Roma 11
11
tu lramanan kana Iseraēl na trau na Viruwa i itras
1nu kemazu mu, kiyaumalr ku: na Viruwa i itras 'ematelr lra kanantu zinekalranan ziyamaw? pauwayanay mu 'azi! i inku maw ku na Iseraēl na trau, maw trungulran pakalikuzan ni Aburaham, muravak kani Bēnyamin za sepi' 'atayan. 2na Viruwa i itras 'azi 'ematrelr kanantu pinalimi' kemay a awatr ziyan zantu zinekalranan. malrazam mu, vinavalray kana Sēsiyo: i Ēliya mukuwa kana Viruwa i itras kokso kana Iseraēl na trau mu, 3marengay i intaw: <<Luzu a, pinatray lra kanannu patralritralri nazu, mivas lra kanannu patavangan; musama' ku lra sasa, maranger ziya pinatray kaninku nazu.>> 4kemuda temuvang kantaw na Viruwa i itras ziyamaw? marengay i intaw: <<semama' ku kaninku za pituwa kuzulr za trau, 'azi ziyan malrituzu semungal kana tinuviruwa i Pali nazu.>> 5harem na nirekudayan maw maresan: na mupana kemay kanantu ipuwavut na Viruwa i itras pinalimi' na trau mu kaytayan lra na musama'. 6tu pinalimi' na Viruwa i itras maw mupana kemay kanantu ipuwavut, zi amelri kinurelrang kanantu paelrangan za trau; anu kinurelrang kanantu paelrangan za trau mu, na ipuwavut kinuwa mu amelri a tatena' na ipuwavut lra.
7i likuzan mukuda ziyamaw? likuzan lra Iseraēl na trau 'azi maruwa kiveray kanantu kiniyaami, muveliyas tu pinalimi' na Viruwa i itras na kaytayan na trau atrevung lra; zuma na musama' na trau mu 'azi putralinga kanantu iyadaulr na Viruwa i itras. 8penauwa kamawan kana nirengay i Sēsiyo: <<na Viruwa i itras paka'ulidaw tu nirangeran nazu; palru harem, 'azi maruwa mena'u nantu matra nazu, 'azi maruwa kinger na tralinga.>> 9zi marengay lra i Davidē:
kiyalriman kanazu kazu kana semasaharan mutani kana kuwatreng na nirangeran, ki'evang;
kiyalriman kanazu za malradu' lra, kipasavung!
10kiyalriman 'emaremenga tu matra nazu, 'azi maruwa mena'u;
kiyalriman matrukulra nazu, iniyan za paziyaziyan!
11nu kemazu mu, kiyaumalr ku: akelretruv zi malradu' Yodaya na trau, zi mukipiya matrepu ziyamaw? tatena' 'azi! mureha kanantu pinamelriyan, na vavaaw meredek kana sizumayan na trau, paka 'ilremes kana Yodaya na trau masepelr. 12tu pinamelriyan na Yodaya na trau murung veray i punapunan za merevaw na 'iyanavayan; tu kalramalraman i ka'ulasan nazu muveliyas tu para merevawaw nantu pinieman na sizumayan na trau. nu kemazu mu, nu kazu muravak kanantu i vavaaw na Viruwa i itras na Yodaya na trau mapiya mu, ini kamelriya lra 'azi aurung za maramerevaw za ka'inavayan ziyamaw?
na Viruwa i itras venaaw kana sizumayan na trau
13harem marengay ku kanmu na sizumayan na trau: nu maw ku sito kana sizumayan na trau, tatena' za penazangal ku mena'u zanku kiyakarunan. 14nu 'azi mu karuwa ku kemezeng kanantu sepelran 'ilremesan i anger kana mawan, pakalranganay kanini venaaw kanazu i savakan za papida a trau. 15anu ki'atelr nazu mu muveliyas kararuwa pareka'inava kana Viruwa i itras zi na trau i punapunan, nu kemazu mu, a mukituluz nazu mu, na minatray lra na trau amelri aasalr ziyan kiveray za uwavaawan ziyamaw?
16nu isunan lra kana Viruwa i itras na ningawangaway minu' na 'emu, kemazu mu, maw isunan lra peniya kantaw. nu isunan lra tu rami na kawi kana Viruwa i itras, kemazu mu, arusay na kawi tu sa'az maw isunan lra kantaw. 17ulra tu sa'az kana olēv na kawi niritru' putani, zi itrungulr kana sa'az na olēv na kawi i tralutralun. inu na sizumayan na trau maw kamawan kana olēv na kawi i tralutralun, harem kisepad pa'inava kana Yodaya na trau za merevaw tu kezang na uwavaawan. 18semeneng, inu amanan 'azi pakanueman kanazu na trau na kamawan za niritru' putani na sa'az, amaw u a sa'az, kemuda zi maruwa kemamatras ziyamaw? amelri inu na temukuz pukezang kana rami na kawi, maw na rami na temukuz pukezang kannu!
