NDANIYERA 10
10
Emoneko lyaNdaniyera pomukuro gwa Tigilisi
1(Momumvho gwautatu gwaKoresi, hompa gwaPeresiya mbudi tazi horokere Ndaniyera ogu ngava tumbura hena asi Belitesasara. Mbudi kwa kere zosili, nye ndigu unene za kere kuzikwata egano. Azo kwa zi mu fatwililire memoneko.)
2Poruveze oro, ame kwa kere mononkali yivike yitatu. 3Ame kapi ngani vhuru kulya nondya donongwa ndi asi ni lye nyama ndi ni makere nampili kavhinyu ndi ni fufure nohuki dange dogoro yivike oyo yitatu tayi lipitire.
4Momazuva nomurongo mbali nagane gokwedi komuhowo, ame kwa sikamene konontere domukuro gomunene gwaTigilisi. 5Ame makura tani kankuka ni tare, tani mono gumwe ogu ana dwara yikoverero yolina noliva rongodoro zene‐zene. 6Rutu rwendi kwa fene ngwendi maurenga. Sipara sendi kwa vemberere ngwendi uzera woruvadi, ano meho gendi kwa yukumine ngwendi mundiro. Mawoko gendi nomaguru gendi kwa fene ngwendi ngoporo vana heke. Ano ezwi lyendi kwa fene ngwendi ezogerero lyombunga zonene.
7Ame nyamelike na mwene emoneko eli. Vantu ava na kere nawo nayimwe si va mwene. Awo kwa va kwete woma, tava duka va ze va ka vande. 8Ame nyamelike va sigire po, ame kuna kutara emoneko eli lyokutetukisa. Mwange kapi mwa hupire hena nonkondo, ano sipara sange tasi lisitunuka, makura nogusi hena ga vhulire kudimburura nge. 9Eyi na zuvha ezwi lyendi, tani ligandere pevhu tani pwilire, sipara sange tasi vhumbama mevhu. 10Makura kuwoko taku kwata nge, taku yambura mawoko gange nonongoro dange, ame simpe kuna kumenga.
11Muengeli ta tantere nge asi: “Ndaniyera, Karunga kwa ku hara. Sikama, ove o purakene nawa eyi nani ku tantera. Ame koge vana tumu nge.” Eyi tupu ga mana kuuyunga eyi, makura ame tani sikama, nye simpe kuna kumenga.
12Age ta tanta asi: “Ndaniyera, wa ha tjira. Karunga ana zuvhu ekanderero lyoge kutunda tupu kezuva lyomuhowo eli wa tokwere o linunupike morwakuhara kuzuvha ko. Ame kuna wiza ni ya limburure ekanderero lyoge. 13Muengeli ogu a kungu sirongo saPeresiya kuna rwisa nge mazuva nomurongo mbali nalimwe. Ano muengeli gumwe gomukurona Mikayera ana wiza a ya kwafe nge, yeeyi nyamelike vana zumbu mo moPeresiya. 14Ame kuna wiza ni ya ku ninke o zuvhe ko eyi ngayi ka horokera mbunga zoge komeho.”
15Tupu ga uyunga eyi, ame makura tani nyongamene pevhu tani mwena teete. 16Ano muengeli ogu ga fene ngwendi muntu, ta gonona kuwoko kwendi ta gumu nomurungu dange. Ame makura tani mu tantere asi: “Hompa, emoneko eli lina retere nge unkundi, yipo nye kukankama kapi taku pu nge. 17Ame kuna fana ngwendi mupika ana sikama kosipara sahekurwendi. Ngapi nani vhura nye kuuyunga nove? Ame kapi na kara nononkondo, nomuhesero nago mwange mutupu mo.”
18Age ta gumu nge hena, tani lizuvhu, kuna kunkondopa ko hena. 19Age ta tantere nge asi: “Karunga kwa ku hara, wa ha sigilira yuma yi ku hepeke ndi yi ku tjilise.”
Age simpe kuna kuuyunga, tani lizuvhu unankondo tani tanta asi: “Hompa, tantera nge eyi ono hepa kuuyunga, yeeyi nyove ono tengwidire nge nonkondo.”
20-21Age ta tanta asi: “Ono yi diva tupu eyi yina reta nge koge? Ame kuna wiza ni ya ku horwere eyi va tjanga mobuke zoUsili. Ano nye ntaantani ngesi ame tani tengura, ni ka rwise muengeli gegameno lyaPeresiya. Konyima zeyi, ngaku horoka nye muengeli gegameno gosirongo saGereka. Kutupu gokukwafa nge, ntudi Mikayera, muengeli gegameno lyaIsraeli.
