Yirugana Yovapositoli 7
7
Eudiso lyaSitefanesa
1Muprisiteli gomunene ta pura Sitefanesa asi: “Yene eyi yininke nye yimo ndi?” 2Age ta limburura asi: “Vakwetu noguhyavanona, purakeneni! Karunga gouyerere kwa monekere kwazinyakurwetu Abirahamu, age moMesopotamiya, age simpe nokutunga si moHarani, 3makura ta mu tantere asi, ‘Tunda mo mosirongo seni nemekoro lyeni, o ze kosirongo esi ngani ku likida.’ 4Makura yipo ga tundire mo mosirongo soVakalidi a ze a ka tunge moHarani. Nye apa ga fire guhwe, Karunga makura ta mu dirwire mosirongo esi muna kara. 5Nye Karunga kapi ga mu pere ko kavega nampili kokusika pompadi asi ka kare kendi, nye ga mu tumbwidilire asi nga mu pa sirongo age noruvharo rwendi, asi si kare sawo. Posiruwo oso Abirahamu age simpe kutupu muna. 6Eyi ga mu tanterere Karunga, yeyi asi, ‘Ruvharo roge ngaru kara vanayirongo mosirongo sa hana asi sawo, nye vantu ngava va weka, tava kara vapika, awo ngava va tekura momudona ure wonomvhura mafere gane.’ 7Karunga kwa tanta asi, ‘Muhoko ogu ngava ruganena, ngani gu pangura, makura awo ntani nye ngava tunda mo mosirongo oso, va ya kerere nge mevega eli.’ 8Karunga yiyo ga pere Abirahamu mpo zeyi yokurugana yovamba, zi kare sidiviso segwanekero lyendi nawo, Abirahamu makura ta reta nye Isaka, makura ta mu rugana yovamba ezuva lyautano‐nautatu. Isaka yiyo ga reta Jakopo, ano Jakopo ta reta ozinyakurwetu murongo navavali.
9“Ano ozinyakurwetu kwa pakerere Josefa mfudu, makura tava mu randesa koEgipite. Nye Karunga kwa kere nendi, 10makura ta mu yoworora momaudigu gendi nagenye. Karunga ta ninki Farawo, hompa gwaEgipite, a mu tare nomeho gomawa. Karunga ta mu pe hena ukonentu, makura Farawo ta mu tura a kare mupangeli gwaEgipite nomukurona gombara zendi nazinye. 11Makura erumbu noupyakadi wounene, tau gwana Egipite naKanana nazinye, ano ozinyakurwetu, kapi va gwene nondya. 12Apa nye ga zuvhire Jakopo asi, koEgipite yisima ko, makura ta tumu ko ozinyakurwetu romuhowo. 13Ano rwauvali ntani nye vana kumudimburura Josefa vakuru vendi namumbyendi, makura Farawo ntani nye ana kudiva oku ga tundilira Josefa. 14Makura Josefa yipo ga tumine, va ka zigide oguhwe Jakopo nekoro lyendi mudima, vantu nomurongo ntano‐nambali novantu vatano. 15Makura Jakopo yipo ga zire koEgipite, nokufa yiko ga ka fira nozinyakurwetu nawo. 16Yimpu yawo kwa yi twere koSikemu, va ka yi vhumbike montoko zaAbirahamu, ezi ga rende yimaliva koVahemoro moSikemu.
17“Ano siruwo sokusikisa mo matumbwidiro aga ga tumbwidilire Karunga Abirahamu, apa sa sikire, muvaru gomuhoko gwetu ago nago guna vhuka unene moEgipite. 18Poruhura posipundi saEgipite ta rondo po hompa peke, ogu ga dilire kudiva Josefa. 19Age nga ninkilire mo muhoko gwetu, nga rugana momudona ozinyakurwetu pokuvasininika va zugume vana vawo va fe. 20Siruwo esi yiso va hampurukire Mosesa, ano age kwa wapere unene kosipara saKarunga. Ure womakwedi gatatu va mu rererere membo lyaguhwe. 21Ano apa va ka mu zugumine, makura munwaFarawo gomukadi ta mu tambura, ta mu rere ngwendi gogu asi munwendi ana kurera. 22Mosesa kwa mu rongere unongo naunye woVaegipite, age kwa fumanene mononkango nomoyirugana.
