Санау 16
16
Корах, Датан эм Абирам Муссагъа къажау турадыла
1Исхар улу Корах (Исхар Кохатны уланы, Кохат а Лебийни уланы эди), Элиаб улула Датан бла Абирам эм Пелет улу Он (ала Рубен улулары эдиле), таша оноу этип, 2Муссагъа къажау тургъандыла. Биргелерине уа Исраил улуладан, дагъыда 250 адам болгъанды; ала жамауатны бачамалары, жыйылыулагъа чакъырылгъан, атлары айтылгъан адамла эдиле. 3Была бары, жыйылып, Муссагъа бла Харуннга къажау туруп, алагъа:
– Сиз асыры тереннге киргенсиз! Битеу жамауат, хар бир адам сыйлыды, Раббий да араларындады! Сиз кесигизни Раббийни халкъындан бийик нек этесиз? – дегендиле.
4Аны эшитип, Мусса жерге беттёбен аугъанды. 5Корахха бла аны нёгерлерине ол былай айтханды:
– Тамбла эрттенликде Раббий Аныкъы ким болгъанын, сыйлы да ким болгъанын эмда Раббийге жууукълашыргъа тийишли ким болгъанын кёргюзтюр. Ол кимни сайласа, Кесине жуукълашыргъа анга эркинлик берир. 6Сен, Корах, эм сени нёгерлеринг былай этигиз: кесигизге кёмюр табакъла алыгъыз да, 7тамбла Раббийни аллында алагъа мыдых, мыдыхны юсюне уа ладан салыгъыз. Раббий кимни сайласа, ол сыйлы болур. Сиз асыры тереннге киргенсиз, Лебий улула!
8Сора Мусса Корахха былай айтханды:
– Былай тынгылагъыз, Лебий улула! 9Исраилни Аллахы сизны Исраил жамауатындан айырып Кесине жууукълашдыргъанды. Сиз Раббийни Мекямыны тийресинде ишлейсиз, жамауат аллында туруп, анга къуллукъ этесиз. Сизге ол азмыды? 10Раббий сизни да, Лебий улу къарындашларыгъызны да Кесине жууукълашдыргъанды, сиз а дин къуллукъну кюсейсиз. 11Сен да, сени нёгерлеринг да Раббийге къажау тургъансыз. Харун кимди? Сиз анга неге тырман этесиз?
12Сора Мусса Элиаб улу Датанны бла Абирамны чакъыртханды. Алай а ала:
– Бармайбыз! – дегендиле. – 13Сен бизни сют бла бал баргъан жерден чыгъарып, бу къуу жерде ёлтюрюрге келтиргенинг санга азмыды? Энди уа сен бизге бийлик да этергеми сюесе? 14Сен бизни сют бла бал баргъан жерге келтирдингми, мюлкге сабанла бла жюзюм бахчала бердингми? Сен бу адамланы кёзлерин сокъур этергеми сюесе? Барлыкъ тюйюлбюз!
15Мусса алагъа бек ачыуланып, Раббийге:
– Аланы саугъаларын Сен къабыл этме. Мен аладан эшек окъуна алмагъанма, аланы бирине бир тюрлю аманлыкъ этмегенме, – дегенди.
16Сора Мусса Корахха:
– Тамбла сен да, нёгерлеринг да Раббийни аллына келигиз. Сен да, ала да, Харун да келигиз. 17Хар биригиз кёмюр табагъын алып, анга ладан салып, аны Раббийни аллына келтирсин. Бары да бирге 250 кёмюр табакъ. Сен да, Харун да кёмюр табакъларыгъызны келтиригиз, – дегенди.
18Ала, хар бири кёмюр табагъын алып, алагъа жаннган мыдыхла салып, юсюне ладан салгъандыла; сора Тюбешиу Чатырны эшик аллында сюелгендиле; Мусса бла Харун да алай этгендиле. 19Корах битеу нёгерлерин Тюбешиу Чатырны эшик аллына Муссагъа бла Харуннга къажау жыйгъанда, битеу жамауатха Раббийни аламатлыгъы кёрюннгенди. 20Раббий Муссагъа бла Харуннга:
21– Бу жамауатдан айырылыгъыз, Мен аланы къарап къарагъынчы къурутурма, – дегенди.
22Ала жерге беттёбен аууп:
– Аллах, хар жанлы затха рух берген Аллах! Бир адам гюнях этгенди, Сен а битеу жамауатхамы ачыуланаса? – дегендиле.
Корахха, Датаннга эм Абирамгъа азап жетдириу
23Сора Раббий Муссагъа:
24– Жамауатха айт, ала Корахны, Датанны эм Абирамны чатырларындан кери кетсинле, – дегенди.
