Roma 4
4
i paruwalru kani Aburaham
1nu kemazu mu kana mutrungulr za dara' mutu temuwamuwan kanta i Aburaham, pauwayanay mu kemuda ta marengay awa? 2anu karuwa kikuwa za patezelr na trau maw mukuwa kanantu paelrangan i intaw mu, ulra lra tu kamatrasan venavati, mawmu kazu i ngawayan kana Viruwa i itras 'azi karuwa kamatrasan venavati. 3marengay na Sēsiyo: <<pakutatena' kana Viruwa i itras i Aburaham, mukuwa kanantu i pakutatena', na Viruwa i itras pakanumaw kantaw a patezelr na trau.>> 4na kiyakarun na trau kiveray za inuvalesan mu, amelri ipuwavut, amaw nintaw kiyaverain. 5mawmu izu na kuretalrima kana sayvang kana mipinamelriyan na trau iniyan za pinamelriyan kema na Viruwa i itras mu, na Viruwa i itras tu pakalranganay kanantu pakutatena', amelri nantu paelrangan, zi intaw maruwaya ulra a penauwa za kireeman kantaw, 6nirengay ni Davidē, izu na 'azi pakalrang za paelrangan zi kinuwa kana Viruwa i itras maw a patezelr na trau mu mika'inavayan lra, amaw ini na pauwayan. marengay i intaw:
7izu na kilraman tu pinatrepelran, na kilapus za pinamelriyan na trau mu mika'inavayan lra!
8izu na 'azi tu paipan ni Luzu tu pinamelriyan na trau mu mika'inavayan lra!
9nantu nirengay ni Davidē ini na 'inavayan mu mawmau muravakan na kikeret za kakuwayanan na trau ziyamaw? amelri. izu muravak na 'azi kikeret za kakuwayanan na trau; 'alrana wasay ta lra tu vati kana Sēsiyo, marengay: <<i Aburaham pakutatena' kana Viruwa i itras, mukuwa kanantu i pakutatena', na Viruwa i itras pakanumaw kantaw a patezelr na trau.>> 10i ini na nirekudayan mureha kemay i iyan ziyamaw? kazu pakangawayan za kikeret i Aburaham, mawlra za pakalikuzan ziyamaw? maw pakangawayan, amelri pakalikuzan. 11i likuzan mu kikeret lra i intaw; i ini mu maw na i pakalrazam pana'u a saya, wasay kantaw za kikeret a pakangawayan mu 'alrana pakutatena' zi mutu patezelr a trau lra. semeneng, na 'azi ziyan kikeret za kakuwayanan, mawmu na pakutatena' zi kipakanumaw kana Viruwa i itras za patezelr a trau kema mu, i Aburaham maw za temama i ka'ulasan. 12kemazu i intaw mu maw nintaw temama kana kikeret lra na trau, amelri mawmau 'alrana maw na kikeret lra nazu, zi 'alrana kurelrang nazu kananta temuwamuwan i Aburaham a 'azi ziyan kikeret izu na pakutatena'an na wayway.
tu iyatuvang na Viruwa i itras mukuwa za pakutatena' zi mula'esi
13na Viruwa i itras temuvang kani Aburaham zi kanantu temamuwan, marengay za i intaw mu uri kiyatuluz kanini na punapunan. ini na ituvang amelri 'alrana i Aburaham miturus kana kuret, maw 'alrana pakutatena' i intaw zi maw patezelr a trau kinuwa. 14nu tu iyatuvang na Viruwa i itras maw vaveray kana miturus kana kuret ni Mosē na trau mu, tu i pakutatena' na trau mu iniyan za pauwayan, zi nantu iyatuvang na Viruwa i itras mu 'azi ula'esi. 15nantu 'ilremesan za patezelran kana Viruwa i itras mu maw na zuwa kemay kana kuret; iniyan za kuret mu, zi iniyan za pamelri kana kuret na lremak.
16mawna kemani, na ituvang maw initurus za pakutena'; ini wasay kanantu ituvang na Viruwa i itras za maw puwavut veray kani Aburaham kanantu temamuwan ziya, 'azi mawmau na miturus za kuret, zi maw muwaravakan nazu na kamawan kani Aburaham maresan pakutatena' kana Viruwa i itras na trau. 'alrana i Aburaham maw ninta temama i ka'ulasan mapiya. 17penauwa kana nirengay i Sēsiyo: <<kanu parahanaw mutu temama kana kazuwan na 'inalrayan.>> kazu i ngawayan kana Viruwa i itras, ini na ituvang maw ulra mikezang; nantu pinakutatena' ni Aburaham mu maw izu na parevaaw kana minatray na trau, kemay kana iniyan zi parevuwa' demaway kana eman ziyan na Viruwa i itras. 18kazu kana iniyan lra za katalrimayan mu, i Aburaham kemazu kuretalrima. kemazu pakutatena', mawna kemani zi mutu <<temama kana kazuwan na 'inalrayan>>. penauwa kana nirengay i Sēsiyo: <<'azika'azi mitemamuwan za kazuwan i inu.>> 19a azu mu i Aburaham adalrep lra za saleman 'ami. nantu zazek i intaw mu mararesan lra za minatray, zi i Sara 'azi lra karuwa mialrak, mawmu, i intaw 'azi mawna kemani zi mulehetr lra za pakutatena'an. 20'azi parelremes za pakutatena'an i intaw, kemazu 'azi malrivak zantu ituvang kana Viruwa i itras; muveliyas puwapuwa arekez nantu pakutatena'an, verayanay na lihu kana Viruwa i itras. 21penakasa pakutatena' i intaw kana Viruwa i itras za 'azika'azi pula'esi kanantu ituvang. 22maw ini na kemuda zi pakutatena' i Aburaham zi <<pakanumaw patezelr a trau kinuwa kana Viruwa i itras>>. 23mawmu <<patezelr a trau kinuwa i intaw>> ini na ngay mu 'azi mawmau marengay kantaw, 24kemazu maw muramawan marengay kanta. 'alrana pakutatena' ta kanizu na Viruwa i itras na parevaaw kananta Luzu i Yēsu kemay kana minatray, semeneng patezelr a trau kinuwa. 25tu tuluzanay kana trau i Yēsu, muramawan zanta pinamelriyan minatray; na Viruwa i itras parevaaw kantaw, tu paruwayaw ta mikireeman za penauwa kana Viruwa i itras.
Currently Selected:
Roma 4: TPN
Highlight
Copy
Compare
Share
Want to have your highlights saved across all your devices? Sign up or sign in
© The Bible Society in Taiwan, 2023