Currently Selected:
NDANIYERA 10: KWN
Highlight
Share
Compare
Copy
Want to have your highlights saved across all your devices? Sign up or sign in
© Egwanekerobibeli Lyanamibia 1987, 2003
© Bible Society of Namibia 1987, 2003
NDANIYERA 10
10
Emoneko lyaNdaniyera pomukuro gwa Tigilisi
1(Momumvho gwautatu gwaKoresi, hompa gwaPeresiya mbudi tazi horokere Ndaniyera ogu ngava tumbura hena asi Belitesasara. Mbudi kwa kere zosili, nye ndigu unene za kere kuzikwata egano. Azo kwa zi mu fatwililire memoneko.)
2Poruveze oro, ame kwa kere mononkali yivike yitatu. 3Ame kapi ngani vhuru kulya nondya donongwa ndi asi ni lye nyama ndi ni makere nampili kavhinyu ndi ni fufure nohuki dange dogoro yivike oyo yitatu tayi lipitire.
4Momazuva nomurongo mbali nagane gokwedi komuhowo, ame kwa sikamene konontere domukuro gomunene gwaTigilisi. 5Ame makura tani kankuka ni tare, tani mono gumwe ogu ana dwara yikoverero yolina noliva rongodoro zene‐zene. 6Rutu rwendi kwa fene ngwendi maurenga. Sipara sendi kwa vemberere ngwendi uzera woruvadi, ano meho gendi kwa yukumine ngwendi mundiro. Mawoko gendi nomaguru gendi kwa fene ngwendi ngoporo vana heke. Ano ezwi lyendi kwa fene ngwendi ezogerero lyombunga zonene.
7Ame nyamelike na mwene emoneko eli. Vantu ava na kere nawo nayimwe si va mwene. Awo kwa va kwete woma, tava duka va ze va ka vande. 8Ame nyamelike va sigire po, ame kuna kutara emoneko eli lyokutetukisa. Mwange kapi mwa hupire hena nonkondo, ano sipara sange tasi lisitunuka, makura nogusi hena ga vhulire kudimburura nge. 9Eyi na zuvha ezwi lyendi, tani ligandere pevhu tani pwilire, sipara sange tasi vhumbama mevhu. 10Makura kuwoko taku kwata nge, taku yambura mawoko gange nonongoro dange, ame simpe kuna kumenga.
11Muengeli ta tantere nge asi: “Ndaniyera, Karunga kwa ku hara. Sikama, ove o purakene nawa eyi nani ku tantera. Ame koge vana tumu nge.” Eyi tupu ga mana kuuyunga eyi, makura ame tani sikama, nye simpe kuna kumenga.
12Age ta tanta asi: “Ndaniyera, wa ha tjira. Karunga ana zuvhu ekanderero lyoge kutunda tupu kezuva lyomuhowo eli wa tokwere o linunupike morwakuhara kuzuvha ko. Ame kuna wiza ni ya limburure ekanderero lyoge. 13Muengeli ogu a kungu sirongo saPeresiya kuna rwisa nge mazuva nomurongo mbali nalimwe. Ano muengeli gumwe gomukurona Mikayera ana wiza a ya kwafe nge, yeeyi nyamelike vana zumbu mo moPeresiya. 14Ame kuna wiza ni ya ku ninke o zuvhe ko eyi ngayi ka horokera mbunga zoge komeho.”
15Tupu ga uyunga eyi, ame makura tani nyongamene pevhu tani mwena teete. 16Ano muengeli ogu ga fene ngwendi muntu, ta gonona kuwoko kwendi ta gumu nomurungu dange. Ame makura tani mu tantere asi: “Hompa, emoneko eli lina retere nge unkundi, yipo nye kukankama kapi taku pu nge. 17Ame kuna fana ngwendi mupika ana sikama kosipara sahekurwendi. Ngapi nani vhura nye kuuyunga nove? Ame kapi na kara nononkondo, nomuhesero nago mwange mutupu mo.”
18Age ta gumu nge hena, tani lizuvhu, kuna kunkondopa ko hena. 19Age ta tantere nge asi: “Karunga kwa ku hara, wa ha sigilira yuma yi ku hepeke ndi yi ku tjilise.”
Age simpe kuna kuuyunga, tani lizuvhu unankondo tani tanta asi: “Hompa, tantera nge eyi ono hepa kuuyunga, yeeyi nyove ono tengwidire nge nonkondo.”
20-21Age ta tanta asi: “Ono yi diva tupu eyi yina reta nge koge? Ame kuna wiza ni ya ku horwere eyi va tjanga mobuke zoUsili. Ano nye ntaantani ngesi ame tani tengura, ni ka rwise muengeli gegameno lyaPeresiya. Konyima zeyi, ngaku horoka nye muengeli gegameno gosirongo saGereka. Kutupu gokukwafa nge, ntudi Mikayera, muengeli gegameno lyaIsraeli.
Currently Selected:
:
Highlight
Share
Compare
Copy
Want to have your highlights saved across all your devices? Sign up or sign in
© Egwanekerobibeli Lyanamibia 1987, 2003
© Bible Society of Namibia 1987, 2003