25Мусса туруп, Датан бла Абирамгъа келгенди, Исраилни тукъум таматалары да ызындан. 26Мусса жамауатха:
– Бу аманлыкъчыланы чатырларындан кери кетигиз! Аланы бир затларына тиймегиз, алай болмаса, аланы битеу гюняхлары ючюн сиз да жоюлурсуз.
27Ала Корахны, Датанны эм Абирамны чатырларындан кери кетгендиле. Датан бла Абирам а, къатынлары, уланлары эм гитче сабийлери бла бирге чатырларыны босагъаларына чыгъып тура эдиле.
28Сора Мусса былай айтханды:
– Битеу бу ишлени мен кеси аллыма этмегеними, аланы манга Раббий буюргъанын, сиз ма былай билирсиз: 29была хар ким да ёлгенча ёлселе, ажаллары да битеу адамланы ажаллары кибик болса, мени Раббий иймегенди. 30Алай а Раббий ёмюрде болмагъан зат этсе, жер жарылып, аланы да, битеу ырысхыларын да жутса эмда ала, жанлары саулай, ёлгенле дуниясына тюшселе, билигиз: бу адамла Раббийни сансыз этгендиле.
31Мусса бу сёзлени тюз айтып бошагъанлай аланы тюплеринде жер жарылгъанды. 32Жер ауузун ачып, аланы да, аланы юйюрлерин да, битеу Корахны адамларын да, аланы ырысхыларын да бирге жутханды. 33Битеу болгъан затлары бла бирге ала, жанлары саулай, ёлгенле дуниясына тюшгендиле. Жер аланы башларындан жабылып, ала жамауатны арасындан жокъ болгъандыла. 34Тёгереклеринде болгъан битеу исраиллиле, ала къычыргъан заманда алайдан ыхтырылып:
– Жер бизни да жутмагъы эди! – деп къачхандыла.
35Олсагъат Раббийден от чыкъгъанды да, ладан келтирген 250 адамны кюйдюргенди. 36Сора Раббий Муссагъа былай айтханды:
37– Дин къуллукъчу Харунну уланы Элазаргъа айт, ол кюйген ёлюклени арасындан кёмюр табакъланы жыйсын да, мыдыхларын узакъ элтип тёксюн; ол кёмюр табакъла энди сыйлыдыла, 38нек дегенде, аланы келтирген гюняхлы адамла жанларын бергендиле. Ол адырланы тюйюп, жассы#16:38 Жассы – жукъа, жайма́; орус. плоский, широкий. этип, къурман жерни юсюн аны бла жапсынла. Аланы Раббийни аллына келтиргендиле да, ала сыйлы болгъандыла; энди ала Исраил улулагъа сакъболуу белги болсунла.
39Дин къуллукъчу Элазар кюйдюрюлген адамла келтирген жез табакъланы алгъанды да, къурман жерни юсюн ала бла жабар ючюн аланы тюйюп жассы этгенди. 40Исраил улуларына эсгертиу болсун: Харунну туудукъларындан башха адам Раббийни аллында ладан кюйдюрюрге жууукълашмасын. Жууукълашса уа, ол да, Корах бла аны нёгерлери сынагъанны чегерикди. Раббий Муссаны юсю бла Элазаргъа алай айтханды.
Мусса бла Харун жамауат ючюн тилейдиле
41Экинчи кюн Исраил улуланы битеу жамауаты Муссагъа бла Харуннга тырман этгенди.
– Сиз Раббийни халкъын ёлтюргенсиз, – дей эдиле ала.
42Муссагъа бла Харуннга къажау туруп, жамауат Тюбешиу Чатыргъа айланнганда, аны булут жапханды эм Раббийни аламатлыгъы кёрюннгенди. 43Мусса бла Харун Тюбешиу Чатыргъа жууукълашхандыла да, 44Раббий Муссагъа:
45– Бу жамауатдан бир жанына кетигиз, Мен аланы къарап къарагъынчы къурутурма, – дегенди.
Ала жерге беттёбен аугъандыла.
46Сора Мусса Харуннга:
– Кёмюр табагъынгы алып, анга къурман жерден жаннган мыдыхны, мыдых юсюне да ладанны сал. Сора аны жамауатха чабып элт да, аланы жакъла. Раббий чамланнганды да, халкъ арасында ёлет башланнганды.
47Харун, Мусса айтханча этгенди да, чабып жамауатны арасына киргенди. Халкъ арасында уа ёлет башланнган эди. Харун, отха ладан салып, халкъны жакълагъанды. 48Ол ёлгенлени бла сауланы арасына киргенди да, ёлет тохтагъанды. 49Корах бла бирге ёлгенлени санамай, ёлетден 14 700 адам къырылгъынды. 50Ёлет тохтагъандан сора, Харун Муссагъа, Тюбешиу Чатырны эшигине къайтханды.
Currently Selected:
Санау 16: МалкъСК
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2020-2024