19aulra kakuwa u marengay: <<niritru' putani na sa'az, muramawan za maruwa ku mukuwa tremungulra.>> 20'azi pamelri ini na ngay. niritru' putani nazu, 'alrana 'azi pakutatena' nazu; maruwa u matikezir, 'alrana pakutatena' u. mawmu ikemamatras i inu, taranapaw i anger. 21na Yodaya na trau maw na melrivak na sa'az; nu kemazu 'azi tu kalramani na Viruwa i itras, nu mianger u mu tu i kalramanaw u ziyamaw? 22maruwa ta mena'u kemay kani, na Viruwa i itras salaw lralraman zi pakirungetr. kanazu na 'azi temaranapaw zi malradu' na trau mu. pakirungetr kakaukaud i intaw; i kannu mu, nu kazu u patrutru mawayway kanantu lramanan i savakan mu, lralraman i intaw; nu 'azi mu, kuwaazu kiritru' putani i inu. 23kema ta kana Yodaya na trau, nu 'azi merukezang patrutru za 'azi pakutatena' mu, karuwa mareveliyas zantu kinayanan, 'alrana maruwa masalr tremungulr kanazu na Viruwa i itras. 24inu na sizumayan na trau kamawan kana niritru' putani na sa'az kana olēv na kawi i tralutralun, zi maruwa ziyan 'azi kirepa'uwa kitrungulr kana 'inava na olēv na kawi; zi i Yodaya na trau kamawan kana nirungetr na kawi, kinirungetr na kawai, na niritru' kemay kanini na kawi na sa'az na Viruwa i itras tu asalranay tremungulr kanantu kawi a mawziya i itras, 'azi puwapuwa kalre'ayan ziyamaw?
tu lramanan na Viruwa i itras meredek kana tratrautrau ziyan
25wadadiyan a, ulra a saya asavak muvulri na tatena' vati, kiyalriman ku kanmu za malrazama, munu misayhuwan mi kema mu marayas. ini na tatena' vati maw a: zuma na Iseraēl na trau maureng, mawmau nu ngangara palru za mareveliyas pakutatena' kana Viruwa i itras mapapiya i sizumayan na trau#11.25 <<tremepa pakutena' kana Viruwa i itras mapapiya na trau>> karuwa marengay za <<tremepa pakutena' kana Viruwa i itras na aipan matemuy lra>>.. 26palru nu azu i Iseraēl na trau mapiya 'azika'azi muvaaw i likuzan lra. penauwa kamawan kanantu nirengay na Sēsiyo:
uwapana kemay i Sion na venavaaw;
tu i pulakaw nantu pinamelriyan na temuwan ni Yakob.
27marengay na Viruwa i itras:
ini mu maw kimakuret ku kanazu za kurut;
nu azu, ku i lapusaw tu pinamelriyan nazu.
28'emazi lra za fukuing i Yodaya na trau, mutu 'alra kana Viruwa i itras, i likuzan lra inmu i sizumayan na trau kiveray mu za ka'inavayan. mawmu, 'alrana tu ipalimi' na Viruwa i itras, zi pakalrang ziya kana Viruwa i itras kanantu iyatuvang kana ma'izang na 'atayan, na Yodaya na trau kemazu 'azi mamelri maw tu kinalraman na Viruwa itras. 29'alrana nantu palimi' demaulr zi ipuwavut na Viruwa i itras 'azi muwavalis. 30aziyuziyan inmu na sizumayan na trau 'azi mu miyaturus kana Viruwa i itras; harem 'alrana 'azi miyaturus i Yodaya na trau, zi muveliyas kiveray mu zantu lramanan na Viruwa i itras. 31mararesan, 'alrana kiveray mu za lramanan, 'azi miyaturus i Yodaya na trau harem, maw muramawan maruwa kazu harem kiveray zantu lramanan kana Viruwa i itras nazu. 32na Viruwa i itras tu sikipaw na trau ziyan kana 'azi miyaturus i savakan, maruwaya pakurena'u zantu lramanan kanazu.
semenay pulihu kana Viruwa i itras
33kemuda kana merevaw tu kalraman na Viruwa i itras! nantu sayhuwan zi nantu kalrazaman manueman kana asavak! i eman na maruwa venavati pakapauwa zantu iyakuret? i eman na maruwa mena'u venakesiyu zantu dalan? 34kamawan kanantu nirengay na Sēsiyo:
i eman na malrazam kanantu nirangeran ni Luzu?
i eman na karuwa venulas kantaw pupana za nirangeran?
35i eman na veray lra za eman kantaw?
zi 'azika'azi pareveliyas i intaw?
36'alrana eman ziyan mupana kemay kantaw peniya, pakalrang kantaw, muravakan kantaw. kiyalriman na lihu mukuwaya kana Viruwa i itras, palru patari velretreng! Amen.
Currently Selected:
Roma 11: TPN
Highlight
Copy
Compare
Share
Want to have your highlights saved across all your devices? Sign up or sign in
© The Bible Society in Taiwan, 2023