ପେରିତ 8
8
1ଆସ୍ତିପାନ୍ଲା ଅଗୁଇ' ଡୁତା ଡ'ସେକ୍ ସାଉଲ୍ଲା ରାଜି ଡେଂକୁଗା' ।
ଆଜିସୁ ବିସ୍ବାସ୍ ଡେମ'କୁନୁଂ ରେମଲେବକ୍ କସ୍ଟ ବିବେ' ଡେନ୍ସା' ମା'ଏ ପାଲ୍ପାଲ୍ ଦେସ୍ବକ୍ ଉଇଡେନ୍
ଉନ୍ତ୍ଦିନ୍ ଜିରୁସାଲମ୍ ମୁନା'ଉଂଗମ୍ବକ୍ ଆଜିସୁଲା ବିସ୍ବାସ୍ ଡେମ'କୁନୁଂ ରେମଲେବକ୍ ଅବୁଦି କସ୍ଟ ବିବେ' ମୁଲାୟ' । ସା' ଆତା ଆଜିସୁଲା ବିସ୍ବାସ୍ ଡେମ'ସେକ୍ ଡୁକୁନୁଂ ଏନ୍ତୁକ୍ର ଜିଉଦା ମୁନା'ଉଂଗମ୍ ମାରି ସମିରନି ମୁନା'ଉଂଗମ୍ବକ୍ ଉର' ଡୁଂଗା' । ପେରିତଲେ ଆମ୍ବ'ସା ଆଉଇତା, ଆତାଉ ଡୁକୁଗା' । 2ସା' ଆତା ଆମାପ୍ରୁ ବିସ୍ବାସ୍ ଡେମ'ସେକ୍ ଡୁକୁନୁଂ ଏନ୍ତୁକ୍ର ସାକ୍ସେକ୍ ସ୍ତିପାନ୍ନା ମଟ୍ ଜୁଗ'ସେକ୍ ଆତିଲ'ସୁଂଅଁ' । ମା'ଏ ଆମାଇ ଏତ୍ସେକ୍ ଅବୁଦି ଉକ୍ସେ' ୱାଇସେ'କୁଗା' । 3#ପେରିତ 22:4,5; 26:9–11ମାତର୍ ସାଉଲ୍ଲା ଆଜିସୁ ବିସ୍ବାସ୍ ଡେମ'ସେକ୍ ଡୁକୁନୁଂ ରେମଲେବକ୍ ଅବୁଦି କସ୍ଟ ବେଡ'ସେକ୍ ଆମା'ଏ ନାସାଇତୁନେଇ ଡ'ସେକ୍ ଏତ୍ଗା' । ମାଇ ଡିଂଅଁ ଡିଂଅଁବକ୍ ଗାଇସେକ୍ ଆଜିସୁ ବିସ୍ବାସ୍ ଡେମ'ସେକ୍ ଡୁକୁନୁଂ ଆଇଂଗେରେ ଆସେଲାନେ ଆଗୁଲାଇର ୱାନ' ଅ'ତୁର'ସେକ୍ ବନ୍ଦିବକ୍ ଅ'ସୁରୁଂଅଁ' ।
ପିଲିପ୍ଲା ସମିରନିୟ ମୁନା'ଉଂଗମ୍ବକ୍ ଉଇଡେନ୍
4ଜିରୁସାଲମ୍ ମୁନା'ଉଂଗମ୍କୁରୁଂ ଉର' ଡୁଂକୁନୁଂ ରେମଲେ ମା'ଏ ଇମ୍ବ'ନ୍ ଇମ୍ବ'ନ୍ ଉଂଗମ୍ବକ୍ ଡେଲ' ଆତା ଗୁଲାଇ କୁନ୍ଡା ମାପ୍ରୁନା ବଲ୍କବର୍ ସୁନ' । 5ପିଲିପ୍ଲା ସମିରନି ମୁନା'ଉଂଗମ୍ବକ୍ ଉଇସେକ୍ ଜିସୁଲାଉ କିରିସ୍ଟଲା ଡ'ସେକ୍ ଆଗୁଲାଇର ସୁନ' । 