Жаратылыу 9
9
1Сора Аллах Нухха да, аны уланларына да алгъыш этип, былай айтханды:
– Кёп болугъуз эм жайылыгъыз, жерни толтуругъуз. 2Жердеги жаныуарланы, кёкдеги къанатлыланы, жерде сюркелгенлени эм тенгизледеги чабакъланы бары да сизден къоркъуп титирерикдиле. Ала сизни къолугъузгъа берилгендиле. 3Жюрюген хар тюрлю жанлы сизге аш боллукъду. Барын да сизге кырдык хансны бергенимча береме. 4Жаланда ичинде къаны болгъан этни ашамагъыз. Къан аны жаныды. 5Сизни жаныгъыз къаныгъыздады. Сизни къаныгъызны тёкгеннге Мен тёлетирикме. Хар тюрлю жаныуаргъа да тёлетирикме, къарындашыны жанын алгъан хар адамгъа да тёлетирикме.
6Адам Аллахны юлгюсюне кёре жаратылгъанды.
Ол себепден, адамны къанын ким тёксе,
аны къаны да адамны къолу бла тёгюлюр.
7Сиз а къозлап барыгъыз да кёп болугъуз, жер башында жайылып, кёбейигиз.
8Сора Аллах Нухха бла уланларына былай айтханды:
9– Мен а, ма, сизни бла эм келлик туудукъларыгъыз бла кесаматымы салама. 10Биргегизге болгъан хар тюрлю жанлы бла да: къанатлыла, юй хайыуанла, кийик жаныуарла бла – кемеден чыкъгъан битеу жаныуарла бла – кесаматымы салама. 11Мен сизни бла кесаматымы салама:
Мындан арысында битеу жаныуарла суу къыяма бла къырыллыкъ тюйюлдюле.
Мындан арысында битеу жерни жойгъан суу къыяма боллукъ тюйюлдю.
12Сора Аллах былай айтханды:
– Ма, Мен сизни бла эм биргегизге болгъан битеу жанлыла бла, келлик тёлюлеригизге, ёмюрге да кесаматны белгисин салама. 13Мен булутлада тейри къылычымы салама. Ол, Мени бла жерни арасында кесаматны белгиси болуп турур. 14Мен жерге булут келтирсем, булутда тейри къылыч кёрюнюрюкдю. 15Ол заманда Мени акъылыма сизни бла эм хар жанлы бла этген кесаматым келир да, битеу жанлыланы къырып бошарыкъ суу къыяма болмаз. 16Булутда тейри къылыч болур да, Мен аны кёрюрме, эмда Мен Аллахны бла жер башындагъы битеу жанлыланы арасында салыннган ёмюрлюк кесамат акъылыма келир.
17Алайды да Аллах Нухха:
– Мени бла жер башында болгъан битеу жанлыланы арасында салыннган кесаматны белгиси буду, – дегенди.
Нух файхамбарны жашлары
18Нухну кемеден тюшген жашлары Шем, Хам, Яфет эдиле. Хам Кенанны атасы болгъанды. 19Бу ючюсю Нухну уланлары эдиле, жер юсюне жайылгъан адамла бары да аладан туугъандыла.
20Нух жер сюрюп башлагъанды эм жюзюм бахча орнатханды. 21Бир кюн ол чагъыр ичип, эсиргенди да, чатырында къымыжалай жатып болгъанды. 22Кенанны атасы Хам атасыны къымыжалыгъын кёргенде, тышына чыгъып, эки къарындашына айтханды. 23Шем бла Яфет а, бир кийим алып, кеслерини имбашларына салгъандыла да, артлары бла бара-бара, аталарыны къымыжалыгъын жапхандыла. Аталарыны къымыжалыгъын кёрмез ючюн, бетлерин бир жанына бургъандыла.
24Нух эсиргенинден аязып уяннганда, кичи жашы анга не этгенин билип, 25былай айтды:
– Кенаннга налат болсун!
Ол къарындашларыны къулларыны арасында
эм гитчеси болур.
26Дагъыда былай айтды:
– Шемни Раббий Аллахы алгъышлыды!
Кенан а Шемге къул болсун.
27Аллах Яфетни#9:27 Яфет атны магъанасы – «кенглик, байлыкъ». жерин кенгертсин.
Ол Шемни чатырларында жерлешсин,
Кенан а Яфетге къул болсун.
28Суу къыямадан сора, Нух дагъыда 350 жыл жашагъанды. 29Алай бла Нухну ёмюрю 950 жыл эди, сора ол ёлгенди.
Currently Selected:
Жаратылыу 9: МалкъСК
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2020-2024
Videos for Жаратылыу 9
Episode 36:Are We Near the End? The Bible’s Hidden Pattern
Under The Hood
EP 25. Why Do So Many Cultures Have Flood Myths? The Truth Behind the Stories
Under The Hood
Ep 34. Genesis 10: How Noah’s Sons Shaped the World & God's Redemption Story
The Bible Show
Episode 19: Feeding of Four thousand with the Syrophonecian woman
The Bible Show