Roma 16
16
i Pawlo mumalr za 'inavayan kana sinziya
1marengay ku pakalrazam kanmu zanta wadadiyan na vavayan i Fēbi; intaw maw a hicezi kana kiyokay i Kēnkerēa. 2'alrazi uramawan kanantu nirekudayan ni Luzu, iturusanay nantu pauwayan na sinziya kemirungetr temara kantaw. nu kemuda lra maranger za eman, 'alrazi muwa puwalrangay i intaw. salaw ra'emetr puwalrang lra za kazuwan i intaw za trau, say i inku kipuwalrang ku lra kantaw.
3'alrazi umalri na kiyakarun kani Kiristo Yēsu na salrangan kikarun i Puriskila zi i Akila; 4muramawan kaninku 'azi lra makakaud mataranapaw kanantu uwavaawan. amelri mawmau i inku lrayuwan kanazu, na kiyokay i sizumayan kemazu lrayuwan kanazu mapiya. 5zi umalri na kazu muwazuk kantaw i ruma' na kiyokay.
'alrazi umalri nanku kinasahar na 'ali'an i Ēpanētus; i intaw maw a inguwanguwayan pakutatena' kani Kiristo na trau i Asiya siyo. 6zi lrayuwan kani Maliya na muramawan kanmu zi maulep kikarun. 7'alrazi umalri lra izu na mukasa ziya kaninku muimeng na mawan i Yodaya i Andronikus zi i Yuniya. nazu kazu kana sito i savakan salaw mingadan, zi maw iyanguwayan kaninku pakutatena' kani Kiristo.
8'alarazi umalri lra i savak kani Luzu ku kinasahar na 'ali'an i Ampoliatus; 9zi umalri ziya na salrangan kikarun kani Kiristo i Urbanus zi nanku kinasahar na 'ali'an i Stakus. 10'alrazi umalri na makalrang lra za kiatalram, salaw penakasa za anger kani Kiristo i Apēlēs; zi umalri lra na Aristobulus saruma'enan. 11'alrazi umalri na mawan i Yodaya i Hērotion; zi umalri lra i Narekisus saruma'enan na pakutatena' kani Luzu na wadadiyan.
12umalri na lralrang kikarun kani Luzu i Turefēna zi i Turefosa; zi umalri lra na muramawan kani Luzu ra'emetr kikarun ku kinasahar na 'ali'an i Pērsis. 13'alrazi umalri lra i Rufus; maw a salaw misayhuwan na pakarunan kani Luzu i intaw; zi umalri lra i tainataw -- tu kamuwanaw ku kanantu alrak temara i intaw. 14'alrazi umalri lra i Asinkeritus, Filekon, Hērmēs, Patirobas, Hērmas, zi na zuma na kurekasa kanazu na wadadiyan. 15'alrazi umalri lra i Filologus zi i Yuliya, i Nērēus zi tu wadiyan na vavayan, i Olimpas zi na mukasa kanazu na sinziya.
16mimanaya mu za mukirungetr na maumauma marekiyumaumalr za 'inavayan. kiyokay ni Kiristo i makaiyaiyan ziya mumalr za 'inavayan kanmu.
talikuzakuzan na temuru panadam
17na wadadiyan, marengay ku papuanger kanmu, taranapaw kanazu na pakakuwatreng paresenenganengan, pakaapelr tu pakutatena'an za trau, 'ematelr kananmu kinipanadam kana trau; udawilr kanazu. 18'alrana kemani na trau amelri kazu kiyakarun kananta Luzu i Kiristo, mawmu papakumaw kanantu tiyalr i intaw. nazu pimanayaw na kemavulay venavetra' na ngay pazelengan kanantu anger na penatezelr na trau. 19malrazam mapiya kananmu i pakutatena' miturus kana fukuing, mawna kemani zi salaw ku semangal kanmu. kazuwa mu kana 'inava na lremak misayhuwan kema ku, kazu kana kuwatreng na lremak iniyana mu za kinalrazam. 20na veray kana ping-an na Viruwa i itras tu i trerevaw kuwatreng na satang, kazuwa mihelrep kanmu i kakuyan.
kiyalriman kananta Luzu i Yēsu veray za ipuwavut kanmu!
21nanku lralrang kikarun i Timotē, zi i Yodaya na mawan i Lukius, i Yason, Sosipater, mumalr kanmu mapiya. 22inku -- na venulas venavalray kanini na tēgami i Tērtius, kazu kani Luzu i savak mumalra kanmu. 23izu na kiyatrevung temara kaninku, zi puwazuk ziya kantaw i ruma' kana Kiyokay i Kaiyus mumalr kanmu. na siko kana kazekalran i Ērastos zi nanta wadiyan i Kuartus mumalr kanmu.#16.23 ulra pidaya awatranan lulun puwayay za 24 vatras <<kiyalriman zanta Luzu Yēsu Kiristo veray za ipuwavut kanmu mapapiya! amēn.>>
na puwaludus na kiyanun zi na semenay pulihu
25kiyalriman na lihu kazuwa kana Viruwa i itras! i intaw maruwa kamawanaw kananku ipalenak na fukuing pakaarekez kananmu pakutena'an. ini na fukuing maw kireeman kani Yēsu Kiristo na vati, pakalrazam lra kana kemay awatr na asavak muvulri lremak, 26ini na pasavak muvulri na lremak i pakalrang lra kanantu valray na patralritralri pakurena'u, pawnung initurus kanantu seratr na vaaw munayun na Viruwa i itras patulre'ay pakalrazam kana kanatanatal, maruwaya pakutatena' miturus na tratrautrau ziyan.
27kiyalriman na lihu makalrang kani Yēsu Kiristo kaya kana misasa mutulre'ay za sayhuwan na Viruwa i itras, patari velretreng! Amen.#16.27 ulra pidaya awatranan lulun 16.25-27 zi kazu ziya i 14.23 i makalikuzan pinupana; ulra pidaya awatranan lulun mawmau kazu i 14.23 i makalikuzan pinupana; ulra saya awatranan lulun kazu i 15.33 i makalikuzan pinupana.
Currently Selected:
Roma 16: TPN
Highlight
Copy
Compare
Share
Want to have your highlights saved across all your devices? Sign up or sign in
© The Bible Society in Taiwan, 2023