6ସା' ପିଲିପ୍ଲା ସୁନ'କୁନୁଂ ଗୁଲାଇର ବଲ୍ ଅଂଅଁ'ସେକ୍ ମାରି ମାଇ ଆତା ଡେମ'କୁନୁଂ ଅବୁଦି କାବାକାବାବାଇ'ନା ସିନଲେ ଗୁଲାଇ ଜୁଲ'ସେକ୍ ମା'ଏ ଗୁଲାଇର ମାଇନା ତୁମ' ଅଂପୁଲେଇ ଅବୁଦି ମୁନ୍ଡେଂକୁ । 7ମାସା'ଡ'ନା ଆରେମଲେ ସବ'କୁନୁଂ ଅଲିରାକ୍ବାଇ' ବୁତ୍ଲେ ଅବୁଦି ଡକ୍ତି'ତା କିରକ୍ସେକ୍ ଅବୁଦି ରେମଲେନ୍କୁରୁଂ ତୁର୍ଡୁଂଗା' । ତିତି ତିକ୍ସୁଂ ଗୁଲାଇ ଞେରି ଗୁଇ'କୁନୁଂସୁଗ ଡୁକୁନୁଂ ରେମଲେ ମାରି ସଟାସଟିବାଇ' ରେମଲେସା ବାନି ଡେଂଗା' । 8ସା' ଗୁତୁନ୍ ମୁନା'ଉଂଗମ୍ବକ୍ ଡୁକୁନୁଂ ଗୁଲାଇର ଅବୁଦି ସାର୍ଦା ଡେଂସେକ୍ ଡୁକୁ ।
ସିମନ୍ଲା ଡ'ସେକ୍ ମୁଇନ୍ଡା ଏରେମ୍
9ମାତର୍ ଆତା ସମିରନିୟ ମୁନା'ଉଂଗମ୍ବକ୍ ସିମନ୍ଲା ଡ'ସେକ୍ ମୁଇନ୍ଡା ଡୁକୁ । ମାଇ ଇନ୍ତେବାଂସା' ଅବୁଦି ଏବାଇ' ଡୁକୁ ମାରି ଆସମିରନିୟ ରେମଲେ ଅବୁଦି କାବା ଅ'ଡେମ'ସେକ୍ ନିଂ ମୁଇନ୍ଡା ମୁନା'ରେମ୍ ଡ'ସେକ୍ ଅବୁଦି ବଡ୍ପୁନ୍ ଡେଂସେକ୍ ଡୁକୁ । 10ସା' “କେନ୍ ରେମ ମୁନା'ବାଇ' ବପୁ ବାଂସେକ୍ ଅବୁଦି କାବାବାଇ' କାମ୍ ଡେମ'ତା ମାସା'ଡ'ନା ମାପ୍ରୁ ଆମାଇ ମୁନା'ରେମ୍ ଅ'ଡେମ'ତା ” ଡ'ସେକ୍ ସମିରନିୟ ଜିଲାନା ଗରିବ୍ରେମ୍ସା ସାକାର୍ରେମ୍ସା ଗୁଲାଇର ମାଇନା ତୁମ' ଅଂଅଁ'ସେକ୍ ଡୁକୁ । 11ମାଇ ଅବୁଦି ବରସ୍ ଡି'କେନ୍ ଏବାଇ' କାମ୍ବୁରଂ ଆରେମଲେ କାବାକାବା ଅ'ଡେମ'ସେକ୍ ଡୁକୁଗା'ସା' ମା'ଏ ଆମାଇ ତେଂଗି' ଉଇଡେଂକୁ । 