Luka 12
12
pataranapaw kana kitu'inavanava
(Matay 10.26-27)
1a azu mu, pasalaw kazuwan a trau ma'etre'etr mukasakasa, arusay za maredupadupa'. iyanguwayan marengay i Yēsu kana temakesi: <<taranapaw i inmu kanantu paresasemak na Palisay na trau, mawna kanantu kitu'inavanava. 2na muvulri ziya na lremak mu uwapana kikalrazam, na mulrasez na lremak mu kuwaazu kina'u. 3mawna kemani, nanmu trinakatrakaw marengay na ngay mu tu i kingeray za trau nu 'uninan; nanmu inasiyas kana ruma' i savak mu kipakalrazamay kana ruma' i sa'usa'uv.>>
i eman na kakaudan
(Matay 10.28-31)
4<<'ali'an a, marengaya ku kanmu, izu na mawmau maruwa pinatray kana zazek, mawmu 'azi karuwa venuli' kanmu mu, ikakaud. 5papuanger ku kanmu za i eman na kakaudan: kakauda mu kanizu na 'emaraw melak za uwavaawan mu, zi ulra ziya tu kezang putani pusavak kantaw i zikok na Viruwa i itras. ai, marengaya ku kanmu, na kakaudan mu maw i intaw!
6<<kemazu na zuwaya tangpiya karuwa tremima' za lruwatra kana terin, mawmu na Viruwa i itras 'azi malalup kana sayasaya; 7arusay nanmu 'arevu piya lra miip i intaw. semeneng, ikakaud i inmu, marapazangal mu lra kana sazu na terin!>>
pakanumau kani Kiristo
(Matay 10.32-33; 12.32; 10.19-20)
8<<marengaya ku kanmu, na kazu i ngawayan kana trau pakanumaw kaninku mu, na Alrak na trau kazu i ngawayan kanantu tēnsi na Viruwa i itras kuwaazu pakanumaw kantaw; 9na kazu i ngawayan kana trau 'azi pakanumaw kaninku mu, na Alrak na trau kazu i ngawayan kanantu tēnsi na Viruwa i itras kuwaazu 'azi pakanumaw kantaw.
10<<na marengay semuveli kana Alrak na trau mu, karuwa kilapus; mawmu na semiri kana Vangesar Lu'em mu, 'azi kararuwa kilapus.
11<<tu urungaw mu za trau mukuwa kana waazukan ruma', zi za pilralrangaw mu mukuwa kana yawan zi na demadikes i ngawayan kisayvang mu, ikavangavang za kuwadakudayan kimasaki i'elaw i inmu, zi za rarengay za eman; 12'alrana mawna azu, na Vangesar Lu'em pananadam kanmu za rarengayan.>>
na iniyan za lrazaman na miyaeman
13kana zinekalranan i savakan ulra sasa a trau marengay kani Yēsu: <<sinsi, 'alrazi rengayu nanku wadadiyan karasepada mi tu vinilin ni amalri na pinieman.>>
14temuvang i Yēsu: <<ali, i eman na pakarun kaninku za sayvangan kanmu zi za paruveli kanmu semepad za pinieman i ruma' awa?>> 15zi patrutru marengay kana mapapiya i intaw: <<taranapaw i inmu kanmu, uwaliki kana marekamelrimelri na alengatran; 'alrana, na trau nu kemuda lra kana miyaeman mu, tu uwavaawan nu kemudakuda mu amelri za manueman tu piniemanan.>>
16kemazu zi marengay i Yēsu kanazu za saya paruwalruwan: <<ulra sasa a miyaeman, miya'uma; 17kemiangeanger i intaw za: <iniyan ku za maruwa tu ka'izang za aepetran kana nire'aniyan peniya, kuwadakudayaw awa?> 18mararengay ziya i intaw sasa: <pamaw lra, kuwa ivasaw na kazu lra na 'alili, asalraw parahan kema'izang, zi epetraw meretra' kana nire'aniyan zi na zuma na eman, 19zi kakuwa ku kaninku marengay, na mivatiyan na trau a, ulra nu eman ziyan, karuwa u mekan za 'ami'ami, pakamawmau temawar pa'inava lra, mekamekan tremeketrekel, pa'inavanava kana wariwari mu!> 20mawmu, na Viruwa i itras rarengay kantaw: <inu na ma'ungaw na trau, harem kana 'esungan, i inu tuluzan nannu uwavaawan; nu kemazu mu, nannu inepetr kannu na pinieman peniya vaveray kani eman awa?> >>
21puludus venavati i Yēsu: <<izu na mawili kantaw mepetr za pinieman mu, kana iyana'u na Viruwa i itras na 'azi miyaeman na trau mu maw kemani a.>>
kuretalrima kana Viruwa i itras
(Matay 6.25-34)
