Лебийлиле 14
14
Жукъгъан тери аурууладан тазалау
1Раббий Муссагъа былай айтханды:
2– Ма тери аурууу болгъан адамны тазалау юсюнден адет. Аны дин къуллукъчугъа келтирсинле да, 3дин къуллукъчу анга, къонушдан тышына чыгъып, къарасын. Ауругъан адам жукъгъан тери аурууундан сау болгъан болса, 4дин къуллукъчу тазаланырыкъ адам ючюн эки сау эм таза болгъан къанатлыны, арзы#14:4 Арзы – орус. кедр. терекни бутагъын, къызыл жюнню эмда иссоп#14:4 Иссоп – Исраилде ёсген, майоран хансны бир тюрлюсю. хансны алып келирге буюрсун. 5Дин къуллукъчу къанатлыладан бирин, ичинде таза сууу болгъан топуракъ сауутну юсюнде сояргъа буюрсун. 6Сора ол, сау къанатлыны алып, аны арзы терекни бутагъы бла, къызыл жюнню бла эмда иссоп ханс бла бирге, союлгъан къанатлыны къанына кёмсюн да, 7тазаланырыкъ адамгъа жети кере бюрксюн. Сора дин къуллукъчу ауругъан адамны жукъгъан тери ауруудан таза болгъанын билдирсин да, сау къанатлыны ачыкъ жерде жиберсин.
8Тазаланырыкъ адам кийимин жуусун, битеу чачын жюлюсюн, сууда жууунсун да, сора таза болур. Сора ол къонушха кирирге эркинди, алай а жети кюнню чатырындан тышында жашасын. 9Жетинчи кюн ол башындагъы битеу чачын, сакъалын, къашларын эм битеу башха тюклерин жюлюсюн, кийимин жуусун, сууда жууунсун да, сора таза болур.
10Сегизинчи кюн ол къыяусуз эки эркек къозу бла бир тиши къозу келтирсин, биргесине уа, ётмек саугъагъа, жау къошулгъан бидиш ундан эфаны ондан ючюсюн#14:10 6,5 литрге жууукъ. эмда зейтун жаудан бир лог#14:10 0,3 литрге жууукъ. келтирсин. 11Тазалау этген дин къуллукъчу тазаланырыкъ адамны саугъалары бла бирге Раббийни аллында, Тюбешиу Чатырны эшигини аллында сюесин.
12Дин къуллукъчу бир къозуну алып, аны зейтун жаудан литрни ючден бири бла бирге терслик ючюн къурманнга Раббийни аллына кётюрюп келтирсин. 13Ол, къозуну сыйлы жерде, гюнях ючюн къурман эм толусунлай кюйдюрюлген къурман этилиучю жерде сойсун. Бу терслик ючюн къурман, гюнях ючюн къурман кибик, дин къуллукъчуну болсун. Ол – бек сыйлыды. 14Дин къуллукъчу терслик ючюн къурманны къанындан алып, аны тазаланырыкъ адамны онг къулагъыны къыйырына, онг къолуну баш бармагъына эмда онг аягъыны баш бармагъына жакъсын. 15Сора дин къуллукъчу зейтун жауну алып, сол къолуну ууучуна къуйсун, 16башала бармагъын къол аязындагъы жаугъа басып, ол жауну Раббийни аллында жети кере бюрксюн. 17Сора дин къуллукъчу къол аязындагъы жауну тазаланырыкъ адамны онг къулагъыны къыйырына, онг къолуну баш бармагъына эмда онг аягъыны баш бармагъына, терслик ючюн къурманны къаныны юсюне жакъсын. 18Къол аязында къалгъан зейтун жауну дин къуллукъчу тазаланырыкъ адамны башына къуйсун да, Раббийни аллында аны тазаласын.
19Дин къуллукъчу гюнях ючюн къурманны келтирсин да, тазаланырыкъ адамны харамлыгъындан къутултсун. Андан сора ол толусунлай кюйдюрюлген къурманны сойсун. 20Дин къуллукъчу аны да, ётмек саугъаны да къурман жерни юсюне салсын. Алай этип, дин къуллукъчу ол адамны тазалар. Сора ол таза болур.
21Адам жарлы болуп, быланы келтирир амалы жокъ эсе, ол тазаланыр ючюн, терслик ючюн къурманнга кётюрюрге бир къозу келтирсин, ётмек саугъагъа зейтун жау къошулгъан бидиш ундан эфаны ондан бирин#14:21 2 литрге жууукъ., зейтун жаудан литрни ючден бирин келтирсин. 22Эмда, амалына кёре, эки къумру неда эки кёгюрчюн бала келтирсин: бирин гюнях ючюн къурманнга, бирин а толусунлай кюйдюрюлген къурманнга.