12ମାତର୍ ପିଲିପ୍ଲା ଆମା'ଏ ମାପ୍ରୁନା ରାଜିନା ବଲ୍କବର୍ ମାରି ଜିସୁ କିରିସ୍ଟଲା ଜା ଡ'ସେକ୍ ସୁନ'ସା' ରେମଲେ ମାଇ ସୁନ'କୁନୁଂ ବଲ୍କବର୍ ଅଂଅଁ'ସେକ୍ ବିସ୍ବାସ୍ ଡେମ'; ମାରି ବିସ୍ବାସ୍ ଡେମ'କୁନୁଂ ସେଲାନେ ମାରି ଇଂଗେରେ ମା'ଏ ଗୁଲାଇର ବାପ୍ତିସ୍ମା ରିଂଗା' । 13ସିମନ୍ଲାସା ନିଜେ ବଲ୍କବର୍ ବିସ୍ବାସ୍ ଡେମ'ସେକ୍ ବାପ୍ତିସ୍ମା ରିଂଗା' । ସା' ମାଇ ଇସାଉ ପିଲିପ୍ଲାବୁରଂ ତିରେ ବୁଲ୍ଲ'କୁଗା' । ମାପ୍ରୁ ସାନ୍ଡୁଂଅଁସା' ପିଲିପ୍ଲା ଡେମ'କୁନୁଂ ସିନଲେ ମାରି କାବାକାବା ଡିନ୍ଡେମ୍ବାଇ' କାମ୍ ଜୁଲ'ସେକ୍ ସିମନ୍ଲା ଅବୁଦି କାବା ଡେଂଉଇଗା' ।
14ସମିରନିୟ ଜିଲାନା ଅବୁଦି ରେମଲେ ମାପ୍ରୁନା ବଲ୍କବର୍ ଅଂଅଁ'ସେକ୍ ବିସ୍ବାସ୍ ଡେମ'ତା ଡ'ସେକ୍ ଜିରୁସାଲମ୍ ମୁନା'ଉଂଗମ୍ବକ୍ ଡୁକୁନୁଂ ପେରିତଲେ ଅଂଅଁ'ସେକ୍ ଆପିତର୍ଲା ମାରି ଆଜଅନ୍ଲା ଆତା ବେନ୍ଟାୟ' । 15ସା' ମାଇପା ସାକ୍ସେକ୍ ଜାଜା ଆତା ଆଜିସୁ ବିସ୍ବାସ୍ ଡେମ'ତା ଆମା'ଏ ଆଗୁଲାଇର ପବିତ୍ର ଆତ୍ମା ବେ' ଡ'ସେକ୍ ମା'ଏପୁଲେଇ ମାପ୍ରୁନ୍ବକ୍ ପାର୍ତନା ଡେମ' । 16ମାସା'ଡ'ନା ଆମା'ଏ ଆଜାଏସା ପବିତ୍ର ଆତ୍ମା ବୁମ୍ବାମ୍ ଅରଇ' ଡେଂକୁ । ଉନ୍ତା ମା'ଏ ଗୁଲାଇର ପ୍ରବୁ ଜିସୁନା ଇମିବକ୍ଉ ବାପ୍ତିସ୍ମା ରିଂସେ'ଗା' ଡୁକୁ । 17ସା' ପିତର୍ଲା ମାରି ଜଅନ୍ଲା ମା'ଏନ୍ ବାଗ୍ବକ୍ ମାଇପାନା ତିତି ବୁଂଅଁ'ସେକ୍ ପାର୍ତନା ଡେମ'ସା' ଆମା'ଏ ଆଗୁଲାଇର ମାପ୍ରୁ ପବିତ୍ର ଆତ୍ମା ବେଡ' ।
