Лебийлиле 5
5
1Бир адам аманлыкъны шагъаты болса неда аны кёрсе, неда аны болуннганын билсе, алай а, андан ант алып соргъанларында, айтмаса, гюняхы ючюн жууапха тартылыр.
2Неда бир адам харам затха: харам кийик жаныуарны неда харам малны, неда сюркелип жюрюген харам жаныуарны мыллыгына тийсе, аны эслемей этсе да, ол харамлы болур эм терслиги боюнунда болур.
3Неда ол адамны харамлыгъына, харамлы этген не бир тюрлю харамлыкъ болса да, ол аны эслемесе да, аны ангылагъан заманда терслиги боюнунда болур.
4Неда бир адам, иги ойламай, бир иги неда аман зат этерге ант этсе, аны билмей этсе да, ангылагъан заманда терслиги боюнунда болур.
5Бу затлада терс болса, адам этген гюняхын ачыкъ айтсын да, 6гюняхы ючюн тёлеуге сюрюуюнден Раббийге гюнях ючюн къурманнга къой неда эчки келтирсин. Сора дин къуллукъчу аны гюняхындан тазалар.
7Адамны къой неда эчки келтирир амалы болмаса, гюняхы ючюн тёлеуге ол Раббийге эки къумру неда эки кёгюрчюн бала келтирсин. Бири – гюнях ючюн къурманнга, бири уа – толусунлай кюйдюрюлген къурманнга. 8Ол аланы дин къуллукъчугъа келтирсин да, ол а алгъа гюнях ючюн къурман къанатлыны бойнун сындырсын, айыргъан а этмесин, 9эм къурманны къанын къурман жерни жанына бюрксюн. Къалгъан къанны къурман жерни тюбюне акъмагъа къояргъа керекди. Бу – гюнях ючюн къурманды. 10Сора дин къуллукъчу экинчи къанатлыны толусунлай кюйдюрюлген къурманнга адетича келтирсин да, ол адамны этген гюняхындан тазалар, эм ол кечилир.
11Адамны эки къумру неда эки кёгюрчюн бала келтирир амалы болмаса, ол гюняхы ючюн бидиш ундан эфаны ондан бирин#5:11 2 литрге жууукъ. келтирсин. Унну юсюне зейтун жау къуймасын, юсюне ладан да салмасын, нек дегенде, бу – гюнях ючюн саугъады. 12Ол аны дин къуллукъчугъа келтирсин да, дин къуллукъчу андан бир ууучну эсгертиу юлюшге алып, къурман жерде Раббийге отда кюйдюрюлген къурманла бла бирге кюйдюрсюн. Бу – гюнях ючюн къурманды. 13Алай этип, дин къуллукъчу аны, ол не тюрлю гюнях этген эсе да, тазалар, эм ол кечилир. Будай унну къалгъаны, мирзеу саугъаны адетинде кибик, дин къуллукъчугъа къалсын.
Терслик ючюн къурман
14Раббий Муссагъа былай айтды:
15– Бир адам, билмегенлей, тюзлюгюн бузуп, Раббийни сыйлы затларына къажау гюнях этсе, ол Раббийге тёлеуге сюрюуюнден бир къыяусуз къочхар келтирсин. Аны кюмюш багъасы, сыйлы шекелле бла санагъанда#5:15 Оригиналда: «кюмюш шекелле, Сыйлы Жерни шекеллери бла». Сыйлы Жерни шекели – Сыйлы Чатырда бла Табыныучу Юйде жумушлада дин къуллукъчула хайырланнган ёлче, 11,5 граммгъа жууукъ., белгиленнген багъагъа тенг болсун. Бу – терслик ючюн къурманды. 16Ол адам къажау гюнях этген сыйлы зат ючюн тёлесин, анга, дагъыда, аны багъасындан бешинден бирин къошсун эм дин къуллукъчугъа берсин. Дин къуллукъчу къочхарны терслик ючюн къурманнга келтирип, ол адамны гюняхындан тазалар, эм ол кечилир.
17Бир адам Раббийни буйрукъларындан биринде айтылгъан затны бузуп, гюнях этсе, билмей этсе да, терслиги боюнунда болур эм жууапха тартылыр. 18Ол адам терслик ючюн къурманнга сюрюуюнден тийишли багъасы болгъан бир къыяусуз къочхарны алып дин къуллукъчугъа келтирсин. Дин къуллукъчу аны билмей этген терслигин тазалар, эм ол кечилир. 19Бу – терслик ючюн къурманды. Бу, адам Раббийни аллында терс болгъан заманда этиледи.
Currently Selected:
Лебийлиле 5: МалкъСК
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2020-2024
