Жаратылыу 25

Ибрахимни Кетурадан туудукълары

1Ибрахим дагъыда бир къатын алгъанды, аны аты Кетура эди. 2Кетура анга Зимранны, Ёкшанны, Меданны, Мидиянны, Ишбакны эм Шуахны тапханды. 3Ёкшандан Шеба бла Дедан туугъандыла. Дедандан ашшурлула, летушлула эм леумлула туугъандыла. 4Мидиянны жашлары: Эфа, Эфер, Ханох, Абида эм Элдаа эдиле. Была бары да Кетураны тукъумундандыла.

5Ибрахим битеу болгъан затын Исхакъгъа берип къойгъанды. 6Тос къатынларыны уланларына уа Ибрахим, кеси сау заманнында окъуна, саугъала берип, аланы уланы Исхакъны къатындан кюн чыкъгъан жанындагъы жерге жиберип къойгъанды.

Ибрахим файхамбар ауушады

7Ибрахим 175 жыл жашагъанды. 8Алайды да, Ибрахим огъурлу къартлыкъда, бек къартайып эм жашаудан тоюп, жанын берип ёлгенди да, ата-бабаларына къошулгъанды. 9Уланлары Исхакъ бла Исмаил аны, хитли Цохарны жашы Эфронну сабанында Мамреге жууукъ болгъан Махпела дорбунда асырагъандыла. 10Ибрахим ол сабанны хетлиледен сатып алгъан эди. Анда Ибрахим къатыны Сараны жанында асыралгъанды. 11Ибрахим ёлгенден сора, Аллах аны уланы Исхакъгъа алгъыш бергенди. Исхакъ Беэр-Лахай-Роини къатында жашай эди.

Исмаилны тукъуму

12Сараны къарауашы мисирли Хажар Ибрахимге тапхан, Ибрахимни уланы Исмаилны тукъум тарыхы буду: 13Тукъум тарыхларына кёре, Исмаилни жашлырыны атлары быладыла: Исмаилны тюнгючю Небайот, ызындан Кедар, Адбеел, Мибсам, 14Мишма, Дума, Масса, 15Хадад, Тема, Етур, Нафиш эм Кедема. 16Была Исмаилны жашларыдыла, онеки бий. Аланы атлары эллерини бла жерлешген жерлерини атлары болгъандыла.

17Исмаил 137 жыл жашагъандан сора жанын берип, ёлгенди да, ата-бабаларына къошулгъанды. 18Исмаил улула Ашшургъа бара тургъан жолда Мисирни чегине жууукъ болгъан Хауила бла Шур арасындагъы жерде жерлешгендиле. Къарындашларыны жанында энчи жашай эдиле.

Исхакъны уланлары – Эсау бла Якъуп

19Ибрахимни жашы Исхакъны тукъум тарыхы буду: Ибрахимден Исхакъ туугъанды. 20Исхакъ Паддан-Арамдан болгъан арамлы Бетуелни къызы, арамлы Лабанны эгечи Рабийгъатны кесине къатыннга алгъан заманында къыркъ жыллыкъ эди. 21Къатыны къаратон болгъаны ючюн, Исхакъ къатыныны юсюнден Раббийден тилек этгенди. Раббий Исхакъны тилегин къабыл этгенди; къатыны Рабийгъат бууаз болгъанды. 22Къарынында уланла сермешип башлагъандыла да, Рабийгъат:

– Неди бу башыма келген зат? – деп, Раббийге сорургъа баргъанды.

23Раббий анга былай айтханды:

– Сени къарынынгда эки миллет барды,

сенден эки халкъ жаратылып айырыллыкъды.

Бир халкъ экинчисинден эсе кючлю боллукъду,

абаданы гитчесине къуллукъ этерикди.

24Рабийгъатны къозлар заманы жетгенде къарынында эгизле бар эдиле. 25Биринчиси къызыл болуп чыкъгъанды. Аны битеу санлары тюклю кийимге ушагъанындан анга Эсау#25:25 Эсау атны магъанасы – «тюклю». атагъандыла. 26Сора аны къарындашы, къолу бла Эсауну табанындан тутуп чыкъгъанды. Ол себепден анга Якъуп#25:26 Якъуп атны магъанасы – «табан тутуучу», «хыйлачы». аталгъанды. Ала туугъан заманда, Исхакъ алтмыш жыллыкъ эди.

Эсау тюнгюч эркинлигин сатады

27Сабийле ёсюп уллу болгъандыла. Эсау уучулукъда уста адам, аулакъланы сюйюучю болгъанды. Якъубʼа дайым чатырлада жашаучу жууаш адам болгъанды. 28Исхакъ Эсауну сюйюучю эди, нек дегенде, ол келтириучю кийик эт Исхакъны кёлюне жарай эди. Рабийгъат а Якъупну сюйюучю эди.

29Бир кюн Якъуп шорпа биширгенди, Эсау а аулакъдан ач болуп келгенди. 30Эсау Якъупха:

– Тилейме, бу къызыл шорпадан манга ашат, мен ачдан ёлеме, – дегенди. Аны ючюн анга Эдом#25:30 Эдом атны магъанасы – «къызыл». деген чам ат берилгенди.

31Якъубʼа анга:

Алгъа тюнгюч эркинлигинги манга сат, – дегенди.

32Эсау а:

– Ма, мен ёле турама. Тюнгюч эркинликден манга не файда? – дегенди.

33Якъуп анга:

– Алгъа манга ант эт, – дегенди.

Эсау ант этип, кесини тюнгюч эркинлигин Якъупха сатып къойгъанды. 34Сора Якъуп Эсаугъа ётмек да, къудору шорпа да бергенди. Эсау ашагъанды, ичгенди, сора туруп, кетгенди. Алай бла тюнгюч эркинлигин сан этмей къойгъанды.

Currently Selected:

Жаратылыу 25: МалкъСК

Highlight

Copy