18ସା' ପେରିତଲେ ମା'ଏନ୍ ବାଗ୍ବକ୍ ତିତି ବୁଂଅଁ'ସେକ୍ ପାର୍ତନା ଡେମ'ସା' ଆମା'ଏ ଆଗୁଲାଇର ମାପ୍ରୁ ପବିତ୍ର ଆତ୍ମା ବେଡ'କୁନୁଂ ଜୁଲ'ସେକ୍ ସିମନ୍ଲା ନିଂ ଗୁତୁନ୍ ବପୁ ଡାବୁ ବେଡ'ସେକ୍ ସପ୍ତିଂ ଡ'ସେକ୍ ଆମାଇପା ଡାବୁ ବିବେ' ସା'ଗା' । 19ସାକ୍ସେକ୍ ମାଇ ସୁନ', “ଆନିଂସା କେନ୍ ବପୁ ବେ' । ମା ଡ'ନା, ନିଂ ଜାନାସା ବାଗ୍ବକ୍ ତିତି ବୁଂଅଁ'ନା ମା'ଏ ପବିତ୍ର ଆତ୍ମା ବାମେଇ' ” ଡ'ସେକ୍ ସୁନ' ।
20ମାତର୍ ପିତର୍ଲା ଆମାଇ ସୁନ' “ମାପ୍ରୁଲାଉ ଆମାଇନା ରେମଲେ ଗୁଲାଇ ବେଡ'ତା । ଡାବୁ ବେଡ'ସେକ୍ ଗୁତୁନ୍ ସୁସପ୍ ଗଂତିଂ ଡ'ସେକ୍ ନ ଏତ୍ଗୁତୁନସା' ନବୁରଂ ନନା ଡାବୁସା ମାପ୍ରୁ ନାସାୟ'ସୁଂଏଁଇ' । 21ମାପ୍ରୁ ଜୁଲ'ନା ନନା ଏତ୍ ବଲ୍ ଆରାକ୍ସା' ନେଇ ଡିନ୍ଡେମ୍ନା କେନ୍ କାମ୍ବକ୍ ମାପ୍ରୁ ଆନ ଆମିସାଇଁତ । 22ଡି'କେନା ଅଲିରାକ୍ବାଇ' ଏତ୍ବାର୍ନା ଅନ୍ତୁର'ସେକ୍ ପ୍ରବୁନ୍ବକ୍ ନ ପାର୍ତନା ଡେମ୍ । ଆମାଇ ମୁନ୍ ଡୁକୁନା ନନା ଜିବନ୍ବକ୍ ସା'କୁନୁଂ ଗୁଲାଇ ଅଲିରାକ୍ ଏତ୍ ମାଇ କେମା ଡେମ୍ତ । 23ମାସା'ଡ'ନା ନ ଆନେଇ ଅବୁଦି ଆଂକାର୍ ଡେଂଗୁତୁନ ମାରି ନ ଅବୁଦି ପାପ୍କାମ୍ଉ ଡେମ'ଡେମ'ସେକ୍ ଡୁତୁନ ଡ'ସେକ୍ ନିଂ ମାଗ'ତିଂ” ଡ'ସେକ୍ ସୁନ' ।
24ସା' ସିମନ୍ଲା ସୁନ' “ପା ସୁନ'କୁନୁଂସୁଗ ଆନିଂ ମାସା ଆଡେମେଇ' ଡ'ସେକ୍ ପା ନିଂପୁଲେଇ ପ୍ରବୁନ୍ବକ୍ ପାର୍ତନା ଡେମ୍” ଡ'ସେକ୍ ସୁନ' ।
25ତିର୍ଗି' ପ୍ରବୁଲା ମାମା ଡେମ'କୁ ଗୁତୁନ୍ ଜୁଲ'କୁନୁଂ ମାରି ପ୍ରବୁଲା ସୁନ'କୁନୁଂ ବଲ୍କବର୍ ପିତର୍ଲା ମାରି ଜଅନ୍ଲା ଆତା ଆଗୁଲାଇର ସାକି ସୁନ' । ମାରି ମାଇପା ଜିରୁସାଲମ୍ ମୁନା'ଉଂଗମ୍ବକ୍ ଆନ୍ଡେଇଁବେଲା କୁରୁଂବକ୍ ଡୁକୁନୁଂ ସମିରନିୟ ରେମଲେନା ଏନ୍ତୁକ୍ ଉଂଗମ୍ବକ୍ ଉଇସେକ୍ ଜିସୁନା ବଲ୍କବର୍ ସୁନ'ସୁନ'ସେକ୍ ଇ'ଗା' ।