23“Ano apa ga kere nonomvhura nomurongo ne, makura taru mu gwana rutjima rokukatara ko vakwawo Vaisraeli. 24Eyi ga mona gumwe tava mu hepeke, makura ta popere mugara ogu va hepekere, ta dipaga Muegipite. 25Age kwa gazarere asi, vakwawo nampo nava dimburura asi Karunga ta va parwisisa kwendi, nye awo kapi va yi dimbwilire. 26Lina kusa ko, ta ya gwana Vaisraeli vavali, awo tava litangwisa. Age makura ta va kava asi va lipe mbili, ta tanta asi, ‘Anone vagara, amesi mu vantu namunwazina, yinke muna kuliruganena momudona ngoso?’ 27Ano ogu ga ruganene po mukwawo momudona, ta zundura Mosesa, ta tanta asi, ‘Yilye ogu ga ku ninka asi o kare mupangeli nomupanguli gwetu? 28Ndi nampo kuna hara o dipage nge, moomu ko dipagere nkera Muegipite?’ 29Ga yi zuvha oyo, Mosesa makura ta tjwayuka a tjilire kosirongo saMidiyani. Yiko ga ka kere unayirongo, makura ta ka retera ko vana vavali wovagara.
30“Eyi da pwa nomvhura nomurongo ne, makura muengeli gwaHompa ta mu monekere momburundu pepi nondundu zaSinayi momundiro gokutwera mosihwa. 31Mosesa kwa mu tetwire eyi ga mwene, ano apa ga ninkire asi a si hedere a ka si tare nawa, makura ezwi lyaHompa tali mu tantere asi, 32‘Ame nyame Karunga gonyokokuru Abirahamu, Karunga gwaIsaka naJakopo.’ Mosesa makura ta tameke kukankama, kapi ga ninkire hena asi a si tare nawa. 33Hompa yipo ga mu tanterere asi, ‘Hutura ko nonkaku doge, evega eli ono sikama evega lyokupongoka. 34Na mono nawa‐nawa ruhepo romuhoko gwange moEgipite, nkugo zawo nina zi zuvhu, yiyo nina hegumuka ni ya va zowore. Wiza oku ni ya ku tume koEgipite.’
35“Mosesa ogu va patanene pokutanta asi, ‘Yilye ogu ana ku ninki asi o kare mupangeli nomupanguli gwetu?’ yige googo ga tumine Karunga, a kare mupangeli nomudituli mokumukwafa muengeli, ogu ga mu monekerere mosihwa sokutwera. 36Age yige ga va gusire mo moEgipite oku ta rugana yitetu noyidiviso mosirongo saEgipite nepEfuta lyEgeha nomomburundu nomvhura nomurongo ne. 37Yige Mosesa googu ga tanterere Vaisraeli asi, ‘Hompa Karunga gweni nga mu tumbira Muporofete mokatji kovakweneni ga fana nge!’ 38Age kwa kere pokatji kepongo lyoVaisraeli momburundu. Yige kozinyakurwetu, yige hena komuengeli ogu ga uyungire nendi koNdundu zaSinayi. Age kwa gwene nonkango domwenyo daKarunga, a di tu pe.