23Тазаланыр ючюн, ол сегизинчи кюн аланы дин къуллукъчугъа, Тюбешиу Чатырны эшигини аллына, Раббийни аллына келтирсин. 24Дин къуллукъчу терслик ючюн къурман къозуну бла зейтун жаудан бир литрни ючден бирин алсын да, кётюрюлген саугъагъа Раббийни аллында кётюрюп келтирсин. 25Терслик ючюн къурман къозуну сойсун. Аны къанындан алып, дин къуллукъчу тазаланырыкъ адамны онг къулагъыны къыйырына, онг къолуну баш бармагъына эмда онг аягъыны баш бармагъына жакъсын. 26Сора дин къуллукъчу сол ууучуна бираз зейтун жау къуйсун да, 27башала бармагъын ары басып, Раббийни аллында жети кере бюрксюн. 28Сора ууучундагъы жауну дин къуллукъчу тазаланырыкъ адамны онг къулагъыны къыйырына, онг къолуну баш бармагъына эмда онг аягъыны баш бармагъына, терслик ючюн къурманны къаны болгъан жерлерине жакъсын. 29Къол аязында къалгъан зейтун жауну дин къуллукъчу тазаланырыкъ адамны башына къуйсун да, Раббийни аллында аны тазаласын. 30Тазаланырыкъ адам амалы жетген, къолундан келген къумруланы неда кёгюрчюн балаланы алсын да, 31бирин гюнях ючюн къурманнга, бирин а толусунлай кюйдюрюлген къурманнга, ётмек саугъа бла бирге келтирсин. Алай бла дин къуллукъчу адамны Раббийни аллында тазалар.
32Бу, жукъгъан тери аурууу болгъан, тазаланыр ючюн а саугъала келтирирге амалы болмагъан адамланы юсюнден адетди.
Мугут жукъгъан юй
33Раббий Муссагъа бла Харуннга былай айтханды:
34– Мен сизге иеликге берген Кенан жерине келгенигизде, Мен иелик жеригизде юйлеригизге мугут тийдирсем, 35юйню иеси дин къуллукъчугъа барып: «Мени юйюме мугутха ушагъан зат кёрюннгенди», – деп айтсын. 36Дин къуллукъчу ол юйге кирирден алгъа, хар затны аны ичинден тышына чыгъарыргъа буюрсун, алайсыз, юйде болгъан хар зат харам этилликди. Андан сора дин къуллукъчу кирсин да, юйге къарасын. 37Ол юйню къабыргъаларында мугутха къарасын да, къабыргъаланы юсюнде теренине баргъан жашилдим неда къызгъылдым тамгъала эсленселе, 38дин къуллукъчу юйден чыгъып, аны эшигин жети кюннге бегитсин. 39Жетинчи кюн дин къуллукъчу, биягъы, келип къарасын. Къабыргъаланы юсюнде мугутну жайылгъанын кёрсе, 40дин къуллукъчу мугут тийген ташланы къабыргъаладан чыгъартып, шахардан тышында бир харам жерге атаргъа буюрсун. 41Ол юйню къабыргъаларын ичинден къырсынла, къырылгъан топракъны шахардан тышында бир харам жерге тёксюнле. 42Эски ташланы орунуна жангы ташла салып, юйню къабыргъаларын жангыдан сюртсюнле.
43Ташланы да чыгъарып, юйню къабыргъаларын да къырып, жангыдан сюртгенден сора, мугут биягъы чыкъса, 44дин къуллукъчу барып, юйге къарасын. Мугут юйню юсюнде жайылгъан болса, ол – жайылгъан мугутду, ол юй харамды. 45Ол юйню бузуп, ташларын, агъач чигинжилерин эм битеу сюртюлген топурагъын шахардан тышына, бир харам жерге чыгъарыргъа керекди.
46Юй киритге этилип тургъан заманда анга кирген адам ингирге дери харам болур. 47Ол юйде жукълагъан неда ашагъан адам кийимин жууаргъа керекди.
48Дин къуллукъчу, юй жангыдан сюртюлгенден сора къарагъанда, мугут жайылмагъанын кёрсе, юй таза болгъанын билдирсин, нек дегенде, мугут кетгенди. 49Юйню тазалар ючюн, ол, эки къанатлыны, арзы бутакъны, къызыл жюнню эмда иссоп хансны алсын да, 50къанатлыладан бирин топуракъ сауутда таза сууну юсюнде сойсун. 51Сора арзы бутакъны, иссоп хансны, къызыл жюнню эмда сау къанатлыны алып, союлгъан къанатлыны къанына кёмсюн да, юйню юсюне жети кере бюрксюн. 52Алай этип, ол юйню къанатлыны къаны бла, таза суу бла, сау къанатлы бла, арзы бутакъ бла, иссоп ханс бла эмда къызыл жюн бла тазалар. 53Сора ол сау къанатлыны шахардан тышында, бир ачыкъ жерде ийсин. Аны бла ол юйню тазалар да, юй таза болур.
54Хар тюрлю жукъгъан тери аурууну юсюнден адет: темиреуню, 55кийимде неда юйде чыкъгъан мугутну, кёпгенни, чапырыуну эм къызарыуну – юсюнден, 56бир зат харам неда таза болгъанын билдиргенни юсюнден адет буду.
Ма, жукъгъан тери аурууланы бла мугутну юсюнден адет.
Currently Selected:
Лебийлиле 14: МалкъСК
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2020-2024