ପିଲିପ୍ଲା ମାରି ଇତିୟପିଆ ରାଜିନା ମୁଇନ୍ଡା
26ତିର୍ଗି' ପ୍ରବୁନା ମୁଇ ଦୁତ ସାକ୍ସେକ୍ ଆପିଲିପ୍ଲା ସୁନ', “ନ ଇଂକେକୁରୁଂ ତୁର୍ସେକ୍, ଜିରୁସାଲମ୍ ମୁନା'ଉଂଗମ୍କୁରୁଂ ଗଜ୍ଜା ଡ'କୁନୁଂ ଉଂଗମ୍ବକ୍ ଉଇନା ରେମ ମଡୁକୁବାଇ' ଡୁକୁନୁଂ ଗୁତୁନ୍ ଗୁରାଇ'ମ'କୁରୁଂନା କୁରୁଂବକ୍ ଉୟା” ଡ'ସେକ୍ ସୁନ' । 27ସା' ମାଇ ତୁର୍ସେକ୍ ଆତା ଉଇଗା'ସା' ଇତିୟପିଆ ଦେସ୍ନା ମୁଇନ୍ଡା ଟେରାବାଇ' ରେମବକ୍ ଆତୁନ୍ କୁରୁଂ ଅଲି'ଗା' । ମାଇ ଇତିୟପିଆ ଦେସ୍ବକ୍ କାନ୍ଡାକି ଡ'ସେକ୍ ରେମଲେ ୱାୟ'କୁନୁଂ ରାଜାକୁଇ'ନା ଗୁଲାଇ ଦନ୍ସମ୍ପତି ଜୁଲ'ସେକ୍ ଡୁକୁନା କାମ୍ ଡେମ'କୁଗା', ସା' ଗୁଲାଇର ମାଇ ମୁଇନ୍ଡା ମୁନା'ରେମ୍ ଡ'ସେକ୍ ଜୁଲ' । ମାଇ ଜିରୁସାଲମ୍ ମୁନା'ଉଂଗମ୍ବକ୍ ଆମାପ୍ରୁ ସୁନ୍ଡ୍ରପୁଲେଇ ଉଇସେକ୍ 28ଗଡାଗାଡିବକ୍ ଲେଇ'ସେକ୍ ଇ'ଡେଂକୁ । ଡୁ'ତୁନା ଇ'ଡେଂକୁନୁଂବେଲା ଜିସାୟଲା ଡ'ସେକ୍ ମୁଇନ୍ଡା ବାବବାଦିଲା ଇନ୍ତେକନ୍ଡେ'କା ଲେକ୍ଲ'ବୁଂଅଁ'କୁନୁଂ ମାଇ ପଡ୍ବାର୍ଡେଂକୁ । 29ସା' ଆଇ'ତୁନ୍ବେଲା ମାପ୍ରୁନା ଜିବନ୍ ଆପିଲିପ୍ଲା ସୁନ', “ନ ମାଇନା ଉନ୍ତୁ' ଉଇସେକ୍ ଗଡାଗାଡିବୁରଂ ତିରେ ଉରିଂ” ଡ'ସେକ୍ ସୁନ' ।
30ସା' ପିଲିପ୍ଲା ଉର' ଉଇସେକ୍ ମାଇନା ଗାଡିବୁରଂ ତିରେ ଉରିଂଅଁ' । ସା' ଜିସାୟଲା ଡ'ସେକ୍ ମୁଇନ୍ଡା ବାବବାଦିଲା ଇନ୍ତେକନ୍ଡେ'କା ଲେକ୍ଲ'ବୁଂଅଁ'କୁନୁଂ ମୁଇ ଉଲାକ୍ ମାଇ ପଡ୍କୁନୁଂ ପିଲିପ୍ଲା ଅଂଅଁ'ସେକ୍ “ନ ପଡ୍କୁନୁଂ ଗୁତୁନା ମା ଡ'ସେକ୍ ମାଗ'ତୁନ ଇ?” ଡ'ସେକ୍ ଆମାଇ ଅ'ଗଁସ୍ଲା'ଗା' ।