22i Yēsu marengay ziyan kana temakesi: <<semeneng, marengaya ku kanmu, amanan muramawan za aekanen i wayway, zi za kakavang i zazek mavangavan. 23na uwavaawan marapazangal kana aekanen; na zazek marapazangal kana kavang. 24na'uwi nazu na takunga mu: 'azi semasalem 'azi mara'ani nazu, iniyan za 'alili, zi na Viruwa i itras tavuray nazu. marapazangal mu kana 'ayam! 25i savak kanmu i eman na maruwa pakalrang za sipelengan zi puwapuwa vaaw za pida wariyan#12.25 <<puwapuwa vaaw za pida wariyan>> karuwa marengay za <<puwapuwa atras za pidaya dapalr>>. nay? 26nu arusay na kemani kana makiteng na lremak mu 'azi mu maruwa kemakuda, zi amanan mavangavang ziya za zuma lremak awa? 27na'uwi na lruwasa kemuda vaaw ma'izang mu: 'azi kiyakarun nazu, zi 'azi trematra'i za kavang. mawmu marengaya ku kanmu, arusay za kamawan kana yawan i Solomon kemazu kana pinazangal mingadan, tu pinimaeman na ipakavulay mu 'azi maravulay kana 'aputr i tralutralun. 28na 'aputr zi na tralun i tralutralun mupana harem kana 'emanan, ma'il nu 'emanan, ivulru' kana 'avuwan muvatri', na Viruwa i itras kemani ziya pakavulay kanazu, i intaw mu kamelriya lra 'azi puwapuwa veray za kavang kanmu ziyamaw? kamakitengan lra nanmu pakutatena'an! 29semeneng, i inmu amanan mavangavang za aekan za eman, tratrekel za eman, mavangavang kananni na lremak. 30nanni na lremak maw i punapunan na 'azi kiputatena' na trau tu 'ineva'evang. nanmu Temama i itras malrazam kananmu niranger na eman ziya. 31kiyami za mula'esi kanantu pinitrepa tu kezang na Viruwa i itras i inmu, intaw tu i vaverayay mu kanini peniya.>>
venavati kana kinapazangal na pinieman i itras
(Matay 6.19-21)
32<<i inmu na kaytayan na salepun, ikakaud, 'alrana nanmu Temama semangal veray kanmu kanantu kanatal. 33tratrima'an nanmu pinieman, na paisu puwalrangan kana kalramalraman na trau; padang za pupaisuwan kannu i inu kana 'azi muwapiris, paepetran i itras nanmu pinieman na pinakapazangal. i kazu, na pinieman na pinakapazangal maw 'azi mukiyapiya; 'alrana 'azi pakatrakaw na male'es, zi 'azi pia'uled. 34nanmu pinieman na pinakapazangal nu kazu i iyan mu, kazu i kazu nanmu anger.>>
na temaranapaw masenekin na pakarunan
35<<penadanga mu marayas, eretru na lunayin, pasenanu na lrawlraw. 36kamawan kana pakarunan mengangara kanantu tawki za muruma' kemay kana pakaetim. muruma' na tawki tremunetrun kana 'alrevan mu, payas tu truwalranay na 'alrevan kantaw nazu. 37muruma' na tawki, mena'u kanazu na pakarunan temaranapaw masenekin, zi mika'inavayan lra nazu! penatezelra ku marengay kanmu, aeretran tu lunayin na tawki, pakayan kanazu mekan za maderu, i intaw na temara kanazu. 38arusay nu puwari palru parekazuwa 'esungan zi za semaselap mu muruma' na tawki, nu mena'u i intaw za temaranapaw masenekin nazu na pakarunan, mika'inavayan lra nazu! 39piangeru i ini na saya: na ma'izang i ruma' nu malrazam za uri zazuwa na male'es nu aidan mu, 'azi paparivas za 'alrevan pusavak kana male'es i intaw. 40maruwaya mu marayas penadang, 'alranu 'azi mu parangeranger kana wari mu na Alrak na trau raredek.>>
na katalrimayan zi na 'azi katalrimayan na pakarunan
(Matay 5.25-26)
41marengay i Pētēro: <<Luzu a, ini nannu i paruwalru maw mararengay kaniyam, zi za maw mararengay kana zinekalranan?>>
42marengay i Luzu: <<nu kemazu mu, i eman izu na katalrimayan zi misayhuwan 'elrepat na pinadikesan kemiyarungetr kana ruma' awa? mawna pinakarunan kana tawki zuwa pana'u kana kiyakarunan i ruma', paturus kana wari panini za aekanan veray kana zuma na pakarunan izu na trau. 43nu muruma' na tawki mu, mena'u kanini na pakarunan kemani kana pakasa za kiyakarunan; ini na pakarunan kemudakuda kana mika'inavayan a! 44penatezelra ku marengay kanmu, pakakarun na tawki kantaw pana'u kana piniemanan peniya. 45mawmu, ini na pakarunan nu kemianger za, <kaulra 'azi kadadika muruma' na tawki>, zi temengez kana zuma na pakarunan zi na pakarunan na vavayan, pawnung mekan tremekel zi venavutrung, 46na tawki kazu za 'azi parangeranger na wari i intaw, kazu za 'azi malrazam i intaw mu muruma'. tu i pakirevay penukepuk i intaw#12.46 <<pakirevay penukepuk i intaw>> karuwa marengay za <<kurusan kantaw pupana>>. na tawki, tu i pukasayaw pasavung kana zuma na 'azi katalrimayan na pakarunan.
