Санау 10
10
Кюмюш сур быргъыла#10:1 Сур быргъы – орус. труба (музыкальный инструмент).
1Раббий Муссагъа былай айтханды:
2– Жамауатны чакъыргъанда эм къонушну жолгъа чыгъаргъанда белги берир ючюн, кесинге кюмюшден тёш-чёгюч бла ишленнген эки сур быргъы ишле. 3Ала экиси да бирча сокъгъанда, жамауат сени аллынгда Тюбешиу Чатырны эшик аллына жыйылсын. 4Жангыз бири сокъса уа, санга бачамала, Исраилни мингбашчылары, жыйылсынла. 5Къуугъун#10:5 Къуугъун – орус. тревога, клич. тауушну макъамы согъулгъанда, кюнчыгъыш жанында жерлешген къонушла жолгъа чыкъсынла. 6Къуугъун экинчи согъулгъанда, къыбыла жандагъы жерлешген къонушла жолгъа чыкъсынла. Къуугъунну макъамы жолгъа чыгъар заманны белгиси болсун. 7Жамауатны жыяргъа керек заманда уа сур быргъыланы согъугъуз, алай а къуугъун таууш этмегиз.
8Сур быргъыланы дин къуллукъчула, Харунну уланлары сокъсунла. Бу сизге эм келлик тёлюлеге ёмюрлюк буйрукъ болсун. 9Сиз кеси жеригизде сизни къысхан душманыгъызгъа уруш этип барсагъыз, сур быргъыла бла къуугъунну макъамын согъугъуз. Сора Раббий Аллахыгъыз, сизни эсгерип, душманларыгъыздан къутхарыр. 10Къууанчлы кюнлеригизде, белгиленнген байрамларыгъызда, Жангы Ай байрамларыгъызда да толусунлай кюйдюрюлген къурманла бла саламатлыкъ къурманла келтиргенигизде сур быргъыланы согъугъуз да, ол Аллахыгъызны аллында сизни юсюгюзден эсгертиу боллукъду. Мен – Раббий Аллахыгъызма.
Исраиллиле Синай тауну тийресинден кетедиле
11Экинчи жыл, экинчи айны жыйырманчы кюнюнде Шагъатлыкъ Мекямны юсюндеги булут кётюрюлгенди. 12Исраил улула, Синай атлы къуу жерден, чёклерин жыйып жолгъа чыкъгъандыла. Булут Паран атлы къуу жерде тохтагъанды. 13Алай бла ала Раббийни Муссагъа буюргъанына кёре жолгъа биринчи кере чыкъгъандыла.
14Эм биринчи, кеси байрагъыны тюбюнде, Яхуда къонушну аскер бёлеклери тебирегендиле. Алагъа башчы Аминадаб улу Нахшон болгъанды. 15Цуар улу Нетанел Иссахар тайпаны аскер башчысы; 16Хелон улу Элиаб а – Зебулун тайпаны аскер башчысы болгъанды. 17Мекямны жыйгъандыла да, аны ташыучу Гершон улула бла Мерарий улула, Мекямны затларын кётюрюп, жолгъа чыкъгъандыла.
18Ызларындан, кеси байрагъыны тюбюнде, Рубен къонушну аскери тебирегенди. Алагъа башчы Шедеур улу Элисур болгъанды. 19Цуришаддай улу Шелумиел Шимон тайпаны аскер башчысы, 20Деуел улу Элиясаф а Гад тайпаны аскер башчысы болгъанды. 21Андан сора, сыйлы адырланы кётюрюп, жолгъа кохатлыла атланнгандыла. Мекям, ала жангы жерге келгинчи, салыныргъа керек эди.
22Ызларындан, кеси байрагъыны тюбюнде, Эфрайим къонушну аскери тебирегенди. Алагъа башчы Аммихуд улу Элишама болгъанды. 23Педасур улу Гамалиел Манаше тайпаны аскер башчысы; 24Гидеони улу Абидан а Бенямин тайпаны аскер башчысы болгъанды.
25Эм артда, битеу къонушла тебирегенден сора, кеси байрагъыны тюбюнде Дан къонушну аскери тебирегенди. Алагъа Аммишаддай улу Ахиезер башчы болгъанды. 26Охран улу Пагиел Ашер тайпаны аскер башчысы; 27Энан улу Ахира уа Нафталий тайпаны аскер башчысы болгъанды. 28Исраил улула жолгъа чыкъгъан заманда чёклери къалай тизилип баргъаны буду.
Аллах халкъын Кеси жюрютеди
29Мусса къайын атасы Реуелни уланы болгъан мидиянлы Хобабха былай айтханды:
– Раббий бизге: «Мен аны сизге берликме», – деген жерге тебирейбиз. Бизни бла кел, биз да санга игилик этербиз, нек десенг Раббий Исраилге игилик этерге айтханды.
30Ол а анга жууапха:
– Угъай, бармайма. Мен кеси жериме, жууукъларыма къайтырыкъма, – дегенди.
31Мусса анга:
– Тилейме, бизни къойма. Нек десенг, сен бу къуу жерде бизге чёкню къайда салыргъа керегин билесе да, бизге жол уста болурса. 32Сен бизни бла барсанг, Раббий бизге этерик игиликде сени да юлюшюнг болур.
33Сора ала Раббийни тауундан жолгъа чыгъып юч кюн бардыла. Раббийни Кесамат Кюбюрю, ала тохтар жерни кёргюзте, алларында бу юч кюнню барып турду. 34Раббийни булуту уа, ала къонушну жыйып, жолгъа чыкъгъан заманда, аланы башларында болуп тургъанды. 35Кюбюрню кётюрюп, жолгъа атланнганда, Мусса былай айта эди:
– Я Раббий, тур!
Душманларынг чачылсынла;
Сени кёрюп болмагъанла аллынгда чабып къачсынла!
36Тохтап, Кюбюрню жерлешдирген заманларында уа, Мусса былай айта эди:
– Я Раббий, кел!
Исраилни минглерине бла тул-тубанларына къайт!
Currently Selected:
Санау 10: МалкъСК
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2020-2024