31ସା' ମାଇ ସୁନ' “ଅମାକ୍ପୁଲେଇ ଜାଏସା ଆଡୁତା ଡ'ନା ନିଂ ମି ମାକ୍ତିଂଲେଇ” ଡ'ସେକ୍ ସୁନ'; ମାରି ମାଇ ଆପିଲିପ୍ଲା “ନ ଗାଡିବକ୍ ଡାଇ'ସେକ୍ ଲେଇ'ୟା” ଡ'ସେକ୍ ସୁନ' ।
32ଗୁତୁନ୍ ମାପ୍ରୁନା ଉଲାକ୍ବକ୍ ମାଇ ପଡ୍କୁନୁଂ ମୁଇ ବାଗ୍ ମା ଡ'ନା:
“ଅଡାପ୍ପୁଲେଇ ରିଂଅଁ' ଉଇଡେଂକୁନୁଂ ମେନ୍ଡାସୁଗ ଆମାଇ ରିଂଅଁ' ଉଇଗା' ।
ଲୁଇମେନ୍ଡା ଆର୍ବେଲା ମୁଇ ଉଁ'ଉଁମେନ୍ଡା ଜୁ' ଡେଂସେକ୍ ଡୁକୁନୁଂସୁଗ
ରେମଲେ ଆମାଇ ଅବୁଦି କସ୍ଟ ବେଡ'ନାସା ମାଇ ବାସ୍ ଆସାର୍ଲଂତା ।
33ରେମଲେ ଆମାଇ ଗୁମୁୟ'ସା' ବିସାର୍ନା ଡିନ୍ଡେମ୍ବକ୍ ମାଇ ମୁଇନ୍ଡା ବୁଲ୍କାମ୍ ଡେମ'କୁନୁଂ ରେମ ଡ'ସେକ୍ ସୁନ'।
ମାଇନା ପୁନ୍ଜି ଡ'ସେକ୍ ମୁଇନ୍ଡାସା ଆରାକ୍,
ମାସା'ଡ'ନା ମାଇନା ଜିବନ୍ କେନ୍ ଦର୍ତନିକୁରୁଂ ରିଂଅଁ'ଡୁଂଗା'” ଡ'ସେକ୍ ଲେକ୍ଲ'କୁନୁଂ ମାଇ ପଡ୍କୁଗା' ।
34ଗୁତୁନ୍ ଟେରାଲା ଆପିଲିପ୍ଲା ଅ'ଗଁସ୍ଲା'ଗା', “ବାବବାଦିଲା କେନା ଜାନା ବିସୟ ସୁନ'ତା? ଆନିଂ ସୁଁ, ମାଇନା ନିଜର୍ନା ବିସୟକି ପାଲ୍ ମୁଇନ୍ଡାନା?” ଡ'ସେକ୍ ଅ'ଗଁସ୍ଲା'ଗା' । 35ସା' ପିଲିପ୍ଲା ମାପ୍ରୁନା ଉଲାକ୍ବକ୍ ଆତା ଲେକ୍ଲ'କୁନୁଂ ଗୁତୁନ୍ ମା ଡ'ସେକ୍ ଆମାଇ ଅମାକ୍ ମୁଲାୟ'ସେକ୍ ଜିସୁନା ବଲ୍କବର୍ ଆମାଇ ସୁନ' ।