47<<na pakarunan malrazam kana tawki za pakiyakarun kantaw za eman, mawmu 'azi penadang, zi 'azi miturus kanantu anger na tawki kemakuda; nu kemani, i intaw kilralrepit za pakirev. 48kema ta kanizu na 'azi malrazam kanantu nirangeran na tawki zi mukuwa kemakudaya lra kana kiyalrepit na lremak na pakarunan mu, kiyalrepit za maraatra'alr i intaw. i eman na sazu tu iveray kana Viruwa i itras mu, tu i kiyaverayay za sazu i eman; sazu tu ipakarun kani eman mu, ka'izang tu kiyaamiyan kani eman.>>
nirehayan za maresenenganengan
(Matay 10.34-36)
49<<zuwa ku paselretika za apuy i punapunan, kemudakuda ku za marangeran kana apuy za simerang lra! 50pauwanay mu kiyasuwap ku za ulepan. makalrang kanini na ulepan pakangawayan mu, ku anger kemudakuda kana mavangavang! 51zuwa ku i kani punapunan murunga za pareka'inavanava ikakuwa mianger i inmu. marengaya ku kanmu, amelri ku murung za pareka'inavanava, maw na murung za paresenenganengan. 52kemay harem kana wari, na lralruwatr na saruma'enan uri paresenenganengan, na tatelu zi na zazuwa pasakisaki, na zazuwa zi na tatelu paziyakuzikul. 53uri paziyakuzikul nazu: na temama kimasaki kana alrak na ma'inayan, na alrak na ma'inayan kimazikul kana temama; na taina kimasaki kana alrak na vavayan, na alrak na vavayan kimazikul kana taina; na tainataw tu inusavakan kimasaki kana musavak; na musavak kimazikul kani tainataw tu inusavakan.>>
patulre'ay menau' kana nirekudayan na ziday
(Matay 16.2-3)
54i Yēsu marengay ziya kana zinekalranan: <<nu mena'u mu za mupana a kutrem i zaya, payas marengay <'a'udalr lra>, tatena' kemani. 55venali i kezet, marengay mu <kavi'as lra na wari>, tatena' kemani. 56na kitu'inavanava na trau a, sayhuwan mu mena'u kana nirekudayan na lingatr dare', kemuda zi ma'ulid patulre'ay mena'u kanini na ziday awa?>>
pareka'inava kana kima'etrev
(Matay 5.25-26)
57<<kemuda zi 'azi mu kemuret za a eman a penauwa na lremak? 58nu ulra a trau kokso kannu mu, kezengaw u mukuwa i hoing, zi rukezangu nu kinaruwa, nu kazu ziyan i dadalan mu pareka'inava kantaw, munu tu tuluzanay u kana hokang, na hokang tu tuluzanay u kana kingsas i hoing, na kingsas i hoing tu pusavakaw u i imengan. 59marengaya ku kannu, nu 'azi u kemipiya semavung kanizu na talikuzakuzan na saya tangpiya, 'azi u kararuwa mupana kemay i imengan.>>
Currently Selected:
Luka 12: TPN
Highlight
Share
Copy
Want to have your highlights saved across all your devices? Sign up or sign in
© The Bible Society in Taiwan, 2023
Luka 12
12
pataranapaw kana kitu'inavanava
(Matay 10.26-27)
1a azu mu, pasalaw kazuwan a trau ma'etre'etr mukasakasa, arusay za maredupadupa'. iyanguwayan marengay i Yēsu kana temakesi: <<taranapaw i inmu kanantu paresasemak na Palisay na trau, mawna kanantu kitu'inavanava. 2na muvulri ziya na lremak mu uwapana kikalrazam, na mulrasez na lremak mu kuwaazu kina'u. 3mawna kemani, nanmu trinakatrakaw marengay na ngay mu tu i kingeray za trau nu 'uninan; nanmu inasiyas kana ruma' i savak mu kipakalrazamay kana ruma' i sa'usa'uv.>>
i eman na kakaudan
(Matay 10.28-31)
4<<'ali'an a, marengaya ku kanmu, izu na mawmau maruwa pinatray kana zazek, mawmu 'azi karuwa venuli' kanmu mu, ikakaud. 5papuanger ku kanmu za i eman na kakaudan: kakauda mu kanizu na 'emaraw melak za uwavaawan mu, zi ulra ziya tu kezang putani pusavak kantaw i zikok na Viruwa i itras. ai, marengaya ku kanmu, na kakaudan mu maw i intaw!