39“Ozinyakurwetu kapi va here kumuzuvha, kapi ngava mu pakere mbili, ngava hara asi va tengure koEgipite. 40Awo kwa tanterere Arona asi, ‘Tu ruganena ko vakarunga, va tu pitisire komeho. Kapi tuna yi divire eyi yina ka mu gwana Mosesa, ogu ga tu gusa moEgipite.’ 41Awo kwa ruganene pomazuva googo efano lyositana va li zambere, va hamberere yirugana yomawoko gavene. 42Nye Karunga yiyo ga va pere mugongo, yiyo ga va sigilira va tongamene nombungururu dekeguru, moomu va tjanga mobuke zoVaporofete asi:
‘Vaisraeli one! Nye ngomu zambere nge tupu
nonzambo dokutoma nedi dopeke
monomvhura nomurongo ne momburundu?
43Ndangone! Tenta zaMoroko
nombungururu zakarunga gweni Rafani
yizo ngomu simbi,
mafano gokurugana nyamweni
yigo ngomu tongamene.
Yiyo nye ngani mu twarera
kesinya kwina lyaBabironi.’
44“Nkongoronzugo zoumbangi waKarunga ozinyakurweni kwa kere nazo momburundu. Azo kwa zi rugene moomu ga likidire Karunga asi va zi honene. 45Ano ozinyakurwetu ava va gwene nkongoronzugo zaKarunga koguhyawo, yiyo va zi simba va ze nazo kumwe naJosuwa mosirongo esi twa kara, va si guse kovapagani, ava ga tjidire Karunga komeho zawo. Yimo za kere omu dogoro pomazuva gaNdafita, 46ogu ga fililire Karunga nkenda, a hundire kwendi asi ngano a mu pulisire kutungira Karunga gwaJakopo nzugo. 47Nye Saromo yige ga ya tungilire Karunga nzugo.
48“Nye Karunga gekeguru‐guru kapi a kara mononzugo edi va tunga vantu, moomu ga tanta muporofete asi:
49‘Eguru sipundi sange,
ano evhu ulyatero wonompadi dange.
Nzugo musinke nomu tungira nge?
Yimo ga uyungire Hompa.
Nevango lyokupwizumukira ame lipi po apa?
50Kapisi nayinye eyi nyame na yi rugana?’
51“One kwa runda nomutwe, nomutjima deni kwa kukuta ngwendi dovapagani, ano matwi geni kwa limbandera, ga dire kuzuvha nonkango daKarunga! One kupatanesa Mpepo zoKupongoka; moomu mozinyakurweni, none yimo. 52Muporofete ogu va dilire kunyenga ozinyakurweni? Awo ngava dipaga ava ngava pumbu ewizo lyoMuhungami ogu mwa horora, yiyo mwa mu dipaga. 53Vantu mwa gwana Veta zaKarunga ezi va gavere vaengeli, nye kapi mwa zi sikisa mo!”
Sitefanesa tava mu dipaga nomamanya
54Ano masimbi apa ga yi zuvhire eyi, makura taga handuka unene, tava mu likwetjere mazego. 55Nye age mugara ga zura Mpepo zoKupongoka, ta nwike keguru, makura ta mono uyerere waKarunga naJesus ana sikama korulyo rwaKarunga. 56Makura ta tanta asi: “Tareni, ame kuna kumona eguru lina zeguruka, ano MunwaMuntu age kuna sikama korulyo rwaKarunga.” 57Awo makura tava zigire unene, tava lisitike matwi, tava mu ngundama navenye, 58tava mu pwagesa mo mositata, makura tava mu toona nomamanya. Nombangi kwa pere yikoverero yawo mumatigara gumwe, edina lyendi Saurusa, a yi takamese. 59Eyi vana kumutoona, Sitefanesa age kuna kukuga kwaHompa asi: “Hompa Jesus, tambura mwenyo gwange!” 60Ga tongeka nongoro, ta zigire unene asi: “Hompa, wa ha va pa usima kweyi vana kurugana!” Kwa yi tanta tupu eyi, makura tagu zi.
© Egwanekerobibeli Lyanamibia 1987, 2003
© Bible Society of Namibia 1987, 2003