36ମାଇପା ଡି'କେନ୍ ଉଇଡେଂକୁନୁଂବେଲା କୁରୁଂପାଲି ଡାଗ୍ ଡୁକୁନୁଂ ଜାଗାବକ୍ ଡେଲ'। ସା' ମାଇ ଆପିଲିପ୍ଲା ସୁନ', “ଜୁ ଆକେ ଡାଗ୍ ଡୁତା, ନିଂ ବାପ୍ତିସ୍ମା ଇନ୍ଡ୍ରିଂ ଆଗଂତିଂ ଇ?” ଡ'ସେକ୍ ସୁନ' । 37#8:37 କେନ୍ ପଦ ସିଁସେଇଁଉ ଡୁକୁନୁଂ ବଲ୍ଟା ଉଲାଗେବକ୍ ଆଡୁତା ।ସା' ପିଲିପ୍ଲା ଆମାଇ ସୁନ' “ନ ଜିବନ୍ ବିତ୍ରେକୁରୁଂ ବିସ୍ବାସ୍ ଡେମ'ତୁନ ଡ'ନା ନ ଇନ୍ଡ୍ରିଂ ଗଂତୁନ” ଡ'ସେକ୍ ଆମାଇ ସୁନ' । ସା' “ଜିସୁ କିରିସ୍ଟଲା ମାପ୍ରୁନା ଉଁ'ଉଁ ଡ'ସେକ୍ ନିଂ ବିସ୍ବାସ୍ ଡେମ'ତିଂ” ଡ'ସେକ୍ ମାଇ ସୁନ' । 38ସୁନ'ସେକ୍ ମାଇ ଗାଡି ଅ'ତଁ ଡ'ସେକ୍ ସୁନ' ମାରି ପିଲିପ୍ଲାବୁରଂ ଗାଡିକୁରୁଂ ଜର୍ସେକ୍ ଡାଗ୍ ବିତ୍ରେ ଇମ୍ବାୟ ଗାଇଗା' । ମାରି ପିଲିପ୍ଲା ଆମାଇ ଆତା ଡାଗ୍ବକ୍ ବାପ୍ତିସ୍ମା ବେଡ' । 39ବେଡ'ସେକ୍ ମାଇପା ଇମ୍ବାୟ ଡାଗ୍କୁରୁଂ ବାଇରି ତୁର୍ଗା' । ଆଇ'ତୁନ୍ବେଲା ପ୍ରବୁନା ଆତ୍ମା ଆପିଲିପ୍ଲା ପାଲ୍ ମୁଇ ଉଂଗମ୍ବକ୍ ସେଟ୍ଟ' ରିଂଅଁ' ଉଇଗା' । ସା' ଗୁତୁନ୍ ଟେରାଲା ମାରି ଇନ୍ଡଇ'ଏସା ଆପିଲିପ୍ଲା ଆଜୁତ, ମାତର୍ ମାଇ ଅବୁଦି ସାର୍ଦାକ୍ସେକ୍ ଆତାକୁରୁଂ ମାଇନା କୁରୁଂବକ୍ ଡୁଂଗା' । 40ମାତର୍ ଅସ୍ଦଦ୍ ଡ'ସେକ୍ ମୁଇ ମୁନା'ଉଂଗମ୍ବକ୍ ଆପିଲିପ୍ଲା ରେମଲେ ଜୁଲ' । ସା' ମାଇ ଆତା ଗୁଲାଇ ଉଂଗମ୍ବକ୍ ମାରି କାଇସରିଆ ଡ'ସେକ୍ ମୁଇ ମୁନା'ଉଂଗମ୍ବକ୍ ଡିଡେପନ୍ତେ'କା ମନ୍ଜା ଡୁକୁନୁଂ ଆଗୁଲାଇ ଉଂଗମ୍ ମାପ୍ରୁନା ବଲ୍କବର୍ ସୁନ' ।
Currently Selected:
ପେରିତ 8: BFW
Highlight
Copy
Compare
Share
Want to have your highlights saved across all your devices? Sign up or sign in
CC BY-NC-ND 4.0