Sam 33
33
Sam 33
Khoze mala lepo fakeliza LOD
(Vese lao ka mavitu)
1Ghotolu nanoni te kohlo puhimira, ghotolu koze hneahnegha gnadi hna teke eira LOD re.
Ghotolu fate'o te leghuza magne ra, lepo fakeliza LOD.
2Ghotolu koze balu gita mala kilo uluza God,
koze lao ka magne balu gita te au salaghi doghogna.
3Koze hariza magne ka khoze valu.
Nanaeru fakeli ka gitare, ni aku fabi'o balu khoze hneahnegha!
4Goeghozegna LOD ie tufuni keli ni tutu'ani,
euwateuwe magne eiza koba hna te lepoza thaigna ie.
5 LOD tufuni nahmara lui nanoni te au kohlo ni eira teu puhi te kelire.
Noa nahma magne ie tei dufu hia te hia ka nauthoglu gne.
6 LOD neke vuavuha goifata fateote'o te au ka manga ie ka goeghozegna lana.
Ka goeghozegna lana, nadafi, ni glaba, ni nathunu teure ne au ka manga ie.
7Magne nana'aza kholo ie ka tufuni hnimoto mala augna ie.
Ni eulanauwa, u hnorara ie ka tufuni hnimoto mala augna ie.
8Ghotolu nanoni te hui ka nauthoglu gne, tufru soruza LOD.
Ghotolu nanoni fate'o ka nauthoglu gne, broabronaza magne.
9Eigna ka goeghozegna lana, magne teke vuavuhaza nauthoglu gne.
Ka goeghozegna lana, goifata fate'o re neke thakle mei.
10 LOD gne choghara nodi groghe mala eira teu nanoni te bongihehe re.
Ni eulanauwa, magne theome sakrera mala eira hatimare hna te ngagura mala eira teure.
11Ni noa groghe LOD re kaina au fatheve.
Tutu'ani, noa groghe magne re kaina the'o ka huigna.
12Hneahnegha nodi lui nanonidi kaontri te LOD gne lana nodi God ie.
Hneahnegha nodi lui nanoni magne teke fafatera mala noa nanoni thaigna tekeu re.
13 LOD gne au klia ne kofu soru,
ne kofira nanoni fate'o re.
14Magne au ka noa sape nafano ie funei frunira nanonire,
ni kofu soru ka nanoni fate'o gna nauthoglu gne.
15Magne gulao gaoghatho ka nanoni fate'o re,
ni magne lasera goifata fate'o te eira hatimare re.
16Neubane au noa chuku mae mala magra lui kahe mae nafano,
hatimare theome tangomana lana te mala fakahriza nodi mae nafano ie.
Ni neubane au magne kahe noa mae te fua hneta lui,
magne theome tangomana te uluza magra ie ka noa nahneta thaigna.
17Ni neubane au noa chuku hose mala magra kahe mae nafano,
hose teure theome tangomana te fa'uluza magne ka magra ie.
Ni neubane fua hneta lui hatimare,
hatimare theome tangomana lanauwa te fakahriza magne.
18Ni LOD ie koikofira ihei te ghatho boheza magne re.
Ni eulanauwa koikofira ihei te farouronu ka noa nahma bi'o magne re.
19Kate dufu mei miolo gna behu ie, LOD ie koikofi fakelira mala theome leme hatimare,
ni eulanauwa fakahrira ka gleme.
20Tati mala tufuni farouronu ka LOD,
eigna magne te koikofighita, ni toghoghita teuwe.
21Tati tufuni hneahnegha,
eigna tati fatutu'aniza God lana.
(Vese lao ka God)
22 LOD, gheati fatutu'anigho ni tukugho fatheve mala mei toghoghami, eigna gheati laseza te ghoe nahmaghami fatheve gheati ie.
Currently Selected:
Sam 33: ggaNTP
Highlight
Copy
Compare
Share
Want to have your highlights saved across all your devices? Sign up or sign in
© 2025 SIL Solomon Islands
