେଇ' ତ'ଗ୍ଡାଗ୍ ମଗୁନଂ ସିକ୍ସେକ୍ ବିନେସାକ୍ବକ୍ଉ ଡିରି'କୁଗା' । 34ସା' ପିତର୍ଲା ଆମାଇ ସୁନ' “ଅ ଏନିୟ, ଜିସୁ କିରିସ୍ଟଲା ଆନ ବଲ୍ ଡିନ୍ଡେମ୍ଡେନ୍ । ଆ'ନା ନ ମୁରାକ୍ସେକ୍ ନନା ସେନ୍ଲା' ଜୁଗ୍” ଡ'ସେକ୍ ସୁନ' । ସା' ମାଇ ଆଇ'କୁ ବଲ୍ ଡେଂସେକ୍ ତଗ୍ଡାଗା' । 35ମାଇ ବଲ୍ ଡେଂସେକ୍ ଉରିଂଅଁ'କୁନୁଂ ଲୁଦ ଉଂଗମ୍ବକ୍ ମାରି ସାରନ ଉଂଗମ୍ନା ପାଦାବାଇ' ଜାଗାବକ୍ ଡୁକୁନୁଂ ଗୁଲାଇର ଜୁଲ' ମାରି ମା'ଏ ଆପ୍ରବୁଲା ବିସ୍ବାସ୍ ଡେମ' ।
ପିତର୍ଲା ଆମୁଇନ୍ଡା ସେଲାନ୍ଲା ଗୁଇ'କୁନୁଂକୁରୁଂ ବ'ରଡେନ୍
36ଜପ ଡ'ସେକ୍ ମୁଇ ମୁନା'ଉଂଗମ୍ବକ୍ ଟାବିତା ଡ'ସେକ୍ ମୁଇନ୍ଡା ସେଲାନ୍ଲା ଆଜିସୁ ବିସ୍ବାସ୍ ଡେମ'ସେକ୍ ଡୁକୁ । ଗିରିକ୍ ସାମ୍ବକ୍ ଟାବିତା ଡ'ନା #9:36 ଗୁତୁନ୍ ଇମିନା ଅର୍ତ ୟଂସୁ ଡ'ସେକ୍ ଡୁତା ।ଦର୍କା ଡ'ସେକ୍ ଡୁତା । ମାଇ ଇସାଉ ବଲ୍କାମ୍ ଡେମ'କୁ ମାରି ଆଗରିବ୍ରେମ୍ ଅବୁଦି ସାନ୍ଡୁଂଅଁ'ସେକ୍ ଡୁକୁ । 37ଉନ୍ତା ଗୁତୁନ୍ ସେଲାନ୍ଲା ସିକ୍ସେକ୍ ଗୁଇ'ଉଇଗା' । ସା' ରେମଲେ ମାଇନା ମଟ୍ ଅ'କିମାଲ'ସେକ୍ ମାଇନା ବାଗ୍ବକ୍ନା ଡିଂଅଁବକ୍ ଅଡିରିଗ' ବୁଂଅଁ' । 38ଲୁଦ ମାରି ଜପ ଇମିକୁନୁଂ ଉଂଗମ୍ ଇମ୍ବାରୁ ଉନ୍ତୁ' ଡୁତାସା' ପିତର୍ଲା ଲୁଦବକ୍ ଡୁତା ଡ'ସେକ୍ ଜପବକ୍ ଡୁକୁନୁଂ ସିସ୍ୟଲେ ଅଂଅଁ' । ସା' ମା'ଏ ଆପିତର୍ଲା “ନ ସୁରୁଇ' ନେନ୍ବକ୍ ସା'ବା” ଡ'ସେକ୍ ଆଇମ୍ବାୟ ମାଇନ୍ବକ୍ ୱାଇ ବେନ୍ଟାୟ' ।
39ସା' ମାଇ ସୁରୁଇ' ତଗ୍ଡାକ୍ସେକ୍ ମାଇପାବୁରଂ ଉଇଗା' । ମାଇ ଆତା ଡେଲ'ସା' ଆମାଇ ଆଇ'କୁ ବାଗ୍ବକ୍ନା ଡିଂଅଁବକ୍ ରିଂଅଁ' ଡାଇ'ଗା' । ସା' ଆତା ଡୁକୁନୁଂ ଗୁଲାଇ ରାନ୍ଡି ସେଲାନେ ଉକ୍ସେ' ୱାଇସେକ୍ସେକ୍ ଟାବିତାଲା ମା'ଏବୁରଂ ଡୁକୁନୁଂବେଲା ମା'ଏପୁଲେଇ ମିମିବାଇ' ଜଲଂଗି ସକାଲେ ଇମ୍ପ'ଡେ ତାଇଁୟ'ବୁଅଁ' ଗୁତୁନ୍ ଗୁଲାଇ ଆପିତର୍ଲା ଅସୁୟ'ସେକ୍ ଆମାଇ ଗୁରୁଂ ଡେମ' ତଂଗା' । 40ମାତର୍ ପିତର୍ଲା ଆମା'ଏ ଆଗୁଲାଇର ଡିଂଅଁ ବାରେ ଅ'ତୁର'ସେ'ଗା ମାଇ ଏନ୍ଡିକ୍ସେକ୍ ଆମାପ୍ରୁ ପାର୍ତନା ଡେମ' । ମାରି ମାଇ ଆମଟ୍ ଜୁଲ'ସେକ୍ ସୁନ', “ଅ ଟାବିତା, ନ ତଗ୍ଡା'ଗା'” ଡ'ସେକ୍ ସୁନ' । ସା' ମାଇ ଆଇ'କୁ ମୁରାକ୍ସେକ୍ ଆପିତର୍ଲା ଜୁଲ'ସେକ୍ ଲେଇ'ଗା' । 41ସା' ପିତର୍ଲା ଆମାଇନା ତିତି ସବ'ସେକ୍ ଆମାଇ ଅ'ତନ' । ଅ'ତନ'ସେକ୍ ଆଜିସୁ ବିସ୍ବାସ୍ ଡେମ'କୁନୁଂ ରେମଲେବକ୍ ମାରି ରାନ୍ଡିସେଲାନେବକ୍ ୱାୟ'ସେକ୍ ମାଇ ମାରି ବୁରଗା' ଡ'ସେକ୍ ଆଗୁଲାଇର ଅସୁୟ' । 42ଡି'କେନ୍ ଡେଂକୁନୁଂ ଜପ ମୁନା'ଉଂଗମ୍ବକ୍ ଗୁଲାଇ କୁନ୍ଡା ଉନୁଂଗା' ସା' ଅବୁଦି ରେମଲେ ଆପ୍ରବୁଲା ବିସ୍ବାସ୍ ଡେମ' । 43ମାରି ପିତର୍ଲା ଆତା ଜପ ମୁନା'ଉଂଗମ୍ବକ୍ ଇସାନା କାମ୍ ଡେମ'ସେକ୍ ଡୁକୁନୁଂ ସିମନ୍ ଡ'ସେକ୍ ମୁଇନ୍ଡାନା ଡିଂଅଁବକ୍ ଅବୁଦି ଦିନ୍ ଡୁକୁ ।
Currently Selected:
ପେରିତ 9: BFW
Highlight
Copy
Compare
Share
Want to have your highlights saved across all your devices? Sign up or sign in
CC BY-NC-ND 4.0