6<<kemazu na zuwaya tangpiya karuwa tremima' za lruwatra kana terin, mawmu na Viruwa i itras 'azi malalup kana sayasaya; 7arusay nanmu 'arevu piya lra miip i intaw. semeneng, ikakaud i inmu, marapazangal mu lra kana sazu na terin!>>
pakanumau kani Kiristo
(Matay 10.32-33; 12.32; 10.19-20)
8<<marengaya ku kanmu, na kazu i ngawayan kana trau pakanumaw kaninku mu, na Alrak na trau kazu i ngawayan kanantu tēnsi na Viruwa i itras kuwaazu pakanumaw kantaw; 9na kazu i ngawayan kana trau 'azi pakanumaw kaninku mu, na Alrak na trau kazu i ngawayan kanantu tēnsi na Viruwa i itras kuwaazu 'azi pakanumaw kantaw.
10<<na marengay semuveli kana Alrak na trau mu, karuwa kilapus; mawmu na semiri kana Vangesar Lu'em mu, 'azi kararuwa kilapus.
11<<tu urungaw mu za trau mukuwa kana waazukan ruma', zi za pilralrangaw mu mukuwa kana yawan zi na demadikes i ngawayan kisayvang mu, ikavangavang za kuwadakudayan kimasaki i'elaw i inmu, zi za rarengay za eman; 12'alrana mawna azu, na Vangesar Lu'em pananadam kanmu za rarengayan.>>
na iniyan za lrazaman na miyaeman
13kana zinekalranan i savakan ulra sasa a trau marengay kani Yēsu: <<sinsi, 'alrazi rengayu nanku wadadiyan karasepada mi tu vinilin ni amalri na pinieman.>>
14temuvang i Yēsu: <<ali, i eman na pakarun kaninku za sayvangan kanmu zi za paruveli kanmu semepad za pinieman i ruma' awa?>> 15zi patrutru marengay kana mapapiya i intaw: <<taranapaw i inmu kanmu, uwaliki kana marekamelrimelri na alengatran; 'alrana, na trau nu kemuda lra kana miyaeman mu, tu uwavaawan nu kemudakuda mu amelri za manueman tu piniemanan.>>
16kemazu zi marengay i Yēsu kanazu za saya paruwalruwan: <<ulra sasa a miyaeman, miya'uma; 17kemiangeanger i intaw za: <iniyan ku za maruwa tu ka'izang za aepetran kana nire'aniyan peniya, kuwadakudayaw awa?> 18mararengay ziya i intaw sasa: <pamaw lra, kuwa ivasaw na kazu lra na 'alili, asalraw parahan kema'izang, zi epetraw meretra' kana nire'aniyan zi na zuma na eman, 19zi kakuwa ku kaninku marengay, na mivatiyan na trau a, ulra nu eman ziyan, karuwa u mekan za 'ami'ami, pakamawmau temawar pa'inava lra, mekamekan tremeketrekel, pa'inavanava kana wariwari mu!> 20mawmu, na Viruwa i itras rarengay kantaw: <inu na ma'ungaw na trau, harem kana 'esungan, i inu tuluzan nannu uwavaawan; nu kemazu mu, nannu inepetr kannu na pinieman peniya vaveray kani eman awa?> >>
21puludus venavati i Yēsu: <<izu na mawili kantaw mepetr za pinieman mu, kana iyana'u na Viruwa i itras na 'azi miyaeman na trau mu maw kemani a.>>
kuretalrima kana Viruwa i itras
(Matay 6.25-34)
22i Yēsu marengay ziyan kana temakesi: <<semeneng, marengaya ku kanmu, amanan muramawan za aekanen i wayway, zi za kakavang i zazek mavangavan. 23na uwavaawan marapazangal kana aekanen; na zazek marapazangal kana kavang. 24na'uwi nazu na takunga mu: 'azi semasalem 'azi mara'ani nazu, iniyan za 'alili, zi na Viruwa i itras tavuray nazu. marapazangal mu kana 'ayam! 25i savak kanmu i eman na maruwa pakalrang za sipelengan zi puwapuwa vaaw za pida wariyan#12.25 <<puwapuwa vaaw za pida wariyan>> karuwa marengay za <<puwapuwa atras za pidaya dapalr>>. nay? 26nu arusay na kemani kana makiteng na lremak mu 'azi mu maruwa kemakuda, zi amanan mavangavang ziya za zuma lremak awa? 27na'uwi na lruwasa kemuda vaaw ma'izang mu: 'azi kiyakarun nazu, zi 'azi trematra'i za kavang. mawmu marengaya ku kanmu, arusay za kamawan kana yawan i Solomon kemazu kana pinazangal mingadan, tu pinimaeman na ipakavulay mu 'azi maravulay kana 'aputr i tralutralun. 