Жаратылыу 16

Хажар бла Исмаил

1Ибрамны къатыны Сарай анга сабий тапмай эди. Сарайны Хажар атлы бир мисирли къарауашы бар эди да, 2Сарай Ибрамгъа:

– Ма, Раббий манга сабий бермеди. Тилейме, мени къарауашыма бар. Андан манга сабий болур эсе уа, – дегенди.

Ибрам Сарайны сёзюне тынгылагъанды. 3Алай бла, Ибрам Кенанны жеринде тургъанлы он жыл озгъандан сора, къатыны Сарай мисирли къарауашы Хажарны алып, ёз эри Ибрамгъа къатыннга бергенди. 4Ибрам Хажарны сынагъанды, Хажар да бууаз болгъанды. Хажарны ауурлугъу болгъанын кёргенинде уа ёз бийчесин сансыз этип башлагъанды.

5Сора Сарай Ибрамгъа:

– Мени инжилиуюмде терс сенсе. Мен къарауашымы сени къоюнунга бергенме. Ол а бууаз болгъанын кёргенинде, мени сансыз этип башлагъанды. Мени бла сени арабызда Раббий хукму#16:5 Хукму – оноу, бегим. этсин! – дегенди.

6– Ма, къарауашынг сени къолунгдады, – дегенди Ибрам Сарайгъа. – Анга не сюйсенг да эт.

Алай бла Сарай Хажаргъа зулму этип башлагъанды да, Хажар андан къачып кетгенди.

7Раббийни мёлеги аны къуу жерде, бир шаудан къатында тапханды. Ол шаудан Шургъа баргъан жолну жанында эди.

8Ол анга:

– Сарайны къарауашы Хажар, сен къайдан келгенсе, къайры бараса? – деп соргъанды.

– Мен бийчем Сарайдан къачып барама, – дегенди Хажар.

9Сора Раббийни мёлеги анга:

– Бийченге къайт да, анга бойсуннган эт, – дегенди.

10Эм дагъыда:

– Сени туудукъларынгы мен бек кёбейтирикме, ала асыры кёпден, аланы санап санаялмазча боллукъдула, – деп къошханды Раббийни мёлеги.

11Дагъыда Раббийни мёлеги анга былай айтханды:

– Ма, сен бууазса,

улан да табарыкъса.

Аны атына Исмаил#16:11 Исмаил атны магъанасы – «Аллах эшитир». атарыкъса,

нек десенг, Раббий инжилгенинги эшитгенди.

12Жашынг кийик эшек кибик азат адам боллукъду.

Ол барысы бла къол тутуп жашарыкъды,

барысы да аны бла къол тутуп жашарыкъдыла.

Ол битеу къарындашларыны

жанында энчи жашарыкъды.

13Сора Хажар: «Мен кертиси бла былайда мени Кёрюучюню кёрдюм!» – деп, аны бла сёлешген Раббийге Эл-Рои – «мени кёрюучю Аллах» – деген ат бергенди. 14Ол себепден Кадеш бла Бередни арасында жерлешген ол къуюгъа «Беэр-Лахай-Рои#16:14 Беэр-Лахай-Рои деген атны магъанасы – «Ёмюрге Жашагъанны эм мени Кёргенни къуюсу».» деп аталгъанды. 15Хажар Ибрамгъа улан тапханды. Ибрам да Хажардан туугъан уланына Исмаил атагъанды.

16Хажар Ибрамгъа Исмаилны тапхан заманда, Ибрам 86 жыллыкъ эди.

Currently Selected:

Жаратылыу 16: МалкъСК

Highlight

Copy