Жаратылыу 23

Ибрахим Сараны асырар ючюн жер сатып алады

1Сара 127 жети жыл жашагъанды; аны ёмюрю аллай бир эди. 2Ол Кенанны жеринде, Кирият-Арбада, алай демеклик Хебронда ёлгенди. Ибрахим Сараны ёлюгюню къатына барып, аны жиляуун этгенди.

3Сора Ибрахим ёлюгюню къатындан туруп, хетлиле бла сёлешип:

4– Мен сизде тыш адамма эм кёчгюнчюме. Мен ёлгеними чыгъарып асырар ючюн, арагъызда манга энчи къабыр орун беригиз, – дегенди.

5Хетлиле Ибрахимге жууап берип:

6– Жюйюсханыбыз, бизге тынгыла, – дегендиле. – Сен арабызда кючлю бийсе. Ёлгенинги къабыр орунларыбызны эм игисинде асыра. Ёлгенинги асырар ючюн къабыр орун берирге бизден бирибиз да санга угъай дерик тюйюлдю.

7Ибрахим ёрге туруп, ол жерни халкъына, хетлилеге баш ургъанды 8эмда:

– Мен ёлген адамымы сизни жеригизде асырарыма ыразы эсегиз, манга тынгылагъыз, Цохарны жашы Эфрондан мени ючюн тилегиз. 9Ол аны сабаныны къыйырында Махпела дорбунну манга энчи къабыр оруннга берсин, сизни аллыгъызда аны манга иги багъагъа сатып берсин, – дегенди.

10Эфрон а хетлилени арасында олтуруп эди. Хитли Эфрон, кеси шахарыны къабакълары бла кириучю хитлилени бары да эшитирча, Ибрахимге жууапха:

11– Угъай, жюйюсханым, манга тынгыла, – дегенди. – Мен санга сабанны да, анда болгъан дорбунну да хакъсыз береме. Халкъымы адамларыны аллында аны санга хакъсыз береме, асыра ёлгенинги.

12Ибрахим ол жерни халкъыны аллында баш ургъанды 13эм бары да эшитирча, Эфроннга:

– Айтханыма ыразы эсенг, сабанны багъасын мен тёлейме. Ахчаны ал да, сора мен ёлгеними анда асырайым, – дегенди.

14Эфрон Ибрахимге жууапха:

15– Жюйюсханым! Манга тынгыла, – дегенди. – Жерни багъасы 400 шекел кюмюшдю. Манга бла санга ол неди? Асыра ёлгенинги.

16Ибрахим Эфронну айтханына ыразылыкъ бергенди да, Эфрон хетлилени алларында айтханыча, саудюгерчиледе жюрюген ахчадан анга 400 шекел кюмюш чегип бергенди.

17Алай бла Эфронну Мамреге жууукъ болгъан Махпеладагъы сабаны, тёгерегиндеги битеу тереклери эмда сабанда болгъан дорбуну бла бирге, 18шахарны къабакъларына жыйылыучу битеу хетлилени кёз алларында, Ибрахимни мюлк жери болуп къалгъанды. 19Андан сора Ибрахим къатыны Сараны Кенанны жеринде, Мамреге – алай демеклик Хеброннга – жууукъ болгъан Махпеланы сабаныны дорбунунда асырагъанды. 20Хетлиле сабанны да, анда болгъан дорбунну да Ибрахимни энчи къабыр оруну деп бегитгендиле.

Currently Selected:

Жаратылыу 23: МалкъСК

Highlight

Copy