28na 'aputr zi na tralun i tralutralun mupana harem kana 'emanan, ma'il nu 'emanan, ivulru' kana 'avuwan muvatri', na Viruwa i itras kemani ziya pakavulay kanazu, i intaw mu kamelriya lra 'azi puwapuwa veray za kavang kanmu ziyamaw? kamakitengan lra nanmu pakutatena'an! 29semeneng, i inmu amanan mavangavang za aekan za eman, tratrekel za eman, mavangavang kananni na lremak. 30nanni na lremak maw i punapunan na 'azi kiputatena' na trau tu 'ineva'evang. nanmu Temama i itras malrazam kananmu niranger na eman ziya. 31kiyami za mula'esi kanantu pinitrepa tu kezang na Viruwa i itras i inmu, intaw tu i vaverayay mu kanini peniya.>>
venavati kana kinapazangal na pinieman i itras
(Matay 6.19-21)
32<<i inmu na kaytayan na salepun, ikakaud, 'alrana nanmu Temama semangal veray kanmu kanantu kanatal. 33tratrima'an nanmu pinieman, na paisu puwalrangan kana kalramalraman na trau; padang za pupaisuwan kannu i inu kana 'azi muwapiris, paepetran i itras nanmu pinieman na pinakapazangal. i kazu, na pinieman na pinakapazangal maw 'azi mukiyapiya; 'alrana 'azi pakatrakaw na male'es, zi 'azi pia'uled. 34nanmu pinieman na pinakapazangal nu kazu i iyan mu, kazu i kazu nanmu anger.>>
na temaranapaw masenekin na pakarunan
35<<penadanga mu marayas, eretru na lunayin, pasenanu na lrawlraw. 36kamawan kana pakarunan mengangara kanantu tawki za muruma' kemay kana pakaetim. muruma' na tawki tremunetrun kana 'alrevan mu, payas tu truwalranay na 'alrevan kantaw nazu. 37muruma' na tawki, mena'u kanazu na pakarunan temaranapaw masenekin, zi mika'inavayan lra nazu! penatezelra ku marengay kanmu, aeretran tu lunayin na tawki, pakayan kanazu mekan za maderu, i intaw na temara kanazu. 38arusay nu puwari palru parekazuwa 'esungan zi za semaselap mu muruma' na tawki, nu mena'u i intaw za temaranapaw masenekin nazu na pakarunan, mika'inavayan lra nazu! 39piangeru i ini na saya: na ma'izang i ruma' nu malrazam za uri zazuwa na male'es nu aidan mu, 'azi paparivas za 'alrevan pusavak kana male'es i intaw. 40maruwaya mu marayas penadang, 'alranu 'azi mu parangeranger kana wari mu na Alrak na trau raredek.>>
na katalrimayan zi na 'azi katalrimayan na pakarunan
(Matay 5.25-26)
41marengay i Pētēro: <<Luzu a, ini nannu i paruwalru maw mararengay kaniyam, zi za maw mararengay kana zinekalranan?>>
42marengay i Luzu: <<nu kemazu mu, i eman izu na katalrimayan zi misayhuwan 'elrepat na pinadikesan kemiyarungetr kana ruma' awa? mawna pinakarunan kana tawki zuwa pana'u kana kiyakarunan i ruma', paturus kana wari panini za aekanan veray kana zuma na pakarunan izu na trau. 43nu muruma' na tawki mu, mena'u kanini na pakarunan kemani kana pakasa za kiyakarunan; ini na pakarunan kemudakuda kana mika'inavayan a! 44penatezelra ku marengay kanmu, pakakarun na tawki kantaw pana'u kana piniemanan peniya. 45mawmu, ini na pakarunan nu kemianger za, <kaulra 'azi kadadika muruma' na tawki>, zi temengez kana zuma na pakarunan zi na pakarunan na vavayan, pawnung mekan tremekel zi venavutrung, 46na tawki kazu za 'azi parangeranger na wari i intaw, kazu za 'azi malrazam i intaw mu muruma'. tu i pakirevay penukepuk i intaw#12.46 <<pakirevay penukepuk i intaw>> karuwa marengay za <<kurusan kantaw pupana>>. na tawki, tu i pukasayaw pasavung kana zuma na 'azi katalrimayan na pakarunan.
