Жаратылыу 34
34
Динагъа этилген артыкълыкъ эм шекемлилеге дерт жетдириу
1Леяны Якъупха тапхан къызы Дина, ол жерни къызларын кёрюрге баргъанды. 2Ол жерни бийи хивли Хаморну жашы Шекем аны кёргенде, аны тутханды эм аны бла жатып, анга артыкълыкъ этгенди. 3Шекем, Якъупну къызы Динаны жаратып, аны битеу жанындан сюйгенди; къызгъа татлы тилли сёлешгенди. 4Сора Шекем атасы Хаморгъа:
– Бу къызны манга къатыннга ал, – деп айтханды.
5Якъуп, къызы Динаны Шекем бедишлик этгенин эшитгенди, алай а уланлары аны малы бла аулакъда болгъанлары себепли, ала келгинчи, Якъуп жукъ айтмай тургъанды.
6Сора Шекемни атасы Хамор Якъуп бла сёлешир ючюн аны аллына келгенди. 7Якъупну уланлары уа, муну эшитгенлей, терк окъуна аулакъдан жетгендиле. Бу кишилени къанлары бузулгъанды, ала ачыудан къайнагъандыла. Шекем Якъупну къызы бла жатып, Исраилге бедишлик этген эди, алай этерге уа чыртда жарамай эди.
8Хамор алагъа:
– Уланым Шекем къызыгъызны битеу жанындан сюйгенди, – дегенди. – Тилейме, къызыгъызны анга къатыннга беригиз. 9Бизни бла жууукъ болугъуз. Къызларыгъызны бизге эрге беригиз, бизни къызларыбызны да кесигизге алыгъыз. 10Бизни бла жашагъыз. Бу жер аллыгъыздады, къайда сюйсегиз жерлешигиз, сатыу-алыу этигиз, жерни мюлкге алыгъыз.
11Шекем а къызны атасына бла къарындашларына:
– Манга ыразы болугъуз ансы, манга не айтсагъыз да, берирме! – дегенди. – 12Не бек уллу къалын бла саугъала буюругъуз; манга не айтсагъыз да, берирме. Къызны манга къатыннга беригиз ансы.
13Алай а, Шекем аланы эгечлери Динаны бедишлик этгени ючюн, Якъупну уланлары анга бла аны атасы Хаморгъа хыйлалыкъ бла жууап бергендиле.
14– Бу ишни эталлыкъ тюйюлбюз, – дегендиле алагъа, – сюннет этилмеген адамгъа эгечибизни берсек, ол бизге намыссызлыкъды. 15Сиз бизнича болсагъыз, битеу эр киши адамларыгъызгъа сюннет этилсе, сизни бла жаланда ол заманда келиширикбиз. 16Сора къызларыбызны сизге эрге берирбиз, сизни къызларыгъызны да къатыннга алырбыз; сизни бла жашарбыз эм бир халкъ болурбуз. 17Биз айтханны этип сюннет этилирге унамасагъыз а, къызны да алып, кетип къалырбыз.
18Хамор бла уланы Шекем бу сёзлени жаратхандыла. 19Жаш, Якъупну къызын бек сюйгени ючюн, ол ишни этерге мычымагъанды. Ол жашны сыйы уа атасыны юйдегисини барындан да уллу эди. 20Хамор бла уланы Шекем шахарларыны къабакъ аллына келип, шахарларыны адамларына былай айтдыла:
21– Бу адамла бизни бла жарашыулудула. Ала бу жерде тохтасынла, сатыу-алыу этсинле. Бу жер эркинди, алагъа да жетер. Аланы къызларын къатыннга алырбыз, къызларыбызны да алагъа эрге берирбиз. 22Алагъа сюннет этилгенича, бизни да битеу эр киши адамыбызгъа сюннет этилсе, бу адамла бизни бла жашаргъа эм бизни бла бир халкъ болургъа жаланда бу шарт бла ыразыдыла. 23Аланы сюрюулери да, мюлклери да, битеу маллары да бизни боллукъ тюйюлмюдюле? Жаланда ала айтханны этейик, сора бизни бла жашап турлукъдула.
24Шахарны къабакъларында жыйылгъан эр кишиле бары да Хаморну бла уланы Шекемни айтханларына ыразылыкъ бергендиле. Сора шахарда эр кишилени барысына да сюннет этилгенди.
25Мындан сора ючюнчю кюн, ала ауруп тургъан заманда, Якъупну эки уланы, Динаны къарындашлары, Шимон бла Лебий, къылычларын алып, кишиге билдирмей шахаргъа чабыууллукъ этгендиле да, битеу эр киши адамланы къыргъандыла. 26Хаморну кесин да, уланы Шекемни да къылыч бла ёлтюргендиле; Динаны да Шекемни юйюнден алып, чыгъып кетгендиле. 27Сора Якъупну башха уланлары да, эгечлери бедишлик этилгени ючюн, келип ёлтюрюлгенлени затларын алып, шахарны тонап чачхандыла. 28Аланы къой-эчкилерин да, тууарларын да, эшеклерин да, шахардагъы затларын да, аулакъдагъы затларын да къолгъа алгъандыла. 29Аланы битеу байлыкъларын сыйырып, битеу сабийлерин да, къатынларын да жесирге алгъандыла, юйлериндеги затланы барын да тонагъандыла.
30Сора Якъуп Шимоннга бла Лебийге:
– Сиз манга ачыу этдиргенсиз, – дегенди, – бу жерде жашагъан адамлагъа – кенанлылагъа бла перизлилеге – мени кёрюп болмазча этгенсиз. Мени адамларым аздыла. Манга къажау болуп жыйылып, чабыууллукъ этселе, мени юйюрюм бла бирге къырып бошарла.
31Ала уа жууапха:
– Эгечибизге саякъ тиширыугъа этгенча артыкълыкъ этерге жараймыды да сора? – дегендиле.
Currently Selected:
Жаратылыу 34: МалкъСК
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2020-2024
