Лебийлиле 21
21
Дин къуллукъчулагъа берилген жорукъла
1Раббий Муссагъа былай айтханды:
– Харун улулагъа, дин къуллукъчулагъа, былай айт:
Дин къуллукъчу ёз халкъындан болгъан адамны ёлюгюне тийип, кесин харам этмесин. 2Жалан да эм къысха жууугъу: анасы, атасы, жашы, къызы, къарындашы 3неда биргесине жашагъан, эри болмагъан эгечи, – ёлсе, аланы ёлюклерине тийип, кесин харам этерге болур. 4Кесини къайынларыны ёлюклерине тийип а, ол кесин харам этмесин.
5Дин къуллукъчула чачларын жюлюмесинле, сакъалларыны къыйырларын кесмесинле, санларын кесип жара салмасынла. 6Ала кеси Аллахларыны аллында сыйлы болургъа керекдиле, Аллахны Атын бедишлик этмесинле. Ала Раббийге отда кюйдюрюлген къурманла этедиле, Аллахларыны аллына ётмек келтиредиле, – ала сыйлы болургъа тийиншлидиле.
7Ала зийначы неда къызлыгъы бузулгъан тиширыуланы къатыннга алмасынла. Дин къуллукъчу Аллахны аллында сыйлыды. 8Анга сый беригиз, нек дегенде, ол Аллахыгъызны аллына ётмек келтиреди. Дин къуллукъчу сизге сыйлы болсун, нек дегенде, Мен, сизни сыйлы этген Раббий, сыйлыма.
9Дин къуллукъчуну къызы, саякъ айланып, кесин бедишлик этсе, ол атасын да бедишлик этеди. Аны отда кюйдюрюрге керекди.
10Къарындашларыны арасында тамата болгъан баш дин къуллукъчу чачын бошламасын, кийимлерин да жырмасын. Ол, башына майлау жау къуюлгъан, сыйлы кийимле киерге багъышланнган адам болсун. 11Ол ёлюк болгъан жерге кирмесин. Атасы неда анасы ёлсе окъуна, ол кесин харам этмесин. 12Ол, Сыйлы Жерден чыкъмасын, Аллахны Сыйлы Жерин харам этмесин, нек дегенде, аны нюзюрю барды, ол Аллахыны майлау жауу бла сыйлы этилгенди. Мен – Раббийме.
13Баш дин къуллукъчу жалан да уяты ачылмагъан къызгъа юйленирге керекди. 14Тул къатыннга, эринден айырылгъан къатыннга неда зийначылыкъ бла кесин харам этген тиширыугъа юйленмесин. Жаланда кеси халкъындан болгъан, уяты сакъланнган къызны алсын. 15Ёз халкъыны арасында ол, кесини тукъумун бедишлик этмесин. Мен – аны сыйлы этген Раббийме.
16Раббий Муссагъа былай айтды:
17– Харуннга былай ангылат:
Сени туудукъларынгдан санларында бир кемчилиги кимни болса, ол Аллахны аллына ётмек келтирирге жууукълашмасын. 18Санларында кемчилиги болгъан адам Сыйлы Жерге жанламасын: не сокъур, не акъсакъ, не бетинде табы болгъан, не сакъат#21:18 Сакъат – санларында кемчилиги болгъан, къыяулу адам; орус. калека, инвалид., 19не аягъы неда къолу сыннган, 20не гуппур, не шылап#21:20 Шылап – алаша бойлу; орус. карлик., не кёзюнде чыбы болгъан, не чыгыр, не къотур, не бюртюклеринде зараны болгъан адам жууукълашмасын. 21Дин къуллукъчу Харунну туудукъларындан санларында кемчилиги болгъан адам Раббийге отда кюйдюрюлген къурманла келтирирге жууукълашмасын. Санларында кемчилиги болгъаны ючюн, ол, Аллахны аллына къурманлыкъ ашны келтирирге жууукълашмасын. 22Сыйлы эм бек сыйлы болгъан, Аллахны аллына келтирилген ашны ол ашаргъа эркинди. 23Алай а, кемчилиги болгъаны ючюн, ол жабыугъа неда къурман жерге жууукълашмасын, Мени Сыйлы Жерими харам этмесин. Мен – аланы сыйлы этген Раббийме.
24Мусса муну Харуннга, аны уланларына эм битеу исраил улулагъа айтханды.
Currently Selected:
Лебийлиле 21: МалкъСК
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2020-2024