47<<na pakarunan malrazam kana tawki za pakiyakarun kantaw za eman, mawmu 'azi penadang, zi 'azi miturus kanantu anger na tawki kemakuda; nu kemani, i intaw kilralrepit za pakirev. 48kema ta kanizu na 'azi malrazam kanantu nirangeran na tawki zi mukuwa kemakudaya lra kana kiyalrepit na lremak na pakarunan mu, kiyalrepit za maraatra'alr i intaw. i eman na sazu tu iveray kana Viruwa i itras mu, tu i kiyaverayay za sazu i eman; sazu tu ipakarun kani eman mu, ka'izang tu kiyaamiyan kani eman.>>
nirehayan za maresenenganengan
(Matay 10.34-36)
49<<zuwa ku paselretika za apuy i punapunan, kemudakuda ku za marangeran kana apuy za simerang lra! 50pauwanay mu kiyasuwap ku za ulepan. makalrang kanini na ulepan pakangawayan mu, ku anger kemudakuda kana mavangavang! 51zuwa ku i kani punapunan murunga za pareka'inavanava ikakuwa mianger i inmu. marengaya ku kanmu, amelri ku murung za pareka'inavanava, maw na murung za paresenenganengan. 52kemay harem kana wari, na lralruwatr na saruma'enan uri paresenenganengan, na tatelu zi na zazuwa pasakisaki, na zazuwa zi na tatelu paziyakuzikul. 53uri paziyakuzikul nazu: na temama kimasaki kana alrak na ma'inayan, na alrak na ma'inayan kimazikul kana temama; na taina kimasaki kana alrak na vavayan, na alrak na vavayan kimazikul kana taina; na tainataw tu inusavakan kimasaki kana musavak; na musavak kimazikul kani tainataw tu inusavakan.>>
patulre'ay menau' kana nirekudayan na ziday
(Matay 16.2-3)
54i Yēsu marengay ziya kana zinekalranan: <<nu mena'u mu za mupana a kutrem i zaya, payas marengay <'a'udalr lra>, tatena' kemani. 55venali i kezet, marengay mu <kavi'as lra na wari>, tatena' kemani. 56na kitu'inavanava na trau a, sayhuwan mu mena'u kana nirekudayan na lingatr dare', kemuda zi ma'ulid patulre'ay mena'u kanini na ziday awa?>>
pareka'inava kana kima'etrev
(Matay 5.25-26)
57<<kemuda zi 'azi mu kemuret za a eman a penauwa na lremak? 58nu ulra a trau kokso kannu mu, kezengaw u mukuwa i hoing, zi rukezangu nu kinaruwa, nu kazu ziyan i dadalan mu pareka'inava kantaw, munu tu tuluzanay u kana hokang, na hokang tu tuluzanay u kana kingsas i hoing, na kingsas i hoing tu pusavakaw u i imengan. 59marengaya ku kannu, nu 'azi u kemipiya semavung kanizu na talikuzakuzan na saya tangpiya, 'azi u kararuwa mupana kemay i imengan.>>
Currently Selected:
:
Highlight
Share
Copy
Want to have your highlights saved across all your devices? Sign up or sign in
© The Bible Society in Taiwan, 2023